1. Kiko ta e kos ku mas mayornan ke pa nan yunan?

 MAYORNAN, nos sa ku e kos ku mas boso ke ta pa boso yunan siña konosé i stima Yehova. Pero kon nan por hasi esei si Dios ta invisibel? I kon boso por yuda boso yunan mira ku di bèrdat e ta eksistí i ku nan por bira su amigu?—Sant. 4:8.

2. Kon mayornan por siña nan yunan tokante Yehova su kualidatnan?

² Ta bèrdat ku un manera importante pa siña yunan tokante Yehova ta di studia Beibel ku nan. (2 Tim. 3:14-17) Pero Beibel ta mustra ku tin un otro manera mas pa siña nan konosé Yehova. Den e buki di Proverbionan nos ta lesa di un tata ku kier a kòrda su yu pa nunka no pèrdè for di bista Yehova su kualidatnan ku ta bisto den kreashon. (Pro. 3:19-21) Awor, laga nos trata algun manera ku mayornan por usa kreashon pa siña nan yunan tokante Yehova su personalidat.

3. Kiko mayornan tin ku yuda nan yunan mira?

³ Beibel ta bisa ku Dios “su kualidatnan invisibel, esta, su poder eterno i Divinidat, ta ser mirá bon kla for di kreashon di mundu padilanti, ya ku nan ta bisto den e kosnan trahá.” (Rom. 1:20) Generalmente, mayornan gusta pasa tempu ku nan yunan den naturalesa. Usa e tempu ei pa yuda bo yunan mira e konekshon entre “e kosnan trahá” i e kualidatnan maravioso di Yehova. Ku  esei na mente, laga nos wak kiko abo komo mayor por siña for di Hesus.

4. Kon Hesus a usa kreashon pa siña su disipelnan lèsnan importante? (Lukas 12:24, 27-30)

⁴ Wak kon Hesus a usa kreashon pa siña su disipelnan lèsnan importante. Tabatin un biaha ku Hesus a bisa nan pa opservá e raf- i lelinan. (Lesa Lukas 12:24, 27-30.) Hesus por a skohe kualke otro bestia òf mata, pero el a skohe un para i un flor ku su disipelnan tabata bon konosí kuné. Muy probablemente nan lo por a mira e rafnan ta bula i e lelinan ta floria nèt ei banda. Pues, bo por djis imaginá kon Hesus tabata mustra riba e kosnan ei segun ku e tabata papia ku su disipelnan. Pero, bo a ripará ku nèt despues ku el a menshoná e raf- i lelinan el a siña su disipelnan un lès importante tokante generosidat i bondat di nan Tata den shelu? Sí, el a siña nan ku Yehova lo alimentá i bisti su fiel sirbidónan meskos ku e ta hasi pa e raf- i lelinan.

5. Kon mayornan por usa kreashon pa siña nan yunan tokante Yehova?

⁵ Mayornan, ora boso ta siña boso yu, hasi meskos ku Hesus. Kon asina? Kont’é tokante algu ku boso gusta di kreashon. Por ehèmpel, tokante bo bestia òf mata faborito. I segun ku bo ta hasi esei, hasi sigur di splik’é kiko e kos ei ta siña bo tokante Yehova. Despues, puntr’é kiko ta su mata òf bestia faborito. Si bo usa algu di kreashon ku ya e gusta, chèns ta grandi ku lo e presta hopi mas atenshon ora bo papia tokante Yehova su kualidatnan.

6. Kiko nos ta siña for di loke Christopher su mama tabata hasi?

⁶ Esei no ke men ku mayornan tin ku dediká hopi tempu ta investigá detayenan di un sierto mata òf bestia. Ripará ku Hesus no a duna un splikashon largu i detayá tokante tur e kosnan ku e rafnan ta kome òf kon e sèlnan di un leli ta hinká den otro. Asta si bo yu gusta siña tokante e detayenan di e kosnan ku Yehova a krea, tin biaha djis un simpel komentario òf pregunta ta sufisiente. Wak loke un ruman ku yama Christopher ta kòrda tokante su infansia. El a konta: “Mi mama tabata djis menshoná algu simpel pa yuda nos apresiá kreashon. Por ehèmpel, ora nos tabata pasa banda di serunan, e tabata bisa: ‘Wak kon grandi i bunita e serunan ei ta! Bo no ta haña ku Yehova ta asombroso?’ Òf, ora nos tabata pasa serka di laman, e tabata bisa: ‘Wak kuantu forsa e olanan ei tin! Yehova mester tin hopi poder.’” Christopher a sigui konta: “Aunke e kosnan ku mi mama tabata bisa tabata simpel, nan a pone nos pensa sí.”

