1. Kiko e kristiannan di promé siglo tabata enfrentá?

ENTRE aña 62 i 64 despues di Kristu, apòstel Pedro a skirbi un karta na e “habitantenan temporal plamá na Ponto, Galasia, Kapadosia, Asia i Bitinia.” (1 Ped. 1:1) E kristiannan akí ku tabata di diferente lugá tabatin mester di animashon i guia pasobra nan tabata enfrentá loke Pedro a yama “pruebanan severo,” esta, persekushon. Ademas, nan tabata biba den un tempu masha krítiko. Pedro a skirbi: “Fin di tur kos a yega serka.” Sí, e fin violento di e sistema hudiu lo a yega den ménos ku ún dékada. Kiko lo por a yuda e kristiannan den e tempu difísil ei?—1 Ped. 4:4, 7, 12.

2, 3. Dikon Pedro a urgi su rumannan pa nan ta hospitalario? (Wak e promé plachi.)

² Pedro a urgi su rumannan pa nan ta, entre otro, “hospitalario ku otro.” (1 Ped. 4:9) E palabra griego pa “hospitalidat” literalmente ta nifiká “kariño pa, òf amor pa, hende straño.” Sinembargo, tuma nota ku Pedro a urgi su rumannan pa nan ta hospitalario “ku otro,” esta, ku hende ku nan tabata konosé kaba i tabata anda kuné. Kon e echo ku nan tabata hospitalario lo a yuda nan?

 ³ Esei lo a uni nan. Pensa riba bo mes eksperensia. Un ruman a yega di invitá bo na su kas? E okashon ei a laga bo ku dushi rekuerdonan, no ta bèrdat? Ora bo a invitá rumannan di bo kongregashon na bo kas, boso amistat no a bira mas fuerte? Ora nos ta hospitalario, nos ta siña konosé nos rumannan mihó. Den tempu di Pedro, kristiannan mester a hala mas serka otro segun ku e sistema tabata bira pió. Esei ta konta tambe pa kristiannan den “e último dianan” akí.—2 Tim. 3:1.

4. Ki preguntanan nos lo analisá den e artíkulo akí?

⁴ Den ki manera nos por ta hospitalario “ku otro”? Kon nos por vense opstákulonan ku ta stroba nos di mustra hospitalidat? Kon nos por ta bon huéspet?

5. Kon nos por mustra hospitalidat na nos reunionnan?

⁵ Na reunion: Yehova i su organisashon ta invitá nos na e reunionnan. I nos ke pa tur hende, spesialmente esnan ku bini pa promé biaha, sinti nan na kas. (Rom. 15:7) Nan tambe ta Yehova su invitadonan, pues nos ke pa nan sinti nan bon, sin importá nan aparensia òf manera di bisti. (Sant. 2:1-4) Si un bishitante ta su so, dikon no invit’é pa sinta huntu ku bo? Podisé lo e apresiá ku bo ta yud’é sigui e programa i buska e tekstonan ku ta ser lesá. Esaki lo ta un bon manera pa “sigui e kaminda di hospitalidat.”—Rom. 12:13.

6. Ken ta e promé hendenan ku nos mester invitá?

⁶ Ora nos ta invitá hende pa kome òf bebe algu: Den tempu di Beibel, ora un hende kier a mustra hospitalidat, e tabata invitá hende pa kome na su kas. (Gén. 18:1-8; Hues. 13:15; Luk. 24:28-30) Un invitashon asina tabata un indikashon di pas i amistat. Awor, ken ta e promé hendenan ku nos mester invitá? Esnan ku ta forma parti di nos bida diario, esta, nos rumannan di kongregashon. Segun ku e sistema akí ta bira pió, nos mester di amigunan leal i mester ta na pas ku nan pa nos por dependé riba otro. Ta interesante pa nota ku na 2011, Kuerpo Gobernante a kambia orario di e Estudio di Toren di Vigilansia pa e famia di Bètel na Merka di 6:45 di anochi pa 6:15 di atardi. Dikon? E anunsio a indiká ku ora e reunion kaba mas trempan, e bètelitanan lo tin mas chèns di mustra i aseptá hospitalidat. E otro sukursalnan a hasi meskos. E kambio akí a yuda e famianan di Bètel hala mas serka otro manera nunka promé.

