DESPUES di vários dia di hopi áwaseru ku bientu, djaluna 1 di sèptèmber 1919 tabatin un dushi wer. E atardi ei, pa e seshon di apertura na e kongreso na Cedar Point, Ohio, Merka, tabatin ménos ku 1.000 delegado den e ouditorio ku kapasidat pa karga 2.500 hende. Anochi, 2.000 delegado mas a bini ku outo, den boto i trein spesial. Riba djamars, tabatin asina tantu hende ku mester a tene sobrá di e kongreso pafó bou di palunan grandi.

Rayonan di solo tabata penetrá dor di e blachinan i krea sombra ku tabata parse manera kanchi riba paña di e hende hòmbernan. Un brisa suave ku tabata bini di Lago Erie tabata bula e plumanan riba e sombrénan di e hende muhénan. Un ruman hòmber ta kòrda: “E ambiente agradabel ei, leu for di bochincha di e mundu, tabata ègt un paradeis.”

Pero e bunitesa di e lugá ei no tabata nada kompará ku e goso ku tabatin riba kara di e presentenan. Un korant lokal a remarká ku “aunke tur hende tabata parse masha deboto, nan tabata mustra felis i kontentu.” E Studiantenan di Beibel tabata masha kontentu di por a asosiá ku nan rumannan despues di a pasa den pruebanan severo den e último añanan. Nan a sufri oposishon den tempu di guera, tabatin desakuerdo pisá den e kongregashonnan, e Bètel di Brooklyn a wòrdu será i hopi ruman a ser enkarselá pa motibu di e Reino, inkluso ocho ruman hòmber ku tabata dirigí e organisashon i ku a ser sentensiá te ku 20 aña di prizòn. *

Den e añanan difísil ei, algun Studiante di Beibel a pèrdè ánimo, a keda tur konfundí i a stòp di prediká. Pero mayoria di ruman a hasi nan bèst pa perseverá apesar di tur loke outoridatnan tabata hasi pa purba di para e trabou di prediká. Por ehèmpel, un investigadó a informá ku maske outoridatnan a taha e Studiantenan di Beibel di prediká, nan a insistí ku nan lo “sigui prediká e palabra di Dios te na fin.”

Durante henter e periodo di prueba ei, fiel Studiantenan di Beibel tabata hasi orashon tur ora pa nan haña guia di e Tata. I awor, nan tabata huntu na un asamblea gososo na Cedar Point. Un ruman muhé a ripití loke hopi hende tabata puntra nan mes, esta, kon nan lo a kuminsá pone man na obra den sirbishi atrobe? Loke mas nan a deseá ta di kuminsá ku e trabou ei atrobe.

Henter siman e delegadonan tabata puntra nan mes ta kiko e lèternan “GA” ku a aparesé riba e programa di kongreso, karchi di bonbiní i bòrchinan na e lugá di kongreso tabata para p’e. Riba djabièrnè, ku tabata “Dia di Kolaboradónan,” Joseph F. Rutherford por fin a revelá e misterio ei na e 6.000 delegadonan. “GA” tabata para pa The Golden Age (E Époka di Oro), un revista nobo pa usa den sirbishi. *

Ruman Rutherford a bisa di su rumannan ungí: “Komo ku nan tin fe, nan por mira mas ayá di e tempunan difísil i por mira e Époka di Oro di e glorioso gobernashon di e Mesías. . . . Nan ta mira e trabou di anunsiá e binida di e Époka di Oro na mundu komo nan deber prinsipal i un privilegio. E ta parti di e mandato ku nan a haña di Dios.”

The Golden Age tabata “un Revista di Echo, Speransa i Konvikshon” i lo a ser usá pa kuminsá ku un forma nobo di plama e bèrdat, esta, un kampaña di bai di kas pa kas pa ofresé hende un abonamènt riba e revista. Ora a puntra ken lo tin gana di hasi e trabou ei, tur hende den ouditorio a bula lanta para. Despues, “yen di zjeitu i entusiasmo ku ta esnan ku ta sigui e pasonan di Hesus so tin,” nan a kanta e kantika titulá “Manda bo lus i bèrdat o Señor.” J. M. Norris a bisa: “E palunan a manera sagudí. Hamas lo mi lubidá esei.”

Despues di e seshon, e delegadonan a para den rei pa oranan largu pa nan por tabata e proménan pa sera un abonamènt riba e revista. Hopi hende tabatin e mesun sintimentu ku Mabel Philbrick, kende a bisa: “Tabata masha emoshonante pa sa ku nos tabatin trabou di hasi atrobe!”

Mas o ménos 7.000 Studiante di Beibel tabata prepará pa pone man na obra. E pamfleta Método di e Organisashon i e foyeto Pa Esnan Ku A Ser Enkargá ku e Obra a duna e detayenan: Un Departamento di Sirbishi nobo na e ofisina prinsipal lo dirigí e trabou. Mester forma un Komité di Sirbishi den kada kongregashon i nombra un direktor di sirbishi pa duna instrukshon. Ademas, lo mester a dividí e teritorionan den sekshon di 150 pa 200 kas. Riba djaweps anochi lo mester a tene un Reunion di Sirbishi pa e rumannan konta nan eksperensianan i entregá nan rapòrt.

Herman Philbrick a konta: “Ora nos a bai kas bèk, nos tur a pone man na obra den e kampaña di abonamènt.” Tur kaminda nan a haña hende ku a skucha nan. Beulah Covey a remarká: “Despues di guera i asina tantu tristesa, a parse ku tur hende a keda enkantá ku djis e idea di un époka di oro.” Arthur Claus a skirbi: “Henter e kongregashon a keda sorprendí ku e kantidat di abonamènt ku a ser será.” Denter di dos luna di e promé edishon di The Golden Age, 50.000 hende a sera un abonamènt, i e rumannan a laga kasi mei mion ehemplar di e revista ei.

Ruman A. H. Macmillan a referí na e artíkulo “Evangelio di e Reino” den E Toren di Vigilansia di 1 di yüli 1920 i a bisa ku e artíkulo ei tabata e promé biaha ku e organisashon a animá e rumannan pa prediká tokante e Reino di Dios rònt mundu. E artíkulo ei a urgi tur kristian ungí pa “duna testimonio na mundu ku e reino di shelu ta serka.” Awe, miónes di hende a djòin e rumannan di Kristu ku “a ser enkargá ku e obra” i ta prediká e palabra ku zelo miéntras nan ta warda e époka di oro Mesiániko yega.