1-2. Kiko un eskritor a bisa, i kiko nos lo trata den e artíkulo akí?

AWE miónes di hende ta bisa ku nan ta kere den Hesus, pero nan no ta aseptá e kosnan ku el a siña. (2 Tim. 4:3, 4) De echo, un eskritor a bisa un biaha: “Kiko nos lo hasi . . . si bini un otro ‘Hesus’ ku ta bisa e mesun kosnan ku e Hesus di dos mil aña pasá a bisa? Nos lo rechas’é tambe? . . . Wèl, e kontesta lo ta: Sí, nos lo rechas’é.”

² Den promé siglo, hopi hende a skucha loke Hesus a bisa i a mir’é hasi milager, pero nan no a bira su siguidó; nan a rechas’é. Dikon? Den e artíkulo anterior nos a wak kuater motibu, i den esun akí nos lo wak kuater mas. Segun ku nos ta hasi esei, nos lo mira dikon hende awe no ta skucha e siguidónan di Hesus, i kiko por yuda nos pa nada no stroba nos di sirbi Yehova. Manera nos a menshoná den e artíkulo anterior, e artíkulo akí tambe ta spesialmente pa esnan ku ya tin tempu ta studia i ta bai reunion, pero ku ainda no a dal e stap pa bira un Testigu.

3. Dikon algun hudiu a rechasá Hesus?

³ Hesus a pasa tempu ku tur tipo di hende. El a kome ku hende riku i poderoso, pero el a pasa hopi tempu tambe ku esnan pober i oprimí. Ademas, e tabatin kompashon pa esnan ku generalmente otronan a mira komo “pekadó.” Algun hudiu orguyoso a rechasá Hesus pa e  kosnan ku el a hasi. Nan a puntra su disipelnan: “Pakiko boso ta kome i bebe ku kobradó di belasting i pekadó? Hesus a kontestá nan: ‘Hende ku ta bon di salú no tin mester di dòkter, ma hende malu sí. Mi no a bini pa yama hende hustu, sino pa yama pekadó pa nan arepentí.’”—Luk. 5:29-32.

4. Segun Isaías, kiko e hudiunan lo mester tabata sa?

⁴ Loke Beibel a profetisá. Hopi promé ku e Mesías a bini na tera, Isaías a profetisá ku mundu lo no a asept’é. El a bisa: “El a wòrdu despresiá i bandoná pa hende . . . i manera un persona ku hende ta skonde kara p’e el a wòrdu despresiá, i nos no tabatin apresio p’e.” (Isa. 53:3) Segun e profesia ei, “hende” lo a bandoná, òf evitá, e Mesías. Pues, e hudiunan den promé siglo lo mester tabata sa ku hende lo a rechasá Hesus.

5. Kon hopi hende awe ta mira e siguidónan di Hesus?

⁵ Mesun kos ta pasa awendia? Sí. Hopi lider religioso ku brasa habrí ta risibí den nan iglesianan hende prominente, riku i ku mundu ta konsiderá sabí. Nan ta hasi esei maske nan sa bon bon ku e manera ku e hendenan ei ta hiba nan bida no ta na armonia ku Dios su prinsipionan. Di otro banda, e mesun lidernan ei ta despresiá Yehova su sirbidónan, ku ta hasi tur nan esfuerso pa obedesé Yehova kedando moralmente limpi. Dikon? Pasobra segun mundu, Yehova su sirbidónan no ta hende prominente. Pero manera Pablo a bisa, Dios a skohe esnan ku hende ta menospresiá. (1 Kor. 1:26-29) Pa Yehova, tur su fiel sirbidónan ta presioso.

6. Kiko Hesus a bisa na Mateo 11:25 i 26, i kon nos por imit’é?

⁶ Loke bo tin ku hasi. (Lesa Mateo 11:25, 26.) No laga mundu su opinion di Dios su sirbidónan influensiá bo. Komprondé ku Yehova ta usa solamente hende humilde pa hasi su boluntat. (Sal. 138:6) Anto pensa kuantu kos el a logra usando esnan ku no ta sabí ni intelektual den bista di mundu.

