1-2. Kiko un hende tin ku hasi promé ku e batisá?

 DEN e sinku añanan ku a pasa, mas ku un mion hende a batisá komo Testigu di Yehova. Entre nan tabatin hopi ku a siña e bèrdat “for di chikitu,” meskos ku Timoteo di promé siglo. (2 Tim. 3:14, 15) Otro a siña tokante Yehova komo adulto, algun asta na edat basta avansá. Algun aña pasá, un señora ku tabata studia Beibel ku Testigunan di Yehova a batisá ku 97 aña.

² Bo ta studia Beibel ku Testigunan di Yehova? Òf, bo mayornan ta Testigu i ta lantando bo den e bèrdat? Sea kual sea e kaso, kisas bo tin planiá pa batisá. Anto esei ta un bon meta! Pero tin algu ku bo tin ku hasi promé ku bo batisá, esei ta di dediká bo bida na Yehova. Den e artíkulo akí lo bo haña sa kiko esei ta enserá. Tambe lo bo mira dikon bo no mester tin miedu pa dediká bo bida na Yehova i batisá ora bo ta kla pa esei.

KIKO DEDIKASHON TA?

3. Duna ehèmpel di algun hende den Beibel ku tabata dediká na Yehova.

³ Den Beibel, un hende dediká na Dios ta un hende apartá pa un motibu sagrado. E israelitanan tabata un nashon dediká na Yehova. Pero algun israelita tabata dediká, esta, apartá, pa un motibu spesial. Por ehèmpel, Yehova a skohe Áròn pa ta sumo saserdote di Israel. P’esei, Áròn tabatin na e parti dilanti di su tulband un plachi  di oro ku ‘a duna prueba ku e tabata dediká na Dios.’ (Lev. 8:9) E nazareonan tambe tabata dediká na Yehova pa un motibu masha spesial. E palabra “nazareo” ta bini di e palabra hebreo nazír, ku ta nifiká “separá pa” òf “dediká na.” Un nazareo mester a tene su mes na e restrikshonnan skirbí den Lei di Moises.​—Num. 6:2-8.

4. (a) Den nos kaso, kiko dediká na Yehova ta nifiká? (b) Kiko “nenga” bo mes ta enserá? (Wak e plachi.)

⁴ Den nos kaso, dediká na Yehova ta nifiká skohe pa bira disipel di Hesukristu i hasi e boluntat di Dios e kos di mas importante den bo bida. Kiko esei ta enserá? Hesus a bisa: “Si un hende ke sigui mi, lag’é nenga su mes.” (Mat. 16:24) Ora bo ta dediká na Yehova, bo mester bisa nò na tur kos ku no ta agradá Yehova. (2 Kor. 5:14, 15) Esei ta enserá bisa nò na “e obranan di karni,” manera inmoralidat seksual. (Gal. 5:19-21; nota; 1 Kor. 6:18) Lo ta difísil pa hasi esei? No si bo ta stima Yehova i ta konvensí ku su leinan ta pa bo mes bon. (Sal. 119:97; Isa. 48:17, 18) Un ruman ku yama Nicholas a splika: “Bo por mira Yehova su normanan sea mané trali di un sèl di prizòn ku ta stroba bo di hasi loke bo ke òf bo por mira nan manera trali di un kouchi ku ta protehá bo di leon.”

5. (a) Kon bo ta dediká bo bida na Yehova? (b) Ki ta e diferensia entre dedikashon i boutismo? (Wak e plachi.)

⁵ Kon bo ta dediká bo bida na Yehova? Den orashon bo ta primintí Yehova ku lo bo adorá e so i ku lo bo pone su boluntat na promé lugá den bo bida. Ku otro palabra, bo ta primintí Yehova ku pa semper lo bo stim’é “ku henter bo kurason, ku henter bo alma, ku henter bo  mente i ku tur bo forsa.” (Mar. 12:30) Dedikashon ta algu privá; entre abo i Yehova. Pero boutismo ta algu públiko; tur hende lo sa ku bo a dediká bo bida na Yehova. Dedikashon ta un promesa serio. Anto bo meta mester ta pa kumpli ku bo promesa, i Yehova ta ferwagt esei tambe.​—Ekl. 5:4, 5.

KIKO LO PONE KU LO BO KE DEDIKÁ BO BIDA NA YEHOVA?

6. Kiko lo pone ku un hende lo ke dediká su bida na Yehova?

⁶ E motibu prinsipal ku lo bo ke dediká bo bida na Yehova ta pasó bo stim’é. Bo amor p’e no ta djis emoshon, pero ta algu ku a bin ta krese segun ku bo ta haña “konosementu eksakto” tokante Yehova i su propósito. (Kol. 1:9) Bo estudio di Beibel a konvensé bo ku (1) Yehova ta eksistí, (2) Beibel ta su Palabra i (3) e ta usa su organisashon pa kumpli ku su boluntat.

