MI TATA, Arthur, un yònkuman deboto na Dios, kier a bira un pastor metodista. Pero el a kambia di idea ora el a lesa literatura di e Studiantenan di Beibel i a kuminsá asosiá ku nan. Na 1914, tempu ku e tabatin 17 aña di edat, el a batisá. E tempu ei, Promé Guera Mundial tabata den su furia, i nan a yama mi tata pa e drenta servisio militar. Komo ku e no kier a karga arma, nan a sentensi’é na dies luna di prizòn na Kingston, Ontario, Canada. Despues ku mi tata a sali liber, el a drenta e sirbishi di tempu kompleto komo un kòlportùr (pionero).

Na 1926, mi tata a kasa ku mi mama, Hazel Wilkinson, kende su mama a haña e bèrdat na 1908. Mi a nase dia 24 di aprel 1931, i mi ta e di dos di kuater ruman. Nos bida di famia tabata drei rònt di adorashon na Yehova, i e rèspèt profundo ku mi tata tabatin pa Beibel a yuda nos haña masha apresio pa e Palabra di Dios. Nos tabata partisipá regularmente komo famia den e trabou di prediká di kas pa kas.—Echo. 20:20.

Na 1939, Segundo Guera Mundial a kuminsá, i e siguiente aña, outoridatnan a prohibí e aktividatnan di Testigunan di Yehova na Canada. Skolnan públiko tabata tene seremonianan patriótiko ku a inkluí saludamentu di bandera i kantamentu di himno. Durante e seremonianan akí, ami ku mi ruman muhé mas grandi, Dorothy, tabatin mag di sali for di klas. Un dia, pa mi sorpresa, mi yùfrou a purba di pone mi kara na bèrgwensa i bisa ku mi ta un kobarde. Despues di skol, algun kompañero di klas a bati mi i benta mi abou. Pero esei mas bien a duna mi mas determinashon ainda pa “obedesé Dios na promé lugá, i no hende.”—Echo. 5:29.

 Na yüli 1942, ku 11 aña di edat, mi a batisá den un tanki di awa na un boerderij. Ora mi tabatin fakansi, mi tabata gusta traha pionero di fakansi (awor pionero ousiliar). Den un di e fakansinan ei, mi a djòin tres ruman hòmber pa prediká na kapdó di palu ku tabata biba den teritorio no asigná den nort di Ontario.

Dia 1 di mei 1949, mi a bira pionero regular. Komo ku e sukursal tabata bou di konstrukshon, mi a haña invitashon pa bai yuda, i dia 1 di desèmber mi a bira miembro di e famia di Bètel di Canada. Nan a manda mi bai traha den e drùkerei, i mi a siña kon pa traha ku e mashin di imprenta ku nan tabata usa einan. Pa algun siman mi a traha e warda djanochi i tabata prent e tratado tokante e persekushon ku e pueblo di Yehova tabata pasa aden na Canada.

Despues, ora mi tabata traha den e Departamento di Sirbishi, mi tabata entrevistá pioneronan ku a bin bishitá e sukursal ora nan tabata riba kaminda pa bai sirbi na Quebec, kaminda tabatin hopi persekushon e tempu ei. Un di e bishitantenan ei tabata Mary Zazula di Edmonton, Alberta. Komo ku Mary ku su ruman hòmber grandi, Joe, a nenga di stòp di studia Beibel, nan mayornan ku tabata miembro deboto di e Iglesia Òrtodòks a saka nan for di kas. Na yüni 1951, nan dos a batisá, i seis luna despues nan a kuminsá traha pionero. Durante e entrevista, mi a keda impreshoná ku Mary su spiritualidat. Mi a bisa den mi mes: ‘Si tur kos bai bon, esaki por ta e mucha muhé ku lo mi kasa kuné.’ Nos a kasa nuebe luna despues riba 30 di yanüari 1954. Un siman despues, nos a haña invitashon pa haña entrenamentu pa e trabou di sirkuito, i pa e siguiente dos añanan nos a bishitá e kongregashonnan na nort di Ontario.

Segun ku e obra mundial di predikashon tabata krese, tabatin mester di mas misionero. Nos a pensa ku si nos por soportá Canada su wenter friu i sangura ku ta kansa hende den zomer, nos lo por wanta kualke sirkunstansia difísil, sin importá unda ku e rumannan manda nos bai sirbi. Nos a gradua di e di 27 klas di e Skol di Galaad na yüli 1956 i pa novèmber, nos a kuminsá nos asignashon na Brazil.

