RIBA djárason 18 di yanüari 2023, nos a lesa un anunsio spesial riba jw.org. E anunsio a bisa ku Ruman Gage Fleegle i Ruman Jeffrey Winder ta forma parti awor di Kuerpo Gobernante di Testigunan di Yehova. Tur e dos rumannan akí tin hopi aña ta sirbi Yehova fielmente.

Ruman Fleegle a lanta na Merka den e parti wèst di Pennsylvania. Su mayornan tabata sirbi Yehova fielmente i a lant’é den e bèrdat. Tempu e tabata tiner, su mayornan a muda pa un pueblo chikitu ku tabatin mester di yudansa. Poko despues di esei, riba 20 di novèmber 1988, el a batisá.

Ruman Fleegle su mayornan semper a anim’é pa traha fultaim pa Yehova. Su mayornan semper tabata laga superintendente di sirkuito i bètelita keda na nan kas, i Ruman Fleegle por a mira kon felis e rumannan akí tabata. El a bira pionero regular riba 1 di sèptèmber 1989. Anto na òktober 1991, el a logra un meta ku e tabatin fo’i su 12 aña​—sirbi na Bètel.

Na Bètel na Brooklyn, Ruman Fleegle a traha ocho aña den Departamento di Kaft Buki, djei el a haña asignashon pa traha den Departamento di Sirbishi. Durante e tempu ei, e tabata den un kongregashon di abla ruso pa un par di aña. Na 2006 el a kasa ku Nadia, kende a djòin e na Bètel. Huntu nan a sirbi den kongregashon di abla portugues i pa mas ku dies aña den kongregashon spañó. Despues di hopi aña den Departamento di Sirbishi, Ruman Fleegle a bai traha den Ofisina di Komité di Siñansa i despues den Ofisina di Komité di Sirbishi. Na mart 2022, el a ser nombrá komo ayudante di Komité di Sirbishi di Kuerpo Gobernante.

 Ruman Winder a lanta na Murrieta, California. Su mayornan a lant’é den e bèrdat, i el a batisá 29 di mart 1986. E siguiente luna mes, el a kuminsá traha pionero ousiliar. El a gusta esei asina tantu ku e kier a sigui i vários luna despues na 1 di òktober 1986 el a bira pionero regular.

Tempu Ruman Winder tabata tiner, el a bishitá su dos ruman hòmbernan mas grandi ku e tempu ei tabata na Bètel. Esei a pone ku e tambe kier a bai Bètel. Anto na mei 1990, el a haña invitashon pa sirbi na Bètel na Wallkill.

Na Bètel, Ruman Winder a traha den vários departamento, inkluso limpiesa, agrikultura i Ofisina di Bètel. Na 1997, el a kasa ku Angela, i fo’i e tempu ei nan ta sirbi huntu na Bètel. Na 2014 nan mester a muda pa Warwick, einan Ruman Winder a yuda ku konstrukshon di sede mundial. Na 2016 nan mester a muda pa Sentro Edukativo di Watchtower na Patterson. Anto kuater aña despues, nan a bai Warwick bèk, i ei Ruman Winder a bai traha den Ofisina di Komité di Personal. Na mart 2022, el a ser nombrá komo ayudante di Komité di Personal di Kuerpo Gobernante.

Nos ta pidi Yehova bendishoná e ‘regalonan akí den forma di hende’ segun ku nan ta sigui traha duru pa e Reino.—Efe. 4:8.