1. Kiko nos tin ku hasi si nos ke bira un kristian madurá?

 NOS ta keda asombrá ora nos mira kon lihé un mucha ta krese bira un adulto. Anto tur esei ta sosodé kasi sin niun esfuerso. Pero esei sí no ta e kaso ora nos ke bira un kristian madurá. b (1 Kor. 13:11; Heb. 6:1) Pa nos por logra esei, nos mester tin un amistat hopi será ku Yehova. Ademas, nos mester di yudansa di su spiritu santu pa nos sigui traha riba kualidatnan ku ta agradá Yehova, siña hasi kosnan ku lo yuda nos den bida i prepará pa responsabilidatnan den futuro.—Pro. 1:5.

2. Kiko nos a komprondé for di Génesis 1:​27, i kiko nos lo studia den e artíkulo akí?

² Yehova a krea hende hòmber i hende muhé. (Lesa Génesis 1:27.) Ta bisto ku nan dos no tin mesun kurpa, pero no ta esei so ta diferente. Por ehèmpel, Yehova a duna hende hòmber i hende muhé responsabilidatnan diferente. Pa nan por kumpli ku eseinan, kada un mester tin sierto kualidat i siña kosnan práktiko. (Gén. 2:18) Den e artíkulo akí, nos lo mira loke nos hobensitanan por hasi pa bira kristian madurá. Anto den e siguiente, nos lo wak loke nos hobensitonan por hasi pa logra meskos.

3-4. Unda ruman muhé hóben por haña bon ehèmpel? (Wak e plachi.)

³ Beibel ta papia di hopi hende muhé ku a stima Yehova i a sirbié. (Subi riba jw.org i buska e artíkulo “Hende  Muhé den Beibel—Kiko Nos Por Siña for di Nan?”) Nan tabatin e mesun kualidatnan ku nos teksto sentral ta menshoná. Nan tabata “moderá den nan kustumbernan” i “fiel den tur kos.” Pero, den bo kongregashon tambe tin ruman muhénan madurá ku bo por siña hopi for di nan.

⁴ Bo konosé algun ruman muhé ku lo bo ke imitá? Opservá nan bunita kualidatnan. Kaba, pensa kon abo por mustra e mesun kualidatnan ei. Den e siguiente paragrafnan, nos lo papia di tres kualidat ku ta masha importante pa tur ruman muhé madurá tin.

5. Kon humildat ta yuda un ruman muhé madurá?

⁵ Humildat ta yuda nos bira un bon kristian. Un hende muhé humilde tin un bon amistat ku Yehova i ku otro hende. (Sant. 4:6) Por ehèmpel, un hende muhé ku ta stima Yehova i ta humilde lo no tin problema pa aseptá ku hende hòmber a haña e responsabilidat pa guia kongregashon i pa guia famia. c—1 Kor. 11:3.

6. Kiko ruman muhé hóben por siña for di Rebeka?

⁶ Pensa un ratu riba Rebeka. E tabata un muhé sabí i desididu ku tabata sa ki ora i kon pa aktua. (Gén. 24:58; 27:​5-17) Sinembargo, e tabatin masha rèspèt i tabata dispuesto pa sigui guia. (Gén. 24:​17, 18, 65) Si bo ta humilde meskos ku Rebeka i ta apoyá esnan ku Yehova a duna e responsabilidat pa guia, lo bo ta un bon influensia pa tur hende den bo famia i den bo kongregashon.

7. Kon ruman muhé hóben por mustra modestia meskos ku Èster?

⁷ Modestia ta un otro kualidat ku tur kristian mester tin. Beibel ta bisa ku “sabiduria ta kompañero di un persona modesto.” (Pro. 11:2) Èster tabata un fiel  sirbidó di Dios ku a mustra e kualidat ei. Por ehèmpel, e no a bira orguyoso ora el a bira reina. Tambe, el a skucha i sigui konseho di su primu Mardokeo, ku tabatin mas edat kuné. (Èst. 2:​10, 20, 22) Ora bo ta pidi konseho i ta apliká nan, bo ta mustra ku bo ta modesto meskos ku Èster.—Tito 2:​3-5.

8. Segun 1 Timoteo 2:9 i 10, kon modestia por yuda un ruman muhé ora di skohe kiko pa bisti i kon pa kuida su aparensia?

⁸ Èster a mustra modestia den un otro manera mas. E tabata “bunita, ku nèchi kurpa”; pero e no a purba di hala atenshon na esei. (Èst. 2:​7, 15) Kon loke Èster a hasi ei por yuda bo? Pensa riba e palabranan na 1 Timoteo 2:9 i 10. (Les’é.) Aki Apòstel Pablo ta bisa ruman muhénan pa bisti ku modestia i sano huisio, esta, na un manera ku ta mustra rèspèt pa Dios. E palabranan griego ku Pablo a usa ta mustra ku un hende muhé semper mester bisti na un manera desente i ku e mester tene kuenta kon otro hende ta sinti òf pensa tokante loke e ta bisti. Nos ta orguyoso di nos ruman muhénan ku ta mustra na nan manera di bisti ku nan ta madurá.