7, 8. Kon nos por mustra hospitalidat na representantenan di Yehova su organisashon?

⁷ Otro okashonnan ku ta duna nos chèns di mustra hospitalidat ta ora nos haña bishita di diskursante di otro kongregashon, di superintendente di sirkuito i, tin biaha, di representante di sukursal. (Lesa 3 Huan 5-8.) I un manera ku nos por hasi esei ta di invitá e rumannan akí pa kome òf bebe algu serka nos. Abo por hasi esei?

⁸ Un ruman muhé di Merka ta kòrda: “Atraves di añanan, ami ku mi kasá tabatin e oportunidat di ta hospitalario i di invitá hopi diskursante ku nan kasá na nos kas. Semper tabata leuk, nos a pasa masha dushi i, mas importante ainda, nos a ser fortalesé spiritualmente. Nunka nos no a lamentá di a mustra hospitalidat.”

9, 10. (a) Ken lo por tin mester di lugá pa keda pa un tempu largu? (b) Un ruman ku tin un kas simpel tambe por mustra hospitalidat? Splika esei.

⁹ Ora nos tin bishitante pa un tempu  largu: Den antigwedat, hopi hende tabata laga bishitantenan di konfiansa keda na nan kas. (Yòb 31:32; Flm. 22) Awe nos tambe por hasi meskos. Superintendentenan di sirkuito hopi biaha mester di lugá pa keda ora nan ta bishitá e kongregashonnan. Studiantenan ku ta asistí na e skolnan teokrátiko i boluntarionan den konstrukshon tambe kisas tin mester di lugá pa keda. Debí na desasternan natural, famianan por keda sin kas i tin mester di lugá pa keda te ora ku nan kas ser drechá. Nos no mester asumí ku ta rumannan ku tin kas grandi so mester yuda, pasobra kisas nan a yuda hopi biaha kaba. Abo por ofresé pa hende keda serka bo asta si bo kas ta simpel?

¹⁰ Un ruman na Surkorea tin grato rekuerdo di e tempu ku el a laga rumannan ku tabata asistí na skolnan teokrátiko keda na su kas. El a skirbi: “Na komienso, mi tabata duda pasobra nos tabata resien kasá i nos kas tabata chikitu. Pero ora e rumannan a keda serka nos tabata masha dushi. Ami ku mi kasá por a mira kon felis un pareha kasá por ta ora nan ta sirbi Yehova i ta traha huntu pa logra metanan spiritual.”

11. Dikon nos mester mustra hospitalidat na rumannan nobo den nos kongregashon?

¹¹ Rumannan nobo den kongregashon: Algun ruman òf famia por muda bin den nos kongregashon. Podisé algun a bin sirbi kaminda tin mester di mas predikadó di Reino. Òf tin pionero ku a ser asigná pa yuda den bo kongregashon. Na komienso, kisas e kambionan akí ta difísil pa e rumannan pasobra nan mester adaptá na un komunidat nobo, un kongregashon nobo i kisas asta na un otro idioma i kultura. Ora nos invitá nan pa bebe òf kome algu òf pa sali ku nos, esei por yuda nan sera amistat nobo i adaptá nan mes na nan sirkunstansia nobo.

12. Ki eksperensia ta mustra ku no mester di muchu kos pa ta hospitalario?

¹² Nos no mester di muchu kos pa ta hospitalario. (Lesa Lukas 10:41, 42.) Un ruman hòmber ta kòrda ku tempu e ku su kasá a kuminsá sirbi komo misionero nan tabata yòn, sin eksperensia i tabata sinti falta di kas. El a konta: ‘Un anochi, mi kasá tabatin masha heimwé, i ni maske kiko mi a hasi, mi no por a yud’é. Anto, banda di 7:30 di anochi, un hende a bati na nos porta. Tabata un studiante di Beibel ku a trese tres apelsina pa nos. El a bini pa yama nos bon biní. Nos a invit’é pa drenta i a dun’é un glas di awa. Despues nos a traha te i chukulati kayente. Nos no por a papia swahili ainda, i e no por a papia ingles. Pero for di e dia ei, nos a kuminsá sera amistat ku e rumannan lokal, i nos tabata mas felis.’

