Dikon “Fulano di tal” a bisa ku si e kasa ku Rut, esei lo “baha balor” di su herensia? (Rut 4:1, 6, nota)

Den tempu di Beibel, kiko lo a pasa ku tereno di un hòmber kasá ku a muri sin ku e tabatin yu? I kon lo a para ku su nòmber? Su nòmber lo disparsé pa semper? Lei di Moises a kontestá e preguntanan ei.

Si un hòmber ku tabatin tereno a muri, un ruman hòmber di dje òf un famia yegá por a heredá e tereno. Òf, si un hòmber bira pober i mester a bende su tereno, su ruman òf famia yegá por a kumpr’é, ya asina e tereno lo por a keda den famia.—Lev. 25:23-28; Num. 27:8-11.

Kiko tabata hasi pa preservá nòmber di e hòmber ku a muri? Ruman hòmber di e defuntu lo a kasa ku e biuda i haña yu kuné. Asina ei, e yu lo a bin karga nòmber di e defuntu i heredá su propiedat. Den kaso di Rut, nan a sigui e areglo ei ku yama matrimonio di sua. Esei tabata algu bondadoso i tambe un protekshon pa e biuda.—Deu. 25:5-7; Mat. 22:23-28.

Wak loke a pasa ku Noemí. E tabata kasá ku Elímelèk. Pero ora su kasá i su dos yu hòmbernan a muri, e no tabatin niun hende hòmber mas den e famia pa kuid’é. (Rut 1:1-5) Ora Noemí a bai bèk Huda, el a manda Rut pa pidi Bóaz pa saka nan for di difikultat, esta, pa kumpra nan tereno bèk. Bóaz tabata un famia yegá di Elímelèk. (Rut 2:1, 19, 20; 3:1-4) Pero Bóaz tabata sa ku tabatin un otro hòmber ku Beibel ta yama “Fulano di tal” i ku tabata famia mas yegá kuné. Pues, “Fulano di tal” tabatin mas derecho pa fungi komo reskatadó.—Rut 3:9, 12, 13.

Na promé instante, “Fulano di tal” no tabatin problema pa yuda. (Rut 4:1-4) Aunke e tabata sa ku e mester a saka un tiki sèn, e tabata sa tambe ku Noemí no por a haña un yu ku por a heredá e tereno di Elímelèk. Pues, e ora ei e tereno lo a bira parti di su herensia i esei lo a kumbiní é.

Pero, ora “Fulano di tal” a haña sa ku ta ku Rut e tin ku kasa, el a bisa: “Mi no por kumpr’é, pasobra esei lo por baha balor di mi herensia.” (Rut 4:5, 6) Dikon el a kambia di idea?

Si Fulano di tal òf un otro hende lo a kasa ku Rut i Rut lo a haña un yu hòmber, e yu hòmber ei lo a heredá Elímelèk su tereno. Kon esei lo por a “baha balor” di “herensia” di Fulano di tal? Beibel no ta bisa, pero ban wak algun posibel motibu.

• Pa di promé, si Rut lo a haña un yu hòmber, Fulano di tal lo por a sinti ku el a benta su sèn afó, pasobra e tereno lo no a bira di dje.

• Di dos, lo e tabatin e responsabilidat pa kuida tantu Rut komo Noemí.

• Di tres, si Rut lo a haña mas yu ku Fulano di tal, e yunan ei lo tabatin e mesun derecho riba su herensia ku e otro yunan ku e tabatin.

• Di kuater, si Fulano di tal mes no tabatin yu, e ora ei, e yu hòmber ku lo el a haña ku Rut lo tabatin derecho riba tantu Elímelèk su tereno komo esun di Fulano di tal. Pues, ora Fulano di tal muri, su tereno lo a bai pa un yu ku a karga nòmber di Elímelèk i no esun di dje. Fulano di tal no kier a kore e rísiko ei dor di yuda Noemí. El a preferá pa laga Bóaz kumpra e tereno. I Bóaz tabata ke hasi esei “pa e herensia por bini bèk riba nòmber di e defuntu.”—Rut 4:10.

Ta parse ku Fulano di tal tabata mas interesá den preservá su mes nòmber i su herensia. E tabata un hòmber egoista. I aunke ku Fulano di tal a hasi tur su esfuerso pa preservá su nòmber, awe nos no sa mes kon yam’é. Es mas, e no a haña e bunita privilegio ku Bóaz sí a haña, bira un di e antepasadonan di e Mesías, Hesukristu. Wak kuantu kos Fulano di tal a pèrdè pasobra e tabata egoista i no kier a yuda un hende ku tabata den nesesidat!—Mat. 1:5; Luk. 3:23, 32.