1-2. (a) Na ki momento foral lo ta difísil pa nos pordoná un hende? (b) Kon Denise a mustra ku el a pordoná?

 AKASO ta fásil pa pordoná? Hopi hende ta bisa: “Nò.” Anto esei ta foral ora un hende hasi nan algu ku a hùrt nan hopi. Sinembargo, ta posibel pa nos surpasá e sintimentunan ei i pordoná un hende. Por ehèmpel, ban wak kon un ruman muhé ku yama Denise a logra pordoná den un situashon hopi difísil. a Na 2017, Denise i su famia a bai bishitá e sede mundial nobo di Testigunan di Yehova. Ora nan tabata na kaminda pa kas, un shofùr a pèrdè kontrol i a bin dal den nan outo. Denise a pèrdè konosementu den e aksidente. Pero ora ku el a bin bei, el a bin haña sa ku su yunan a sufri hopi daño i ku su esposo, Brian, a muri. Pensando riba loke a pasa, Denise a bisa: “Mi ta sinti mi kibrá i tur konfundí.” Anto ora el a haña sa ku e shofùr no tabata distraí ni fuma ni drogá, el a resa pidi Yehova dun’é pas.

² E shofùr a ser arestá i mester a bai dilanti korte pa motibu ku el a kousa morto di Denise su kasá. Si korte a haña ku e ta kulpabel, e por a bai prizòn. Denise a haña sa ku e kastigu ku e shofùr lo a haña lo a dependé di loke Denise a bisa den korte. Denise a splika: “M’a sinti manera un hende a habri mi heridá di nobo i a basha un barí di salu den dje. Ta komo si fuera mi mester a biba henter e suseso atrobe.” Un par di siman despues, Denise tabata den e sala di korte. E mester a papia dilanti di e persona ku a kousa nan asina tantu doló. Papiando ku e hues, Denise a  pidié pa mustra miserikòrdia na e hòmber. b Ora Denise a kaba di papia, awa a kuminsá basha for di e hues su wowo. El a bisa: “Mi tin 25 aña ta traha komo hues i nunka m’a tende algu asina den mi korte. Nunka m’a tende famia di un víktima roga mi pa mustra miserikòrdia na esun kulpabel. Nunka m’a skucha ekspreshonnan asina di amor i pordon.”

 3. Kiko a motivá Denise pa pordoná?

³ Kiko a yuda Denise pordoná? El a kòrda kon Yehova ta pordoná. (Mik. 7:18) Nos ta haña un apresio ora nos para pensa riba tur e biahanan ku Yehova a pordoná nos, i esei ta pone ku nos tambe ta sinti ku nos mester pordoná.

 4. Kiko Yehova ke pa nos hasi? (Efesionan 4:32)

⁴ Yehova ke pa nos pordoná otro libremente meskos ku e ta hasi ku nos. (Lesa Efesionan 4:32.) E ta ferwagt pa nos ta kla pa pordoná esnan ku ta peka kontra nos. (Sal. 86:5; Luk. 17:4) Den e artíkulo akí, nos lo trata tres kos ku lo yuda nos hasi esei.

NO IGNORÁ BO SINTIMENTUNAN

 5. Segun Proverbionan 12:18, kon nos por sinti nos ora un hende hùrt nos?

⁵ Bo por sinti bo hopi rabiá òf desapuntá ora ku un hende faya ku bo, foral ora ta un bon amigu òf famia. (Sal. 55:12-14) Anto tin biaha, e doló ei ku nos ta karga den nos kurason ta manera un hinká di kuchú. (Lesa Proverbionan 12:18.) Tin biaha, nos ta hasi hopi esfuerso pa ignorá e doló ei. Pero hasiendo esei ta manera nos ta laga e kuchú den nos herida despues ku un hende hinka nos. Si nos laga e kuchú den e herida e no ta bai kura. Asina tambe nos no por ferwagt ku nos sintimentunan ta bai mehorá si nos djis ignorá nan.

 6. Kon nos ta reakshoná hopi biaha ora un hende ofendé nos?

⁶ Ora un hende hùrt nos, e promé kos ku nos ta hasi ta rabia. Beibel mes ta bisa ku esei por pasa. Pero, e ta spièrta nos pa no keda rabiá ni laga rabia dominá nos. (Sal. 4:4; Efe. 4:26) Dikon? Pasobra masha fásil mes nos emoshonnan ta kambia den akshon. Anto rabia nunka ta hiba na algu bon. (Sant. 1:20) Pues, nos por rabia. Pero ta nos ta skohe si nos ta keda rabiá òf nò.