13. Dikon ta bon pa nos mustra hospitalidat?

¹³ Bo ta vasilá pa mustra hospitalidat? Si ta asina, lo bo por pèrdè chèns di disfrutá di bon kompania i di sera amistatnan duradero. Es mas, un di e mihó maneranan pa vense soledat ta di mustra hospitalidat. Pero, kisas bo ta puntra bo mes: ‘Dikon algun ruman ta vasilá pa mustra hospitalidat?’ Por tin vários opstákulo. Ban wak algun.

14. Kiko nos por hasi si nos no tin tempu ni energia pa mustra hospitalidat òf aseptá un invitashon?

¹⁴ Tempu i energia: Sirbidónan di Yehova ta hopi drùk i, mayoria di biaha, nos tin hopi responsabilidat. Algun ruman ta pensa ku nan no tin tempu ni energia pa mustra hospitalidat. Si bo ta pensa asina, kisas bo mester analisá bo  skèdjel. Bo por hasi algun kambio pa asina bo por tin tempu i energia pa ta hospitalario òf aseptá un invitashon? Beibel ta urgi nos pa mustra hospitalidat. (Heb. 13:2) No tin nada malu si nos traha tempu pa mustra hospitalidat; mas bien, esei ta e kos korekto pa hasi. Pero, pa nos por hasi esei, nos mester ta dispuesto pa baha man na aktividatnan ménos importante.

15. Dikon algun ruman kisas ta pensa ku nan no por mustra hospitalidat?

¹⁵ Loke bo ta pensa tokante bo mes: Kisas bo ke mustra hospitalidat, pero bo ta sinti bo inkapas? Algun ruman ta tímido i tin miedu ku nan lo no por hiba un kòmbersashon òf ku nan bishitantenan por sinti nan laf. Otro rumannan no tin masha plaka, i nan ta kere ku nunka nan lo por ofresé nan bishitantenan loke otro rumannan sí por. Kòrda, bo kas no mester ta luho; e mester ta na òrdu, limpi i bo bishitantenan mester sinti nan na kas.

16, 17. Kiko por yuda nos si nos ta preokupá ora di invitá hende na nos kas?

¹⁶ Si e idea di invitá hende na bo kas ta hasi bo nèrvioso, bo no ta bo so. Un ansiano na Gran Bretaña a bisa: “Bo por bira nèrvioso ora bo mester prepará pa bishita. Pero manera ta ku tur aspekto di nos sirbishi na Yehova, ora nos ta hospitalario, e benefisio i satisfakshon ku nos ta haña ta surpasá kualke preokupashon. Mi ta pasa momentonan masha dushi ora ami ku mi bishitantenan ta djis bebe kòfi i kòmbersá.” Kòrda ku semper ta bon pa mustra interes den bo bishitantenan. (Flp. 2:4) Kasi tur hende ta gusta konta nan eksperensia di bida. I un di e mihó momentonan ku nos por skucha otro su eksperensia ta na un reunion sosial. Un otro ansiano a skirbi: “Ora mi invitá rumannan di mi kongregashon na mi kas, esei ta yuda mi komprondé nan mihó i ta duna mi tempu pa mi siña konosé nan i haña sa, por ehèmpel, kon nan a bini den e bèrdat.” Si bo mustra interes personal den bo bishitantenan, bo por tin sigur ku boso tur lo disfrutá.

¹⁷ Un ruman muhé pionero, kende hopi biaha a laga rumannan ku tabata asistí na skolnan teokrátiko keda na su kas, a bisa: “Na komienso, mi tabata preokupá pasobra mi kas ta masha simpel i mi muebelnan ta segunda mano. Ma esposa di un di e instruktornan a trankilisá mi. El a bisa mi ku ora e ku su kasá ta sirbi den e trabou di sirkuito, nan mihó simannan ta esnan ku nan ta keda serka personanan spiritual ku no tin hopi kos material pero ku tin mes meta ku nan, esta, di sirbi Yehova i di hiba un bida simpel. Esei a pone mi kòrda loke mi mama tabata bisa nos tempu nos tabata mucha: ‘Mihó un tayó di bèrdura kaminda tin amor.’” (Pro. 15:17) Pues, nos no mester wòri ora di mustra hospitalidat pasobra loke realmente ta importante ta e amor ku nos ta mustra na nos bishitantenan.

