1. Kon un ruman hòmber por tin éksito den bida?

 APÒSTEL Pablo a bisa e kristiannan na Korinto: “Rumannan, no bira manera mucha den boso forma di pensa. Sea . . . madurá den boso forma di pensa.” (1 Kor. 14:20) E konseho ei ta konta pa tur ruman hòmber awe. Pa nan tin éksito den bida, nan mester sa kon pa obedesé Dios su leinan i tambe kon pa apliká prinsipio bíbliko. (Luk. 2:52) Ta hopi importante pa nos ruman hobensitonan bira kristian madurá. Ban wak dikon.

2-3. Dikon ta importante pa un ruman hòmber yòn bira un kristian madurá?

² Ruman hòmber tin hopi responsabilidat importante den famia i den kongregashon. Komo un ruman hóben, sigur lo bo a pensa riba e responsabilidatnan ku bo por tin den futuro. Kisas bo ta pensa riba prediká fultaim, bira sirbidó ministerial i kisas despues ansiano? Òf por ta bo ke kasa tambe i tin yu? (Efe. 6:4; 1 Tim. 3:1) Pa logra e metanan ei i tin éksito, bo mester ta un kristian madurá. b

³ Pa bo bira un kristian madurá, tin algun kos importante ku bo mester siña i bira bon den dje. Pero, ban wak kon bo por prepará for di awor pa bo por tin éksito den futuro.

4. Unda bo por haña bon ehèmpel pa imitá? (Wak e plachi.)

⁴ Skohe bon ehèmpel. Beibel tin diferente relato di hende  hòmber ku bo por imitá. Nan tabata stima Dios i a kuida su pueblo na diferente manera. Bo por haña bon ehèmpel tambe den bo famia i den bo kongregashon. (Heb. 13:7) Anto, bo tin e ehèmpel perfekto di Hesukristu. (1 Ped. 2:21) Segun ku bo ta analisá e ehèmpelnan ei, pensa riba e kualidatnan ku bo ta atmirá di kada un. (Heb. 12:​1, 2) Djei, pensa riba loke abo tin ku hasi pa imitá nan den esei.

5. Kon bo por siña usa bo mente, i dikon esei ta asina importante? (Salmo 119:9)

⁵ Siña usa “bo mente.” (Pro. 3:21) Esei lo yuda bo pensa bon promé ku bo aktua. Dikon ta importante pa bo siña esei? Pasobra mundu ta yen di hóben ku ta hasi loke nan ta pensa òf sinti ku ta bon. (Pro. 7:7; 29:11) Fuera di esei, televishon, pelíkula, Internet i medionan sosial por influensiá bo. Pero kon bo por siña usa bo mente? For di Beibel, kuminsá siña kiko Yehova ta pensa i sinti tokante sierto kos i despues wak dikon ta bon pa bo hasi loke Yehova ke. Djei, usa loke bo a siña pa yuda bo tuma desishonnan ku ta agradá Yehova. (Lesa Salmo 119:9.) Si bo siña hasi tur eseinan bo ta riba kaminda pa bira un kristian madurá. (Pro. 2:​11, 12; Heb. 5:14) Ban wak kon siña usa bo mente por yuda bo den (1) e manera ku bo ta trata ruman muhénan i (2) e manera ku bo ta bisti i kuida bo aparensia.

6. Kon un ruman hóben ku siña usa su mente lo trata ruman muhé?

⁶ Ora bo siña pensa manera Yehova ta pensa, lo bo respetá hende muhé. No tin nada malu ku un ruman hóben ta interesá den un ruman muhé i ke konosé mihó. Pero awor, un ruman hóben ku a siña usa su mente lo no skirbi, bisa ni hasi nada ku lo laga e ruman muhé pensa ku e tin interes den dje a ménos ku e tin berdadero intenshon di kasa ku e ruman muhé ei. (1 Tim. 5:​1, 2) Òf si e ta bezig ta konosé un ruman muhé, lo e hasi esfuerso pa nunka nan ta sin shaperon. Asina ei lo e protehá e bon reputashon di e ruman muhé.—1 Kor. 6:18.

7. Ora un ruman ta pensa manera Yehova ta pensa, kon esei lo afektá su desishonnan tokante loke e ta bisti i kon e ta kuida su aparensia?

 ⁷ E manera ku un ruman hòmber hóben ta bisti i kuida su aparensia tambe lo demostrá si e ta pensa manera Yehova ta pensa. Hopi di e hendenan ku ta diseñá paña òf bin ku stail nobo no ta sirbi Yehova i ta hiba un bida inmoral. P’esei e pañanan ku nan ta diseñá ta pega i saka forma di kurpa òf ta laga un hòmber parse un muhé. Pero, un ruman hòmber hóben ku ta hasi esfuerso pa bira un kristian madurá lo tene kuenta ku loke ta agradá Yehova i ku e bon ehèmpelnan den kongregashon. Por ehèmpel, e por puntra su mes: ‘Mi eskohonan ta mustra ku mi no ta djis skohe loke ta na moda òf popular i ku mi ta tene konsiderashon ku otro hende? Ta fásil pa otro hende mira na mi manera di bisti ku mi ta un sirbidó di Dios?’ (1 Kor. 10:​31-33; Tito 2:6) Ruman hòmber hóbennan ku siña usa nan mente lo gana rèspèt di tantu nan Tata den shelu komo di nan rumannan den kongregashon.

