1, 2. (a) Kon algun mayor ta reakshoná ora ku nan yu ke batisá? (b) Dikon e oradó ta puntra e kandidatonan di boutismo si nan a dediká nan bida na Yehova? (Wak e promé plachi.)

E MAYORNAN di un mucha muhé di nuebe aña, ku nos lo yama Maria, tabata wak segun ku nan yu a lanta para huntu ku e otro kandidatonan di boutismo. Ku un bos fuerte i kla Maria a kontestá e dos preguntanan ku e oradó a hasi. I djis despues, Maria a batisá.

² Maria su mayornan tabata sinti nan orguyoso ku Maria a dediká su mes na Yehova i a batisá. Pero mas promé, Maria su mama tabata un poko preokupá. E tabata puntra su mes: ‘Maria ta muchu chikitu pa batisá? E ta komprondé di bèrdat ku boutismo ta algu serio? No ta mihó pa e warda un poko mas promé ku e batisá?’ Eseinan ta preguntanan ku hopi mayor ku ta stima nan yu ta hasi nan mes ora ku nan yu bisa ku e ke batisá. (Ekl. 5:5) Al fin i al kabo, dedikashon i boutismo ta e pasonan di mas importante den bida di un kristian.—Wak e kuadro “ Bo A Dediká Bo Mes na Yehova?”

3, 4. (a) Ki komparashon apòstel Pedro a hasi pa mustra e importansia di boutismo? (b) Dikon Pedro a kompará boutismo ku konstrukshon di e arka?

 ³ Apòstel Pedro a kompará boutismo ku konstrukshon di e arka di Noe. El a bisa: “Loke ta korespondé ku esaki, esta, boutismo, ta loke ta salba boso tambe awor.” (Lesa 1 Pedro 3:20, 21.) E arka tabata un prueba palpabel ku Noe tabata ke hasi e boluntat di Dios. P’esei, Noe a kumpli fielmente ku e asignashon ku Yehova a dun’é. I debí na Noe su obranan di fe, Yehova a skapa Noe i su famia durante e Diluvio. Awor, kiko Pedro kier a siña nos ku e komparashon akí?

⁴ Ora e hendenan a mira e arka, nan tabata sa ku Noe tabatin fe den Dios. Di mes manera, ora nos mira un hende batisá, nos sa ku e kristian akí a dediká su bida na Yehova pasobra e tin fe den e sakrifisio i resurekshon di Kristu. Meskos ku Noe, disipelnan ku a dediká nan bida na Yehova ta obedesé Dios i ta kumpli ku e trabou ku el a duna nan. Anto meskos ku Yehova a salba Noe den tempu di Diluvio, lo e salba kristiannan batisá i fiel ora e mundu malbado akí yega na su fin. (Mar. 13:10; Rev. 7:9, 10) Pues, dedikashon i boutismo ta pasonan masha importante. De echo, un persona ku ta posponé su boutismo innesesariamente por pèrdè e chèns di biba pa semper.

5. Ki preguntanan nos lo kontestá den e artíkulo akí?

⁵ Awor ku nos ta komprondé kon serio boutismo ta, ta bon pa nos kontestá tres pregunta: Kiko Beibel ta bisa tokante boutismo? Kiko un hende mester hasi promé ku e por batisá? Dikon un kristian semper mester kòrda e importansia di boutismo ora e ta studia ku su yu òf ku un otro studiante di Beibel?

6, 7. (a) Kiko tabata nifikashon di e boutismo ku Huan tabata efektuá? (b) Ken su boutismo tabata úniko, i dikon?

⁶ E promé biaha ku Beibel ta papia tokante boutismo ta ora e ta menshoná ku Huan Boutista tabata batisá hende. (Mat. 3:1-6) E hendenan ku a laga Huan batisá nan a hasi esei pa demostrá ku nan a arepentí di nan pikánan, esta, ku a duel nan ku nan a desobedesé e Lei di Moises. Sinembargo, ta interesante pa nota ku e boutismo di mas importante ku Huan a efektuá no tabatin nada di haber ku arepentimentu. Huan tabatin e privilegio úniko di batisá Hesus, e Yu humano perfekto di Dios. (Mat. 3:13-17) Hesus no tabatin piká, pues e no mester a arepentí. (1 Ped. 2:22) Dikon el a batisá anto? El a batisá pa mustra ku e tabata kla pa hasi e boluntat di Dios.—Heb. 10:7.

⁷ Durante Hesus su sirbishi riba tera, su disipelnan tambe a batisá hende. (Huan 3:22; 4:1, 2) Meskos ku e hendenan ku Huan a batisá, e hendenan ku a laga e disipelnan batisá nan a demostrá ku nan a arepentí di e echo ku nan a desobedesé e Lei di Moises. Pero, despues di e morto i resurekshon di Hesus, boutismo a haña un otro nifikashon.

