1. Kon nos ta haña sabiduria, i kon e sabiduria ei por yuda nos?

YEHOVA ta e Fuente di sabiduria, i generosamente e ta kompartí su sabiduria ku otronan. Santiago 1:5 ta bisa: “Si un di boso falta sabiduria, lag’é sigui pidi Dios, i lo e dun’é esaki, pasobra e ta duna tur hende generosamente, sin tira na nan kara.” Un manera ku nos por haña sabiduria ta di aseptá Dios su disiplina. E disiplina ei por kuida nos, òf protehá nos di kosnan ku por daña nos relashon ku Yehova. (Pro. 2:10-12) Asina, nos ta “keda den e amor di Dios, . . . ku bida eterno na bista.”—Hudas 21.

2. Kon nos por siña balorá e disiplina di Dios?

² Sinembargo, debí na nos tendensianan pekaminoso, e manera ku nos a ser lantá i otro faktornan por ta difísil pa nos aseptá disiplina òf mir’é komo algu bon. Nos ta siña balorá e disiplina di Dios ora nos mira su benefisionan, ya ku nan ta demostrá Dios su amor pa nos. Proverbionan 3:11 i 12 ta bisa en parte: “Mi yu, no rechasá e disiplina di SEÑOR, . . . pasobra esun ku SEÑOR ta stima, e ta reprendé.” Sí, laga nos nunka lubidá ku Yehova tin nos bienestar na pechu. (Lesa Hebreonan 12:5-11.) Ademas, komo ku Yehova konosé nos bon, su disiplina semper ta korekto i na un midí apropiá. Den e artíkulo akí, nos lo analisá kuater aspekto di disiplina:  (1) disiplina propio, (2) disiplina di mayor, (3) disiplina den kongregashon i (4) algu pió ku e doló temporal di disiplina.

3. Kon yunan por kultivá disiplina propio? Splika esei.

³ Ora nos tin disiplina propio, nos por disipliná nos mes i asina mehorá nos kondukta i manera di pensa. Nos no ta nase ku disiplina propio; nos tin ku kultiv’é. Pensa riba e ilustrashon akí: Ora un mucha ta siña kore baiskel pa promé bes, mayoria di biaha, su tata ta tene e baiskel stret pa e yu no kai. Pero segun ku e yu ta haña balansa, ratu ratu e tata ta laga e baiskel lòs. Ora e tata sa ku e yu por keda den balansa, e ta lag’é so kore. Na un manera similar, ora ku mayornan konsistentemente i ku pasenshi ta siña nan yunan “e disiplina di Yehova i [ta] inkulká su manera di pensa den nan,” nan ta yuda nan yunan kultivá disiplina propio i sabiduria.—Efe. 6:4.

4, 5. (a) Dikon disiplina propio ta un parti importante di “e personalidat nobo”? (b) Dikon nos no mester entregá asta si nos, na moda di papia, “kai shete bes”?

⁴ Esei ta konta tambe pa hende ku ta siña konosé Yehova ora nan ta adulto. Aunke kisas nan a kultivá sierto grado di disiplina propio, den sentido spiritual, nan no ta maduro. Ma, nan por bira maduro segun ku nan ta bisti “e personalidat nobo” i ta imitá Kristu. (Efe. 4:23, 24) I disiplina propio ta un parti importante di e proseso ei, pasobra e ta yuda nos “rechasá tur loke ta kontra boluntat di Dios i tambe deseonan mundano, i e ta siña nos biba ku sano huisio, hustisia i deboshon na Dios den e tempu akí.”—Tito 2:12.

⁵ Pero, nos tur ta peka. (Ekl. 7:20) Sinembargo, si nos peka, esei no ta nifiká ku nos ta un kaso pèrdí òf ku nos no tin disiplina propio. De echo, Proverbionan 24:16 ta bisa: “Un hende hustu ta kai shete bes, i ta lanta atrobe.” Kiko lo yuda nos lanta atrobe? E spiritu di Dios i no nos mes forsa. (Lesa Filipensenan 4:13.) I un aspekto di e fruta di spiritu ta dominio propio, ku ta estrechamente ligá ku disiplina propio.