7. Dikon Hesus a yama e fariseonan hipókrita, i kiko nan a hasi?

⁷ Ku kurashi Hesus a saka e hipokresia di e lidernan religioso di su tempu na kla. Por ehèmpel, el a yama e fariseonan hipókrita pasobra nan tabata mas preokupá ku labamentu di man ku kuida nan mayornan. (Mat. 15:1-11) Loke Hesus a bisa a sorprendé su disipelnan. De echo, nan a puntr’é: “Bo sa ku e fariseonan a sinti nan mes ofendí ora nan a tende loke bo a bisa?” Hesus a kontestá nan: “Tur mata ku mi Tata selestial no a planta lo keda ranká ku rais ku tur. Laga nan. Ta guia siegu nan ta. I si un siegu guia un siegu, tur dos ta kai den buraku.” (Mat. 15:12-14) Hesus no a laga e manera ku e lidernan religioso a reakshoná stòp e di papia e bèrdat.

8. Kon Hesus a mustra ku Dios no ta aseptá tur kreensia religioso?

⁸ Hesus a saka tambe siñansanan falsu na kla. Nunka e no a bisa ku Dios ta aseptá tur kreensia religioso. Mas bien, el a bisa ku hopi hende lo ta riba e kaminda hanchu ku ta hiba na destrukshon, miéntras ku djis un par so lo ta riba e kaminda smal ku ta hiba na bida.  (Mat. 7:13, 14) El a splika bon kla ku algun hende lo bisa ku nan ta sirbi Dios, pero esei ta leu for di bèrdat. El a spièrta: “Tene kuidou ku e profetanan falsu ku ta bini serka boso bistí na kueru di karné ma ku di paden ta lobo hambrá. Na nan fruta boso lo rekonosé nan.”—Mat. 7:15-20.

9. Kua siñansa religioso falsu Hesus a saka na kla?

⁹ Loke Beibel a profetisá. Segun un profesia, e Mesías lo tin zelo pa e kas di Yehova. (Sal. 69:9; Huan 2:14-17) E zelo ei a pone ku Hesus a saka siñansanan i práktikanan religioso falsu na kla. Por ehèmpel, e fariseonan tabata kere ku alma ta inmortal, pero Hesus a siña hende ku e mortonan ta drumí. (Huan 11:11) E saduseonan no tabata kere den resurekshon, pero Hesus a resusitá su amigu Lázaro. (Huan 11:43, 44; Echo. 23:8) E fariseonan tabata bisa ku tur loke pasa ku un hende ta debí na destino òf debí ku Dios tabata ke, pero Hesus a siña hende ku ta un persona mes ta disidí si e ke sirbi Dios òf nò.—Mat. 11:28.

10. Dikon hopi hende no ke skucha nos?

¹⁰ Mesun kos ta pasa awendia? Sí. Hopi hende no ke skucha nos pasobra nos ta usa Beibel pa saka siñansa religioso falsu na kla. Lidernan religioso ta siña hende ku Dios ta kastigá mal hende den fièrnu. Nan ta hasi esei pa nan tin kontrol riba nan hendenan. Pero, nos ku ta sirbidónan di Yehova, e Dios di amor, ta siña hende ku e siñansa ei ta falsu. Lidernan religioso ta siña hende tambe ku alma ta inmortal. Pero, nos ta usa Beibel pa proba ku e siñansa ei no ta bèrdat; sino no tabatin mester di resurekshon. Hopi religion ta bisa ku bida di hende ta predestiná. Ma, nos ta siña ku hende ku kada ken ta liber pa skohe si nan ke sirbi Dios òf nò. Kon lidernan religioso ta reakshoná riba tur loke nos ta siña hende for di Beibel? Mayoria di biaha nan ta bira furioso!