Ora nos a yega e sukursal di Brazil, nos a kuminsá siña portugues. Despues ku nos a siña maneranan fásil pa saludá hende i a memorisá un presentashon di un minüt pa ofresé revista, e rumannan a invitá nos pa sali ku nan den sirbishi. Si un persona a mustra interes, nos mester a lesa un teksto i splik’é kon bida lo ta bou di e Reino di Dios. Riba nos promé dia den sirbishi, un señora a skucha ku masha atenshon; ma despues ku mi a lesa Revelashon 21:3 i 4 p’e, mi a kai flou! Mi kurpa  no a kustumbrá ainda ku e kalor i e humedat; esaki lo a bira un reto di tur dia.

Nos asignashon komo misionero tabata na e siudat di Campos, kaminda awor tin 15 kongregashon. Tempu nos a yega, tabatin solamente un grupo aislá i un kas di misionero ku kuater ruman muhé: Esther Tracy, Ramona Bauer, Luiza Schwarz i Lorraine Brookes (awor Wallen). Mi tarea na e kas tabata pa yuda laba paña i buska palu pa kushiná. Riba un djaluna anochi despues di nos Estudio di Toren di Vigilansia, nos a haña un bishita ònferwagt. Mi kasá tabata sosegá riba un sofá tanten ku nos tabata papia tokante kon nos dia a bai. Ora el a hisa su kabes for di e kusinchi pa e lanta para, un kolebra a sali for di bou di e kusinchi i a kousa un konsternashon te ora mi a mat’é!

Despues ku mi a siña portugues pa un aña, mi a ser nombrá komo superintendente di sirkuito. Nos a hiba un bida simpel den un área rural. Nos no tabatin koriente, nos tabata drumi abou riba mat i nos tabata kore garoshi halá pa kabai pa yega na nos destinashon. Durante un kampaña pa prediká den un teritorio no asigná, nos a biaha ku trein bai un pueblo den seru i a hür un kamber na un penshon. Sukursal a manda 800 revista pa nos usa den sirbishi. Nos mester a bai vários biaha na e pòstkantor pa buska e kahanan di revista i karga nan hiba na e kamber kaminda nos tabata keda.

Na 1962, a tene e Skol di Ministerio di Reino rònt Brazil pa ruman hòmber- i muhénan misionero. Pa seis luna largu, mi tabata asigná pa bishitá vários skol, pero sin Mary. Mi a duna lès na Manaus, Belém, Fortaleza, Recife i Salvador. Mi a organisá un kongreso di distrito na e famoso teater di ópera na Manaus. Áwaseru pisá a kontaminá hopi di e awa ku nos tabatin pa bebe i a laga nos sin un lugá pa un kafetaria pa e kongreso. (E tempu ei, nan tabata sirbi kuminda na kongreso.) Mi a tuma kontakto ku servisio militar, i un sòldá gustosamente a sòru pa nos haña awa di bebe durante henter e kongreso i a manda sòldá pa arma dos tènt grandi pa nos kushina i kafetaria.

Ora mi no tabat’ei, Mary tabata prediká den un área kaminda tabatin hopi komersiante di Portugal, kendenan tabata interesá solamente den gana hopi plaka. E no por a kuminsá niun kòmbersashon basá riba Beibel ku niun hende, p’esei el a bisa e bètelitanan: “E delaster kaminda na mundu ku mi ke biba ta na Portugal.” Anto bo no por imaginá bo unda nos a bai despues! No muchu tempu despues, nos a haña un invitashon pa bai sirbi na Portugal. E tempu ei, nos trabou di prediká tabata prohibí einan, pero nos a aseptá nos asignashon, aunke ku na promé instante Mary a keda di shòk.

Na ougùstùs 1964, nos a yega Lisboa, Portugal. E rumannan tabata haña hopi persekushon na man di e polis sekreto di Portugal (PIDE). Pa motibu di esaki, tabata mihó pa e rumannan no a bin risibí nos, i nos a evitá di tabatin kontakto ku e Testigunan lokal. Nos a keda den un penshon miéntras nos tabata warda riba nos pèrmit di estadia. Despues ku nos a haña esaki, nos a hür un apartamento. Na yanüari 1965, por fin nos por a tuma kontakto ku e sukursal. Ki kontentu nos tabata ku nos por a asistí na nos promé reunion despues di sinku luna!

Nos a bin haña sa ku tur dia polis tabata listra kas di e rumannan. Komo ku e Salònnan di Reino tabata será, e rumannan tabata tene e reunionnan den kas di e rumannan. Sientos di Testigu mester a bai warda di polis pa polis identifiká nan i interogá nan. Polis tabata maltratá e ruman hòmbernan pa nan revelá nòmber di e rumannan ku tabata dirigí e reunionnan. P’esei, e ruman hòmbernan a kuminsá yama otro na nan nòmber dilanti, manera José òf Paulo, en bes di yama otro na nan fam. Pues nos a hasi meskos.