8. (a) Ki mandamentu Hesus a duna su siguidónan despues di su resurekshon? (b) Dikon un kristian mester batisá?

⁸ Na aña 33, Hesus resusitá a aparesé na mas ku 500 hende hòmber, hende muhé i kisas asta mucha. Podisé tabata na e okashon ei el a bisa: “P’esei bai, i hasi hende di tur nashon mi disipel, i batisá nan den nòmber di e Tata i di e Yu i di spiritu santu, i siña nan kumpli ku tur loke mi a manda boso.” (Mat. 28:19, 20; 1 Kor. 15:6) Sí, ta parse ku sientos di Hesus su siguidónan tabata presente ora el a duna e mandamentu pa hasi disipel. Akinan, Hesus a mustra ku esnan ku ke bira su disipel, òf aseptá su yugo, mester batisá. (Mat. 11:29, 30) Un persona ku ke sirbi Dios na e manera ku Dios ta aprobá mester rekonosé i aseptá e ròl ku Hesus tin den kumplimentu di e propósito di Yehova. Despues, e persona ei por batisá. Esaki ta e úniko boutismo bou di awa ku tin e aprobashon di Dios. Den Beibel tin hopi relato ku ta demostrá ku e disipelnan nobo di Kristu den promé siglo a komprondé e importansia di boutismo i ku nan no a posponé nan boutismo innesesariamente.—Echo. 2:41; 9:18; 16:14, 15, 32, 33.

9, 10. Kiko nos por siña tokante boutismo for di e hòmber di Etiopia i di apòstel Pablo?

⁹ Lesa Echonan 8:35, 36. Laga nos analisá e ehèmpel di e hòmber di Etiopia ku a kombertí na hudaismo. Ora e hòmber akí tabata riba kaminda pa kas, despues di a adorá Yehova na Herúsalèm, un angel a manda Felipe serka dje. I Felipe a “deklará e bon notisia tokante Hesus na dje.” Kon e etiope a reakshoná? El a demostrá bon kla ku di kurason el a apresiá e bèrdatnan ku el a siña i ku e tabata ke kumpli ku Yehova su boluntat. Pues, el a batisá sin tarda.

¹⁰ Un otro ehèmpel ta di Saulo, un hòmber hudiu, ku tabata persiguí e kristiannan. El a nase den e nashon hudiu ku tabata dediká na Yehova pero ku despues a pèrdè nan relashon spesial ku Dios. Saulo tabata sigui e tradishonnan di hudaismo ku zelo. Pero despues, el a siña algu mihó ora ku Hesukristu resusitá mes a papia kuné for di shelu. Kon el a reakshoná? Gustosamente, el a aseptá  yudansa di e disipel Ananías. I Beibel ta bisa ku “el a lanta ariba i a ser batisá.” (Echo. 9:17, 18; Gal. 1:14) Despues el a bira konosí komo apòstel Pablo. Ripará ku Pablo a tuma akshon asina ku el a komprondé e ròl di Hesus den kumplimentu di e propósito di Dios. Sí, el a batisá sin tarda.—Lesa Echonan 22:12-16.

11. (a) Kiko ta motivá studiantenan di Beibel awe pa batisá? (b) Kon nos ta sinti nos ora un studiante di Beibel batisá?

¹¹ Awe, hopi studiante di Beibel, sea ku nan ta yòn òf di edat, ta reakshoná na un manera similar. Komo ku nan tin fe i tin berdadero apresio pa e bèrdatnan di Beibel, nan ta ansioso pa dediká nan bida na Yehova i batisá. De echo, na tur asamblea i kongreso tin un diskurso masha spesial dirigí na esnan ku ta bai batisá. Testigunan di Yehova ta keda masha kontentu ora un studiante di Beibel aseptá e bèrdat i disidí di batisá. Mayornan kristian tambe ta sinti nan masha felis ora nan mira nan yunan entre e disipelnan nobo ku ta bai batisá. Durante e aña di sirbishi 2017, mas ku 284.000 hende ku tabata “dispuesto pa aseptá e bèrdat” a batisá komo símbolo di nan dedikashon na Yehova. (Echo. 13:48) Ta klaru ku e disipelnan nobo akí a komprondé ku un kristian mester batisá. Pero, kiko nan mester a hasi promé ku nan por a batisá?

