1-2. Ki difikultat hopi di nos rumannan ta haña nan kuné?

APÒSTEL Pablo a animá Timoteo: “Kumpli ku bo sirbishi kabalmente.” (2 Tim. 4:5) Nos tambe ta hasi esfuerso pa sigui e konseho ei, pero esei no ta bai sin difikultat. Hopi di nos rumannan tin miedu di prediká. (2 Tim. 4:2) Por ehèmpel, esnan ku ta biba na paisnan ku nos obra ta restringí òf te asta prohibí. Ku kurashi nan ta sigui prediká aunke nan sa ku nan por pèrdè nan libertat.

² Tin otro tipo di difikultat ku tambe por desanimá nos. Por ehèmpel, algun di nos rumannan mester traha oranan largu pa djis kumpra e kosnan básiko pa nan famia. Nan lo ke hasi mas den sirbishi, pero pa ora wikènt yega, nan no a sobra masha energia. Òf tin di nan ku no por hasi mashá den sirbishi debí na malesa króniko òf edat avansá; kisas algun no por ni sikiera sali fo’i kas. Anto otronan konstantemente ta sinti ku nan no ta masha balioso pa Yehova. Un ruman ku yama Mary * a bisa: “E echo ku mi tin ku lucha ku sintimentunan negativo ta kita tur mi energia; mi ta keda emoshonalmente kansá. Anto despues mi ta sinti mi malu ora mi ripará ku mi no a sobra masha tempu i energia pa sirbishi.”

3. Kiko nos lo wak den e artíkulo akí?

³ Sin importá e difikultatnan ku nos ta pasando aden, Yehova ta duna nos e forsa pa sigui sirbié te kaminda nos sirkunstansia ta permití. Pero, promé ku nos wak kon Yehova ta yuda nos, laga nos wak kon el a duna Pablo i Timoteo e forsa ku nan tabatin mester pa por a kumpli ku nan sirbishi apesar di difikultat.

4. Ki difikultat Pablo tabatin?

⁴ Pablo tabatin hopi difikultat. Su enemigunan a batié, piedr’é i ser’é den prizòn. (2 Kor. 11:23-25) Anto e no tabatin bèrgwensa pa bisa ku tin biaha e tabata lucha ku sintimentunan negativo. (Rom. 7:18, 19, 24) I e tabatin “un sumpiña den karni” ku e tabata ke pa Yehova kita fo’i dje.—2 Kor. 12:7, 8.

5. Kiko Pablo a logra apesar di tur e kosnan ku el a pasa aden?

⁵ Apesar di tur e kosnan ei ku Pablo a pasa aden, Yehova a dun’é e forsa ku tabatin mester pa sigui prediká. Pensa riba tur e kosnan ku el a logra. Por ehèmpel, tempu ku e tabata será den un kas na Roma, e tabata masha zeloso i a prediká na hopi hende, inkluso hende ku tabatin outoridat. (Echo. 28:17; Flp. 4:21, 22) El a prediká tambe na hopi sòldá di e Guardia Pretoriano i tambe na tur esnan ku a bin bishit’é. (Echo. 28:30, 31; Flp. 1:13) Durante e mesun tempu ei, Dios a us’é pa skirbi karta ku a yuda e kristiannan den pasado i ku te awe ta yuda nos. Anto su ehèmpel a fortalesé e rumannan na Roma asina tantu te ku nan a haña “asta mas kurashi pa papia e palabra di Dios sin miedu.” (Flp. 1:14) Aunke tin biaha e no por a hasi mashá, el a hasi tur loke e tabata por den su situashon. Anto esei a kontribuí na “adelanto di e bon notisia.”—Flp. 1:12.

6. Segun 2 Korintionan 12:9 i 10, kiko a yuda Pablo kumpli ku su sirbishi?

⁶ Pablo tabata sa ku tur loke el a logra den Yehova su sirbishi no tabata riba su mes forsa, sino ku e forsa ku el a haña di Yehova. El a rekonosé ku ta Yehova ta esun ku a dun’é forsa ora e tabata débil. (Lesa 2 Korintionan 12:9, 10.) Sí, Yehova a usa su spiritu santu pa duna Pablo e forsa ku e tabatin mester pa kumpli ku su sirbishi kabalmente—apesar di persekushon, enkarselashon i otro difikultat.

7. Ki ta algun kos ku Timoteo mester a vense pa e por a kumpli ku su sirbishi?

⁷ Aunke Timoteo tabata mas yòn ku Pablo, e tambe tabatin mester di Yehova su forsa pa kumpli ku su sirbishi. Por ehèmpel, el a kompañá Pablo riba  biahenan di misionero. Tambe Pablo a pidié bai bishitá i animá algun kongregashon. (1 Kor. 4:17) Por ta Timoteo a sintié insigur. Kisas ta p’esei Pablo a bis’é: “No laga ningun hende menospresiá bo nunka pasobra bo ta yòn.” (1 Tim. 4:12) Anto pa kolmo, durante e tempu ei, Timoteo tabatin su mes sumpiña den karni; “kada biaha” e tabata bira malu. (1 Tim. 5:23) Pero, Timoteo tabata sa ku Yehova por a usa Su spiritu santu pa dun’é e forsa ku e tabatin mester pa prediká e bon notisia i sirbi su rumannan.—2 Tim. 1:7.

