1-2. Kon asina un hende su bida ta mehorá ora e batisá?

 ORA un persona batisá, e ta bira parti di Yehova su famia. Esei ta un gran goso! Sin duda, esnan ku tin un amistat será asina ku Yehova ta di akuerdo ku loke e salmista David a bisa: “Felis ta e persona ku bo [Yehova] ta skohe i hala serka bo pa biba riba e plenchinan di bo tèmpel.”​—Sal. 65:4.

² No ta asina asina Yehova ta laga un hende subi riba e plenchinan di su tèmpel. Manera nos a mira den e artíkulo anterior, ora hende demostrá ku nan ke ta Yehova su amigu, Yehova ta hala serka nan. (Sant. 4:8) Ora nan dediká nan bida na Yehova i batisá, nan ta forma un amistat masha spesial kuné. Yehova ta primintí nan: “Boso lo mira kon mi ta . . . basha bendishon riba boso te ku boso lo no sinti falta di nada.”​—Mal. 3:10; Yer. 17:7, 8.

3. Ki responsabilidat un kristian dediká i batisá tin? (Eklesiástes 5:4, 5)

³ Klaru ku boutismo ta djis e komienso. Komo un kristian dediká i batisá, lo bo ke kumpli ku bo promesa di sirbi Yehova i keda fiel na dje, asta ora bo haña bo ku prueba òf tentashon. (Lesa Eklesiástes 5:4, 5.) Ademas, bo tin ku sigui Hesus su ehèmpel i su mandamentunan mas fielmente posibel. (Mat. 28:19, 20; 1 Ped. 2:21) E artíkulo akí lo yuda bo logra esei.

 PRUEBA I TENTASHON

4. Den ki sentido Hesus su disipelnan lo karga un “staka di tormento”? (Lukas 9:23)

⁴ No kere ku lo bo tin un bida fásil despues ku bo batisá. De echo, Hesus a bisa bon kla ku kada un di su disipelnan lo karga nan “staka di tormento . . . dia aden dia afó.” (Lesa Lukas 9:23.) Akaso Hesus kier a bisa ku ta semper su siguidónan lo sufri? Niun ora so. Djis e kier a enfatisá ku no ta bendishon so nan lo haña; nan lo haña nan ku prueba i algun di eseinan lo ta hopi difísil.​—2 Tim. 3:12.

5. Ki bendishonnan Hesus a primintí esnan ku hasi sakrifisio?

⁵ Kisas ya bo a haña bo ku oposishon di famia. Òf, kisas debí ku bo a pone Dios su Reino na promé lugá, bo a sakrifiká oportunidat di haña mas plaka i mas kos. (Mat. 6:33) Si ta asina, bo por tin sigur ku Yehova ta konsiente di tur loke bo a hasi p’e. (Heb. 6:10) Kisas bo a asta eksperensiá e palabranan di Hesus: “Ningun hende ku a bandoná kas, ruman hòmber, ruman muhé, tata, mama, yu òf kunuku pa mi motibu i pa motibu di e bon notisia, lo no keda sin haña awor, den e tempu akí, 100 biaha mas tantu kas, ruman hòmber, ruman muhé, mama, yu i kunuku—huntu ku persekushon—i den e era ku ta bini, bida eterno.” (Mar. 10:29, 30) E bendishonnan ku bo ta haña no ta di kompará ku e sakrifisionan ku bo a hasi.​—Sal. 37:4.

6. Dikon lo bo tin ku sigui lucha kontra “deseo di karni” despues ku bo batisá?

⁶ Despues ku bo batisá, lo bo tin ku sigui lucha kontra “deseo di karni.” (1 Huan 2:16) Esei ta pasó te ainda lo bo ta imperfekto. Tin biaha, bo por sinti bo meskos ku Apòstel Pablo. El a bisa: “Realmente, mi tin plaser den e lei di Dios segun e hende ku mi ta di paden, pero mi ta mira den mi kurpa un otro lei ku ta bringa kontra e lei di mi mente. I e lei di piká akí tin mi prezu.” (Rom. 7:22, 23) Bo por sinti bo frustrá debí na bo mal deseonan. Pero, pensa riba loke bo a primintí Yehova ora bo a dediká bo bida na dje. Esei lo duna bo forsa pa sigui lucha kontra bo tendensia di peka. Loke bo a primintí Yehova lo yuda bo ora bo haña bo ku tentashon. Den ki sentido?

7. Kon bo dedikashon ta yuda bo keda fiel na Yehova?

⁷ Ora bo dediká bo bida na Yehova, bo ta nenga bo mes. Esei ta nifiká ku bo ta bisa nò na deseo- i metanan ku no ta agradá Yehova. (Mat. 16:24) Pues, ora bo haña bo ku un prueba, bo no tin nodi di deliberá ku bo mes kiko pa hasi. Pasó ora bo a dediká bo bida na Yehova, ya bo a bari tur opshon fo’i mesa i a keda ku un so: keda leal na Yehova. P’esei, lo bo ta kompletamente determiná pa hasi Yehova kontentu. Lo bo ta manera Yòb. Aunke el a hañ’é ku pruebanan hopi duru, el a bisa ku konvikshon: “Lo mi keda leal na Dios te na mi morto!”​—Yòb 27:5.