9. Kiko nos por siña for di Abigail?

⁹ Disernimentu tambe ta un otro kualidat ku tur ruman muhé mester tin pa bira un kristian madurá. Pero kiko ta disernimentu? Esei ta e abilidat di sa loke ta bon i loke ta malu, i djei skohe pa hasi loke ta korekto. Bo ta kòrda Abigail? Su esposo a tuma un mal desishon ku lo tabata masha desastroso pa tur hende den su kas. Ora Abigail a tende di loke a pasa, mesora el a tuma akshon. Debí ku el a komprondé kiko tabata e kos korekto pa hasi, el a salba bida. (1 Sam. 25:​14-23, 32-35) Disernimentu tambe ta yuda nos sa ki ora pa papia i ki ora pa keda ketu. Ademas, e ta yuda nos mustra interes den otro hende sin laga nan sinti nan inkómodo.—1 Tes. 4:11.

10-11. Dikon ta bon pa bo siña lesa i skirbi bon, i kon esei lo yuda otro hende? (Wak e plachi.)

¹⁰ Ta bon pa ruman muhénan siña kosnan práktiko. Algun di e kosnan ku bo ta siña for di chikitu lo ta útil pa restu di bo bida. Ban wak kiko algun di nan ta.

¹¹ Siña lesa i skirbi bon. Algun kultura ta haña ku no ta importante pa hende muhé siña lesa ni skirbi. Pero ta bon i importante pa tur kristian, tantu hòmber komo muhé, siña lesa i skirbi. d (1 Tim.  4:13) Pues, no laga nada stroba bo di siña lesa i skirbi bon. Dikon? Pasobra asina ei lo ta mas fásil pa bo haña i keda ku un trabou. Ademas, lo bo studia Beibel mihó i por yuda otro hende komprond’é. Anto mas importante ainda, ora bo lesa Beibel i meditá riba loke bo ta lesa, lo bo bira mas será ku Yehova.—Hos. 1:8; 1 Tim. 4:15.

12. Kiko bo ta siña for di Proverbionan 31:26?

¹² Siña komuniká bon. Ta importante pa tur kristian hasi esei. Disipel Santiago ta duna nos e bunita konseho akí: “Tur hende mester ta kla pa skucha [i] slo pa papia.” (Sant. 1:19) Bo ta ‘mustra ku bo tin sintimentu’ pa otro hende ora bo ta skucha nan ku pasenshi. (1 Ped. 3:8) Si bo no sa sigur ku bo a komprondé loke un hende ta bisa òf kon e ta sinti, puntr’é ku takto si e por splika bo mas mihó. Kaba, pensa bon promé ku bo papia. (Pro. 15:​28, nota) Puntra bo mes: ‘Loke mi ta bai bisa ta bèrdat, animante, amabel i respetuoso?’ Bo por siña for di ruman muhénan madurá ku ta skucha ku atenshon i ta papia amabel. (Lesa Proverbionan 31:26.) Paga tinu ki nan ta bisa i kon nan ta bis’é. Ora bo siña komuniká bon, lo ta mas fásil pa bo sera amistat.

13. Kon bo por siña hasi trabou di kas? (Wak e plachi.)

¹³ Siña hasi trabou di kas. Den hopi pais, hende muhé ta esnan ku ta hasi mayoria di trabou di kas. Kisas bo mama òf un ruman muhé por siña bo kon pa hasi nan. Un ruman ku yama Cindy a bisa: “Un di e kosnan ku mi mama a siña mi ku mas mi ta apresiá ta ku trabou duru no ta mata, al kontrario bo ta sinti bo kontentu ku bo mes. Siña kushiná, limpia kas, kose i hasi kompra a hasi mi bida mas fásil i a laga ku mi por a hasi mas pa Yehova. Mama a siña mi tambe pa ta hospitalario i danki na esei m’a konosé hopi ruman ku mi por a siña for di nan.” (Pro. 31:​15, 21, 22) Un hende muhé ku ta trahadó, ku ta hospitalario i sa kon pa mantené un kas ta un bendishon pa tur hende den su famia i den su kongregashon.—Pro. 31:​13, 17, 27; Echo. 16:15.

14. Kiko bo ta siña for di Crystal, i kiko bo tin ku tene na mente?

¹⁴ Siña para riba bo pia. Ta importante pa tur kristian madurá siña esei. (Flp. 4:11; 2 Tes. 3:​7, 8) Un ruman ku yama Crystal a bisa: “Tempu mi tabata bai skol, mi mayornan a yuda mi skohe materianan práktiko. Mi tata a animá mi pa siña boekhouden, kual a yuda mi hopi.” Fuera di siña kon pa gana bo pan di kada dia, purba di siña kon pa traha un budget i pega na dje. (Pro. 31:​16, 18) Ora bo evitá  di hasi debe innesesario i keda kontentu ku e kosnan ku bo tin, lo bo ta liber pa hasi mas pa Yehova.—1 Tim. 6:8.

15-16. Dikon ruman muhénan soltero ta balioso? (Marko 10:​29, 30)

¹⁵ Ora bo sigui traha riba e kualidatnan ku ta agradá Yehova i siña kosnan práktiko, lo bo ta mihó prepará pa responsabilidatnan den futuro. Ban wak algun di nan.