6. Kon nos por ta mihó studiantenan di Beibel? (Wak e promé plachi.)

⁶ Orashon sinsero, estudio di Beibel i meditashon tambe ta yuda nos kultivá disiplina propio. Pero, kiko si abo tin difikultat pa studia e Palabra di Dios? Kiko si bo no ta gusta studia? Wèl, kòrda ku Yehova lo yuda bo si bo permitié. E por yuda bo “krea un anhelo” pa studia su Palabra. (1 Ped. 2:2) Promé, bo mester pidi Yehova duna bo e disiplina ku bo mester pa studia su Palabra. Despues, kumpli ku bo orashon. Kisas bo por kuminsá ku seshonnan kòrtiku di estudio. Segun tempu ta pasa, bo estudio lo bira mas fásil i mas agradabel. Sí, lo bo kuminsá disfrutá di e momentonan trankil ku bo ta meditá riba e pensamentunan presioso di Yehova.—1 Tim. 4:15.

7. Kon disiplina propio por yuda nos alkansá metanan spiritual?

⁷ Disiplina propio ta yuda nos alkansá metanan spiritual. Wak e ehèmpel di un tata ku a sinti ku su zelo pa sirbishi tabata menguando. Komo ku e tabata preokupá, el a pone meta pa bira pionero regular i a kuminsá lesa artíkulonan basá riba e tópiko ei den nos revistanan. Esei huntu ku orashon a anim’é i fortales’é spiritualmente. Ademas, ora e tabata por, el a traha pionero ousiliar. Kiko tabata e resultado? Apesar di e  opstákulonan, el a keda enfoká riba su meta pa bira pionero regular i, ku tempu, el a logr’é.

8-10. Kiko por yuda mayornan kristian lanta nan yunan den e disiplina di Yehova? Duna un ehèmpel.

⁸ Mayornan kristian tin e bunita privilegio di por lanta nan yunan “den e disiplina di Yehova i inkulká su manera di pensa den nan.” (Efe. 6:4) Esei ta un reto, foral den e mundu djawe. (2 Tim. 3:1-5) Yunan no ta nase ku e konosementu di loke ta bon i malu. Nan ta nase ku un konsenshi, pero esaki mester ser eduká, òf disipliná. (Rom. 2:14, 15) Segun un buki di referensia bíbliko, e palabra griego tradusí komo “disipliná” por nifiká tambe eduká bo yu pa e bira un adulto responsabel.

⁹ Ora mayornan ta disipliná nan yunan ku amor, nan yunan ta sinti nan sigur. E yunan ei ta siña ku libertat tin límite i ku nan desishon i kondukta tin konsekuensia, sea bon òf malu. Pues, ta masha importante pa mayornan buska Yehova su guia. No lubidá ku e idea- i métodonan relashoná ku lantamentu di yu ta kambia atraves di tempu i ta varia di un kultura pa otro. Pero, mayornan ku ta sigui e guia di Dios sa kon pa lanta nan yunan i no ta dependé riba eksperensia òf pensamentu di hende.

¹⁰ Laga nos tuma Noe komo ehèmpel. Tempu ku Yehova a bisa Noe pa traha e arka, Noe no por a dependé riba su mes eksperensia, pasobra nunka el a yega di traha un arka. Pues, e mester a dependé riba Yehova, i “el a hasi” manera Yehova a bis’é. (Gén. 6:22) Kiko tabata e resultado? Noe a traha e arka manera Yehova a bisa i a salba su mes i su famia. Ademas, Noe tabata un bon tata. Dikon? Pasobra el a konfia den Dios su sabiduria. El a eduká su yunan bon i a pone un bon ehèmpel pa nan, aunke esei tabata un reto grandi den e mundu malbado promé ku Diluvio.—Gén. 6:5.

