1. Kiko algun fiel sirbidó di Yehova sa puntra nan mes?

 TA DUSHI pa sa ku “Yehova ta masha kontentu ku su pueblo.” (Sal. 149:4) Ma tòg tin biaha algun di nos por desanimá i puntra nos mes: ‘Ta bèrdat ku Yehova ta kontentu ku su sirbidónan komo grupo, pero kiko di ami? E ta kontentu ku mi?’ Hopi di Yehova su fiel sirbidónan den Beibel na un momento òf otro a yega di pensa asina.​—1 Sám. 1:6-10; Yòb 29:2, 4; Sal. 51:11.

2. Ken tin Yehova su aprobashon?

² Beibel ta splika bon kla ku hende imperfekto por haña Yehova su aprobashon. Kon? Nos tin ku pone fe den Hesukristu i batisá. (Huan 3:16) Asina ei nos ta laga hende mira ku nos a arepentí di nos pikánan i ku nos a primintí Dios ku nos lo hasi su boluntat. (Echo. 2:38; 3:19) Ora nos dal e pasonan ei pa nos tin un amistat será ku Yehova, esei ta hasié felis. Si nos sigui hasi nos bèst pa kumpli ku nos dedikashon, Yehova lo ta kontentu ku nos i ta mira nos komo su bon amigu.​—Sal. 25:14.

3. Tokante kiko nos lo bai papia den e artíkulo akí?

³ Pero, dikon algun di nos tin biaha ta duda ku Yehova ta kontentu ku nos? Kon Yehova ta laga nos sa ku nos tin su aprobashon? Kiko lo yuda nos ta mas konvensí ku Yehova ta aprobá di nos?

DIKON ALGUN DI NOS TA DUDA?

4-5. Asta si bo ta sinti ku bo no ta sirbi pa nada, di kiko bo por tin sigur?

⁴ Hopi di nos for di chikitu ta sinti ku nos no ta sirbi pa nada. (Sal. 88:15) Un ruman ku yama Adrián a bisa:  “Semper m’a sinti ku mi no ta bal nada. Mi ta kòrda ku ten mi tabata chikitu, mi tabata resa pa mi famia drenta Paradeis, pero mi tabata konvensí ku ami sí lo no drenta.” Tony, kende su mayornan no tabata Testigu, a bisa: “Nunka nan a bisa mi ku nan stima mi ni ku nan ta orguyoso di mi. Nan tabata laga mi sinti ku ni maske ki mi hasi, nada no tabata bon pa nan.”

⁵ Si tin biaha abo tambe ta sinti asina, kòrda ku ta Yehova ta esun ku a hala bo serka dje. (Huan 6:44) E ta mira e bon kualidatnan ku kada un di nos tin, aunke nos mes kisas no ta mira nan, i e konosé nos mihó ku nos konosé nos mes. (1 Sám. 16:7; 2 Kró. 6:30) Pues, bo por tin sigur i bo por konfia ku si Yehova bisa bo ku bo ta presioso p’e, ta pasó bo ta.​—1 Huan 3:19, 20.

6. Kon Pablo su pikánan di pasado a lag’é sinti?

⁶ Kisas algun di nos ainda ta sinti nos kulpabel pa e kosnan ku nos a hasi promé ku nos a bin den bèrdat. (1 Ped. 4:3) Algun ruman ku tin hopi aña ta sirbi Yehova fielmente kisas ta sigui lucha ku diferente debilidat. Awor kiko di abo? Bo kurason ta laga bo sinti ku Yehova hamas por pordoná bo? Si ta asina, ta bon pa bo kòrda ku otro fiel sirbidó di Yehova tambe a sinti meskos. Por ehèmpel, Apòstel Pablo a sintié frustrá ora e tabata pensa riba su imperfekshonnan. (Rom. 7:24) Ta bèrdat ku el a arepentí di su pikánan i a batisá. Pero tòg, el a deskribí su mes komo “esun di mas insignifikante di e apòstelnan” i e pekadó di mas grandi.​—1 Kor. 15:9; 1 Tim. 1:15.

