1. Kiko hopi hende ta mira ora nan bini nos reunionnan pa promé biaha? (Wak e plachi.)

 IMAGINÁ un pareha kasá ku pa promé biaha ta bai un reunion na Salòn di Reino. Nan ta keda masha impreshoná ora nan ta mira kon amigabel e rumannan ta i e amor ku tin entre nan. Na kaminda pa kas, e esposa ta bisa su esposo: “E Testigunan di Yehova ta apart, m’a gusta nan.”

2. Dikon algun hende a stòp di sirbi Yehova?

² E amor ku tin den e kongregashon kristian ta hopi spesial. Sinembargo, Testigunan di Yehova no ta perfekto. (1 Huan 1:8) P’esei, mas nos siña konosé e rumannan, probablemente mas bisto nan fayonan ta bira. (Rom. 3:23) Lamentablemente, algun a permití imperfekshon- òf fayonan di otro pone nan stòp di sirbi Yehova.

3. Kiko ta identifiká un berdadero kristian? (Huan 13:34, 35)

³ Wak e teksto sentral di e artíkulo akí atrobe. (Lesa Huan 13:34, 35.) Bo a ripará kiko lo a identifiká berdadero kristian? Amor, no perfekshon. Ripará tambe ku Hesus no a bisa: ‘Na esaki boso lo sa ku boso ta mi disipelnan.’ Ma el a bisa: “Na esaki tur hende lo sa ku boso ta mi disipelnan.” Pues, Hesus a indiká ku ta posibel pa tantu su siguidónan komo otro hende rekonosé su berdadero  siguidónan na e echo ku nan ta stima otro di bèrdat.

4. Kiko algun hende kisas ta puntra nan mes?

⁴ Hende ku no ta Testigu di Yehova kisas por puntra nan mes: ‘Den ki sentido amor por yuda mi sa ken ta Hesus su berdadero siguidónan? Kon Hesus a mustra amor na su apòstelnan? I kon ami por imitá Hesus su ehèmpel?’ Lo ta bon pa nos ku ta Testigu hasi nos mes e preguntanan ei. Ora nos hasi esei lo e yuda nos stima nos rumannan asta mas, foral ora nos tin ku trata ku nan imperfekshonnan.—Efe. 5:2.

5. Splika kiko Hesus tabata ke men na Huan 15:12 i 13.

⁵ Hesus a bisa ku su siguidónan lo stima otro na un manera spesial. (Lesa Huan 15:12, 13.) Ripará e mandamentu ku el a duna nan: “Stima otro meskos ku ami a stima boso.” Kiko Hesus tabata ke men ku esei? Wèl, manera el a sigui splika, e tabata ke pa nan stima otro mas ku nan mes. E tipo di amor ei lo laga ku un kristian ta dispuesto pa muri pa su ruman. b

6. Kon Dios su Palabra ta siña nos ku amor ta hopi importante?

⁶ Dios su Palabra ta siña nos ku amor ta hopi importante. Por ehèmpel, e ta bisa: “Dios ta amor.” (1 Huan 4:8) “Stima bo próhimo meskos ku bo mes.” (Mat. 22:39) “Amor ta tapa un multitut di piká.” (1 Ped. 4:8) “Amor no ta kaba nunka.” (1 Kor. 13:8) Pa hopi hende, eseinan ta algun di nan tekstonan faborito. Tantu e tekstonan ei komo otro teksto ta siña nos kon importante ta pa demostrá amor.

7. Dikon Satanas no por logra ku hende ta uni i stima otro?

 ⁷ Hopi hende ta puntra nan mes: ‘Kon mi por sa kua ta e religion berdadero? Tur ta bisa ku nan ta siña hende e bèrdat, pero kada un ta siña kosnan diferente tokante Dios.’ Satanas a logra bruha hopi hende pasobra el a krea un kantidat di religion falsu ku ta pone ku ta difísil pa hende haña sa kua ta esun berdadero. Pero, tin un kos sí ku e no por hasi. E no por logra ku hende di diferente pais ta uni i stima otro. Ta Yehova so por hasi esei. Nos sa esei pasobra amor berdadero ta bini di Yehova i ta solamente ku su spiritu santu i bendishon su sirbidónan por stima otro di bèrdat. (1 Huan 4:7) No ta nada straño anto ku Hesus a bisa ku amor berdadero ta loke lo identifiká su berdadero siguidónan.

8-9. Kon algun hende a sinti ora nan a mira e amor ku tin entre Testigunan di Yehova?