8. Kon Yehova ta duna nos e forsa ku nos tin mester?

⁸ Awe Yehova ta duna nos e “poder ku ta surpasá esun di hende” pa nos por sigui sirbié fielmente. (2 Kor. 4:7) E ta hasi esei pa medio di kuater kos: orashon, Beibel, nos rumannan i nos sirbishi.

9. Kon orashon ta yuda nos?

⁹ Orashon. Na Efesionan 6:18, Pablo ta bisa nos pa sigui “resa tur ora.” Dios lo kontestá nos orashonnan i lo duna nos e forsa ku nos tin mester. Jonnie, un ruman na Bolivia, a sinti kon Yehova a yud’é ora e tabata pasando den diferente prueba. Su mayornan i su esposa a bira hopi malu pareu. Tabata masha difísil pa e por a kuida nan tur tres. Su mama a fayesé, i a dura hopi pa su esposa i su tata bira bon. Pensando bèk Jonnie a bisa: “Ora mi tabata sinti ku e kosnan tabata bira hopi pa mi, loke semper a yuda mi tabata hasi orashon na Yehova i splik’é kiko mi tabata sinti.” Yehova a duna Jonnie e forsa ku e tabatin mester pa dil ku su situashon. Ronald, un ansiano na Bolivia a haña sa ku su mama tabatin kanser. Un luna despues, su mama a fayesé. Kiko a yuda Ronald durante e tempu difísil ei? Orashon. El a bisa: “Mi tabata deshogá mi mes na Yehova i bis’é delaster un kos ku tabatin riba mi kurason. Mi sa ku e ta komprondé mi mas mihó ku kualke otro hende, asta mas mihó ku mi mes.” Tin biaha nos ta sinti ku nos emoshonnan ta bira muchu hopi i ta laga nos keda morto kansá, sin sa kiko pa bisa Yehova den orashon. Pero, kòrda ku Yehova mes ta pidi nos pa hasi orashon asta si nos no por splika kiko nos ta sinti.—Rom. 8:26, 27.

10. Segun Hebreonan 4:12, dikon ta asina importante pa lesa Beibel i meditá riba dje?

¹⁰ Beibel. Meskos ku Pablo, nos tambe por haña forsa i konsuelo for di e Skritura. (Rom. 15:4) Segun ku nos ta lesa Dios su Palabra i meditá riba dje, Yehova por usa su spiritu pa yuda nos komprondé kon Beibel por yuda nos. (Lesa Hebreonan 4:12.) Ronald, menshoná anteriormente, a bisa: “Mi ta kontentu ku tur anochi mi tabata lesa Beibel. Mi tabata meditá masha hopi mes riba Yehova su kualidatnan i ku kuantu amor e tabata trata su sirbidónan. Esei a duna mi forsa pa sigui padilanti.”

11. Kon Beibel a yuda un ruman ku su esposo a fayesé?

¹¹ Ora nos meditá riba Beibel, nos por mira nos situashon for di un otro ángulo. Wak kon Beibel a yuda un ruman ku su esposo a fayesé. Un ansiano a bis’é ku lo ta bon p’e lesa e buki di Yòb. Na promé instante e tabata blo kritiká Yòb so.  Den su mes e tabata bisa: “Yòb, bo ta blo pensa riba bo problemanan so!” Pero, despues el a realisá ku e no tabata muchu leu fo’i Yòb; e tambe tabata hasi meskos. Loke el a siña for di e lesamentu ei a yud’é p’e no wak su problemanan so, ma p’e meditá mas riba Yehova i e speransa ku e ta duna nos. Tur esei a dun’é e forsa ku e tabatin mester pa dil ku e doló di a pèrdè su esposo.

12. Kon Yehova ta usa nos rumannan pa duna nos e forsa ku nos tin mester?

¹² Nos rumannan. Yehova ta usa nan tambe pa duna nos e forsa ku nos tin mester. Pablo a skirbi ku e tabatin masha gana mes “pa por tin un interkambio di estímulo” ku su rumannan kristian. (Rom. 1:11, 12) Mary, menshoná anteriormente, gusta ta huntu ku su rumannan. El a bisa: “Yehova a duna mi e forsa ku mi tabatin mester pa medio di mi rumannan ku ni sikiera tabata sa di mi lucha ku sintimentunan negativo. Tin biaha nan a bisa algu ku a animá mi, anto otro biaha nan tabata manda karchi. Tur eseinan semper a bini nèt ora. Loke ku a yuda mi tambe ta di papia ku rumannan ku tabatin e mesun lucha ku mi i siña for di nan eksperensia. Anto e ansianonan semper ta rekordá mi ku mi ta balioso pa e kongregashon.”

