NA KOMIENSO di añanan ’30, e predikashon di Reino na Brazil tabata bai poko poko. Pero na 1935, e pioneronan Nathaniel ku Maud Yuille a manda un karta pa Joseph F. Rutherford, kende tabata dirigí e trabou di prediká e tempu ei. Den e karta nan a bisa Ruman Rutherford ku nan tabata dispuesto pa bai yuda kaminda tabatin mester di mas yudansa.

Nathaniel tabata un ingeniero sivil, i e tempu ei, e tabatin 62 aña. E tabata direktor di sirbishi di un kongregashon di Testigunan di Yehova na San Francisco, California. Ei el a organisá e trabou di prediká i a yega di usa ekipo di zonido pa prediká e bon notisia. El a ser nombrá komo sirbidó di sukursal di Brazil, i su eksperensia i deseo di traha a resultá di ta un bendishon pa su asignashon nobo den un teritorio multilingwe.

Na 1936, Nathaniel, Maud i Antonio P. Andrade, un pionero ku a fungi komo intérprete, a yega Brazil. Nan a trese un karga di gran balor: 35 tokadisko portátil i un outo ku ekipo di zonido. Aunke Brazil ta e di sinku pais mas grandi na mundu, e tempu ei tabatin solamente 60 publikadó di Reino. Pero e ekiponan di zonido ei lo a yuda nan prediká na miónes di hende den apénas un par di aña.

Un luna despues ku famia Yuille a yega Brazil, a tene e promé kongreso di predikashon na São Paulo, Brazil. * Aparentemente, Maud tabata stür e outo i a toka e diskurso públiko ku 110 hende a skucha. E kongreso a animá e publikadónan mashá, i nan a ser motivá pa hasi mas den sirbishi. Nan a siña prediká ku literatura, karchi di  testimonio i tokadisko ku diskursonan na aleman, húngaro, ingles, polako, spañó i mas despues na portugues.

Ademas, e tres kongresonan di predikashon ku a ser tené na São Paulo, Rio de Janeiro i Curitiba na 1937 a duna un enorme empuhe na e trabou di prediká. Durante e kongresonan akí, e rumannan tabata bai prediká di kas pa kas ku e outo ku ekipo di zonido. José Maglovsky, kende e tempu ei tabata basta yòn, a skirbi despues: “Nos tabata pone literatura bíbliko na un stènt, i miéntras ku e outo ku ekipo di zonido tabata transmití grabashon di un mensahe, nos tabata papia ku hende ku tabata sali for di nan kas pa wak kiko tabata pasa.”

Boutismo tabata tuma lugá den riu miéntras ku otro hende tabata landa den bisindario. Esei tabata nèt un bon chèns pa prediká e bon notisia ku e outo ku ekipo di zonido. E diskurso di Ruman Rutherford tabata resoná for di e loutspikernan, i hende kurioso tabata bai para rònt di e outo pa skucha miéntras tabata tradusí e diskurso na portugues. Despues di e diskurso, nan tabata toka kantikanan di Reino na polako miéntras e kandidatonan pa boutismo tabata batisá. E rumannan tabata kanta na diferente idioma. E Anuario di 1938 a bisa: “Esaki a pone nos kòrda kon na Pentekòste kada persona tabata komprondé su mes idioma.”

Despues di kongreso, ku òf sin áwaseru, tur djadumingu hende den parke, áreanan residensial i fábrikanan den sentro di São Paulo i pueblonan den bisindario por a skucha e diskursonan bíbliko for di e outo ku ekipo di zonido. Un biaha pa luna, e outo ei tabata kore 97 kilometer pa toka un programa bíbliko pa e 3.000 habitantenan di un kolonia di hende ku lepra na nortost di São Paulo. Ku tempu, un kongregashon progresivo a lanta einan. Apesar di nan malesa teribel, e publikadónan di Reino ei a haña pèrmit pa bishitá otro kolonianan di hende leproso pa papia ku nan tokante e mensahe konsolador di Beibel.

Na 1938, por fin grabashon di diskursonan na portugues a yega. Riba Dia di tur Defuntu, e outo ku ekipo di zonido tabata bai na diferente sementerio i mas ku 40.000 hende ku tabata di luto por a skucha e diskursonan titulá “Unda e Mortonan Ta?,” “Yehova” i “Rikesa.”

Lidernan religioso furioso no tabata gusta e forma di prediká akí niun tiki, i hopi biaha nan tabata pone preshon riba outoridatnan lokal pa “sera boka” di e outo ku ekipo di zonido. Ruman Maud ta kòrda un okashon ora ku pastornan lokal a instigá un multitut di hende pa rondoná e outo. Pero, e alkalde i polis a yega na e sitio i a skucha henter e programa. E alkalde a asta bai ku algun literatura. E dia ei a bai sin problema. Apesar di tal oposishon, e Anuario di 1940 a bisa ku aña 1939 tabata “e mihó tempu pa sirbi e Gran Teókrata i proklamá su nòmber” na Brazil.

Sin duda, “e outo ku ekipo di zonido di Watch Tower” a trese un kambio grandi den e trabou di prediká na Brazil. El a yuda miónes di hende skucha e mensahe di Reino. Aunke a bende e outo famoso ei na 1941, tin sientos di míles di Testigu di Yehova ku ta prediká e bon notisia na hende di kurason sinsero den e teritorio inmenso di Brazil.—For di nos archivo na Brazil.