YEHOVA a duna nos masha hopi regalo. Sin duda bo ta apresiá nan, i bo ta kontentu ku e ta duna bo e libertat pa skohe kuantu bo ke disfrutá di kada un di nan. Bo tabata sa ku Beibel ta bisa ku biña ta un di e regalonan ei? Eklesiástes 10:19 asta ta bisa: “Kuminda ta alegrá kurason, i biña ta hasi bida dushi.” (Sal. 104:15) Pero, kisas bo a ripará ku algun hende ta hasi mal uso di nan libertat pa bebe alkohòl. Ademas, kada pais i kada kultura tin diferente opinion tokante alkohòl. Pues, kon un kristian mester mira alkohòl?

E punto di bista ku lo yuda nos tin un bida felis ta esun di Yehova. Pues ora nos mester tuma un desishon, nos ta laga Yehova su manera di pensa guia nos i no esun di hende.

Kisas bo a ripará ku den mundu hende ta bebe hopi. Tin ta hasié pa relahá i otronan pa dil ku nan problemanan. I den sierto pais, si bo no bebe hopi, bo no ta madurá òf bo no ta hòmber.

Pero, nos komo kristian ta haña bon guia di nos Kreador. Por ehèmpel, e ta spièrta nos di e peligernan di bebementu di mas. Kisas e teksto na Proverbionan 23:​29-35 ta bini na bo mente. Ei tin un splikashon hopi detayá di un buraché i e problemanan ku e ta hañ’é kuné. a Daniel, un ansiano na Europa, ta konta kon su bida tabata promé ku el a bira ruman. El a bisa: “Mi tabata bebe mashá pisá, i esei a pone ku m’a tuma mal desishon ku te awe ta afektá mi.”

Pues, kon nos por usa nos libertat pa skohe i evitá e problemanan ku ta bini huntu ku bebementu di mas? Nos tin ku laga Yehova su manera di pensa guia nos desishon- i akshonnan.

Ban wak kiko Beibel ta bisa tokante bebementu di alkohòl, i despues nos lo mira kiko ta pone ku algun hende ta bebe.

Beibel no ta bisa ku nos no por bebe niun tiki alkohòl. Eigenlijk nos ta lesa ku bebementu di biña ta algu dushi. Eklesiástes 9:7 ta bisa: “Disfrutá di bo kuminda, i bebe bo biña ku kurason kontentu.” Ademas, Beibel ta bisa ku Hesus i otro fiel sirbidónan di Yehova tambe a bebe biña.—Mat. 26:​27-29; Luk. 7:34; 1 Tim. 5:23.

Aunke Beibel no ta prohibí alkohòl, e ta bisa bon kla: “No bebe biña bira burachi.” (Efe. 5:18) E ta asta bisa ku hende “buraché . . . lo no risibí e Reino di Dios.” (1 Kor. 6:10) Sí, Yehova ta odia tantu bebementu di mas komo buracheria. Pues, na lugá di laga bo kultura influensiá bo, laga Yehova guia bo desishonnan.

Algun hende ta bisa ku nan por bebe hopi sin bira burachi. Pero, esei ta hopi peligroso. Beibel ta bisa bon kla ku un hende “bisiá na muchu biña” por hasi algu robes i peka kontra Yehova. (Tito 2:3; Pro. 20:1) Hesus asta a atvertí ku “bebementu di mas” por stroba un hende di drenta Dios su mundu nobo. (Luk. 21:​34-36) E ora ei, kiko por yuda un kristian evitá di hañ’é ku e problemanan ku alkohòl ta bini kuné?

Ta peligroso pa laga nos kultura influensiá nos uso di alkohòl. P’esei, ora ta trata di kuminda i bibida, komo kristian nos ke hasi loke ta agradá Yehova. Beibel ta kòrda nos: “Sea ku boso ta kome, bebe òf kiko ku boso ta hasi, hasi tur kos pa e gloria di Dios.” (1 Kor. 10:31) Ban wak algun pregunta i prinsipio di Beibel ku lo yuda nos ku esei.

Mi ta bebe pa hende no hasi chèrchi di mi? Éksodo 23:2 ta bisa pa no hasi algu ‘djis pasobra mayoria di hende ta hasi esei.’ Ei, Yehova tabata atvertí e israelitanan pa no bai tras di hende ku no ta agrad’é. E spièrtamentu ei ta konta pa nos tambe. Si nos ta laga otro hende influensiá nos desishonnan tokante alkohòl, pokopoko nos por daña nos amistat ku Yehova.—Rom. 12:2.

Mi ta bebe pa hende pensa ku mi ta fuerte? Den sierto kultura, ta masha normal pa bebe frekuente i hopi. (1 Ped. 4:3) Pero ripará kiko 1 Korintionan 16:13 ta bisa: “Keda lantá, para firme den fe, tene kurashi, bira poderoso.” Awor, alkohòl por yuda un hende bira poderoso? Nò, nèt kontrali. Masha fásil e por stroba un hende di pensa kla i di tuma bon desishon. P’esei, ora un hende ta bebe hopi, na lugá di mustra kon tòf e ta, e ta mustra kon suak i bobo e ta. Isaías 28:7 ta bisa ku un hende ku ta desviá pa motibu di bibida ta zeila i no por tuma bon desishon.

