1. Kiko kisas a pasa ora bo a kuminsá papia ku otro hende tokante e mensahe di Beibel?

BO TA kòrda kon bo a sinti na momento ku bo a realisá ku bo a haña e bèrdat? Loke bo tabata siña for di Beibel tabata asina kla—mas kla ku di dia! Pa abo, tur hende lo tabata kontentu pa skucha e mensahe di Beibel. Bo a pensa ku lo el a yuda nan tin un bida mas felis awor i tambe un bunita speransa pa futuro. (Sal. 119:105) Pues, kontentu asina bo a bai konta delaster un di bo amigu- i famianan loke bo a siña. Pero, pa bo sorpresa, nan no tabata interesá den loke bo kier a bisa nan.

2-3. Kiko mayoria di hudiu den promé siglo a pensa di Hesus i di su mensahe?

² No mester sorprendé nos ora hende no ke skucha nos mensahe. Den promé siglo, aunke Hesus a hasi hopi milager i a proba ku e tabatin Dios su sosten, mayoria di hudiu a rechas’é. Por ehèmpel, nan a hasi esei ora el a resusitá Lázaro; algu ku ni e lidernan hudiu ku tabata opon’é no por a nenga. Ma asina mes, nan no a kere ku e tabata e Mesías. Asta nan tabata kier a mata tantu e komo Lázaro.—Huan 11:47, 48, 53; 12:9-11.

³ Hesus tabata sa ku mayoria di hudiu lo no a asept’é komo e Mesías. (Huan 5:39-44) El a bisa algun disipel di Huan Boutista: “Felis ta esun ku no ta haña motibu pa trompeká en konekshon ku mi.” (Mat. 11:2, 3, 6) Pero, kiko a pone ku tantu hudiu asina a rechas’é?

4. Kiko nos lo analisá den e artíkulo akí?

 ⁴ Hopi hudiu den promé siglo a laga algun kos stroba nan di bira siguidó di Hesus. Tantu den e artíkulo akí komo den esun siguiente, nos lo wak kiko nan ta. Tambe nos lo mira dikon awe hopi hende no ta skucha nos mensahe. Anto mas importante ainda, nos lo mira ku si nos tin un fe fuerte, nos lo no laga nada stroba nos di bira siguidó di Hesus.

5. Dikon algun hudiu a pensa ku Hesus no por tabata e Mesías?

⁵ Hopi hudiu a laga Hesus su background stroba nan di bira su siguidó. Nan a rekonosé ku e tabata un ekselente maestro i ku el a hasi milager. Pero pa nan, e tabata djis yu di un karpinté. Anto e tabata di Názarèt, un stat insignifikante. Asta Natanael, kende despues a bira un disipel di Hesus, na promé instante a bisa: “Akaso algu bon por sali for di Názarèt?” (Huan 1:46) Kisas pa Natanael, e stat di Názarèt no tabata masha impreshonante. Òf, kisas e tabatin e profesia di Mikéas 5:2 na mente ku a bisa ku e Mesías lo a nase na Bètlehèm, i no na Názarèt.

6. Kiko e hudiunan mester a hasi pa nan por a rekonosé ku Hesus tabata e Mesías?

⁶ Loke Beibel a profetisá. Isaías a profetisá ku e enemigunan di Hesus lo no a buska pa sa e detayenan di e Mesías “su generashon,” esta, su liña di desendensia. (Isa. 53:8) Hopi di e detayenan ei tabata pará skirbí den e profesianan. Si nan a djis tuma tempu pa buska e informashonnan korekto, nan lo a bin haña sa ku Hesus a nase na Bètlehèm i ku e tabata desendiente di Rei David. (Luk. 2:4-7) E lugá di Hesus su nasementu a kuadra ku e profesia na Mikéas 5:2. Kiko anto tabata e problema? E hudiunan tabata muchu lihé pa saka konklushon. Nan no a bai buska tur detaye, i debí na esei nan no a bira su siguidó.