18, 19. Kon hospitalidat por yuda bo vense sintimentunan negativo?

¹⁸ Loke bo ta pensa tokante otro hende: Tin un hende den kongregashon ku ta iritá bo? Kisas bo no ke invitá un ruman ku bo no ta gusta òf ku a hasi bo algu ku ta difísil pa bo lubidá. Sinembargo, si bo no hasi nada pa kita e sintimentunan negativo ei, nan lo no bai.

¹⁹ Beibel ta mustra ku bo por mehorá bo relashon ku otronan, asta ku bo enemigunan, ora bo ta hospitalario. (Lesa Proverbionan 25:21, 22.) Hospitalidat por baha tenshon i asta kita sintimentunan negativo. E por yuda bo mira e bon  kualidatnan ku Yehova a mira den e ruman ora ku El a hal’é na e bèrdat. (Huan 6:44) Ora bo ta laga amor motivá bo pa invitá un hende sin ku e ta ferwagt, esei por bira e komienso di un bunita amistat. Kon bo por hasi sigur ku ta amor sinsero ta motivá bo? Un manera ku nos por hasi esei ta di sigui e animashon ku nos ta haña na Filipensenan 2:3, ku ta bisa: “Ku humildat, konsiderá ku otro hende ta superior na boso.” Ta bon pa nos buska pa sa den ki maneranan nos rumannan ta superior na nos. Kisas nan ta superior na nos den nan fe, perseveransia, kurashi òf un otro kualidat kristian. Asina nos lo haña mas amor pa nan i lo ta mas fásil pa nos mustra hospitalidat.

20. Si nos aseptá un invitashon, kiko nos tin ku hasi i dikon?

²⁰ Salmista David a puntra: “O SEÑOR, ken por biba den bo tabernakel?” (Sal. 15:1) Despues, den su deskripshon di un hende ku Yehova ta aseptá den su tabernakel, òf tènt, el a bisa: “Maske e hura den su desbentaha, e no ta kambia esei.” (Sal. 15:4) Pues, si nos aseptá un invitashon, nos no mester kansel’é sin motibu bálido sino nos anfitrion su preparashonnan lo ta pòrnada. (Mat. 5:37) Algun ruman ta kanselá un invitashon pa aseptá un otro ku ta parse mihó. Esei ta amoroso òf respetuoso? En bes di hasi asina, nos mester ta gradisidu pa loke nos anfitrion ta prepará pa nos. (Luk. 10:7) I si nos mester kanselá pa un motibu bálido, nos mester laga nos anfitrion sa mas pronto posibel.

21. Ki kustumbernan lokal un bon invitado ta respetá?

²¹ Ta importante tambe pa nos respetá kustumbernan lokal. Den algun kultura, hende por bishitá otro sin afsprak, miéntras ku na otro lugá ta mihó pa traha afsprak. Algun kaminda, e invitadonan ta haña lo mihó, miéntras ku otro kaminda e invitadonan i e famia ta haña meskos. Na algun lugá, invitadonan ta trese algu, pero otro kaminda nan no tin nodi di trese nada. I den algun kultura, e anfitrion ta ferwagt ku su invitadonan respetuosamente ta nenga e invitashon ún òf dos biaha, miéntras ku otro kaminda, si bo nenga un invitashon, esei por ta un falta di apresio. Laga nos hasi nos bèst pa nos anfitrion sintié bon ku el a invitá nos.

22. Dikon ta masha importante pa nos ta “hospitalario ku otro”?

²² Pedro a bisa ku e “fin di tur kos a yega serka.” (1 Ped. 4:7) Pronto e tribulashon di mas grandi lo tuma lugá. Segun ku e situashon ta bira pió, nos mester stima nos rumannan mas i mas. Awor mas ku nunka nos tin ku sigui e konseho ku Pedro a duna: “Sea hospitalario ku otro.” (1 Ped. 4:9) Sí, ta masha dushi i importante pa nos mustra hospitalidat awor i pa semper.