HOPI hende sa ku ántes na Egipto nan tabata usa papiro pa skirbi riba dje. Tantu e griegonan komo e romanonan tabata skirbi riba papiro. * Pero, loke hopi hende no sa ta ku nan tabata usa papiro pa traha boto tambe.

Mas ku 2.500 aña pasá, Profeta Isaías a skirbi ku hende ku tabata biba “banda di e riunan di Etiopia” a “manda embahadornan riba laman, den barkunan di papiro.”—Isa. 18:1, 2.

Debí ku Beibel ta inspirá pa Dios no ta sorprendé nos ku arkeólogonan a haña prueba ku den tempu bíbliko tabata traha boto di papiro. (2 Tim. 3:16) Pero, kiko nan a deskubrí? Nan a haña sufisiente evidensia ku a mustra presis kon tabata traha boto di papiro na Egipto.

E pintura- i obranan di arte riba muraya den e grafnan na Egipto ta mustra kon nan tabata kolektá papiro i traha boto. Un hende tabata kòrta stèngelnan di e papiro, mara nan na bulto i kue e bultonan mara nan na otro. Stèngel di papiro tin forma di triángulo. P’esei, ora mara nan huntu, nan tabata forma un bulto será i fuerte. Un buki di historia di Egipto a bisa ku por a haña boto di papiro di 55 pia (17 meter), ku espasio pa 10 òf 12 rema kada banda.

Pasobra por a haña papiro na kantidatnan grandi den e vaye di Nilo. Es mas, tabata basta fásil pa traha boto di papiro. Asta ora hende a kuminsá usa palu pa traha boto mas grandi, e piskadó- i yagdónan a sigui traha nan botonan mas chikitu di papiro.

Hende a usa boto di papiro pa hopi tempu. Segun e eskritor griego Plutarko, kende a biba den tempu di e kristiannan di promé siglo, hende te ainda tabata usa boto di papiro den su tempu.