BO A yega di sinti ku bo ta hogando den problema i no tabatin niun hende pa yuda bo? E tempu ku nos ta bibando aden ta ‘krítiko i difísil pa trata kuné’ i por pone bo sinti bo bo so i desanimá. (2 Tim. 3:1) Pero bo no tin ku dil ku problemanan di bida bo so. Beibel ta bisa ku berdadero amigu por ta di gran yudansa “den tempu difísil.”—Pro. 17:17.

Apòstel Pablo a biaha ku su amigunan i nan a yud’é den diferente manera. (Kol. 4:7-11) Ora ku e tabata den prizòn, nan a yud’é ku kosnan ku e mes no por a hasi. Por ehèmpel, Epafrodito a hiba e kosnan ku e rumannan di Filipo a manda pa Pablo. (Flp. 4:18) Tikiko a hiba Pablo su kartanan pa e diferente kongregashonnan. (Kol. 4:7) Ku yudansa di su amigunan, Pablo por a sigui animá e kongregashonnan asta ora e tabata bou di aresto na kas òf den prizòn. Pero kon abo por ta un berdadero amigu?

Awe tambe hopi ruman ta demostrá loke amigunan por hasi pa otro. Elisabet un pionero regular na Spaña ta konta kon un ruman muhé a yud’é durante tempunan difísil. Ora ku Elisabet a haña sa ku su mama tabatin kanser terminal, e ruman muhé ei tabata un berdadero amigu pa Elisabet. Regularmente e tabata manda mensahenan bunita ku teksto di Beibel pa Elisabet. Elisabet a konta: “E mensahenan ei a laga mi sinti ku mi no ta mi so i a duna mi e forsa ku mi tabatin mester kada dia.”—Pro. 18:24.

Un kos ku por yuda bo tin un amistat mas será ku bo rumannan ta di pasa buska nan pa sirbishi òf reunion. Por ehèmpel, bo por pensa riba algun ruman di edat ku lo keda kontentu ku bo yudansa den eseinan? Si bo yuda nan, boso lo tin oportunidat di fortalesé i animá otro. (Rom. 1:12) Pero awor, kiko di rumannan ku no por sali fo’i kas?

Tin ruman ku no por asistí na e reunionnan en persona debí na nan salú òf otro sirkunstansia. Esei ta loke a pasa ku David, un ruman ku tabatin kanser. Pa seis luna e mester a tuma kimoterapia. Durante e periodo ei, e i su kasá Lidia por a sigui e reunionnan via Internet.

Ki yudansa nan a haña di nan kongregashon? Wèl, despues di kada reunion, algun ruman na Salòn tabata kòmbersá ku David i Lidia via Internet. Ademas, ora ku David i Lidia duna komentario, e rumannan tabata  manda mensahe despues di reunion pa gradisí nan. Ki tabata e resultado? David i Lidia a sinti nan stimá i mas será ku nan rumannan.

Nos por inkluí e rumannan ku no por sali fo’i kas tambe den nos sirbishi. Pa logra esei, nos lo tin ku djis hasi algun kambio na nos rutina di sirbishi i asina demostrá nan ku nos no a lubidá riba nan. (Pro. 3:27) Kisas nos por plania pa skirbi karta i prediká via telefòn ku nan. Ademas, ansianonan por regla pa e rumannan ei djòin e salida di sirbishi via Internet. David i Lidia a apresiá e areglo ei masha hopi mes. David a splika: “Djis e echo ku nos por djòin e salida di sirbishi i skucha e orashon tabata un gran animashon pa nos.” Es mas, si ta sabí i safe, de bes en kuando bo por bai ku bo studiante na kas di e ruman i studia einan.

Ora nos ta traha ku nos rumannan ku no por sali fo’i kas, nos ta konosé nan mas mihó, nos ta mira nan bunita kualidatnan i nos ta bira mas será ku nan. Por ehèmpel, ora bo mira kon nan ta siña hende for di Beibel òf kon nan ta yuda hende hala mas serka di Yehova, bo ta haña mas apresio pa nan. Ora bo yuda bo rumannan prediká i asistí na reunion, lo bo haña mas ruman ku bo ta será kuné.—2 Kor. 6:13.

Pablo a sintié hopi bon ora ku su amigu Tito tabat’ei p’e. (2 Kor. 7:5-7) Ta bon pa nos bisa nos rumannan palabranan animante. Pero, e relato di Tito ta siña nos ku nos ta konsolá nan tambe ora nos t’ei pa nan i ta hasi kos pa nan.—1 Huan 3:18.

Nos rumannan na Rusia ta duna nos un bon ehèmpel pa loke ta trata nos un yuda otro. Wak loke a pasa ku Sergey i su kasá Tatyana. Polis a hasi un entrada hudisial na nan kas i djei a hiba nan warda pa interogashon. Tatyana a sali liber promé. Sergey a konta: “Manera [Tatyana] a yega kas, un ruman muhé a tuma kurashi i a presentá na nos porta. Despues, mas ruman a bin yuda pone e kas na òrdu bèk.”

Sergey a sigui konta: “Semper m’a gusta Proverbionan 17:17 ku ta bisa: ‘Un berdadero amigu ta stima semper i e ta un ruman ku bo por konta kuné den tempu difísil.’ E palabranan ei a haña mas nifikashon awor ku mi ta pasando den persekushon. Mi sa ku mi no por a dil ku e situashon ei riba mi mes. Yehova a duna mi amigunan ku no tabatin miedu, nan tabatin kurashi i no a bandoná mi.” a

Segun ku kosnan ta bira mas i mas difísil, nos tin mester di amigunan ku nos por konta kuné. Anto durante e tribulashon grandi nos lo tin mas mester di nan. Pues, for di awor, laga nos hasi tur loke nos por pa ta un berdadero amigu!—1 Ped. 4:7, 8.