Nos interes prinsipal tabata pa duna nos rumannan kuminda spiritual. Mary su asignashon tabata pa taip e artíkulonan di estudio di Toren di Vigilansia i otro literatura riba stènsel ku nos tabata usa despues pa produsí mas ehemplar.

Na yüni 1966, tabatin un kaso den korte nunka bisto na Lisboa. Nan a hiba tur e 49 miembronan di e kongregashon di Feijó korte pasobra nan a asistí na un reunion ilegal den kas di un ruman. Mi a prepará e rumannan pa e kaso hasiendo manera kos ku mi tabata e fiskal ku ta interogá nan. Nos tabata sa ku nos lo a pèrdè e kaso, pero nos a realisá ku nos lo por a duna un bon testimonio. Ku kurashi nos abogado na final di su defensa a sita Gamaliel di promé siglo. (Echo. 5:33-39) Notisia di e kaso akí a sali den prensa, i e 49 rumannan a haña kastigu di prizòn di entre 45 dia pa sinku luna i mei. Nos ta kontentu pa bisa ku nos abogado a aseptá un estudio di Beibel i tabata asistí na e reunionnan promé ku el a fayesé.

Na desèmber 1966, mi a ser nombrá komo superintendente di sukursal, i mi a dediká hopi tempu na asuntunan legal. Ku tempu, Testigunan di Yehova a haña e derecho pa disfrutá di libertat pa adorá Dios. (Flp. 1:7) Finalmente, dia 18 di desèmber 1974, nos a haña rekonosementu legal. Rumannan Nathan Knorr i Frederick Franz, di e sede mundial, a bishitá Portugal i a kompartí nos goso na un reunion históriko ku nos a tene tantu na Oporto komo na Lisboa, ku un asistensia total di 46.870 hende.

Yehova a habri kaminda pa e bèrdat sigui krese na islanan kaminda ta papia portugues, manera  Azóres, Cabo Verde, Madeira i São Tomé i Príncipe. Nos tabatin mester di un sukursal mas grandi, i nos a haña esaki na aña 1988. Dia 23 di aprel di e mesun aña ei, Ruman Milton Henschel a dirigí e programa di dedikashon di e fasilidatnan nobo den presensia di 45.522 ruman yen di entusiasmo. Entre e rumannan ei, tabatin 20 ruman ku a yega di sirbi komo misionero na Portugal. Tabata masha konmovedor pa mira nan atrobe na e evento históriko ei.

E echo ku nos a konosé tantu ruman fiel atraves di añanan a enrikesé nos bida mashá. Mi a siña un lès masha importante ora mi a kompañá Ruman Theodore Jaracz durante un bishita ku el a hasi komo superintendente di zona. E sukursal ku nos a bishitá a haña nan ku un problema serio, i e miembronan di e Komité di Sukursal a hasi tur loke nan tabata por. Pa trankilisá e rumannan, Ruman Jaracz a bisa: “Awor ta tempu pa laga e spiritu santu obra.” Durante un bishita ku ami ku mi kasá, Mary, a hasi na Brooklyn vários dékada pasá, nos a pasa un anochi ku Ruman Franz i algun otro ruman mas. Ora a pidi Ruman Franz pa e sera e anochi ku algun palabra tokante su añanan di sirbishi na Yehova, el a bisa: “Mi konseho ta pa keda ku Yehova su organisashon den tempu bon i den tempu malu. Esaki ta e úniko organisashon ku ta kumpli ku e trabou ku Hesus a duna su disipelnan, esta, di prediká e bon notisia di e Reino di Dios!”

Ami ku mi kasá a haña hopi goso den e trabou ei. Nos tin grato rekuerdo di e bishitanan di zona ku nos a hasi na diferente sukursal. E bishitanan akí a duna nos e oportunidat pa mustra apresio pa e fiel sirbishi tantu di rumannan di edat komo di rumannan mas yòn i pa animá nan pa sigui ku nan privilegio spesial pa sirbi Yehova.

E añanan a pasa lihé, i ami ku Mary tin 80 i piku aña kaba. Mary ta lucha ku hopi problema di salú. (2 Kor. 12:9) E pruebanan ku nos a pasa aden a yuda refiná nos fe i fortalesé nos determinashon pa sigui mantené nos integridat na Yehova. Ora nos wak bèk riba nos bida, nos por mira kon Yehova a mustra su bondat inmeresí na nos na hopi manera. *