7. Dikon hopi hende awendia no ke sa nada tokante Testigunan di Yehova?

⁷ Mesun kos ta pasa awendia? Sí. Mayoria di Yehova su sirbidónan no ta hende riku ni importante. Pa hopi hende, nos ta ‘hende gewon sin muchu edukashon.’ (Echo. 4:13) Segun nan, nos no por siña hende tokante Beibel pasobra nos no a bai skol pa esei. Otronan ta para ariba ku nos ta un “religion merikano.” Pero en realidat, di tur e Testigunan ku ta biba rònt mundu ta mas o ménos 14 porshento so ta biba na Merka. Otronan a tende ku nos no ta kere den Hesus. Durante añanan, nan a yama nos “spion merikano,” “ekstremista” i “kibradó di famia.” Hende ku ta skucha e rumornan ei no tin tur detaye, i debí na esei nan no ke sa nada tokante Testigunan di Yehova.

8. Segun Echonan 17:11, kiko un hende tin ku hasi si e ke sa ken ta e sirbidónan di Yehova awe?

⁸ Loke un hende tin ku hasi. Hasi esfuerso pa haña sa kiko ta bèrdat. Esei ta loke Lukas a hasi. Ora el a skirbi su Evangelio, el a “investigá tur kos for di prinsipio ku eksaktitut.” E tabata ke pa su lektornan “mira kon sigur e kosnan” ku nan a skucha di Hesus tabata. (Luk. 1:1-4) E hudiunan na Berea a hasi meskos. E promé biaha ku nan a tende e bon notisia tokante Hesus, nan a analisá e Skritura Hebreo pa konfirmá ku loke nan tabata siña ta bèrdat. (Lesa Echonan 17:11.) Awe un hende lo tin ku hasi meskos. E tin ku kompará loke Testigunan di  Yehova ta siñ’é ku loke Beibel ta bisa. E tin ku studia e historia di Testigunan di Yehova den tempu moderno. Ora e hasi eseinan, lo e no bai tras di opinion ku otro hende tin tokante Testigunan di Yehova.

9. Kiko a pasa ora Hesus a nenga di duna un señal for di shelu?

⁹ E manera impreshonante ku Hesus tabata siña no tabata sufisiente pa algun hudiu; nan tabata ke mas. Nan a eksigié pa hasi “un señal for di shelu” pa proba ku e tabata e Mesías. (Mat. 16:1) Kisas nan no a komprondé Daniel 7:13 i 14 bon. Sinembargo, no tabata Yehova su tempu ainda pa e profesia ei kumpli. Loke Hesus tabata siña hende lo mester tabata sufisiente pa konvensé nan ku e tabata e Mesías. Pero ora el a nenga di hasi e señal ku nan a pidié, nan a rechas’é.—Mat. 16:4.

10. Kon Hesus a kumpli ku loke Isaías a bisa tokante e Mesías?

¹⁰ Loke Beibel a profetisá. Profeta Isaías a bisa tokante e Mesías: “Lo e no grita ni halsa su bos, ni lo e no laga su bos wòrdu tendí den kaya.” (Isa. 42:1, 2) Hesus a kumpli ku su asignashon sin hala atenshon na su mes. E no a traha tèmpel, no a bisti paña religioso ni a eksigí pa hende usa títulonan religioso ora nan a papia kuné. Durante Hesus su huisio, el a nenga di hasi milager pa Rei Heródes aunke ku su bida tabata na peliger. (Luk. 23:8-11) Ta bèrdat ku Hesus a hasi milager ora ku e tabata riba tera, pero el a enfoká prinsipalmente riba prediká e bon notisia. El a bisa su disipelnan: “Pa e motibu akí mi a bini.”—Mar. 1:38.

