ARTÍKULO DI ESTUDIO 6
KANTIKA 18 Gratitut pa e Reskate
Yehova Su Pordon Ta un Regalo pa Nos
“Dios a stima mundu asina tantu ku el a duna su Yu unigénito.”—HUAN 3:16.
LOKE NOS LO SIÑA
Nos lo haña mas apresio pa Yehova su pordon i nos lo siña tur loke Yehova a hasi pa ofresé nos su pordon.
1-2. Den ki sentido humanidat ta den e mesun situashon ku e yònkuman menshoná na paragraf 1?
IMAGINÁ un yònkuman ku a lanta den un famia riku. Un dia el a haña un notisia teribel: su mayornan a muri den un aksidente. Anto esei no ta tur kos. E ta bin haña sa ku nan a malgastá tur nan rikesa i a hinka nan mes den debe grandi. Na lugá di laga sèn, nan a laga debe p’e. Pues, e tin ku paga tur e debe di su mayornan. Plùs, e hendenan ke nan sèn awor. Pero, e debe ta asina grandi ku nunka di su bida lo e no por pag’é.
2 Den un sentido humanidat ta den e mesun situashon ku e yònkuman ei. Nos promé mayornan, Ádam ku Eva, tabata perfekto i tabata biba den un bunita paradeis. (Gén. 1:27; 2:7-9) Nan por a biba felis i pa semper. Pero, algu hopi teribel a pasa. Ádam ku Eva a peka i komo resultado Yehova a saka nan for di e hòfi na Éden. Riba esei, nan no por a biba pa semper mas. Ki herensia nan a laga pa nan yunan? Beibel ta bisa: “Pa medio di ún hende [Ádam] piká a drenta mundu, i morto pa medio di piká, i asina morto a pasa pa tur hende pasobra nan tur a peka.” (Rom. 5:12) Pues, e herensia ku nos a haña di Ádam ta piká ku ta hiba na morto. E piká ku nos a heredá ta manera un debe grandi ku niun di nos no por paga.—Sal. 49:8.
3. Dikon por kompará nos pikánan ku “debe”?
3 Hesus a kompará nos pikánan ku “debe.” (Mat. 6:12; Luk. 11:4) Kada biaha ku nos peka, ta komo si fuera nos ta krea un debe serka Yehova ku nos tin ku paga. Si Yehova no a pèrkurá nada pa kanselá e debe ei, e úniko manera ku nos lo por a paga e debe ei lo tabata ku nos morto.—Rom. 6:7, 23.
4. (a) Kon lo a para ku nos si nos no tabatin yudansa? (Salmo 49:7-9) (b) Den Beibel, na kiko e palabra “piká” ta referí? (Wak e kuadro “ Piká.”)
4 Riba nos mes nos no por haña bèk loke Ádam ku Eva a pèrdè. (Lesa Salmo 49:7-9.) Sin yudansa, nos lo no tabatin speransa di biba pa semper ni resurekshon. Pues, nos lo muri sin e chèns di biba atrobe, meskos ku ora bestia ta muri.—Ekl. 3:19; 2 Ped. 2:12.
5. Kon nos Tata ku stima nos a yuda nos paga nos debe di piká? (Wak e plachi.)
5 Bo ta kòrda e yònkuman di paragraf 1? Kon bo ta kere lo e sinti si un hòmber riku ofresé pa paga tur su debenan? Sin duda lo e ta hopi gradisidu i lo aseptá e regalo generoso ei. Di mes manera, Yehova, nos Tata ku stima nos, a duna nos un regalo ku ta paga e debe di piká ku nos a heredá di Ádam. Hesus a splika e regalo ei asin’akí: “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.” (Huan 3:16) E mesun regalo akí tambe ta permití nos tin un bon amistat ku Yehova.
Hesus a prediká e bon notisia di Yehova su pordon. P’esei, Hesus mester a sakrifiká su bida perfekto. (Huan 3:16) E tabata dispuesto pa paga e preis (Wak paragraf 5)
6. Kiko nos lo trata den e artíkulo akí, i dikon?
6 Pero, kiko nos tin ku hasi pa benefisiá di e maravioso regalo akí ku ta hasi posibel ku nos pikánan ta ser pordoná? Pa kontestá e pregunta ei nos lo usa Beibel pa mira kiko ta tur loke Yehova a hasi pa ofresé nos su pordon. Ora nos meditá riba esei, nos lo ta mas gradisidu ainda na dje.
