1-2. (a) Den ki sirkunstansia Pablo a skirbi e rumannan na Efeso? (b) Ki pregunta nos lo kontestá?

 MIÉNTRAS Pablo tabata prezu na Roma, e tabatin masha gana di animá su rumannan. Komo ku e no por a bishitá nan, el a skirbi karta. Rònt di aña 60 òf 61 di promé siglo, el a skirbi e rumannan na Efeso.​—Efe. 1:1; 4:1.

² Un dies aña promé, Pablo a pasa un par di tempu na Efeso, predikando i siñando hende e bon notisia. (Echo. 19:1, 8-10; 20:20, 21) E tabata stima su rumannan masha tantu mes i kier a yuda nan keda fiel na Yehova. Pero, dikon el a skirbi nan tokante skuridat i lus? I ki lès nos por siña for di loke el a skirbi? Ban wak.

FOR DI SKURIDAT PA LUS

3. Ki palabranan Pablo a usa ora el a skirbi e rumannan na Efeso?

³ Pablo a skirbi e rumannan na Efeso: “Un tempu boso tabata skuridat, ma awor boso ta lus.” (Efe. 5:8) Aki Pablo a usa e palabranan “skuridat” i “lus” pa mustra kuantu kambio e rumannan ei a hasi. Ban wak dikon Pablo a bisa ku “un tempu [nan] tabata skuridat.”

4. Den ki sentido e efesionan tabata den skuridat spiritual?

⁴ Religion falsu. Promé ku e efesionan a bira kristian, nan tabatin kreensianan religioso falsu i tabata masha superstisioso. Den e stat ei tabatin e famoso tèmpel di e diosa griego Artémis. Hopi hende di e tempu ei a konsiderá  e tèmpel komo un di e shete maravianan di mundu. Hende tabata bai einan pa adorá vários imágen. Trahamentu i bendementu di tèmpelnan chikitu di e diosa Artémis tabata un negoshi lukrativo. (Echo. 19:23-27) Ademas, e stat tabata bon konosí pa praktiká magia.​—Echo. 19:19.

5. Den ki sentido e efesionan tabata inmoral?

⁵ Kondukta inmoral. Hende na Efeso tabata masha inmoral i no tabatin niun tiki bèrgwensa di nan mal kondukta. Den teaternan i asta na fiestanan religioso tabata masha normal pa tende kosnan vulgar. (Efe. 5:3) Hopi di e habitantenan a “pèrdè tur sentido moral.” (Efe. 4:17-19) E palabra original ku a ser usá aki literalmente ta nifiká ku nan “no tabata sinti doló mas.” Pues, promé ku nan a siña loke ta bon i malu, nan no tabata sinti niun tiki remordimentu ni no a pensa ku nan mester a duna kuenta i rason na Yehova pa nan akshonnan. P’esei, Pablo a bisa ku nan tabata “mentalmente den skuridat i alehá for di e bida ku ta bini di Dios.”

6. Dikon Pablo a bisa ku algun di e efesionan tabata “lus”?

⁶ Pero algun di e efesionan no a keda den skuridat, i p’esei Pablo a bisa nan: “Awor boso ta lus ya ku boso ta den union ku Señor.” (Efe. 5:8) Nan a kuminsá biba segun Yehova su Palabra, ku tabata mané un lus ku tabata guia nan. (Sal. 119:105) Nan a bandoná religion falsu i kondukta inmoral. Nan a “imitá Dios” i tabata hasi tur nan esfuerso pa adorá Yehova i agrad’é.​—Efe. 5:1.

7. Den ki sentido nos situashon ta meskos ku hopi di e rumannan na Efeso?

⁷ Asina tambe promé ku nos a haña e bèrdat, nos tabata den religion falsu i no tabatin problema ku kondukta inmoral. Por ehèmpel, nos tabata selebrá dianan di fiesta òf tabata hiba un bida inmoral. Pero asina ku nos a siña tokante loke ta bon i malu den bista di Yehova,  nos a hasi kambio. Nos a kuminsá biba manera Yehova ke. I esei tabata bon pa nos mes. (Isa. 48:17) Aunke nos a bandoná skuridat no ta semper fásil pa keda leu for di dje i “sigui kana komo yunan di lus.” Pero kon nos por logra esei?

KEDA LEU FOR DI SKURIDAT

8. Segun Efesionan 5:3-5, for di kiko e rumannan na Efeso mester a keda leu?

⁸ Lesa Efesionan 5:3-5. Pa e rumannan na Efeso keda leu for di kondukta inmoral, nan mester a sigui evitá kosnan ku Yehova no gusta. Esei no a djis inkluí aktonan inmoral pero tambe papiamentu di kosnan vulgar. Pablo a kòrda nan ku nan mester keda leu for di tipo di kosnan ei si nan ke “tin herensia den e Reino di Kristu i di Dios.”