11. Ki pensamentu robes algun hende tin?

¹¹ Mesun kos ta pasa awendia? Sí. Hopi hende ta mira un katedral grandi yen di obra di arte kostoso i esei ta impreshoná nan. Otronan ta keda enkantá pa usa títulonan importante ora nan ta papia ku  nan lidernan religioso. Anto algun otro ta gusta selebrá seremonianan religioso aunke ku, durante tempu, hende a lubidá nan orígen i nifikashon. Mayoria di hende ku ta asistí na e sirbishinan ei no ta siña nada tokante Dios ni su propósito. Di otro banda, esnan ku sí ta asistí na nos reunionnan ta siña loke Yehova ta ferwagt di nos. Nos Salònnan di Reino ta limpi i práktiko; nan no ta ekstrabagante. I esnan ku ta dirigí e kongregashon no ta bisti paña religioso ni nan no tin títulonan importante. Nos siñansanan ta basá riba Beibel. Apesar di esei, hopi hende awe no ta interesá den nos mensahe pasobra nan ta haña ku nos manera di adorá ta muchu laf i ku loke nos ta siña hende no ta loke nan tin gana di skucha.

12. Segun Hebreonan 11:1 i 6, riba kiko bo fe mester ta basá?

¹² Loke bo tin ku hasi. Apòstel Pablo a bisa e kristiannan na Roma: “Fe ta bini despues ku un hende tende e palabra. Anto un hende ta tende e palabra ora un persona papia tokante Kristu.” (Rom. 10:17) Bo fe mester ta basá riba loke bo ta studia for di Beibel, i no riba partisipashon den seremonianan religioso ku no ta kuadra ku Beibel, pa bunita i impreshonante ku nan por ta. Fe firme ta basá riba konosementu eksakto pasobra “sin fe ta imposibel pa agradá Dios.” (Lesa Hebreonan 11:1, 6.) Pues, bo no tin nodi di para warda un señal espektakular for di shelu pa indiká bo ku bo a haña e bèrdat. Un estudio di Beibel mes ta sufisiente pa konvensé bo i kita kualke duda.

13. Kiko a pone hopi hudiu rechasá Hesus?

¹³ Den promé siglo, e disipelnan di Huan Boutista a keda sorprendí pasobra Hesus su disipelnan no tabata yuna. Hesus a splika nan ku su disipelnan no tabatin nodi di hasi esei miéntras ku e  tabata na bida. (Mat. 9:14-17) Apesar di esei, e fariseonan i enemigunan di Hesus a kritik’é pasobra e no a sigui nan kustumber- i tradishonnan. Nan a rabia masha hopi mes ora el a kura hende malu riba sabat. (Mar. 3:1-6; Huan 9:16) Nan a pretendé di ta masha deboto, obedesiendo lei di sabat, pero di otro banda, nan tabata hasi negoshi den e tèmpel. Nan a rabia masha pisá ora Hesus a kondená nan pa esei. (Mat. 21:12, 13, 15) Anto e hudiunan ku Hesus a prediká na dje den snoa na Názarèt a bira furioso ora el usa loke a pasa den pasado na Israel pa mustra ku nan tabata egoista i no tabatin fe. (Luk. 4:16, 25-30) Hopi hudiu a rechasá Hesus pasobra e no a hasi loke nan a spera ku lo el a hasi.—Mat. 11:16-19.

14. Dikon Hesus no a sigui tradishon humano ku no tabata di akuerdo ku e Skritura?

¹⁴ Loke Beibel a profetisá. Pa medio di Profeta Isaías, Yehova a bisa: “E hendenan akí ta aserká mi ku nan boka i ta onra mi ku nan lepnan, ma nan kurason ta leu for di mi, i nan temor pa mi ta konsistí di mandamentu di hende, ku nan ta siña for di kabes.” (Isa. 29:13) Hesus tabatin tur derecho pa no sigui tradishon humano i pa bisa ku nan no tabata basá riba e Skritura. Esnan ku a preferá di sigui regla- i tradishonnan na lugá di sigui e Skritura, a rechasá Yehova i esun ku el a manda komo Mesías.