8. Kon un ruman hòmber por bira konfiabel?

⁸ Sea un hende konfiabel. Esei ta enserá tuma tur responsabilidat ku bo haña na serio. (Luk. 16:10) Hesus tabata un ehèmpel perfekto di esei. Nunka e tabata hasi kos kon ku ta òf na un manera iresponsabel. Al kontrario, semper el a hasi tur loke Yehova a pidié, asta ora esei no tabata fásil. E tabata stima hende, foral su disipelnan, i tabata dispuesto pa asta muri pa nan. (Huan 13:1) Meskos ku Hesus, hasi bo esfuerso pa kumpli ku kualke asignashon ku bo haña. Anto si bo no sa kon pa hasi algu, humildemente pidi un ruman hòmber madurá pa yuda bo. No djis hasi nèt loke nan pidi bo ma mustra interes den loke bo ta hasi. (Rom. 12:11) Hasi esfuerso pa kumpli ku tur bo asignashonnan pasó bo ta hasié “pa Yehova, i no pa hende.” (Kol. 3:23) Klaru ku bo no ta perfekto, pues sea modesto i atmití kualke fout ku bo hasi.—Pro. 11:2.

9. Dikon un ruman hòmber mester siña kosnan ku ta útil pa bida?

⁹ Pa bira un kristian madurá, bo tin ku siña sierto kos práktiko. Nan lo yuda bo kumpli ku bo responsabilidatnan den kongregashon. Tambe, nan lo yuda bo haña i keda ku un trabou ku lo yuda bo pèrkurá pa bo mes òf pa bo famia i bai bon ku hende. Ban trata algun di nan.

10-11. Dikon ta bon pa un ruman hòmber siña kon pa lesa i skirbi bon? (Salmo 1:​1-3) (Wak e plachi.)

¹⁰ Siña lesa i skirbi bon. Beibel ta bisa ku un hende lo ta felis i lo tin éksito si tur dia e tuma tempu pa lesa i meditá riba  Dios su Palabra. (Lesa Salmo 1:​1-3.) Esei lo yud’é komprondé Yehova su manera di mira kos mihó, loke na su turno lo yud’é apliká konsehonan di Beibel den su bida. (Pro. 1:​3, 4) Den kongregashon nos mester di ruman hòmbernan ku ta asina. Ban wak dikon.

¹¹ E kongregashon tin mester di ruman hòmbernan ku por siña e kongregashon i duna konseho for di Beibel. (Tito 1:9) Si bo por lesa i skirbi bon, lo bo por prepará diskurso i komentario ku ta fortalesé fe di bo rumannan. Ademas, ora bo ta hasi estudio personal, skucha diskurso na reunion, asamblea i kongreso lo bo por skirbi e kosnan ku bo a haña interesante. E notanan ei lo yuda bo pa fortalesé bo fe i pa animá otro ruman.

12. Kiko por yuda bo komuniká bon?

¹² Siña komuniká bon. Ta masha importante pa tur ruman hòmber siña esaki. E ta enserá skucha e otro persona i komprondé loke e ta pensa i sinti. (Pro. 20:5) Bo por siña kapta loke e persona ke bisa bo na su tono di bos, ekspreshon di kara, gestonan i postura. Pero si bo úniko forma di komuniká ta elektrónikamente, por ehèmpel, e-mail i mensahe, e ora ei lo bira mas difísil pa bo komuniká ku hende en persona. P’esei, ta importante pa krea oportunidat pa pasa tempu ku hende i kòmbersá ku nan kara kara.—2 Huan 12.

13. Kiko mas un ruman hòmber yòn tin ku siña hasi? (1 Timoteo 5:8) (Wak e plachi.)

¹³ Siña para riba bo pia. Un ruman hòmber madurá mester pèrkurá pa su mes i su famia. (Lesa 1 Timoteo 5:8.) Den algun pais, ruman hòmbernan hóben ta siña un fishi òf un trabou for di nan tata òf un otro famia. Den otro pais, un hóben tin ku bai un skol sekundario pa siña un fishi òf otro tipo di trabou. Sea kual sea ta bo kaso, ta bon pa bo siña hasi algu ku lo yuda bo haña un trabou. (Echo. 18:​2, 3; 20:34; Efe. 4:28) Si bo traha duru i kaba ku bo tareanan, hende lo ripará ku bo ta un bon trahadó i ku bo no ta laga kos na mitar. Esei lo oumentá bo chèns di haña i keda ku un trabou. Ora un ruman hòmber hóben siña e kosnan ku nos a trata den e artíkulo akí, lo e ta mihó prepará pa responsabilidatnan den futuro. Ban wak algun di nan.