7. Kiko nos mester ta hasiendo promé ku nos dediká nos bida na Yehova?

⁷ Promé ku un hende dediká su bida na Yehova, ya kaba e mester sa e siñansanan básiko ku tin den Beibel, e mester ta bibando na armonia ku Dios su normanan i papiando ku otro hende tokante loke el a siña. (Mat. 28:19, 20) Ademas, ya kaba e mester tin un amor pa Yehova i e gana di adorá Yehova ku henter su kurason. Kiko di abo? Si bo stima Yehova ku henter bo kurason, lo bo no dediká bo mes na dje i batisá djis pasó bo ke hasi e Testigu ku ta studia bo kontentu. Anto si bo ta un hóben, lo bo no hasi  esei djis pa komplasé bo mayornan ni pasó bo amigunan tambe ta batisá.

8. Kon gratitut por yuda ku lo bo ke dediká bo bida na Yehova? (Salmo 116:12-14)

⁸ Si bo pensa riba tur e kosnan ku Yehova a hasi pa bo, lo bo ke mustr’é kon gradisidu bo ta i dediká bo bida na dje. (Lesa Salmo 116:12-14.) Beibel ta bisa ku “tur regalo perfekto” i bon ta bini di Yehova. (Sant. 1:17) E regalo di mas presioso ku el a duna nos ta e sakrifisio di su Yu, Hesus. Djis para un ratu i pensa: E sakrifisio a hasi posibel ku abo por tin un amistat será ku Yehova i e oportunidat di biba pa semper. (1 Huan 4:9, 10, 19) Pues, bo dedikashon na Yehova ta e mihó manera pa mustr’é kon gradisidu bo ta pa e amor ku e tin pa bo i pa tur loke el a hasi pa bo. (Deu. 16:17; 2 Kor. 5:15) E buki Bo Por Disfrutá di Bida pa Semper! ta enfatisá esei na lès 46, bou di punto 4, ku tin un vidio di tres minüt ku e título: Duna Dios Bo Regalo.

BO TA KLA PA DEDIKASHON I BOUTISMO?

9. Dikon un hende no mester sintié preshoná pa dediká su mes na Yehova?

⁹ Kisas bo ta sinti ku bo no ta kla ainda pa dedikashon i boutismo. Por ta ainda bo tin ku hasi algun kambio den bo bida pa obedesé Yehova su normanan. Òf, kisas bo mester di mas tempu pa hasi bo fe mas fuerte. (Kol. 2:6, 7) No ta tur studiante ta progresá mesun lihé, i no ta tur hóben ta kla pa dedikashon i boutismo na e mesun edat. P’esei, no kompará bo mes ku otro studiante òf otro hóben. Sea realístiko; wak loke abo tin ku mehorá i loke bo por hasi.​—Gal. 6:4, 5.

10. Kiko bo por hasi si bo ta mira ku ainda bo no ta kla pa dedikashon i boutismo? (Wak e kuadro  “Si Bo Mayornan Ta Testigu.”)

¹⁰ Si bo ta mira ku ainda bo no ta kla pa dediká bo bida na Yehova, sigui hasi esfuerso pa logra e meta ei. Pidi Yehova yuda bo hasi e kambionan ku ainda bo falta. (Flp. 2:13; 3:16) Bo por tin sigur ku lo e tende bo i lo yuda bo.​—1 Huan 5:14.

DIKON ALGUN TA DUDA?

11. Kon Yehova lo yuda nos keda fiel na dje?

¹¹ Algun hende ta kla pa dediká nan mes i batisá, pero nan ta duda pa hasié. Kisas nan tin miedu ku nan por kometé un piká grave i ser ekspulsá. Si esei ta preokupá bo, kòrda ku Beibel ta bisa ku Yehova lo duna bo tur loke bo mester pa “kana na un manera digno di [dje] a fin di agrad’é plenamente.” (Kol. 1:10) Tambe lo e duna bo forsa pa hasi loke ta korekto. El a yega di hasi esei ku hopi hende kaba. (1 Kor. 10:13) Pa motibu di esei, masha tiki hende ta ser ekspulsá. Sí, Yehova ta yuda su adoradónan keda fiel.

12. Kiko lo yuda nos evitá di kometé un piká grave?

¹² Komo hende imperfekto, nos tur tin tendensia di hasi malu. (Sant. 1:14) Pero ora bo haña bo ku un tentashon, ta abo tin ku skohe kiko lo bo hasi. Al final di kuenta loke bo hasi òf keda sin hasi ku bo bida ta dependé di abo. Tin hende ta bisa ku nos no por kontrolá nos impulsonan. Pero esei no ta bèrdat, nos por siña kontrolá loke nos ta sinti i loke nos ta hasi. Pues, asta ora bo haña bo ku tentashon, abo por skohe pa no kai den piká. Anto tin vários kos ku por yuda bo  ku esei. Bo por resa na Yehova tur dia, tene na un bon skèdjel di estudio personal, bai reunion i prediká. Si bo hasi e kosnan ei regularmente, lo bo haña forsa pa keda fiel na Yehova. Nunka lubidá ku Yehova lo yuda bo kumpli ku loke bo a primintié.​—Gal. 5:16.