 7. Ki otro sintimentunan nos por haña ora un hende hùrt nos?

⁷ Fuera di rabia, nos por sinti otro emoshonnan ora un hende hùrt nos. Por ehèmpel, un ruman muhé ku yama Ann a bisa: “Ora mi tabata mucha, mi tata a bai laga mi mama i a bai kasa ku e señora ku tabata kuida mi. M’a sinti mi bandoná. Anto ora nan a haña yu, m’a sinti ku nan a remplasá mi. I pa hopi aña m’a sinti ku niun hende no tabata ke mi.” Un ruman muhé ku yama Georgette a splika kon el a sinti ora ku su esposo a kometé adulterio. El a bisa: “Fo’i mucha nos tabata amigu. Nos a traha pionero huntu! Mi kurason tabata na wèrki.” Anto un ruman muhé ku yama Naomi a bisa: “Nunka m’a imaginá ku mi esposo lo a hùrt mi asina tantu. Pues, ora el a konfesá na mi ku e tabata  wak pornografia i ku e tabata skonde esei fo’i mi, m’a sinti mi traishoná.”

 8. (a) Ki ta algun motibu pakiko nos mester pordoná otro? (b) Ki bendishonnan nos ta haña si nos pordoná? (Wak e kuadro “ Mi Tin Ku Pordoná e Persona Ku A Troumatisá Mi?”)

⁸ Nos no tin kontrol riba loke otro hende ta bisa òf hasi. Pero loke sí nos tin kontrol riba ta dje ta kon nos ta reakshoná. Anto e mihó reakshon ku nos por tin ta di pordoná. Dikon? Pasobra nos stima Yehova i Yehova ke pa nos pordoná. Si nos keda rabiá i no ke pordoná, chèns ta hopi grandi ku nos lo hasi ko’i bobo i asta daña nos salú. (Pro. 14:17, 29, 30) Wak loke Christine a bisa. “Ora ku mi ta hopi rabiá, kasi henter dia mi ta kana ku mi kara será. Ademas, mi ta kome malu, mi no por drumi bon i ta hopi difísil pa mi kontrolá mi emoshonnan. Tur esei ta afektá mi matrimonio i mi amistat ku otro hende.”

 9. Dikon nos mester stòp di karga renkor?

⁹ Pero, kiko si e persona ku a hùrt bo no ke atmití ku el a hasi fout i pidi pordon? Wèl, tin algu ku por yuda bo trata ku bo sintimentunan. Kiko esei ta? Georgette, menshoná anteriormente, a bisa: “Aunke esaki no a bai di un dia pa otro, tòg m’a logra stòp di karga renkor kontra mi ekskasá. Esei a yuda mi sinti un pas inmenso.” Ora nos stòp di karga renkor, nos ta evitá di laga amargura daña nos amistat ku otro hende. Ademas, nos ta hasi algu bon pa nos mes. Nos por kuminsá hiba un bida normal atrobe i disfrutá di dje. (Pro. 11:17) Pero, kiko si bo a hasi tur e kosnan ei pero te ainda bo no por pordoná?

TRATA KU BO SINTIMENTUNAN

10. Dikon nos mester tuma tempu pa kura emoshonalmente? (Wak e plachi.)

¹⁰ Kiko bo por hasi pa stòp di kana ku rabia, odio òf renkor? Un manera ta di laga tempu pasa. Meskos ku ora un persona ku tin un herida grave mester di tempu pa kura, asina tambe kisas nos mester di tempu pa nos kura den sentido emoshonal. E ora ei numa nos lo ta kla pa por pordoná di kurason.—Ekl. 3:3; 1 Ped. 1:22.

11. Kon orashon por yuda bo pordoná?

¹¹ Hasi orashon i pidi Yehova pa yuda bo pordoná. c Ann, menshoná anteriormente,  a splika kon orashon a yud’é. El a bisa: “M’a pidi Yehova pa pordoná kada un di nos den e famia pa e kosnan ku nos a hasi robes. Djei, m’a skirbi un karta pa mi tata i su kasá nobo i m’a bisa nan ku mi a pordoná nan.” Ann ta atmití ku esei no tabata niun tiki fásil. Pero el a bisa: “Mi ta spera ku si mi purba di imitá Yehova su pordon, ku esei por pone ku mi tata i su esposa lo haña gana di siña mas tokante Yehova.”

12. Dikon nos mester konfia Yehova na lugá di bai tras di nos sintimentunan? (Proverbionan 3:5, 6)

¹² No bai tras di bo sintimentunan. Konfia Yehova! (Lesa Proverbionan 3:5, 6.) Semper e sa loke ta mihó pa nos. (Isa. 55:8, 9) Ademas, nunka lo e pidi nos hasi algu ku lo hasi nos daño. Pues, ora e animá nos pa pordoná, nos por tin sigur ku esei ta bon pa nos. (Sal. 40:4; Isa. 48:17, 18) Pero di otro banda, si nos bai tras di nos sintimentunan, kisas nunka nos lo logra pordoná. (Pro. 14:12; Yer. 17:9) Naomi, menshoná anteriormente, a bisa: “Na promé instante, m’a sinti ku mi tabatin tur mi derecho pa no pordoná mi kasá tokante e asuntu di pornografia. Mi tabatin miedu ku si mi pordon’é lo e bolbe hùrt mi òf ku lo el a lubidá kuantu doló el a hasi mi. M’a rasoná ku Yehova ta komprondé mi sintimentunan. Pero, despues m’a realisá ku djis pasobra Yehova ta komprondé mi sintimentunan no ke men ku e ta aprobá nan. E sa kon mi ta sinti mi i ku mi mester di tempu pa kura. Pero e ke tambe pa mi pordoná.” d

