Mary ku su kasá, John, a ta biba na un pais kaminda hopi hende di Filipinas ta bin traha. Esei ta habri kaminda pa nan papia tokante e bon notisia ku e hendenan ei. Durante e pandemia di COVID-19 Mary a logra kuminsá diferente estudio di Beibel no solamente kaminda e ta biba, sino tambe ku hende ku ta biba na otro pais. Kon el a logra esei?

Mary tabata puntra su studiantenan: “Bo konosé un hende ku tambe ke studia Beibel?” Si nan bis’é sí, Mary ta pidi nan pa ser’é konosí kuné. Mayoria di biaha e simpel pregunta ei ta duna bon resultado. Esei ta pasobra ora hende ta gusta loke nan ta siña for di Beibel, por lo general nan ke konta nan famia- i amigunan loke nan a siña. Kon a bai ku Mary?

Wèl, Jasmin, studiante di Mary, a lag’é sera konosí ku kuater hende ku tambe kier a studia. Un di nan, Kristine, tabata gusta loke e tabata siña asina tantu ku el a pidi Mary pa e studia dos bes pa siman. Anto Mary a puntr’é si e konosé mas hende ku ke studia. El a kontestá: “Sí, mi ta laga bo sera konosí ku mi amiganan.” Denter di un par di siman, Kristine a laga Mary sera konosí ku kuater di su amiganan ku kier a studia. Mas despues, Kristine a laga Mary sera konosí ku mas amiga di dje, i algun di nan a duna Mary nòmber di otro hende ku tambe kier a studia Beibel.

Kristine tabata ke pa su famianan na Filipinas tambe studia Beibel. P’esei el a papia ku su yu, Andrea. Na promé instante Andrea a pensa: ‘Testigunan di Yehova ta un sekta, nan no ta kere den Hesus i nan ta usa Tèstamènt Bieu so.’ Pero despues di a studia un solo biaha, el a bin realisá ku e idea ku e tabatin tokante Testigunan tabata kompletamente robes. Kada biaha ku e tabata siña algu nobo, e tabata bisa: “Si e ta pará den Beibel, e mester ta bèrdat!”

Ku tempu Andrea a laga Mary sera konosí ku dos amiga i un kolega di dje, kendenan tambe a kuminsá studia. Andrea tabatin un tanchi siegu ku yama Angela. Mary no tabata sa ku Angela tabata skucha ora e tabata studia ku Andrea. Anto riba un dia, Angela a pidi Andrea pa puntra Mary si e por studia kuné tambe. Angela tabata gusta loke e tabata siña. Denter di un luna, el a siña hopi teksto fo’i kabes i kier a studia kuater biaha pa siman! Ku yudansa di Andrea, Angela a kuminsá skucha e reunionnan regularmente via Internet.

 Joshua, kasá di Kristine, semper tabata keda serka banda di Kristine ora Mary tabata studia kuné. Ora Mary a haña sa esei, el a puntra Joshua si e kier a studia huntu ku nan. Joshua a kontestá: “Ta bon, pero kòrda ku ta skucha so mi ta skucha. Anto no hasi mi niun pregunta sino mi ta lanta bai.” Apénas nan tabatin sinku minüt ta studia ku ya Joshua a kuminsá hasi mas pregunta ku Kristine. Anto Joshua a bisa ku e tambe kier a studia Beibel.

Hopi hende a kuminsá studia debí na un simpel pregunta ku Mary a hasi. Mary a hasi areglo pa hopi di e hendenan ei studia ku otro ruman. Na tur, Mary a kuminsá 28 estudio di Beibel na 4 pais.

Jasmin, e promé studiante ku nos a menshoná den e artíkulo akí, a batisá na aprel 2021. Kristine a batisá na mei 2022 i a bai Filipinas bèk pa ta huntu ku su famia. Angela a batisá un par di luna despues i awor e ta un pionero regular. Dos otro studiante ku Kristine a laga Mary sera konosí kuné tambe a batisá. Tantu Joshua, kasá di Kristine, i Andrea, nan yu, komo vários otro studiante ta progresando hopi bon.

Hopi hende den promé siglo tabata konta nan famia- i amigunan loke nan a siña tokante e bon notisia. (Huan 1:​41, 42a; Echo. 10:​24, 27, 48; 16:​25-33) P’esei, dikon bo no ta puntra bo studiante di Beibel i otro hende interesá si nan konosé un hende ku tambe ke studia Beibel? Ken sa kuantu estudio abo por kuminsá hasiendo djis e simpel pregunta ei.