11. Segun Huan 8:45-47, kiko Dios ke pa su sirbidónan hasi?

 ¹¹ Loke bo tin ku hasi. Si bo ta stima e bèrdat, lo bo aseptá tur palabra ku ta bini di Dios. (Lesa Huan 8:45-47.) Kontrali na Satanas e Diabel, nos komo sirbidónan di Yehova lo keda firme den e bèrdat i nunka bira lomba pa nos kreensianan. (Huan 8:44) Dios ke pa, meskos ku Hesus, nos “odia loke ta malu” i “pega na loke ta bon.”—Rom. 12:9; Heb. 1:9.

12. Dikon e echo ku Hesus a muri na staka a pone e hudiunan rechas’é?

¹² Kiko mas a pone ku e hudiunan a rechasá Hesus? Pablo a bisa: “Nos ta prediká Kristu klabá na staka, ku pa e hudiunan ta un piedra di trompeká.” (1 Kor. 1:23) Dikon e echo ku Hesus a muri na staka a pone e hudiunan trompeká? Pasobra pa nan, e echo ku el a muri na staka a indiká ku e tabata un kriminal i un pekadó; no e Mesías.—Deu. 21:22, 23.

13. Kiko e hudiunan ku a rechasá Hesus no a realisá?

¹³ E hudiunan ku a rechasá Hesus a nenga di realisá ku e tabata inosente, ku el a ser husgá falsamente i ku el a ser tratá inhustamente. E huesnan a kibra i pasa por alto di diferente lei; purá purá nan a tene un huisio. (Luk. 22:54; Huan 18:24) Na lugá di ta imparsial i skucha e akusashonnan i analisá e evidensianan kontra Hesus, nan mes a “buska testimonio falsu kontra Hesus pa por a laga mat’é.” Ora nan no a logra, e sumo saserdote a purba di laga Hesus inkriminá su mes. Esei tabata kompletamente kontra lei. (Mat. 26:59; Mar. 14:55-64) Anto, wak kiko e mesun huesnan inhustu ei a hasi despues ku Hesus a resusitá. Nan a paga e sòldánan romano ku tabata vigilá su graf “un kantidat basta grandi di moneda di plata” pa kana plama  mentira ku Hesus su disipelnan a hòrta su kurpa.—Mat. 28:11-15.

14. Kiko Beibel a profetisá tokante e Mesías?

¹⁴ Loke Beibel a profetisá. Hopi hudiu no a pensa ku e Mesías lo a muri. Pero, tabatin un profesia ku a bisa: “El a drama su bida te na morto, i a wòrdu kontá huntu ku e transgresornan; i e mes a karga e piká di hopi hende, i a intersedé pa e transgresornan.” (Isa. 53:12) Pues, si nan lo a lesa e profesia ei, nan lo no tabatin niun motibu pa rechasá Hesus ora el a ser kologá na staka.

15. Ki akusashon kontra nos a pone ku algun hende no ke skucha nos mensahe?

¹⁵ Mesun kos ta pasa awendia? Klaru ku sí! Meskos ku Hesus, nos komo Testigunan di Yehova ta ser akusá falsamente i tratá inhustamente. Wak algun ehèmpel. Na Merka, entre 1930 i 1950, bes tras bes nos mester a bai korte pa defendé nos derecho di libertat pa adorá Dios. Anto algun di e huesnan ei abiertamente a demostrá ku nan tabata kontra nos. Na Quebec, Canada, Iglesia Katóliko i gobièrnu a sera kabes pa oponé nos trabou. Hopi publikadó a kai será djis pasobra nan a papia ku otro hende tokante e Reino di Dios. Na Alemania, gobièrnu nazi a mata hopi ruman hòmber hóben. Den e último añanan, hopi di nos rumannan na Rusia a ser arestá i a bai prizòn pasobra nan tabata papia ku hende tokante Beibel, algu ku outoridatnan ta yama “aktividat ekstremista.” Nan a asta prohibí e Tradukshon di Mundu Nobo di e Santu Skritura na ruso i a klasifik’é komo “material ekstremista” debí ku e tin e nòmber Yehova aden.