E META
7. (a) Kiko mas Ádam ku Eva a pèrdè? (b) Kiko nos komo yunan di Ádam ku Eva tabatin mester di dje? (Romanonan 5:10, 11)
7 Aparte di pèrdè e posibilidat di biba pa semper, Ádam ku Eva a pèrdè nan bunita amistat ku Yehova. Ora Yehova a krea nan, nan tabata parti di su famia. (Luk. 3:38) Pero ora nan a desobedes’é, el a saka nan for di su famia. Tur esaki a sosodé promé ku nan a haña yu. (Gén. 3:23, 24; 4:1) P’esei, niun di nan yunan, inkluso nos, no por a forma parti di Yehova su famia. Nos tabatin mester di yudansa pa asina nos por tin un amistat ku Yehova. (Lesa Romanonan 5:10, 11.) Nos státus mester a kambia fo’i enemigu di Dios pa amigu di Dios. Algu masha impreshonante ta ku ta Yehova mes ta esun ku a tuma e inisiativa pa esei bira posibel. Kon el a hasi esei?
E AREGLO
8. Kiko Yehova a pèrkurá?
8 Yehova a bin ku un areglo pa pordon di piká ku lo a hasi posibel pa hende imperfekto bira su amigu. E areglo ei a enserá ku Yehova lo a hasi posibel pa haña bèk loke Ádam a pèrdè. Kon? Dor di pèrkurá algu di mesun balor. E Skritura Griego Kristian tambe ta menshoná ku Yehova a hasi posibel pa hende hasi pas, òf sera pas, kuné.—Rom. 3:25.
9. Kiko Yehova a pèrkurá pa asina e israelitanan por a haña pordon di nan pikánan?
9 Den tempu di e israelitanan, Yehova a bin ku un areglo temporal ku a hasi posibel pa nan haña pordon di nan pikánan i un bon amistat kuné. Un biaha pa aña, nan mester a selebrá un fiesta ku tabata yama: Dia di Ofresé Sakrifisio pa Pordon di Piká. Riba e dia ei e sumo saserdote tabata ofresé sakrifisio di bestia pa e pueblo. Pero, komo ku bestia ta inferior ku hende, e sakrifisionan ei nunka por a kita e pikánan di e israelitanan pa semper. Ma tanten ku e israelitanan tabata arepentí i a sigui ofresé e sakrifisionan ku Yehova tabata rekerí, e tabata dispuesto pa pordoná nan pikánan. (Heb. 10:1-4) Tur e sakrifisionan ku a ser ofresé durante e fiesta ei i na otro okashonnan, a kòrda e israelitanan ku nan tabata pekadó i ku nan tabatin mester di algu otro ku por a kita nan pikánan pa semper.
10. Kiko tabata Yehova su areglo permanente pa pordon di piká di humanidat?
10 Yehova tabatin un areglo permanente na mente pa pordon di piká di humanidat. El a pèrkurá pa su Yu stimá “ofresé su mes ún biaha so pa karga piká di hopi hende.” (Heb. 9:28) Hesus a duna su bida “komo reskate a kambio di hopi hende.” (Mat. 20:28) Pero kiko esei ta enserá?
E PREIS
11. (a) Dikon mester a paga un preis di reskate? (b) Kiko tabata e rekisitonan pa paga e reskate?
11 Beibel ta bisa ku Yehova a disidí ku pa nos por ser pordoná di nos pikánan i por bira su amigu, un preis di reskate mester a ser pagá. a Pero ki balor e preis di e reskate ei mester tabatin? Kòrda ku Ádam ku Eva a pèrdè nan bida perfekto i no por a biba pa semper mas. Pues preis di e reskate mester tabatin e mesun balor ku loke a bai pèrdí. (1 Tim. 2:6) Esun ku lo a pag’é mester tabata un hòmber adulto ku (1) tabata perfekto, (2) tabatin e posibilidat di biba pa semper riba tera i (3) tabata dispuesto pa entregá, òf sakrifiká, e bida ei pa nos. Bida di e persona ei lo a remplasá, òf paga, pa e bida ku a bai pèrdí.
12. Dikon Hesus por a paga preis di e reskate?
12 Tin tres motibu dikon Hesus por a paga preis di e reskate. (1) E tabata perfekto—“e no a kometé piká.” (1 Ped. 2:22) (2) E por a biba pa semper riba tera. (3) E tabata dispuesto pa muri i duna su bida pa nos. (Heb. 10:9, 10) Hesus tabata un hòmber perfekto meskos ku Ádam tabata promé ku el a peka. (1 Kor. 15:45) P’esei, ku Hesus su morto e por a paga pa Ádam su piká. Hesus por a remplasá loke Ádam a pèrdè. (Rom. 5:19) Asina ei, Hesus a bira “e último Ádam.” No ta nesesario mas pa niun hende perfekto paga pa loke Ádam a pèrdè. Dikon? Pasobra Hesus a muri “un biaha i pa semper.”—Heb. 7:27; 10:12.
13. Kiko e areglo pa pordon di piká i e preis di e reskate tin di haber ku otro?
13 Kiko e areglo pa pordon di piká i e preis di e reskate tin di haber ku otro? Yehova ta esun ku a bin ku e areglo pa pordon di piká ku a hasi posibel pa hende imperfekto por bira su amigu. Pero pa e areglo ei funshoná, mester a paga preis di e reskate. E preis ei ta Hesus su bida perfekto.—Efe. 1:7; Heb. 9:14.