7. Kon bo por siña bo yunan pa opservá kreashon?

⁷ Segun ku bo yunan ta krese, siña nan meditá riba kreashon pa nan por siña mas tokante Yehova. Por ehèmpel, bo por papia tokante un kos ku Yehova a krea i djei puntra nan: “Kiko esaki ta siña boso di Yehova?” Lo bo keda sorprendí di loke nan lo bisa.—Mat. 21:16.

8. Kiko e mayornan israelita por a hasi ora nan tabata “kana riba kaminda” ku nan yunan?

⁸ E israelitanan a haña instrukshon pa siña nan yunan tokante Yehova su mandamentunan ora ku nan tabata “kana riba kaminda.” (Deu. 11:19) Na Israel, e kamindanan tabata pasa den kunuku i  nan por a mira un variedat di bestia, para i flor. Pues, e mayornan israelita por a probechá di e oportunidatnan ei pa lanta kuriosidat di nan yunan den e kosnan ku Yehova a krea. Komo mayor, bo por hasi meskos. Laga nos wak kon algun mayor a hasi esei.

9. Kiko bo ta siña di Punitha i Katya?

⁹ Punitha, un mama ku ta biba den un stat grandi na India, a bisa: “Ora nos bai bishitá famia den kunuku, nos ta mira esei komo un bon chèns pa siña nos yunan tokante Yehova su bunita kreashon. Mi ta sinti ku ta mas fásil pa mi yunan siña di kreashon ora nan ta leu for di e bochincha di tráfiko den stat.” Mayornan, nunka mas boso yunan lo no lubidá e tempu ku boso a pasa huntu ku nan na un lugá bunita den naturalesa. Katya, un ruman di Moldavia, a bisa: “E kosnan ku mas mi ta kòrda di mi infansia ta e tempu ku m’a pasa ku mi mayornan den naturalesa. Mi ta hopi kontentu ku for di chikitu mi mayornan a siña mi pa para ketu i opservá loke Yehova a krea i pa mira loke nan ta siña mi di dje.”

10. Kiko mayornan por hasi si ta difísil pa sali for di stat? (Wak e kuadro “ Yudansa pa Mayornan.”)

¹⁰ Kiko si ta difísil pa abo i bo famia sali for di stat? Amol, kende tambe ta biba na India, a bisa: “Kaminda mi ta biba, mayornan tin ku traha oranan largu i pa biaha sali for di stat ta hopi karu. Pero, tòg nos por bai un parke òf para riba balkon pa opservá kreashon i papia tokante Yehova su kualidatnan.” Si bo wak bon, probablemente lo bo mira ku rònt di bo kas tin kosnan ku Yehova a krea ku bo por mustra bo yunan. (Sal. 104:24) Kisas lo bo mira para, insekto, mata i otro kos. Karina, di Alemania, a  bisa: “Mi mama gusta flor. P’esei ora mi tabata chikitu i nos tabata sali keiru, e tabata mustra mi tur e flornan bunita.” Mayornan, boso por usa vidio- i publikashonnan di e organisashon ku ta papia tokante kreashon pa siña boso yunan. Pues, no ta importá unda bo ta biba, bo por yuda bo yunan opservá e kosnan ku Yehova a krea. Awor laga nos trata algun di Yehova su kualidatnan ku bo por siña bo yunan tokante dje.

11. Kon mayornan por yuda nan yunan mira Yehova su amor?

¹¹ Pa yuda bo yunan komprondé Yehova su amor, laga nan wak kon bestia ta kuida nan yunan. (Mat. 23:37) Tambe bo por papia ku nan tokante e bunita variedat ku tin den kreashon. Karina, menshoná na paragraf 10, a bisa: “Ora nos tabata sali bai kana, mi mama tabata animá mi pa para ketu i opservá kon diferente kada flor ta i kon su bunitesa ta reflehá Yehova su amor. Te awe, ora mi mira flor, mi ta para ketu pa opservá nan koló i diseño. Tur esei ta kòrda mi kuantu Yehova ta stima nos.”

12. Kon mayornan por yuda nan yunan mira kon sabí Yehova ta? (Salmo 139:14) (Wak e plachi.)

¹² Yuda bo yunan mira kon sabí Yehova ta kompará ku kualke otro persona. (Rom. 11:33) Por ehèmpel, splika nan kon awa ta subi bai laira bira nubia i kon e nubianan fásilmente ta hiba e awa di un lugá pa otro. (Yòb 38:36, 37) Papia ku nan tambe tokante kon maravioso nos kurpa ta. (Lesa Salmo 139:14.) Wak kon un tata ku yama Vladimir a hasi esei. El a konta: “Un dia, nos yu tabata kore su baiskel i el a kai raspa su pia. Djis un par di dia despues su pia a kura. Nos a splik’é ku Yehova a traha nos sèlnan ku e abilidat pa drecha nan mes. Nos a bis’é tambe ku nos no por mira esei den niun di e kosnan ku hende a traha. Si un outo dal, e no por drecha su mes. Loke nos a splik’é ei a yud’é mira kon sabí Yehova ta.”