13. Ki bon ehèmpel Yósef a pone pa nos?

¹³ Lo ta mas fásil pa bo keda fiel na Yehova, si di antemano bo pensa kiko lo bo hasi ora bo haña bo ku tentashon. Beibel ta konta di vários hende ku probablemente a hasi esei, i nan tambe tabata imperfekto. Yósef tabata un di nan. Dia aden dia afó, kasá di Potifar tabata purba di sedusí Yósef. Pero Yósef tabata sa kaba kiko lo el a hasi. Beibel ta konta nos ku el “a nenga” i a bisa: “Kon lo mi por kometé e maldat grandi akí i peka kontra Dios?” (Gén. 39:8-10) Ta bisto ku Yósef tabata sa kaba kon lo e reakshoná asta promé ku e kasá di Potifar a purba di lag’é peka. Esei a hasi mas fásil p’e hasi loke ta korekto.

14. Kon nos por siña rechasá tentashon?

¹⁴ Kon bo por hasi meskos ku Yósef i keda fiel na Yehova ora bo haña bo ku tentashon. Pensa for di awor kiko lo bo hasi si bo haña bo ku un tentashon. Siña kon pa rechasá kosnan ku Yehova ta odia i pa no sigui pensa riba nan. (Sal. 97:10; 119:165) Komo ku ya b’a pone den bo mente kon lo bo reakshoná, esei lo yuda bo evitá di kometé un piká grave.

15. Kon bo por mustra ku bo “ta hasi esfuerso pa buska [Yehova]”? (Hebreonan 11:6)

¹⁵ Kisas bo tin sigur ku b’a haña e bèrdat i ke sirbi Yehova ku henter bo kurason. Pero, por ta te ainda bo ta sinti ku bo no ta kla pa dediká bo bida na Yehova i batisá. Den e kaso ei, bo por hasi meskos ku Rei David. El a roga Yehova: “O Dios, saminá mi, i wak kiko tin den mi kurason. Wak ki sorto di hende mi ta i kiko ta preokupá mi. Wak si tin kualke kos den mi ku por hiba mi den mal kaminda, i guia mi riba e kaminda ku no ta kaba nunka.” (Sal. 139:23, 24) Tipo di orashon asina ta mustra ku bo ta buskando Yehova su yudansa i ku bo ta hasiendo bo esfuerso pa logra e meta di dedikashon i boutismo.  I bo por tin sigur ku si bo hasi esei, Yehova ta bendishoná bo.​—Lesa Hebreonan 11:6.

SIGUI HALA SERKA YEHOVA

16-17. Kon Yehova ta hala esnan ku a lanta den e bèrdat serka dje? (Huan 6:44)

¹⁶ Hesus a bisa ku ta Yehova ta esun ku ta hala hende na Su pueblo. (Lesa Huan 6:44.) Pensa kon maravioso esei ta i kiko esei ta nifiká pa abo. Yehova ta mira algu bon den kada hende ku e hala den e bèrdat. P’e kada un ta su ‘propiedat spesial,’ òf ‘poseshon presioso.’ (Deu. 7:6; nota) Ta asina ei Yehova ta mira abo tambe.

¹⁷ Si bo mayornan ta Testigu, kisas bo ta sinti ku bo ta sirbi Yehova pasó bo mayornan ta trèk bo i no pasó Yehova ta hala bo serka dje. Pero Beibel ta bisa: “Hala serka Dios, i lo e hala serka bo.” (Sant. 4:8; 1 Kró. 28:9) Ora abo dal e promé paso pa hala serka Yehova, e di su parti lo hala serka bo. Yehova no ta mira bo komo djis parti di famia tal i tal. Kada persona den kongregashon, Yehova a hala individualmente; anto esei ta inkluí kada hóben ku lanta den e bèrdat. Pues, ora un hende dal e promé paso pa hala serka Yehova, Yehova ta hasi loke tin skirbí na Santiago 4:8.​—Kompará ku 2 Tesalonisensenan 2:13.

18. Di kiko nos lo papia den e siguiente artíkulo? (Salmo 40:8)

¹⁸ Ora bo dediká bo mes na Yehova i batisá, bo ta hasi meskos ku Hesus. Di su mes, el a presentá dilanti su Tata pa hasi tur loke el a pidié. (Lesa Salmo 40:8; Heb. 10:7) Den e siguiente artíkulo, nos lo mira loke lo yuda bo sigui sirbi Yehova fielmente despues di bo boutismo.