E RESULTADONAN
14. Kiko nos lo bai trata awor, i dikon?
14 Kon nos ta benefisiá for di loke Yehova a hasi posibel pa nos? Pa kontestá e pregunta ei, nos lo analisá dos kos ku lo yuda nos komprondé kon Yehova su pordon ta benefisiá nos.
15-16. For di kiko nos a ser librá, i kon esei ta laga bo sinti?
15 Beibel ta bisa ku nos a ser librá, òf redimí, pasobra preis di e reskate a ser pagá. Apòstel Pedro a splik’é di e manera akí: “Boso sa ku no ta ku kos ku ta kaba na nada, manera plata òf oro, boso a ser librá, òf redimí, for di e manera bano di biba ku boso antepasadonan a pasa pa boso; mas bien, tabata ku sanger presioso, manera di un lamchi sin defekto i sin mancha, esun di Kristu.”—1 Ped. 1:18, 19.
16 Danki na e echo ku Hesus tabata dispuesto pa sakrifiká su bida perfekto nos por ser librá di piká i morto i di e sufrimentu ku nan ta kousa. (Rom. 5:21) Sin duda nos ta masha gradisidu ku Yehova i Hesus a redimí òf libra nos pa medio di e sanger òf bida presioso di Hesus.—1 Kor. 15:22.
17-18. (a) Kiko ke men ser deklará hustu? (b) Ki bendishon nos ta haña ora Yehova deklará nos hustu?
17 Beibel ta bisa tambe ku Yehova ta deklará su sirbidónan hustu. Esei ta nifiká ku Yehova ta kita tur akusashon kontra nos i ku nos karchi di kastigu ta ser hasí limpi. Akaso esei ke men ku Yehova ta kibra su normanan di hustisia? Nò. E no ta deklará nos hustu pasobra nos meresé esei ni pasobra e ta aprobá nos pikánan. Pero, e ta dispuesto pa kanselá nos pikánan pasobra nos ta pone fe tantu den e areglo pa pordon di piká komo e preis di reskate ku a ser pagá.—Rom. 3:24; Gal. 2:16.
18 Ki bendishon nos ta haña ora Yehova deklará nos hustu? Algun hende a ser deklará hustu i a ser skohí pa reina ku Hesus den shelu i nan a bira yu di Dios. (Tito 3:7; 1 Huan 3:1) Yehova ta pordoná nan pikánan. Komo ku nan no tin, na moda di papia, un karchi di kastigu, nan por forma parti di e Reino. (Rom. 8:1, 2, 30) Anto tin algun hende ku a ser deklará hustu pa biba pa semper riba tera i bira amigu di Dios. Nan pikánan tambe ta wòrdu pordoná. (Sant. 2:21-23) Den e mundu nobo tantu e multitut grandi, sobrebibiente di Armagedon, komo “hende hustu” i “inhustu,” ku lo ser resusitá, lo tin e posibilidat di no muri nunka mas i disfrutá di “e glorioso libertat di e yunan di Dios.” (Echo. 24:15; Rom. 8:21; Huan 5:28, 29; 11:26) Nos ke pa e dia ei yega pa kaba, ora ku por fin nos por ta yunan perfekto di nos Tata, Yehova!
19. Kon nos situashon a mehorá? (Wak e kuadro “ Yehova Su Pordon.”)
19 Nos por bisa ku nos situashon tabata meskos ku e yònkuman di paragraf 1 ku a pèrdè tur kos i a heredá un debe grandi ku nunka di su bida e por paga bèk. Pero Yehova a yuda nos. Nos situashon a kambia pasobra Yehova a bin ku e areglo pa pordon di piká i Hesus a paga e preis di reskate. Nos fe den Hesukristu ta laga ku nos por ser redimí, òf librá, for di piká i morto. Ora Yehova pordoná nos pikánan, ta manera nunka nan a pasa. Pero mas mihó ainda, nos por tin un bon amistat ku nos Tata den shelu, Yehova.
20. Kiko nos lo analisá den e siguiente artíkulo?
20 Segun ku nos ta sigui pensa riba loke Yehova i Hesus a hasi pa nos, nos kurason ta yena ku apresio. (2 Kor. 5:15) Sin nan yudansa, nos lo no tabatin niun speransa. Den e siguiente artíkulo nos lo analisá algun ilustrashon den Beibel ku lo yuda nos komprondé ku ora Yehova pordoná nos, nos no tin nodi di sinti nos kulpabel mas.
KANTIKA 10 Alabá Yehova, Nos Dios!
a Algun idioma ta tradusí e palabra “preis di reskate” ku un ekspreshon ku literalmente ta nifiká “e preis di bida” òf “e pago hasí.”