16. Segun 1 Huan 4:1, dikon bo no mester bai tras di mentira tokante Testigunan di Yehova?

¹⁶ Loke bo tin ku hasi. Haña sa kiko ta e bèrdat. Den e Sermon Riba Seru, Hesus a spièrta su disipelnan ku lo tin hende ku lo “saka tur sorto di mentira malisioso kontra” nan. (Mat. 5:11) Satanas ta esun ku ta bini ku tur e mentiranan ei. E ta perkurá pa opositornan plama mentira tokante esnan ku ta stima e bèrdat. (Rev. 12:9, 10) Rechasá tur mentira ku opositornan bini kuné. Nunka laga sorto di mentiranan ei laga bo haña miedu di sirbi Yehova òf suak bo fe.—Lesa 1 Huan 4:1.

17. Kon tur e kosnan ku a pasa promé ku Hesus su morto a pone ku algun hende a rechas’é?

¹⁷ Djis promé ku Hesus su morto, un di su 12 apòstelnan a traishon’é. Un otro a neng’é tres biaha, i nan tur a bandon’é e anochi promé ku el a muri. (Mat. 26:14-16, 47, 56, 75) Esei no a sorprend’é pasobra e mes a bisa ku esei lo a pasa. (Huan 6:64; 13:21, 26, 38; 16:32) Ora tur e kosnan ei a pasa, algun hende a disidí ku nan lo no ke ta su disipel. Kisas nan a bisa: ‘Si ta e kosnan ei su apòstelnan ta hasi, ami sí no ke ta un di nan!’

18. Ki profesia a kumpli promé ku Hesus su morto?

¹⁸ Loke Beibel a profetisá. Profeta Zakarías a bisa ku e Mesías lo a ser traishoná pa 30 pida di plata. (Zak. 11:12, 13) Esun ku lo a traishoná Hesus lo ta un di su amigunan. (Sal. 41:9) Zakarías a skirbi tambe: “Dal e wardadó mata pa e karnénan wòrdu plamá.” (Zak. 13:7) Hende di kurason sinsero lo no a laga e motibunan ei stroba nan di bira siguidó di Hesus.  En bes di esei, nan fe lo a bira fuerte ora nan a mira ku e profesianan a kumpli den Hesus.

19. Kiko hende sinsero sa?

¹⁹ Mesun kos ta pasa awendia? Sí. Algun Testigu di Yehova bon konosí a bandoná e bèrdat, a bira apóstata i a purba pa otronan hasi mesun kos. Pa medio di internet i medionan di komunikashon, nan ta plama mentira tokante nos. Pero, hende sinsero no ta ser engañá pa eseinan. Al kontrario, nan sa ku Beibel a profetisá ku e tipo di kosnan ei lo sosodé.—Mat. 24:24; 2 Ped. 2:18-22.

20. Kiko bo tin ku hasi pa no laga esnan ku a bandoná e bèrdat engañá bo? (2 Timoteo 4:4, 5)

²⁰ Loke bo tin ku hasi. Pa mantené bo fe fuerte, bo tin ku studia ku regularidat, hasi orashon frekuentemente i keda okupá den e trabou ku Yehova Dios a duna nos. (Lesa 2 Timoteo 4:4, 5.) Si bo tin un fe asina, lo bo no kai den pániko ora bo tende notisianan negativo. (Isa. 28:16) Amor pa Yehova, pa su Palabra i pa nos rumannan lo pone ku esnan ku a bandoná e bèrdat lo no engañá nos.

21. Aunke mayoria di hende awendia no ke skucha nos mensahe, di kiko nos por tin sigur?

²¹ Den promé siglo, hopi hudiu a rechasá Hesus. Pero, tabatin otronan ku sí a bira su siguidó. Entre nan tabatin por lo ménos un miembro di Sanedrin i te asta “un gran kantidat di saserdote.” (Echo. 6:7; Mat. 27:57-60; Mar. 15:43) Awendia tambe tin miónes di hende ku ta bira siguidó di Hesus i ta sirbi Yehova. Dikon? Pasobra nan konosé e bèrdatnan ku tin den Beibel i ta stima nan. Dios su Palabra ta bisa: “Esnan ku ta stima bo lei tin gran pas, i nada no ta hasi nan trompeká.”—Sal. 119:165.