⁸ Manera Hesus a bisa, hopi hende lo rekonosé su berdadero siguidónan na e amor ku nan tin pa otro. Esei ta loke a pasa ku un ruman ku yama Ian. E ta kòrda ku e promé biaha ku el a bai un kongreso ta na un stadion serka di su kas. El a yega di bai e mesun stadion ei algun luna promé pa wak un wega. El a bisa: “E ambiente tabata kompletamente diferente. E Testigunan tabata amabel, nèchi bistí i e muchanan tabatin bon manera.” El a sigui bisa: “Es mas, mi por a mira ku nan tabata hopi kontentu i tabatin pas mental, algu ku mi tambe tabata ke den mi bida. Mi no ta kòrda niun diskurso, pero mi no ta lubidá nunka mas e kondukta di e Testigunan.” c Loke Ian a eksperensiá ei ta debí na e berdadero amor ku Testigunan tin pa otro. Dor ku nos ta stima nos rumannan asina tantu, nos ta respetá nan i ta trata nan bon.

⁹ Un ruman ku yama John a pasa den algu similar ora el a kuminsá bai reunion. El a bisa: “Loke a impreshoná mi tabata kon amabel tur hende tabata ku otro—m’a pensa ku nan mester ta perfekto. E amor ku tabatin entre nan a konvensé mi ku m’a haña e religion berdadero.” d Bes tras bes, tipo di eksperensia asina a proba ku Testigunan di Yehova ta e berdadero kristiannan.

10. Na ki momento por ta difísil pa demostrá ku di bèrdat nos stima nos rumannan? (Wak e nota na pia di página.)

¹⁰ Manera nos a mira na kuminsamentu, niun di nos rumannan no ta perfekto. Tardi òf trempan nan lo bisa òf hasi kos ku lo ofendé nos òf traha riba nos nèrvio. e (Sant. 3:2) Na e momentonan ei, kisas por ta difísil pa nos sigui demostrá ku di bèrdat nos stima nan. Kiko por yuda nos reakshoná na e manera korekto? Ban wak e ehèmpel di Hesus.—Huan 13:15.

11. Kiko Santiago i Huan a demostrá na un okashon? (Wak e plachi.)

¹¹ Hesus no a ferwagt perfekshon di su siguidónan. Na lugá di esei, el a  yuda nan traha riba nan personalidat di manera ku nan por a gana Yehova su aprobashon. Na un okashon, Santiago i Huan, dos di Hesus su apòstelnan, a manda nan mama pa pidi Hesus duna nan un lugá importante den e Reino. (Mat. 20:20, 21) Loke nan a hasi ei a demostrá ku nan tabata orguyoso i ambisioso.—Pro. 16:18.

12. Ta Santiago i Huan so mester a traha riba nan personalidat? Splika.

¹² Na e okashon ei a bira bisto ku no ta solamente Santiago i Huan mester a traha riba nan personalidat. Ripará kon e otro apòstelnan a reakshoná: “Ora e otro diesnan a tende di esaki, nan no a keda niun tiki kontentu ku e dos rumannan.” (Mat. 20:24) Nos por djis imaginá kiko a sosodé entre Santiago, Huan i e otro apòstelnan. Kisas nan a bisa Santiago i Huan: ‘Ken boso ta kere boso ta pa pidi un lugá importante den e Reino? No ta bosnan so a traha duru huntu ku Hesus; nos tambe a traha duru. No ta boso so meresé un lugá importante den e Reino!’ Sea kual sea e kaso, pa un ratu e apòstelnan a permití e situashon akí stroba nan amor pa otro.

13. Kon Hesus a reakshoná ora ku su apòstelnan a faya? (Mateo 20:25-28)

¹³ Kon Hesus a trata ku e situashon ei? E no a rabia. Ni tampoko e no a bisa ku  lo el a bai skohe otro apòstel ku tabata mas humilde i ku semper lo a stima otro. En bes di esei, ku pasenshi el a papia ku nan pasobra e tabata sa ku nan tabata ke hasi loke ta korekto. (Lesa Mateo 20:25-28.) Esaki no tabata e promé ni e último biaha ku e apòstelnan a diskutí tokante ken tabata esun di mas grandi. Asina mes, Hesus a sigui trata nan ku amor.—Mar. 9:34; Luk. 22:24.

14. Den ki tipo di ambiente Hesus su apòstelnan a krese?

¹⁴ Sin duda, Hesus a tene kuenta ku e ambiente ku su apòstelnan a lanta aden. (Huan 2:24, 25) E tempu ei, segun e lidernan religioso, pa bo ta importante bo mester tin un posishon haltu. (Mat. 23:6) Es mas, e lidernan religioso tabata sinti ku nan tabata mihó ku otro hende. f (Luk. 18:9-12) Hesus tabata sa ku tur e kosnan ei lo a afektá e manera ku su apòstelnan tabata mira nan mes i otro hende. (Pro. 19:11) P’esei e no a ferwagt perfekshon di nan. E tabatin pasenshi ku nan ora ku nan a faya. E tabata sa ku nan tin bon kurason, i p’esei el a yuda nan pone nan ambishon i orguyo un banda i a siña nan bira hende mas humilde ku stima otro.