7. Kiko nos tin ku keda kòrda tokante nos pikánan di pasado?

⁷ Yehova ta primintí ku si nos arepentí lo e pordoná nos. (Sal. 86:5) Si di bèrdat bo a arepentí di bo pikánan, bo no tin nodi di duda ku Yehova lo kumpli ku su palabra. Pues, bo por tin sigur ku el a pordoná bo!​—Kol. 2:13.

8-9. Kiko por yuda nos stòp di sinti ku nada ku nos hasi no ta sufisiente pa Yehova?

⁸ Nos tur ke duna Yehova lo mihó di nos. Pero, algun di nos ta sinti ku nada ku nos hasi no ta sufisiente pa haña Yehova su aprobashon. Un ruman ku yama Amanda a bisa: “Den mi kabes, duna Yehova lo mihó semper ke men ku kada bes mi tin ku keda duna Yehova mas i mas. P’esei hopi biaha mi ta hasi mas di loke ku mi por. Anto ora ku mi no logra, mi ta desepshoná ku mi mes i ta kuminsá pensa ku Yehova tambe ta desepshoná ku mi.”

⁹ Kiko por yuda nos stòp di sinti ku nada ku nos hasi no ta sufisiente pa Yehova? Kòrda ku Yehova no ta un persona eksigente ni rígido, ma rasonabel. Hamas lo e pidi nos duna mas di loke nos por. Si loke nos ta hasi p’e ta lo mihó ku nos por, sea ku ta hopi òf tiki, e ta balor’é mashá. Pensa tambe riba esnan den Beibel ku a sirbi Yehova ku henter nan kurason. Por ehèmpel, Pablo a traha duru durante hopi aña, a biaha míles di kilometer i a lanta hopi kongregashon. Pero ora kosnan a kambia den su bida, e no por a hasi mes tantu pa Yehova. Awor, e kambio ei a pone ku el a pèrdè Yehova su aprobashon? Nò. Pablo a sigui hasi loke e tabata por anto Yehova a bendishon’é. (Echo. 28:30, 31) Di mes manera, no ta semper nos por duna Yehova mesun tantu. Pero loke ta konta p’e te motibu ku nos ta sirbié. Laga nos ban wak algun  manera ku Yehova ta laga nos sa ku nos tin su aprobashon.

KON YEHOVA TA LAGA NOS SA KU NOS TIN SU APROBASHON?

10. Kon nos por “tende” Yehova bisa nos ku e ta kontentu ku nos? (Huan 16:27)

¹⁰ Mediante Beibel. Yehova gusta laga su sirbidónan sa ku e stima nan i ta kontentu ku nan. Beibel ta menshoná dos okashon ku Yehova a bisa Hesus ku e tabata su Yu stimá i ku e tabatin su aprobashon. (Mat. 3:17; 17:5) Abo lo tin gana di tende Yehova bisa bo ku e ta kontentu ku bo? Ta bèrdat ku lo bo no tende Yehova ta papia ku bo for di shelu, pero lo bo tend’é ta papia ku bo sí mediante Beibel. Ora nos lesa e palabranan kariñoso ku Hesus tabata bisa su disipelnan, ta komo si fuera nos por “tende” Yehova ta bisa nos e palabranan ei. (Lesa Huan 16:27.) Hesus su personalidat ta eksaktamente manera su Tata. P’esei, ora bo lesa ku Hesus a bisa su disipelnan ku el a stima nan apesar di nan fayonan, bo por imaginá Yehova bisando bo e mesun kos.​—Huan 15:9, 15.