Si nos ke berdadero forsa pa hasi loke ta korekto, nos tin ku pidi Yehova esei. E forsa ei ta rekerí pa nos keda lantá i para firme den fe. (Sal. 18:32) Pa logra esei nos tin ku keda leu for di kualke peliger i desishon ku por daña nos amistat ku Yehova. Hesus tabatin un amistat hopi será ku Yehova i hopi hende a atmirá su kurashi i determinashon pa hasi loke ta korekto.

Mi ta bebe pa no kòrda riba mi problemanan? Bou di inspirashon, un salmista a bisa: “Ora ku mi preokupashonnan tabata muchu pa mi, ta abo [Yehova] tabata konsolá mi i trankilisá mi.” (Sal. 94:19) Si tin algu ta preokupá bo, buska Yehova i no alkohòl.  Un di e mihó maneranan pa hasi esei ta di hasi mas orashon na Yehova. Ademas, hopi ruman a bisa ku ora nan a pidi konseho for di un amigu madurá den kongregashon, esei a yuda hopi. Bon mirá, ora un hende bebe alkohòl pa skapa di su problemanan, eigenlijk ta bira mas difísil p’e hasi loke ta korekto. (Osé. 4:11) Daniel, kende nos a menshoná anteriormente, a atmití: “Mi tabata lucha ku ansiedat i sintimentu di kulpa. Mi tabata bebe pa dil ku esei pero mi problemanan a bira mas hopi, m’a pèrdè mi amistatnan i a sinti ku mi no tabata bal nada.” Kiko a yuda Daniel? “M’a realisá ku ta Yehova mi tabatin mester i no alkohòl.” El a sigui bisa: “Ku Yehova su yudansa m’a trata ku mi problemanan i sigui padilanti.” Kòrda, no tin niun problema ku ta muchu grandi pa Yehova; semper e t’ei pa nos.—Flp. 4:​6, 7; 1 Ped. 5:7.

Si bo sa bebe alkohòl, pensa riba e siguiente preguntanan pa mira si bo tin ku hasi kualke ahuste. Puntra bo mes: ‘Mi bebementu ta preokupá un famia òf un bon amigu?’ Kisas e ta bisa bo esei pasobra bo ta desaroyando un kustumber ku bo mes no ta ripará. ‘Mi ta bebe mas ku ántes?’ Esei por sosodé ku un hende ku, aunke no ta adikto na alkohòl, ta kuminsá bai den e direkshon ei. ‘Mi no por pasa un dia òf mas sin bebe?’ Si ta asina, kisas bebementu ya a bira un hábito òf adikshon. I den kasonan asina kisas mester di yudansa profeshonal pa trata ku e adikshon.

Mirando tur e problema- i peligernan mará ku bebementu di alkohòl, algun kristian ta skohe pa no bebe alkohòl. Pero tin otro ku no ta bebe gewon pasobra nan no gusta e smak. Si un konosí di bo no ta bebe alkohòl, lo ta amabel di bo parti pa respetá su desishon i no kritik’é.

Otro hende ta mira ku ta sabí pa pone límite. Por ehèmpel, nan ta limitá e kantidat di alkohòl ku nan ta bebe. Òf, nan ta limitá  kuantu biaha pa siman nan ta bebe. Kisas nan ta bebe un biaha pa siman so òf solamente un tiki ora nan ta kome. Tambe tin hende ku a pone límite na e tipo di alkohòl ku nan ta bebe. Por ehèmpel, nan ta bebe biña òf serbes, pero nan no ta bebe bibida stèrki ni kòktel. Unabes un persona pone límitenan pa su mes, lo ta mas fásil p’e. Un kristian madurá ku tuma tipo di desishonnan asina i ke pega na nan, no mester sinti bèrgwensa di loke hende ta pensa.

Algu otro ku nos ke tene na mente ta kon otro hende ta sinti. Romanonan 14:21 ta bisa: “Ta mihó pa no kome karni ni bebe biña ni hasi nada ku ta pone bo ruman trompeká.” Kon nos por sigui e konseho ei? Mustrando amor na nos rumannan. Si nos ta mira ku nos lo por ofendé un ruman si nos bebe alkohòl, amor lo motivá nos pa no bebe durante e okashon ei. Ora nos hasi esei, nos ta mustra ku nos ta respetá i ta stima otro hende mas ku nos mes.—1 Kor. 10:24.

Ademas, gobièrnu mes por tin leinan tokante alkohòl ku un kristian lo mester obedesé. Kisas tin un edat mínimo pa bebe alkohòl òf ta prohibí pa bebe i stür òf pa bebe i traha ku sierto mashin.—Rom. 13:​1-5.

Yehova a duna nos e libertat di disfrutá di tur e regalonan ku el a duna nos. Esei ta enserá tambe skohe kiko nos ta kome i bebe. P’esei, laga nos eskohonan agradá nos Tata den shelu i asina mustr’é ku nos ta balorá e libertat ku el a duna nos.