15. Dikon hopi hende no ta gusta Testigunan di Yehova?

¹⁵ Mesun kos ta pasa awendia? Sí. Hopi hende no ta gusta Testigunan di Yehova pasobra nos no ta selebrá tradishonnan ku no ta basá riba Beibel, manera hasimentu di aña i pasku. Otronan ta rabia pasobra nos no ta partisipá den selebrashonnan patriótiko i no ta sigui kustumbernan di entiero ku no ta basá riba Beibel. E hendenan ei di bèrdat ta kere ku nan manera di adorá Dios ta agrad’é. Pero, nan no por agradá Yehova si nan ta preferá di sigui tradishon di mundu na lugá di e siñansanan ku tin bon kla den Beibel.—Mar. 7:7-9.

16. Kiko bo tin ku hasi, i kiko bo tin ku rechasá? (Salmo 119:97, 113 i 163-165)

¹⁶ Loke bo tin ku hasi. Stima Yehova su lei- i prinsipionan. (Lesa Salmo 119:97, 113, 163-165.) Ora ku bo ta stima Yehova, lo bo rechasá kualke tradishon ku no ta agrad’é. Lo bo no laga nada bira mas importante ku bo amor pa Yehova.

17. Kiko hopi hudiu a ferwagt di e Mesías?

¹⁷ Den tempu di Hesus algun hudiu tabata ke kambio di gobièrnu mesora. Nan a ferwagt ku e Mesías lo a libra nan for di e dominio di e gobièrnu romano. Pero ora nan a purba di hasi Hesus rei, el a nenga. (Huan 6:14, 15) E saserdotenan i otro hudiunan tabatin miedu ku Hesus lo a trese kambio di gobièrnu. Nan tabatin miedu ku e romanonan lo a rabia, kendenan a duna nan e poder ku nan tabatin. Tur e asuntunan polítiko ei a pone ku hopi hudiu no a bira siguidó di Hesus.

18. Ki profesia tokante e Mesías hopi hudiu a ignorá?

¹⁸ Loke Beibel a profetisá. Ta bèrdat ku hopi profesia a bisa ku e Mesías lo a bira un guerero viktorioso, pero hopi profesia tambe a bisa ku promé e mester a muri pa nos pikánan. (Isa. 53:9, 12) Ta  dikon anto hopi hudiu tabatin idea robes tokante e Mesías? Pasobra hopi di nan tabata ke pa nan problemanan ser solushoná mesora, anto ta p’esei nan a ignorá tur e profesianan ku no a primintí esei.—Huan 6:26, 27.

19. Kiko ta pone ku hopi hende no ta interesá den nos mensahe awe?

¹⁹ Mesun kos ta pasa awendia? Sí. Hopi hende no ta interesá den nos mensahe pasobra nos ta neutral den asuntunan polítiko. Pa nan nos tin ku vota. Pero, nos sa ku si nos skohe un lider humano pa goberná riba nos, nos ta rechasando Yehova. (1 Sam. 8:4-7) Tin ta sinti ku nos mester traha skol i hospital i tambe yuda komunidat. Nan ta nenga di skucha nos mensahe tambe pasobra nos ta hasi esfuerso pa prediká na lugá di solushoná mundu su problemanan.

20. Segun Mateo 7:21-23, kiko mester ta e kos di mas importante?

²⁰ Loke bo tin ku hasi. (Lesa Mateo 7:21-23.) Kòrda ku e kos di mas importante ta di hasi e trabou ku Hesus a manda nos. (Mat. 28:19, 20) Nunka laga problemanan polítiko i sosial di e mundu akí distraí bo. Nos ta stima hende i nos ta preokupá ku nan problemanan, pero nos sa ku e mihó manera ku nos por yuda nos próhimo ta di siña nan tokante e Reino di Dios i yuda nan bira amigu di Yehova.

21. Kiko nos mester ta desididu pa hasi?

²¹ Hopi di e hudiunan den promé siglo i hopi hende awe a laga algun kos stroba nan di bira siguidó di Hesus. Den e artíkulo akí, nos a analisá kuater di nan. Pero, ta e kuaternan ei so tin? Nò. Den e siguiente artíkulo, nos lo wak kuater mas. Laga nos ta desididu pa no laga nada stroba nos di bira siguidó di Hesus i pa nos tin un fe firme!