9. Dikon nos mester evitá kualke kos ku tin di haber ku inmoralidat?

⁹ Nos tambe tin ku tene kuidou pa no hasi kosnan ku ta hiba nos na “e obranan infruktífero ku ta pertenesé na skuridat.” (Efe. 5:11) Echo ta ku ora un hende wak, skucha òf papia kosnan inmoral, chèns ta grandi ku lo e hasi algu ku ta robes. (Gén. 3:6; Sant. 1:14, 15) Por ehèmpel, na un pais un grupo grandi di ruman a forma un chat group. Na kuminsamentu, hopi di nan tabata papia tokante kosnan spiritual. Pero segun ku tempu tabata bai, tiki tiki nan a kuminsá papia di kosnan ku no ta agradá Yehova. Mayoria di nan kòmbersashonnan tabata tokante sèks. Mas despues, hopi di nan a bisa ku ta e tipo di kòmbersashonnan ei a pone nan kai den inmoralidat seksual.

10. Kiko Satanas ta purba di hasi? (Efesionan 5:6)

¹⁰ Satanas ke purba di laga nos kere ku no tin nada malu den e kosnan ku Yehova ta konsiderá inmoral. (2 Ped. 2:19) Anto esei no ta straña nos, pasobra un dje métodonan ku Satanas ta usa mas tantu ta di bruha hende di manera ku nan no por mira e diferensia entre malu i bon. (Isa. 5:20; 2 Kor. 4:4) Ta p’esei hopi pelíkula, programa di televishon i website ta promové ideanan ku ta bai kontra Yehova su normanan hustu. Satanas ke pa nos pensa ku práktika i estilo di bida inmoral, ku ta masha na moda, no solamente ta normal sino asta ta safe i dushi.​—Lesa Efesionan 5:6.

11. Kon e ehèmpel di Angela ta mustra e importansia di sigui e konseho na Efesionan 5:7? (Wak e plachi.)

¹¹ Satanas ke tambe pa nos tin amistat ku hende ku no ta yuda nos pega na Yehova su normanan. P’esei Pablo a spièrta e rumannan na Efeso pa “no bira . . . kómplise” di hende ku ta hasi loke ta malu den Yehova su bista. (Efe. 5:7) Awendia nos mester tene mas kuidou ku e rumannan na Efeso di antigwedat. Dikon? Pasó awendia nos ta pasa tempu no solamente ku hende en persona sino tambe riba ret sosial. Angela, a kende ta biba na Asia, a realisá kon peligroso ret sosial por ta. El a konta: “Sin ku m’a ripará mi pensamentu a kuminsá kambia. A yega un momento ku mi no tabatin problema pa mi tin ‘amigunan’ ku no ta respetá prinsipio di Beibel. Ku tempu m’a kuminsá pensa ku ta oké pa hasi kosnan ku no ta agradá Yehova.”  Pero algun ansiano, na un manera kariñoso, a yuda Angela hasi e kambionan nesesario. Angela a sigui bisa: “Awor na lugá di yena mi mente ku loke tin riba ret sosial, mi ta yen’é ku kosnan di Yehova.”

12. Kiko lo yuda nos pega na Yehova su normanan di bon i malu?

¹² Pa mundu, kondukta inmoral ta algu masha normal, pero nos sa ku esei no ta bèrdat. P’esei nos tin ku sigui rechasá e pensamentu ei. (Efe. 4:19, 20) Pero awor, puntra bo mes: ‘Mi ta hasi sigur ku mi no tin trato innesesario ku kolega, kompañero di skol òf otro hende ku no ta respetá Yehova su normanan hustu? Mi tin kurashi di defendé Yehova su normanan, aunke hende bisa ku mi ta fanátiko?’ Di otro banda, mané 2 Timoteo 2:20-22 ta indiká, nos tin ku tene kuidou tambe ku nos amistatnan ku nos skohe den kongregashon. Dikon? Pasó no ta tur ruman lo yuda nos sigui sirbi Yehova fielmente.