11. Dikon nos no tin ku pensa ku prueba ke men ku nos a pèrdè Yehova su aprobashon? (Santiago 1:12)

¹¹ Mediante su akshonnan. Yehova ke yuda nos, foral dor di pèrkurá pa nos nesesidatnan material. Pero tin biaha, e por permití nos pasa den difikultat, mané tabata e kaso ku Yòb. (Yòb 1:8-11) Ora nos haña nos ku prueba, esei no ke men ku nos a pèrdè Yehova su aprobashon. Mas bien, prueba ta duna nos chèns pa mustra Yehova kuantu nos ta stim’é i ta konfi’é. (Lesa Santiago 1:12.) Anto durante e momentonan difísil ei nos lo mira kuantu e stima nos i kuantu e ta yuda nos pa soportá.

12. Kiko nos por siña for di Dmitrii?

¹² Wak loke a pasa ku Dmitrii, un ruman na Asia. El a pèrdè trabou i pa basta luna e no logra haña nada di hasi. Pues, el a disidí di ta mas aktivo den sirbishi i asina demostrá su konfiansa den Yehova. Pero basta luna mas a pasa, i ainda nada di trabou. Riba esei el a hañ’é ku problema di salú i e no por a baha for di kama. El a kuminsá sinti ku e ta un mal kasá i un mal tata i ku el a pèrdè Yehova  su aprobashon. Un anochi su yu muhé a skirbi riba un papel e palabranan di Isaías 30:15: “Boso lo tin forsa si boso keda kalmu i konfia den mi.” El a trese p’e i a bis’é: “Tata, ora bo ta sinti bo tristu, kòrda e teksto akí.” Dmitrii a realisá ku ta danki na Yehova su famia tabatin kuminda, paña i dak riba nan kabes. El a bisa: “Loke ami mester a hasi ta djis keda kalmu i sigui konfia den mi Dios.” Si bo ta pasando den un situashon similar, konfia ku Yehova stima bo i ku lo e yuda bo soportá.

13. Ken Yehova por usa pa laga nos sa ku nos tin su aprobashon, i kon e ta hasi esei?

¹³ Mediante nos rumannan. Yehova por motivá nos rumannan pa bisa nos algu animante presis ora nos mester di dje. Esei ta loke a pasa ku un ruman muhé na Asia ora e tabata pasando den un periodo hopi difísil. El a pèrdè trabou i a bira masha malu mes. Djei su esposo a kometé un piká serio i no por tabata ansiano mas. E ruman muhé a bisa: “Mi no por a komprondé dikon e kosnan akí tabata pasando ku mi. M’a pensa ku kisas m’a hasi algu malu i ku Yehova tabata rabiá ku mi.” Nos ruman muhé a roga Yehova pa mustr’é si realmente e tabata stim’é, i Yehova a kontest’é. Kon? El a bisa: “E ansianonan a papia ku mi i a yuda mi mira ku ketu bai Yehova stima mi.” Un par di tempu despues, el a bolbe pidi Yehova pa mustr’é si realmente e tabata stim’é. El a bisa: “E mesun dia ei m’a haña un karta di un par di ruman di mi kongregashon. Ora m’a lesa nan bunita palabranan, m’a sinti ku Yehova a skucha mi orashon.” Sí, hopi bes Yehova ta usa nos rumannan pa laga nos sa ku e stima nos i ta kontentu ku nos.​—Sal. 10:17.

14. Kon ta un otro manera ku Yehova ta laga nos sa ku nos tin su aprobashon?

 ¹⁴ Un otro manera ku Yehova ta laga nos sa ku nos tin su aprobashon ta ora e usa nos rumannan pa duna nos konseho ora nos tin mester di dje. Por ehèmpel, den promé siglo, el a usa Apòstel Pablo pa skirbi 14 karta p’e rumannan. Ku kariño, Pablo a duna nan konseho ku tabata hopi firme. Dikon Yehova a guia Pablo pa duna e konsehonan ei? Pasobra Yehova ta un bon Tata, i e ta disipliná su yunan “ku e ta stima.” (Pro. 3:11, 12) Pues, ora nos risibí konseho for di Beibel, no pensa ku Yehova ta rabiá ku nos. Mas bien, mir’é komo prueba ku ainda Yehova stima nos. (Heb. 12:6) Pero, kon mas nos por sa si nos tin Yehova su aprobashon?