13. Kon nos por fortalesé nos rumannan na reunion?

¹³ Un di e mihó okashonnan pa animá nos rumannan ta na reunion. Tuma e inisiativa pa fortalesé nan. Bisa nan ku bo ta stima nan i yama nan danki pa tur loke nan ta hasi. Por ehèmpel, promé ku reunion, un ansiano ku yama Peter a bisa un ruman muhé ku su kasá no ta Testigu: “Bo no por imaginá bo kon kontentu mi ta di mira boso akinan. Semper abo ku bo seis yunan ta nèchi bistí i kla prepará pa duna komentario.” E mama su wowo a yena ku awa, i el a kontestá: “E palabranan ei ta nèt loke mi tabatin mester awe.”

14. Kon sirbishi por yuda nos?

¹⁴ Nos sirbishi. Ora nos papia ku otro hende tokante Yehova, nos ta sinti bon, sea ku nan ta skucha òf nò. (Pro. 11:25) Un ruman ku yama Stacy a mira kon sirbishi a dun’é e forsa ku e tabatin mester. Ora un miembro di su famia a ser ekspulsá, e tabata masha tristu i tabata keda puntra su mes si tabatin algu mas ku e por a hasi pa yud’é. Stacy tabata pensa riba e kos ei so. Kiko a yud’é dil ku henter e situashon? Sirbishi! Segun ku e tabata prediká, mas e tabata pensa riba hende den su teritorio ku tabatin mester di su yudansa. I ménos e tabata pensa riba su situashon. El a bisa: “Yehova a duna mi un studiante ku a hasi progreso masha lihé mes. Esei a animá mi mashá. Sirbishi ta e kos ku mas a yuda mi den mi situashon.”

15. Kiko bo ta siña for di loke Mary a bisa?

¹⁵ Tin biaha algun ruman ta sinti ku nan no por hasi mashá den sirbishi debí na nan sirkunstansia. Si esei ta bo kaso, kòrda ku Yehova ta keda kontentu ku e esfuerso ku bo ta hasi. Ora Mary a muda na un otro teritorio kaminda hende ta papia un otro idioma, el a sinti ku e no tabata por a yuda mashá. El a bisa: “Pa un tempu, e úniko kos ku mi tabata por a hasi ta djis duna un komentario simpel, lesa un teksto òf duna tratado den sirbishi.” E tabata sintié insigur foral ora  el a kompará su mes ku e rumannan ku sí tabata por a papia e idioma bon. Pero, el a kambia su manera di pensa. El a bin komprondé ku Yehova por us’é aunke ku e no por a papia e idioma bon. El a bisa: “E bèrdatnan di Beibel ta masha simpel, anto nan por kambia un hende su bida.”

16. Kiko por yuda e rumannan ku no por sali fo’i kas?

¹⁶ Tin ruman ku tin masha gana di sali prediká, pero nan no por sali kas. Nan por tin sigur ku Yehova ta komprondé pa nan i ta apresiá tur loke nan por hasi. E por krea oportunidat pa nan prediká na esnan ku ta bin kuida nan na kas, prediká na dòkter òf na verpleegster. Si nan kompará loke nan tabata por a hasi den pasado ku loke nan ta hasiendo aworakí, esei por desanimá nan. Pero, si nan mira ku ta Yehova ta esun ku ta yudando nan aworakí, esei ta duna nan e forsa ku nan tin mester pa trata ku kualke prueba, sin pèrdè nan goso.

17. Segun Eklesiástes 11:6, dikon nos mester sigui prediká aunke nos no ta mira resultado mesora?

¹⁷ Nos no sa kua di e simianan di e bèrdat ku nos ta planta por saka rais i kuminsá krese. (Lesa Eklesiástes 11:6.) Por ehèmpel, Barbara, un ruman di 80 i piku aña, ta prediká regularmente via telefòn i karta. Den un di su kartanan, el a hinka E Toren di Vigilansia di 1 di mart 2014, ku tin e artíkulo “Kiko Dios A Hasi pa Bo?” Sin ku e tabata sa, el a manda e karta ei na un pareha ku tabata ekspulsá. Nan a lesa e revista bes tras bes. E esposo a sinti manera ta Yehova tabata papia kuné. E pareha a kuminsá bai reunion i ku tempu nan a bira Testigu atrobe—despues di mas ku 27 aña. Barbara lo a sintié masha animá i fortalesí pa mira kon esun karta ku el a manda ei tabatin un resultado asina positivo!

18. Kiko nos mester hasi pa Yehova duna nos e forsa ku nos tin mester?

¹⁸ Yehova ta duna nos e forsa ku nos tin mester pa medio di orashon, Beibel, nos rumannan i nos sirbishi. Ora nos hasi uso di e kuater kosnan ei, nos ta mustr’é ku nos ta konfia ku e por i ke yuda nos. P’esei, laga nos semper konfia nos Tata selestial, kende “por sostené fuertemente esnan ku nan kurason ta kompletamente di dje.”—2 Kró. 16:9.