13. Kon mayornan por yuda nan yunan mira Dios su poder? (Isaías 40:26)

¹³ Na Isaías 40:26 Yehova ta pidi nos  pa hisa nos wowo wak ariba i pensa kon e ta usa su poder pa tene tur e kosnan den shelu na nan lugá. (Les’é.) Bo tambe por animá bo yunan pa wak shelu i pensa riba loke nan ta mira. Tingting, un ruman muhé di Taiwan, ta kòrda algu ku a pasa kuné tempu e tabata mucha. El a konta: “Un biaha ami ku mi mama a bai kamper, i nos por a mira hopi strea. E tempu ei mi tabata lucha ku preshon di pareu i no kier a faya ku Yehova. Mi mama a animá mi pa mi pensa riba kuantu poder Yehova a usa pa krea tur e streanan ei i pa kòrda ku lo e usa e mesun poder ei pa yuda mi keda fiel den kualke prueba. Despues di a opservá kreashon e biaha ei, mi kier a konosé Yehova mihó i sirbié pa semper.”

14. Kon mayornan por usa kreashon pa yuda nan yunan mira ku Yehova ta un Dios felis?

¹⁴ Kreashon ta siña nos ku Yehova ta un Dios alegre i tin sentido di humor. Sientífikonan a konstatá ku mayoria di bestia gusta hunga, inkluso para i piská. (Yòb 40:20) Kisas bo a yega di haña bo yunan bou di harimentu pasó un yu di pushi ta hunga ku un bòl di hilu òf un yu di kachó ta kore tras di su mes rabu. Wèl, e siguiente biaha ku bo mira bo yunan ta hari pa e kosnan prèt ku un bestia ta hasi, yuda nan kòrda ku nos ta sirbi un Dios felis.—1 Tim. 1:11.

15. Kiko por yuda mayornan haña sa loke nan yunan ta pensa? (Proverbionan 20:5) (Wak e plachi.)

¹⁵ Mayornan sa ku nan yunan ta pasa den hopi difikultat. Pero, tin biaha ta difísil pa nan haña sa kiko nan yunan ta luchando kuné. Kiko bo por hasi pa bo yu habri i konta bo loke ta pasando den su mente? (Lesa Proverbionan 20:5.) Algun mayor tabatin bon resultado ora nan a bai kana ku nan yunan den naturalesa. Kon bin? Un motibu ta pasobra tin ménos distraishon pa tantu e mayornan komo e yunan. Masahiko, un tata na Taiwan, a menshoná un otro motibu. El  a konta: “Ora nos pasa tempu den aire liber ku nos yunan, por ehèmpel kanando den seru òf kantu di laman, generalmente nan ta sinti nan mas trankil. E ora ei ta mas fásil pa nos papia ku nan i haña sa loke nan ta pensa.” Katya, menshoná na paragraf 9, a konta: “Despues di skol, mi mama tabata bai ku mi na un parke masha bunita. Den e ambiente relahá ei, tabata hopi mas fásil pa kont’é kiko tabata pasando ku mi na skol i kiko tabata preokupá mi.”

16. Kon famianan por disfrutá di kreashon?

¹⁶ Kreashon ta duna famianan chèns tambe pa relahá i dibertí, i esei ta hala nan mas serka di otro. Beibel ta bisa ku tin “un tempu pa hari” i “un tempu pa bula rònt.” (Ekl. 3:1, 4, nota) Yehova a krea lugánan bunita kaminda nos por kore, landa, hunga i hasi e kosnan ku nos ta gusta. Hopi famia gusta pasa tempu huntu den áreanan den naturalesa, mondi, seru òf playa. Algun mucha gusta kore i hunga den parke, opservá bestia i landa den riu, lago òf laman. Pues, tin hopi oportunidat pa disfrutá di naturalesa i di e kosnan ku Yehova a krea.

17. Dikon mayornan tin ku siña nan yunan stima Yehova su kreashon?

¹⁷ Den e mundu nobo, tantu mayornan komo nan yunan lo disfrutá di loke Yehova a krea manera nunka promé. Nos lo no tin miedu di bestia ni nan tampoko lo no tin miedu di nos. (Isa. 11:6-9) Nos lo bai tin tur tempu di mundu pa disfrutá di loke Yehova a krea. (Sal. 22:26) Pero mayornan, no warda te ora ku e mundu nobo yega pa kuminsá siña boso yunan stima kreashon. Si for di awor boso usa kreashon pa siña boso yunan tokante Yehova, sigur nan lo sinti meskos ku David ora el a bisa: “O Yehova, esta hopi bo obranan ta!”—Sal. 104:24.