15. Kiko nos ta siña for di loke a pasa entre Santiago ku Huan i e otro apòstelnan?

¹⁵ Nos por siña hopi for di loke a pasa entre Santiago ku Huan i e otro apòstelnan. Pa kuminsá, nan tabata robes pa pidi un lugá importante den e Reino. Pero e otro apòstelnan tambe a hasi robes; nan no a hasi nan esfuerso pa keda uní. Asina mes, Hesus a trata tur su 12 apòstelnan ku amor. Ki lès nos ta siña for di esei? Nos ta siña ku nos no por djis wak loke e hende a hasi fout. Nos tin ku wak tambe kon nos ta reakshoná. Kiko por yuda nos reakshoná na e manera korekto? Ora nos ta rabiá ku un ruman, nos tin ku puntra nos mes: ‘Dikon e kos ku e ruman ei a hasi a traha asina tantu riba mi nèrvio? Kisas e kos ei ta saka na kla algu ku ami tin ku traha riba dje? E ruman ku a pone mi rabia ta pasando den difikultat? Asta si mi ta sinti ku mi tin tur mi derecho di rabia, mi por demostrá amor tòg i djis pordoná e otro persona?’ Mas nos trata otro ku amor, mas nos ta demostrá ku nos ta berdadero siguidónan di Hesus.

16. Kiko mas nos por siña for di Hesus?

¹⁶ Algu mas ku nos ta siña di Hesus ta ku nos tin ku purba di komprondé nos rumannan. (Pro. 20:5) Ta bèrdat ku Hesus sí por lesa kurason pero nos nò. Ma loke sí nos por hasi ta tene pasenshi ku nos rumannan ora nan iritá nos. (Efe. 4:1, 2; 1 Ped. 3:8) I lo ta hopi mas fásil pa hasi esei si nos siña konosé nos rumannan mihó. Laga nos wak un ehèmpel di esei.

17. Dikon tabata bon ku un superintendente di sirkuito a siña konosé un ruman mihó?

¹⁷ Un superintendente di sirkuito na Ost Afrika ta kòrda un ruman ku tabatin un karakter hopi difísil. E no tabata bai bon ku niun hende. Kiko e superintendente  di sirkuito a hasi? El a konta: “Na lugá di evitá di trata ku e ruman ei, m’a disidí di siña konos’é mihó.” Ora el a hasi esei, el a bin haña sa kon e ruman akí a wòrdu lantá i kon esei a afektá su manera di trata otro hende. E superintendente di sirkuito a sigui bisa: “Unabes m’a komprondé kuantu e ruman akí a lucha ku su karakter i tur e progreso ku el a hasi, m’a atmir’é. Nos a bira bon amigu.” Pues, unabes nos purba di komprondé nos rumannan lo ta mas fásil pa stima nan.

18. Kua pregunta nos por hasi nos mes si un ruman a ofendé nos? (Proverbionan 26:20)

¹⁸ Tin biaha nos ta sinti ku nos no por laga e kos bai i ku nos tin ku papia ku e ruman ku a ofendé nos. Pero promé ku nos hasi esei, lo ta bon pa nos puntra nos mes: ‘Di bèrdat mi sa kiko a pasa?’ (Pro. 18:13) ‘Ta pa malu e ruman a hasi e kos ei?’ (Ekl. 7:20) ‘Ami a yega di hasi e kos ei ku un otro hende? (Ekl. 7:21, 22) ‘Si mi bai papia ku e ruman, mi ta bai drecha e asuntu òf hasié pió?’ (Lesa Proverbionan 26:20.) Ora nos pensa riba e preguntanan ei, kisas nos ta realisá ku ta mihó pa nos laga e kos para, stima e ruman i pordon’é.

19. Kiko bo ta determiná pa hasi?

¹⁹ Testigunan di Yehova ta demostrá ku nan ta berdadero disipel di Kristu. I kada un di nos ta demostrá esei ora ku apesar di e fayonan di nos rumannan, nos ta stima nan di kurason. Ora nos ta hasi esei nos lo por yuda otro hende mira ku esaki ta e religion berdadero i kisas nan lo djòin nos den sirbi Yehova, e Dios di amor. P’esei, laga nos ta determiná pa sigui demostrá e amor ku ta proba ku nos ta berdadero kristian.