8. Kon bo promesa na Yehova por yuda bo resistí tentashon?

⁸ Ora bo meditá riba e promesa ku bo a hasi na Yehova pa hasi su boluntat, lo bo haña forsa pa resistí kualke tentashon. Por ehèmpel, lo bo no kuminsá flirt ku un hende kasá, pasó bo a primintí Yehova kaba ku hamas lo bo hasi algu asina. Si bo no duna mal deseo  chèns di krese den bo kurason, lo bo no tin ku lucha despues pa ranka nan. Lo bo no “kohe rumbo di hende malbado.”​—Pro. 4:14, 15.

9. Kon bo promesa na Yehova lo yuda bo tambe pa sigui pone aktividatnan spiritual na promé lugá?

⁹ Awor, kiko si bo haña un trabou ku lo stroba bo di bai tur bo reunionnan? Lo bo no duda kiko pa hasi. Dikon? Hopi promé ku nan a ofresé bo e trabou ei ya bo a disidí di no tuma niun trabou ku lo stroba bo di bai reunion. Pues, lo bo no kai den e tentashon di tuma e trabou numa anto despues bringa pa wak kon bo ta sigui pone Yehova na promé lugá. Si bo meditá riba kon determiná Hesus tabata pa agradá su Tata, abo tambe lo ta firme i rechasá mesora tur kos ku ta strobá bo di agradá e Dios na ken bo a dediká bo bida.​—Mat. 4:10; Huan 8:29.

10. Kon Yehova lo yuda bo “sigui [Hesus] kontinuamente” despues di bo boutismo?

¹⁰ Prueba i tentashon ta duna bo oportunidat pa proba ku bo ke “sigui [Hesus] kontinuamente.” I bo por tin sigur ku Yehova lo yuda den esei. Beibel ta bisa: “Dios ta fiel na su palabra, i lo e no laga boso pasa den un tentashon ku boso no por soportá, ma ora e tentashon presentá, lo e pèrkurá tambe pa e salida, a fin ku boso por want’é.”​—1 Kor. 10:13.

LOKE BO POR HASI PA “SIGUI [HESUS] KONTINUAMENTE”

11. Kiko ta un di e mihó maneranan pa sigui Hesus kontinuamente? (Wak e plachi.)

¹¹ Hesus a sirbi Yehova ku henter su kurason i regularmente e tabata hasi orashon na Yehova. (Luk. 6:12) Un di e mihó maneranan pa bo sigui Hesus kontinuamente despues di bo boutismo ta di  krea i mantené e kustumber di hasi kosnan ku ta hala bo mas serka di Yehova. Beibel ta bisa: “Te asina leu ku nos a progresá, laga nos sigui kana na un manera ordená den e mesun kaminda akí.” (Flp. 3:16) Tempu tempu lo bo tende di rumannan ku a disidí di hasi mas pa Yehova. Kisas nan a bai Skol pa Predikadó di Reino òf a muda pa un área ku tin mester di yudansa den e trabou di prediká. Bo sirkunstansia ta permití bo hasi mas pa Yehova? Sirbidónan di Yehova semper ta buska manera pa hasi mas p’e. (Echo. 16:9) Pero, kiko si aworakí bo sirkunstansia no ta permití? No sinti bo ménos kompará ku rumannan ku sí ta hasi mas. Loke ta konta den e kareda kristian ta perseveransia. (Mat. 10:22) No lubidá ku Yehova ta keda masha kontentu ora bo ta hasi loke abo por den bo sirkunstansia. Asina ei lo bo por sigui Hesus kontinuamente despues di bo boutismo.​—Sal. 26:1.

12-13. Kiko bo por hasi si bo no tin mesun smak ku ántes? (1 Korintionan 9:16, 17) (Wak e kuadro “ Sigui Kore den e Kareda.”)

¹² Awor, kiko si bo ta sinti ku bo ta djis hasi orashon pa hasi orashon òf ku bo sirbishi a bira un rutina. Òf kisas bo ta sinti ku bo no ta disfrutá di bo lesamentu di Beibel manera ántes. Si kualke un di e kosnan ei pasa ku bo despues di bo boutismo, no pensa ku bo a pèrdè e spiritu di Yehova. Komo hende imperfekto, ta normal ku nos sintimentunan no ta semper meskos. Si bo ripará ku bo no ta disfrutá di sirbi Yehova manera ántes, meditá riba Apòstel Pablo. Aunke el a purba di imitá Hesus, Pablo tabata sa ku tin biaha lo e no tin mesun gana di  hasi loke e mester a hasi. (Lesa 1 Korintionan 9:16, 17.) El a bisa: “Asta si mi hasié kontra mi boluntat, e ta un responsabilidat ku a ser konfiá na mi.” Ku otro palabra, maske Pablo no tabatin gana tur ora, tòg e tabata determiná pa kumpli ku su sirbishi.