11. Dikon ta importante pa mayornan hasi esfuerso pa lanta nan yunan den e bèrdat?

¹¹ Mayornan, kon boso por imitá Noe? Hasi manera Yehova ta bisa. Laga é siña boso kon pa lanta boso yunan. Usa su Palabra i e instrukshonnan ku nos ta haña mediante nos organisashon. Ku tempu, probablemente boso yunan lo gradisí boso. Un ruman hòmber a skirbi: “Mi ta masha gradisidu na mi mayornan pa e manera ku nan a lanta mi. Nan a hasi nan bèst pa alkansá mi kurason. Gran parti di mi progreso spiritual ta debí na nan esfuerso.” Sinembargo, tin mucha ta bandoná Yehova apesar di tur esfuerso di nan mayornan. Pero mayornan  ku a hasi nan bèst pa inkulká e bèrdat den nan yu su kurason por tin un konsenshi limpi. Nan por tin e speransa ku un dia nan yu lo bolbe serka Yehova.

12, 13. (a) Kon mayornan por mustra obedensia na Dios ora nan yu ser ekspulsá? (b) Kon obedensia na Yehova a benefisiá un famia?

¹² Un di e situashonnan di mas difísil ku ta pone obedensia di mayornan na prueba ta ora nan yu ser ekspulsá. Wak loke a pasa ku un mama ora su yu muhé ku a ser ekspulsá a bai for di kas. E mama a atmití: “Mi tabata ke pasa tempu ku mi yu i mi ñeta. P’esei, mi tabata buska algu den nos publikashonnan pa mi por a hustifiká mi mes.” Pero bondadosamente su kasá a yud’é komprondé ku nan no tabata responsabel mas pa nan yu i ku nan mester a keda leal na Yehova.

¹³ Algun aña despues, nan yu a ser restorá. E mama a bisa: “Awor e ta bèl mi òf manda mensahe pa mi kasi tur dia! I e tin masha rèspèt pa ami ku mi kasá pasobra e sa ku nos a obedesé Dios. Nos tin un bon relashon ku otro.” Si bo yu ta ekspulsá, lo bo “konfia den SEÑOR ku henter bo kurason, i no dependé riba bo mes komprondementu”? (Pro. 3:5, 6) Kòrda, Yehova su disiplina ta reflehá su sabiduria i amor sin igual. Nunka lubidá ku el a duna su Yu pa nos tur, pa bo yu tambe. Dios no ke pa niun hende ser destruí. (Lesa 2 Pedro 3:9.) Pues mayornan, sigui konfia den Yehova su disiplina i guia. Hasi asina asta ora esei ta hasi doló. Sí, traha na armonia ku Yehova su disiplina i no bai kontra dje.

14. Kon Yehova su instrukshon ku e ta perkurá pa nos mediante “e mayordomo fiel” ta benefisiá nos?

¹⁴ Yehova a primintí ku e ta kuida, protehá i instruí e kongregashon kristian. E ta hasi esei na vários manera. Por ehèmpel, el a nombra su Yu komo kabes di e kongregashon. I Hesus, na su turno, a nombra un “mayordomo fiel” pa duna nos kuminda spiritual na e debido tempu. (Luk. 12:42) E mayordomo akí ta duna nos instrukshon, òf disiplina, masha balioso den vários manera. Bo a yega di skucha un diskurso òf lesa un artíkulo den un di nos revistanan ku a motivá bo pa kambia bo manera di pensa òf bo kondukta? Si ta asina, bo por ta kontentu pasobra esei ta nifiká ku bo ta permití Yehova moldia, òf disipliná, bo.—Pro. 2:1-5.

15, 16. (a) Kon ‘e regalonan den forma di hende’ por yuda nos? (b) Kon nos por hasi e trabou di nos ansianonan mas fásil?

¹⁵ Ademas, Kristu a duna e kongregashonnan “regalo den forma di hende,” esta, e ansianonan pa pastoriá e tou di Dios. (Efe. 4:8, 11-13) Kon nos por benefisiá di e regalonan presioso akí? Un manera ta di imitá nan fe i ekselente ehèmpel. Un otro manera ta di sigui nan konseho basá riba Beibel. (Lesa Hebreonan 13:7, 17.) Kòrda ku e ansianonan ta stima nos i ke pa nos progresá spiritualmente. Por ehèmpel, si nan ripará ku nos ta falta reunion òf ku nos zelo ta menguando, mesora nan ta ofresé yudansa. Nan ta skucha nos ku atenshon, animá nos i duna nos bon konseho basá riba e Skritura. Bo ta mira e yudansa di e ansianonan komo prueba di Dios su amor pa bo?