12. Kiko un studiante di Beibel mester hasi promé ku e por batisá?

¹² Promé ku un studiante di Beibel por batisá, e mester siña e bèrdat tokante Dios, su propósito i loke el a hasi pa salba humanidat. (1 Tim. 2:3-6) Despues, e tin ku kultivá fe a base di e konosementu ei. Anto e fe akí, na su turno, ta motivá e studiante pa rechasá kondukta ku ta desagradá Dios i pa obedesé Yehova su normanan hustu. (Echo. 3:19) Esei ta importante pasobra Dios lo no aseptá e dedikashon di un hende ku ta sigui hasi loke Dios ta odia. (1 Kor. 6:9, 10) Pero un studiante mester hasi mas ku djis obedesé e normanan moral haltu di Yehova. Un hende ku ke dediká su bida na Yehova mester asistí na e reunionnan i partisipá regularmente den e trabou di prediká i di hasi disipel. Hesus a bisa ku ta su berdadero disipelnan lo hasi e trabou ku ta salba bida akí. (Echo. 1:8) Ta despues ku un disipel nobo kuminsá hasi e kosnan akí, e por dediká su bida na Yehova den un orashon privá i despues simbolisá su dedikashon públikamente mediante boutismo.

13. Dikon nos mester kòrda ku studiantenan di Beibel ku ke bira kristian mester batisá?

¹³ Segun ku nos ta studia ku nos yunan òf otro studiantenan di Beibel, nos mester tene na mente ku si nan ke bira berdadero disipel di Hesus, nan mester batisá. Di e manera ei, nos por komuniká na un manera mas kla ku nos studiantenan. Nos lo no tin miedu di buska momentonan apropiá pa papia ku nan tokante e importansia di dedikashon i boutismo. Sí, nos ke pa nos yunan i otro studiantenan di Beibel progresá i batisá.

14. Dikon nos no ta preshoná niun hende pa batisá?

¹⁴ Ta klaru ku niun hende no mester pone preshon riba nan yu òf un otro studiante p’e batisá. Yehova no ta fòrsa niun hende pa sirbié. (1 Huan 4:8) Mas bien, segun ku nos ta studia ku un persona, nos ta yud’é mira e importansia di kultivá un relashon personal ku Dios. Di e manera ei, un studiante ku tin amor sinsero pa e bèrdat i ku ke bira berdadero  disipel di Kristu lo sintié motivá pa batisá.—2 Kor. 5:14, 15.

15, 16. (a) Un hende mester tin un edat spesífiko pa e por batisá? Splika esei. (b) Dikon un studiante di Beibel mester batisá komo Testigu di Yehova asta si el a yega di batisá den otro religion?

¹⁵ Un hende no mester tin un edat spesífiko pa e por batisá. Tur studiante ta diferente, i algun ta progresá mas lihé ku otro. Hopi studiante ta batisá na edat yòn i ta sigui sirbi Yehova fielmente segun ku nan ta bira grandi. Otro studiantenan tabata di edat avansá tempu ku nan a siña e bèrdatnan di Beibel i batisá. Algun di nan tabatin asta mas ku 100 aña!

¹⁶ Un studiante di Beibel di edat avansá, ku atraves di añanan a batisá den diferente religion, a puntra e publikadó ku tabata studia kuné si di bèrdat tabata nesesario pa e batisá atrobe. E studiante i e publikadó a repasá algun teksto di Beibel ku a kontestá su pregunta. E studiante a komprondé kiko Beibel ta siña. I poko tempu despues, el a batisá aunke e tabatin kasi 80 aña. Kiko nos por siña for di e ehèmpel akí? Pa Yehova aseptá nos boutismo, nos mester tin konosementu eksakto di su boluntat. Pues, disipelnan nobo mester batisá asta si nan a yega di batisá den otro religion.—Lesa Echonan 19:3-5.

17. Kiko un studiante mester pensa ariba dia di su boutismo?

¹⁷ E dia ku un studiante batisá ta un dia masha gososo. Pero esei ta un okashon tambe pa e studiante pensa seriamente riba e esfuerso ku e tin ku hasi pa kumpli ku su dedikashon. De echo, disipelnan di Hesus no mester “biba mas pa nan mes, ma pa esun ku a muri pa nan i a ser lantá for di morto.”—2 Kor. 5:15; Mat. 16:24.

18. Ki preguntanan nos lo kontestá den e siguiente artíkulo?

¹⁸ Manera nos a siña den e artíkulo akí, e desishon pa bira un disipel di Kristu ta un desishon masha serio. Ta p’esei, e mama di Maria a hasi su mes e preguntanan ku nos a menshoná na komienso di e artíkulo akí. Si bo ta un mayor, podisé bo tambe ta puntra bo mes: ‘Di bèrdat mi yu ta kla pa batisá? E tin sufisiente konosementu pa Yehova aseptá su dedikashon? Awor kiko di su metanan relashoná ku skol òf ku un karera? E mester kaba enseñansa superior òf haña un trabou promé ku e batisá? Kiko si mi yu kometé un piká serio despues ku e batisá?’ Den e siguiente artíkulo, nos lo kontestá e preguntanan akí i mira kon mayornan kristian por tin un punto di bista balansá di boutismo.