Na 2012, arkeólogonan a koba saka fragmentonan di un poron di serámika di 3.000 aña bieu ku a lanta interes di algun investigadó. Kiko a hasié asina spesial? Loke tabatin skirbí riba dje.

Ora arkeólogonan por fin a pega e pida-pidanan di e poron na otro, nan por a desifrá e inskripshon kananeo di antigwedat. Riba dje tabatin skirbí: “Es-Baal Ben [yu hòmber di] Beda.” Esaki ta promé biaha ku arkeólogonan a haña e nòmber ei riba un inskripshon antiguo.

De echo, Beibel ta menshoná un otro Es-Baal, kende tabata un di e yu hòmbernan di Rei Saul. (1 Kró. 8:33; 9:39) Profesor Yosef Garfinkel, kende a partisipá den e ekskavashon, a bisa: “Ta interesante pa nota ku e nòmber Es-baal ta aparesé den Beibel, i awor tambe den e registro arkeológiko, solamente durante e reinado di Rei David.” Algun hende ta pensa ku nan tabata usa e nòmber ei solamente den e époka ei. Un biaha mas, arkeólogonan ta haña prueba di un detaye chikitu den Beibel.

Na otro lugánan den Beibel, e nòmber Es-Baal ta aparesé komo Is-boset; den e kasonan ei a remplasá “baal” ku “boset.” (2 Sam. 2:10) Dikon? Algun investigadó ta splika: “Ta parse ku den e buki di Dos Samuel nan no kier a usa e nòmber Es-Baal, ku tabata pone hende pensa riba Baal, e dios kananeo di tormenta, pero e nòmber original . . . a keda den e Buki di Krónikanan.”