¹⁶ Bo por skohe pa keda soltero pa un tempu. Manera Hesus a bisa, algun hende muhé ta skohe pa no kasa, asta si esei no ta normal den nan kultura. (Mat. 19:​10-12) Otro kisas ta keda soltero pa diferente motibu. Ta bon pa bo keda kòrda ku Yehova i Hesus no ta pensa ku bo tin ménos balor pasó bo no ta kasá. Rònt mundu, ruman muhénan soltero ta un bendishon pa e kongregashon. Komo ku nan ta stima i ta interesá pa nan rumannan, nan ta bira mané ruman muhé i mama pa nan rumannan den kongregashon.—Lesa Marko 10:​29, 30; 1 Tim. 5:2.

17. Kiko un ruman muhé hóben por kuminsá hasi pa prepará pa sirbishi di tempu kompleto?

¹⁷ Bo por skohe pa drenta sirbishi di tempu kompleto. Mundialmente, ruman muhénan ta hasi gran parti di e trabou di prediká. (Sal. 68:11) Bo a pensa kaba riba tur e maneranan ku bo por traha fultaim pa Yehova? Bo por bira pionero, boluntario den konstrukshon òf bètelita. Papia ku Yehova tokante bo meta. Kòmbersá ku rumannan ku a logra e tipo di metanan ei. Asina ei, bo por haña sa kiko bo tin ku hasi pa drenta sirbishi di tempu kompleto. Djei, traha un plan ku lo yuda bo logra bo meta. Sea sigur ku ora bo logra bo meta, yen di porta lo habri ku lo yuda bo hasi mas pa Yehova.

18. Dikon un ruman muhé mester wak bon ku ken e ke kasa? (Wak e plachi.)

¹⁸ Bo por disidí di kasa. E kualidatnan i kosnan ku nos a trata te ku awor lo yuda bo bira un bon esposa. Klaru ku bo tin ku wak masha bon ku ken bo ke kasa. Skohementu di un kasá ta un di e desishonnan di mas importante ku lo bo tuma. Kòrda, ta abo ta skohe ken lo bira bo kabes. (Rom. 7:2; Efe. 5:​23, 33) P’esei puntra  bo mes: ‘E ta un kristian madurá? E ta pone Yehova na promé lugá den su bida? E ta tuma bon desishon? E ta rekonosé su fayonan? E ta respetá hende muhé? Lo e por yuda mi keda ku mi amistat será ku Yehova? Lo e por pèrkurá pa mi i ta un bon amigu pa mi? E ta responsabel? Por ehèmpel, e ta kumpli ku e trabou- i asignashonnan ku e ta haña den kongregashon?’ (Luk. 16:10; 1 Tim. 5:8) Klaru ku si bo ke un bon esposo, abo tambe mester kuminsá prepará pa bira un bon esposa.

19. Dikon un esposa por sinti felis ku e ta “un ayudante”?

¹⁹ Beibel ta bisa ku un bon esposa ta “un ayudante” pa su esposo i “ta pas kuné.” (Gén. 2:18) Esei ke men ku un esposa tin ménos balor? Nò! E tarea di un ayudante ta masha importante. De echo, vários biaha Beibel ta deskribí Yehova komo un “ayudante.” (Sal. 54:4; Heb. 13:6) Un esposa ta un berdadero yudansa pa su esposo ora e ta apoy’é. Por ehèmpel, ora e esposo tuma desishon pa e famia, e esposa ta kooperá kuné pa asina e desishon tin éksito. Anto komo ku e ta stima Yehova, e ta hasi esfuerso pa yuda otro hende mira e bon kualidatnan di su esposo. (Pro. 31:​11, 12; 1 Tim. 3:11) Si bo traha riba bo amistat ku Yehova, yuda na kas i den kongregashon, lo bo ta mihó prepará pa ta un bon esposa si bo disidí di kasa.

20. Ki influensia un mama tin?

²⁰ Bo por haña yu. Si bo kasa, e chèns t’ei ku abo i bo kasá por bira mayor. (Sal. 127:3) P’esei ta bon pa bo pensa kiko ta enserá ta un bon mama. E kualidatnan i otro kosnan ku nos a trata den e artíkulo akí lo yuda bo ku esei. Si bo ta amoroso, amabel i tin pasenshi, lo bo tin un famia felis i bo yunan lo sinti nan stimá i safe.—Pro. 24:3.

21. Ki bo ta pensa di nos ruman muhénan, i dikon? (Wak plachi riba portada.)

²¹ Nos ruman hobensitanan, nos stima boso pa tur loke boso ta hasi pa Yehova i su pueblo. (Heb. 6:10) Boso ta hasi esfuerso pa traha riba kualidatnan ku ta agradá Yehova i pa siña kosnan práktiko ku lo hasi boso bida i bida di esnan rònt di boso mas agradabel. Ademas, boso ta hasi esfuerso pa prepará pa bo futuro. Nunka lubidá, boso ta hopi presioso pa Yehova su organisashon!