14. Kon un ruman hòmber yòn por prepará pa drenta sirbishi di tempu kompleto?

¹⁴ Sirbishi di tempu kompleto. Hopi ruman hòmber madurá a kuminsá traha fultaim pa Yehova for di tempu ku nan tabata yòn. E trabou di pionero ta yuda un ruman hòmber hóben siña kon pa trata ku tur sorto di hende. Tambe e ta siña kon pa manehá plaka i no gasta mas ku e ta gana. (Flp. 4:​11-13) Un bon manera pa kuminsá den e trabou di pionero ta di kuminsá traha pionero ousiliar. Hopi ruman ta hasi esei pa un tempu pa asina nan kustumbrá ku e trabou promé ku nan kuminsá traha pionero regular. Anto, unabes bo ta pionero regular, esei por habri porta pa otro trabounan den tempu kompleto, manera traha den konstrukshon òf na Bètel.

15-16. Kon un ruman hóben por bira un sirbidó ministerial òf ansiano?

¹⁵ Sirbidó ministerial òf ansiano. Beibel ta bisa ku si un ruman hòmber ta hasi esfuerso pa bira ansiano, e “ta deseá un trabou ekselente.” (1 Tim. 3:1) Pero promé ku e bira ansiano, e mester kualifiká pa bira sirbidó ministerial. Sirbidó ministerial ta yuda ansianonan kuida e kongregashon. Tantu ansiano komo sirbidó ministerial ta hasi esfuerso pa prediká ku entusiasmo den sirbishi huntu ku e otro rumannan. Un ruman hóben por kualifiká pa bira sirbidó ministerial fo’i su 17 aña. Anto si e sigui krese den su amistat ku Yehova, e por kualifiká pa bira un ansiano fo’i su 20 aña kaba.

¹⁶ Kiko bo tin ku hasi pa bira sirbidó ministerial i despues ansiano? Beibel ta menshoná e kualidatnan ku bo mester tin. Nan tur tin di haber ku amor: amor pa Yehova, pa bo famia i pa e kongregashon. (1 Tim. 3:​1-13; Tito 1:​6-9; 1 Ped. 5:​2, 3) Hasi bo esfuerso pa komprondé kiko kada kualidat ta enserá i pidi Yehova yuda bo mustra nan. c

17. Kon un ruman hóben por prepará pa bira un esposo i un kabes di famia? (Wak e plachi.)

¹⁷ Esposo i kabes di famia. Algun ruman hòmber madurá ta skohe pa keda soltero. (Mat. 19:12) Pero si bo disidí di kasa, lo bo tin e responsabilidat di esposo i kabes di famia. (1 Kor. 11:3) Un bon esposo stima su kasá i ta kuid’é den sentido físiko, emoshonal i spiritual. (Efe.  5:​28, 29) Loke ku por yuda bo ku esei ta e kosnan ku nos a siña den e artíkulo akí manera siña usa bo mente, respetá hende muhé i sea konfiabel. Asina ei, lo bo ta prepará pa ta un esposo i kabes di famia.

18. Kon un ruman hóben por prepará pa bira tata?

¹⁸ Bo por tin yu. Si bo kasa, e chèns t’ei ku bo por bira tata i sigur bo ke ta un bon tata. Awèl tin hopi kos ku bo por siña for di Yehova. Ban wak algun di nan. (Efe. 6:4) Yehova no tabatin bèrgwensa pa bisa su Yu, Hesus, ku e tabata stim’é i ku e ta kontentu kuné. (Mat. 3:17) Si bo bira tata, hasi sigur ku regularmente bo ta bisa bo yunan ku bo ta stima nan. Elogiá nan pa e bon kosnan ku nan ta hasi. Un tata ku ta sigui Yehova su ehèmpel, lo yuda su yunan bira kristiannan madurá. P’esei for di awor, siña laga bo famia i e kongregashon sinti kuantu bo ta stima i apresiá nan. (Huan 15:9) Asina ei lo bo ta mihó prepará pa kumpli ku e futuro responsabilidat di esposo i tata. Mientrastantu, e preparashon ei lo hasi bo hopi balioso pa Yehova i un gran yudansa pa bo famia i kongregashon.

19-20. Kon un ruman hòmber yòn por bira un kristian madurá? (Wak plachi riba portada.)

¹⁹ Hobensito, no ta outomátikamente bo ta bira un kristian madurá. Bo tin ku skohe bon ehèmpel, siña usa bo mente, sea konfiabel, siña kosnan práktiko i prepará pa futuro.

²⁰ Kisas ora bo pensa riba tur e kosnan ku bo tin ku hasi i traha riba dje, bo por sinti ku nan ta muchu. Pero bo por! Kòrda ku Yehova ke yuda bo. (Isa. 41:​10, 13) Anto klaru, e rumannan den bo kongregashon tambe lo yuda bo. Ora bo hasi esfuerso pa bira e tipo di hòmber ku Yehova ke pa bo ta, lo bo haña goso den bida. Nos ta stima bo masha hopi i nos ta pidi Yehova bendishoná bo segun ku bo ta hasi esfuerso pa bira un kristian madurá.—Pro. 22:4.