HAÑA SINTIMENTUNAN POSITIVO

13. Segun Romanonan 12:18-21, kiko nos mester hasi?

¹³ Kisas nos por bisa un hende: “M’a pordoná bo. Laga nos no papia mas tokante e asuntu.” Pero, pordoná ta enserá mas ku esei. Nos meta ta pa hasi pas, anto foral si ta un ruman a hùrt nos. (Mat. 5:23, 24) Pa logra nos meta, nos tin ku remplasá rabia pa miserikòrdia i renkor pa pordon. (Lesa Romanonan  12:18-21; 1 Ped. 3:9) Pero, kiko por yuda nos hasi esei?

14. Kiko nos tin ku hasi, i dikon?

¹⁴ Yehova ta skohe pa mira e bon den hende. I nos ke hasi nos esfuerso pa hasi meskos kuné i mira e bon den e hende ku nos ke pordoná. (2 Kró. 16:9; Sal. 130:3) Hopi biaha ora nos ta buskando algu, ta nèt esei nos ta haña. Si nos ta buska e malu den hende, ta esei nos ta haña. Pero si nos buska e bon, nos ta haña e bon. Anto ora nos buska e bon den hende, ta bira mas fásil pa nos pordoná. Por ehèmpel, un ruman ku yama Jarrod a bisa: “Ta bira hopi mas fásil pa mi pordoná un ruman ora mi pensa riba tur e kosnan ku mi ta gusta di dje na lugá di pensa riba e erornan ku e ta hasi.”

15. Dikon ta importante pa nos bisa un persona ku nos a pordon’é?

¹⁵ Algu importante ku tambe nos mester hasi ta di bisa e persona ku nos a pordon’é. Dikon? Wèl, wak kiko a pasa ku Naomi, kende nos a menshoná anteriormente.  El a bisa: “Ora mi kasá a puntra mi si m’a pordon’é, mi kier a bis’é. Pero, pa nada di mundu e palabranan no kier a sali. Ei m’a realisá ku ainda mi no a pordon’é di kurason. Ku tempu, mi por a bis’é: ‘Mi ta pordoná bo.’ Awa tabata basha fo’i su wowo, ora m’a bis’é esei. Hamas mi por a imaginá kuantu alivio i pas e kuater palabranan ei a trese pa tantu ami komo mi kasá. Despues di esei, tiki tiki mi por a konfi’é atrobe. I awor, nos ta mihó amigu atrobe.”

16. Kiko bo a siña tokante kon pa pordoná?

¹⁶ Yehova ke pa nos pordoná otro. (Kol. 3:13) Pero asina mes, tin biaha ta hopi difísil pa nos hasi esei. Pa nos por logra pordoná, nos mester (1) no ignorá nos sintimentunan, (2) hasi esfuerso pa trata ku nan i (3) haña sintimentunan positivo.—Wak e kuadro “ Tres Kos Ku Bo Tin Ku Hasi pa Pordoná.”

E BENEFISIONAN DI PORDONÁ

17. Ki benefisionan nos ta haña ora nos pordoná?

¹⁷ Nos tin hopi motibu pa pordoná otro hende. Promé, nos ta imitá nos Tata miserikòrdioso i ta hasié kontentu. (Luk. 6:36) Di dos, nos ta mustra ku nos ta gradisidu pa e manera amoroso ku Yehova a pordoná nos. (Mat. 6:12) Di tres, hasiendo esei nos ta kuida nos salú i tambe nos amistat ku otro hende.

18-19. Kiko ta pasa ora nos pordoná?

¹⁸ Ora nos ta pordoná otro hende, nos ta haña bendishon ku nos no a spera. Por ehèmpel, wak kiko a pasa ku Denise ku nos a menshoná anteriormente. Denise no tabata sa, pero e hòmber ku a kousa e aksidente tabata kier a mata su kurpa despues di e kaso den korte. Pero el a keda asina impreshoná i gradisidu ku e manera ku Denise a pordon’é ku el a disidí di kuminsá studia Beibel ku Testigunan di Yehova.

¹⁹ Nos por sinti ku ta hopi difísil pa pordoná un hende—pero e por ta tambe e kos ku mas lo duna nos gran satisfakshon. (Mat. 5:7) Pues, laga nos hasi nos máksimo esfuerso pa pordoná meskos ku Yehova.