¹⁶ Kòrda ku no ta tur biaha ta fásil pa e ansianonan duna nos konseho. Pensa por ehèmpel kon difísil lo tabata pa profeta Natan papia ku David despues ku e rei akí a purba di skonde e piká grave ku el a kometé. (2 Sam. 12:1-14) Di mes  manera, siguramente apòstel Pablo mester tabatin kurashi pa korigí Pedro, un di e 12 apòstelnan, kende a faboresé e rumannan hudiu. (Gal. 2:11-14) Awor, kon abo por hasi e trabou di e ansianonan den bo kongregashon mas fásil? Sea humilde, aserkabel i gradisidu. Mira nan yudansa komo un ekspreshon di Yehova su amor pa bo. Esaki lo benefisiá bo i e ansianonan lo tin mas goso den nan trabou.

17. Kon e ansianonan a yuda un ruman muhé?

¹⁷ Un ruman muhé a konta ku debí na su pasado, e tabatin difikultat pa stima Yehova. El a bisa: “Ora mi pasado i otro problemanan a pone ku mi a bira deprimí, mi tabata sa ku mi mester a papia ku e ansianonan. Nan no a rabia ku mi ni kritiká mi; mas bien, nan a animá mi i fortalesé mi. Despues di tur reunion, maske kon drùk nan tabata, por lo ménos ún di nan tabata puntra mi konta ku mi. Debí na mi pasado, tabata difísil pa mi kere ku mi meresé Dios su amor. Pero bes tras bes, Yehova a usa e kongregashon i e ansianonan pa demostrá mi ku e stima mi. Mi ta pidi Yehova yuda mi pa nunka mi bandon’é.”

18, 19. Kiko ta pió ku e doló di disiplina? Duna un ehèmpel.

¹⁸ Ta bèrdat ku disiplina por ta doloroso. Pero tin algu asta mas doloroso ku esei: e daño ku bo ta hasi bo mes ora bo rechasá disiplina. (Heb. 12:11) Laga nos trata dos ehèmpel, esta, di Kain i di Rei Sedekias. Ora Dios a mira ku Kain tabata odia Abel, el a spièrta Kain: “Pakiko bo ta rabiá? I pakiko bo kara ta será asina? Si bo hasi bon, lo bo no wòrdu aseptá? I si bo no hasi bon, piká ta lur na porta. I su deseo ta pa bo, ma abo mester domin’é.” (Gén. 4:6, 7) Pero Kain no a hasi kaso di Yehova. El a mata su ruman i e mester a sufri e konsekuensianan. (Gén. 4:11, 12) Si Kain lo a skucha Yehova, lo el a evitá hopi doló.

¹⁹ Un otro ehèmpel ta Rei Sedekias. E tabata un rei kobarde i malbado ku a goberná durante un periodo difísil na Herúsalèm. Bes tras bes, profeta Yeremías a bisa Sedekias ku e mester a bandoná su mal kamindanan, pero el a nenga di aseptá disiplina. Atrobe e resultado tabata trágiko. (Yer. 52:8-11) Manera nos ta mira, Yehova ke spar nos di sufrimentu innesesario.—Lesa Isaías 48:17, 18.

20. Kiko lo pasa ku hende ku ta aseptá e disiplina di Dios i ku esnan ku ta rechas’é?

²⁰ Awendia, hopi hende ta pensa ku e disiplina di Dios ta algu ridíkulo. Pero pronto, hende ku ta pensa asina lo sufri e konsekuensianan doloroso. (Pro. 1:24-31) P’esei, laga nos ‘aseptá disiplina, pa nos por ta sabí.’ Manera Proverbionan 4:13 ta mustra, nos mester aseptá disiplina i ‘no lag’é bai. Kuid’é, pasobra e ta nos bida.’