¹³ Asina tambe, no laga bo sintimentunan imperfekto influensiá bo desishonnan. Disidí pa hasi loke ta korekto asta ora bo no tin masha gana di hasié. Ku tempu, bo akshonnan lo tin bon influensia riba bo sintimentunan. Turesten, un bon skèdjel di estudio personal, orashon, asistensia na reunion i predikashon lo yuda bo despues di boutismo pa sigui Hesus kontinuamente. Anto ora bo rumannan mira bo perseveransia, nan lo sinti nan animá pa hasi meskos.​—1 Tes. 5:11.

“SIGUI SAMINÁ” BO MES

14. Kiko bo tin ku analisá regularmente, i dikon? (2  Korintionan 13:5)

¹⁴ Despues ku bo batisá, ta importante pa bo analisá bo bida i kustumbernan. (Lesa 2 Korintionan 13:5.) Ta bon pa bo wak si bo ta hasi orashon tur dia, lesa i studia Beibel, bai reunion i sirbishi. Buska maneranan pa hinka bida den e aktividatnan akí i disfrutá di nan. Por ehèmpel, puntra bo mes: ‘Mi sa kon pa splika siñansanan básiko di Beibel? Ki mi por hasi pa mi disfrutá mas di mi sirbishi? Mi ta spesífiko den mi orashonnan i mi ta mustra ku mi ta konfia kompletamente den Yehova? Mi ta hasi esfuerso pa no pèrdè niun reunion? Ki mi por hasi pa konsentrá i partisipá mas na reunion?’

15-16. Kiko bo ta siña di loke Robert a pasa aden?

¹⁵ Ta importante tambe pa bo analisá i wak kiko ta bo debilidatnan. Loke a pasa ku un ruman ku yama Robert ta mustra esei. El a konta: “Tempu mi tabatin un 20 aña asina, mi tabata traha partaim. Un dia despues di trabou, un mucha muhé ku tabata mi kolega a invitá mi na su kas. El a bisa mi ku lo no tin niun hende i ku nos lo ‘pasa dushi’ ku otro. Na kuminsamentu, m’a keda bin ku yen di èksküs, pero finalmente m’a bis’é nò i a splik’é dikon.” Robert no a kai pa e tentashon, i esei ta hopi bon. Pero despues el a analisá loke a pasa i a mira ku eigenlijk e mester a reakshoná diferente. El a  bisa: “Mi no a reakshoná mesora ni mes firme mané Yósef a hasi ku e kasá di Potifar. (Gén. 39:7-9) De echo, mi no a ferwagt ku lo tabata asina difísil pa bisa nò. Esei a yuda mi mira ku mi mester a hasi mi amistat ku Yehova mas fuerte.”

¹⁶ Lo ta bon pa bo analisá bo mes meskos ku Robert a hasi. Asta si bo no a kai pa un tentashon, tòg puntra bo mes: ‘Kuantu a dura mi pa mi bisa nò?’ Si bo ta mira ku bo tin ku mehorá, no sinti bo malu. Al kontrario, keda kontentu ku bo a bira konsiente di e debilidat akí. Papia ku Yehova tokante dje i hasi kosnan ku lo yuda bo fortalesé bo deseo pa obedesé Yehova.​—Sal. 139:23, 24.

17. Splika ki efekto Robert su lealtat tabatin riba e nòmber di Yehova.

¹⁷ Tin algu mas ku nos por siña for di Robert. El a sigui konta: “Despues ku m’a rechasá mi kolega, el a bisa mi: ‘B’a slag!’ M’a puntr’é kiko e ke men. Anto el a splika mi ku un amigu di dje, ku ántes tabata Testigu, a bis’é ku tur hóben Testigu ta hiba un bida dòbel i si nan haña un chèns di hasi kos malu, nan lo hasié. Pues, el a bisa e amigu ku lo e bai tèst wak ki mi t’ei hasi. Wèl, mi tabata masha kontentu ku m’a onra e nòmber di Yehova.”

18. Kiko bo ta determiná pa hasi despues ku bo batisá? (Wak e kuadro “ Dos Artíkulo Ku Lo Bo Gusta Mashá.”)

¹⁸ Ora bo dediká bo bida na Yehova i batisá, bo ta mustra ku ni maske kiko pasa bo ke santifiká su nòmber. Anto bo por tin sigur ku Yehova ta konsiente di e prueba- i tentashonnan ku bo ta resistí. E ta mira kuantu esfuerso bo ta hasi pa keda fiel i lo e bendishoná bo pa esei. Nunka duda esei! Lo e duna bo su spiritu santu pa bo haña forsa pa hasi loke ta korekto. (Luk. 11:11-13) Ku e yudansa ku Yehova duna bo, lo bo por sigui Hesus kontinuamente despues di bo boutismo.