OTRO PRUEBA DI YEHOVA SU APROBASHON

15. Ken Yehova ta duna su spiritu santu, i ki siguransa esei ta duna nos?

¹⁵ Yehova ta duna su spiritu santu na esnan ku tin su aprobashon. (Mat. 12:18) Puntra bo mes: ‘Mi ta demostrá algun di e kualidatnan di Dios su spiritu santu?’ Por ehèmpel, bo tin mas pasenshi awor kompará ku promé ku b’a konosé Yehova? Bon mirá, mas bo ripará ku bo ta demostrá e kualidatnan di Dios su spiritu santu, mas sigur bo por ta ku bo tin Yehova su aprobashon!​—Wak e kuadro “ Fruta di Spiritu Ta . . .”

16. Ken Yehova ta usa pa prediká e bon notisia, i kon esei ta laga bo sinti? (1 Tesalonisensenan 2:4)

¹⁶ Yehova ta konfia e bon notisia na hende ku e aprobá. (Lesa 1 Tesalonisensenan 2:4.) Wak kon un ruman ku yama Jocelyn a ripará ku esei ta asina. Un dia, el a lanta sin ánimo. El a bisa: “Mi no tabatin forsa pa hasi nada. Pero, mi tabata traha pionero i e dia ei mi mester a bai sirbishi. Pues m’a hasi orashon i m’a bai.” E mainta ei, Jocelyn a topa Mary, un señora masha amabel ku kier a kuminsá studia. Algun luna despues, Mary a konta Jocelyn ku e tabata pidiendo Dios pa yudansa na momento ku el a bati na su porta. Kiko esei a siña Jocelyn? El a bisa: “M’a sinti komo si fuera Yehova tabata bisando mi, ‘Bo tin  mi aprobashon.’” Klaru, no ta tur hende lo skucha nos mensahe. Pero, nos por tin sigur ku Yehova ta masha kontentu ora e mira nos ta hasi nos bèst pa papia ku otro hende tokante e bon notisia.

17. Kiko bo ta siña for di loke Vicky a bisa tokante e reskate? (Salmo 5:12)

¹⁷ A base di e reskate, Yehova ta pordoná piká di hende ku tin su aprobashon. (1 Tim. 2:5, 6) Pero, kiko si ta difísil pa nos aseptá ku Yehova stima nos i ta kontentu ku nos, aunke nos tin fe den e reskate i ta batisá? Kòrda ku no ta semper nos por bai tras di nos sintimentunan, pero semper nos por konfia Yehova. P’e, tur hende ku tin fe den e reskate ta hustu i e ta primintí di bendishoná nan. (Lesa Salmo 5:12; Rom. 3:26) Un ruman ku yama Vicky tabata duda si Yehova stim’é, pero ora el a meditá riba e reskate, esaki a yud’é hopi. El a yega na e konklushon: “M’a realisá kuantu pasenshi Yehova tabatin purbando di mustra mi pa hopi tempu ku e stima mi. Pero tabata mané mi tabata bis’é: ‘Yehova, hamas bo por stima un hende manera ami. E sakrifisio di bo Yu no por kubrí e pikánan ku ami a hasi.’” Si nos meditá riba e reskate, meskos ku Vicky, nos tambe por sinti ku Yehova stima nos i nos lo ta konvensí ku nos tin su aprobashon.

18. Di kiko nos por tin sigur si nos sigui stima nos Tata den shelu?

¹⁸ Aunke nos ta hasi esfuerso pa apliká loke nos a siña den e artíkulo akí, kisas tin biaha nos por desanimá i puntra nos mes si Yehova stima nos i ta kontentu ku nos. Ora esei pasa, kòrda ku semper Yehova ta aprobá “esnan ku ta sigui stim’é.” (Sant. 1:12) Pues, sigui hala serka Yehova i purba di mira tur e maneranan ku e ta laga bo sa ku e ta kontentu ku bo. Anto hamas lubidá ku Yehova “no ta masha leu for di kada un di nos.”​—Echo. 17:27.