“KANA KOMO YUNAN DI LUS”

13. Kiko “sigui kana komo yunan di lus” ta nifiká? (Efesionan 5:7-9)

¹³ Ademas di animá e rumannan na Efeso pa sigui keda leu for di skuridat, Pablo a bisa nan tambe pa “sigui kana komo yunan di lus.” (Lesa Efesionan 5:7-9.) Kiko esei ta nifiká? E ta nifiká komportá nos mes na tur momento komo berdadero kristian. Un manera pa logra esei ta di lesa i studia Beibel i nos publikashonnan regularmente. Anto ora nos hasi esei, nos tin ku pone atenshon foral na e ehèmpel i siñansa di Hesukristu, “e lus pa mundu.”​—Huan 8:12; Pro. 6:23.

14. Kon spiritu santu por yuda?

¹⁴ Pa nos sigui komportá nos mes “komo yunan di lus,” nos mester di yudansa tambe di Dios su spiritu santu. Dikon? Pasó no ta niun tiki fásil pa keda limpi den e mundu inmoral akí. (1 Tes. 4:3-5, 7, 8) Spiritu santu por yuda nos lucha kontra pensamentu i opinion di  hende den mundu ku no ta mira kosnan mané Yehova ta mira nan. Ademas, spiritu santu por yuda nos produsí “tur sorto di bondat [i] hustisia.”​—Efe. 5:9.

15. Den ki maneranan nos por haña spiritu santu? (Efesionan 5:19, 20)

¹⁵ Un manera ku nos por haña spiritu santu ta di pidi Yehova p’e. Hesus a bisa ku Yehova lo “duna spiritu santu na esnan ku pidié.” (Luk. 11:13) Un otro manera mas pa nos haña spiritu santu ta ora nos ta alabá Yehova huntu na nos reunionnan. (Lesa Efesionan 5:19, 20.) Dios su spiritu santu lo tin un bon influensia riba nos i lo yuda nos biba na un manera ku ta agradá Yehova.

16. Kiko lo yuda nos tuma bon desishon? (Efesionan 5:10, 17)

¹⁶ Ora nos tin ku tuma desishon importante, nos tin ku komprondé “kiko ta e boluntat di Yehova” riba esei, anto djis hasié. (Lesa Efesionan 5:10, 17.) Ora nos buska prinsipionan di Beibel ku ta kuadra ku nos situashon, nos ta buskando pa sa loke Yehova ta pensa tokante e asuntu. Anto ora nos apliká e prinsipionan ei, nos lo por tuma bon desishon.

17. Kon nos por hasi bon uso di nos tempu? (Efesionan 5:15, 16) (Wak e plachi.)

¹⁷ Tambe Pablo a konsehá e rumannan na Efeso pa hasi bon uso di nan tempu. (Lesa Efesionan 5:15, 16.) Satanas, “e malbado,” lo gosa ora nos ta asina okupá ku kosnan di mundu ku nos no ta sobra tempu pa kosnan di Yehova. (1 Huan 5:19) Ta masha fásil pa nos kuminsá focus riba sèn, edukashon òf trabou na lugá di focus riba e diferente maneranan ku nos por sirbi Yehova. Si esei pasa ku nos, esei ta indiká ku nos a kuminsá pensa manera mundu. Klaru ku riba nan mes e kosnan ei no ta malu, pero nunka nan no mester bira e kosnan  di mas importante den nos bida. Pa nos sigui “kana komo yunan di lus,” nos tin ku usa nos “tempu di e mihó manera,” esta, focus riba loke di bèrdat ta importante.

18. Kiko Donald a hasi pa usa su tempu mihó?

¹⁸ Buska oportunidat pa hasi mas pa Yehova. Esei ta loke Donald, kende ta biba na Suráfrika, a hasi. El a konta: “M’a analisá mi situashon i a roga Yehova pa yuda mi hasi mas den sirbishi. M’a pidié pa laga mi haña un trabou ku lo yuda mi sobra mas tempu pa prediká, i Yehova a yuda mi hañ’é. Anto ami ku mi kasá a kuminsá traha den sirbishi di tempu kompleto.”

19. Kon nos por sigui “kana komo yunan di lus”?

¹⁹ Sin duda, e karta ku Pablo a skirbi na e rumannan na Efeso a yuda nan keda fiel na Yehova. I e konsehonan ei por yuda nos tambe. Mané nos a mira, nan por yuda nos hasi bon eskoho den loke nos ta wak, lesa i skucha i tambe nos amistatnan. Tambe nan ta motivá nos pa studia Beibel regularmente pa asina su lus por sigui guia nos. Ademas, nan ta kòrda nos riba e importansia di spiritu santu, ku ta yuda nos produsí bon kualidatnan. Si nos sigui e konsehonan di Pablo, nos lo tuma desishonnan ku ta di akuerdo ku Yehova su manera di pensa. Tur e kosnan ei lo yuda nos evitá skuridat di e mundu akí i keda den e lus.