1. Dikon nos tur mester di e sabiduria ku Yehova Dios ta duna? (Proverbionan 4:7)

 SI BO a yega di tuma un desishon importante den bo bida, sin duda bo a pidi Yehova sabiduria. Loke bo a pidi ei ta hopi bon. (Sant. 1:5) Rei Sálomon a skirbi: “Sabiduria ta e kos di mas importante ku bo mester tin; pues, atkerí sabiduria. Ora bo ta buska pa optené algu, buska pa optené perspikasia tambe.” (Pro. 4:7, NW) Klaru ku e no tabata papia akí di kualke sabiduria; e tabata papia di e sabiduria ku Yehova Dios ta duna. (Pro. 2:6) Pero, e sabiduria ei por yuda nos trata ku e problemanan djawendia? Konpolaga! Den e artíkulo akí nos lo wak esei.

2. Kua ta un bon manera pa haña e sabiduria ku Yehova ta duna?

² Un bon manera pa haña e sabiduria ku Yehova ta duna, ta di studia i apliká konsehonan di dos hende konosí pa nan sabiduria. Nos lo papia promé di Sálomon. Beibel ta bisa ku “Dios a hasi Sálomon un hòmber sumamente sabí i inteligente.” (1 Rei. 4:29) Despues, nos lo papia di Hesus, kende tabatin un sabiduria inkomparabel. E profesia na Isaías 11:2 ta bisa: “E spiritu di SEÑOR lo keda riba [Hesus], e spiritu di sabiduria i komprondementu.”

3. Kiko nos lo trata den e artíkulo akí?

³ Dios a duna Sálomon i Hesus masha tantu sabiduria. P’esei, nan por a duna bon konseho tokante kosnan ku ta importante pa nos tur. Den e artíkulo akí, nos lo papia  tokante tres di nan: e importansia di tin un punto di bista balansá di plaka, di trabou i di nos mes.

4. Ki diferensia tabatin entre e situashon finansiero di Sálomon i esun di Hesus?

⁴ Sálomon tabata masha riku i tabatin un bida luhoso. (1 Rei. 10:7, 14, 15) En kambio, Hesus tabatin masha tiki kos material anto ni un kas e no tabatin. (Mat. 8:20) Pero, nan tur dos tabatin un punto di bista balansá di kosnan material pasó nan sabiduria a bini di Yehova.

5. Kon Sálomon a mira plaka?

⁵ Sálomon a rekonosé ku plaka ta “protekshon.” (Ekl. 7:12) Plaka ta permití nos kumpra e kosnan ku nos tin mester i algun kos ku nos ta deseá. Pero, aunke Sálomon tabata masha riku, el a komprondé ku tin kosnan mas importante ku plaka. Por ehèmpel, el a skirbi: “Un bon nòmber ta mas di deseá ku gran rikesa.” (Pro. 22:1) Tambe el a mira ku masha poko biaha hende ku sèn ta kontentu ku loke nan tin. (Ekl. 5:10, 12) Anto el a bisa ku nos no mester pensa ku plaka ta e kos di mas importante, pasó e por disparsé masha lihé.—Pro. 23:4, 5.

6. Kon Hesus a mira kosnan material? (Mateo 6:31-33)

⁶ Hesus tabatin un punto di bista balansá di kosnan material. E tabata gusta kuminda i kos di bebe. (Luk. 19:2, 6, 7) Por ehèmpel, un di su promé milagernan tabata di hasi awa bira biña di bon kalidat. (Huan 2:10, 11) Anto riba e dia ku el a muri e tabatin un paña karu bistí. (Huan 19:23, 24) Pero e no a laga kosnan material bira e kos di mas importante den su bida. El a bisa su siguidónan: “Ningun hende no por ta esklabo di dos doño . . . Boso no por ta esklabo di Dios i di Rikesa.” (Mat. 6:24) Ei Hesus a laga nos komprondé ku, si nos buska e Reino promé, Yehova lo hasi sigur ku nos tin loke nos mester.—Lesa Mateo 6:31-33.

7. Ki bendishonnan Daniel a haña debí ku el a mantené un punto di bista balansá di plaka?

 ⁷ Hopi di nos rumannan a benefisiá ora nan a sigui Yehova su konseho tokante plaka. Wak e ehèmpel di un ruman soltero ku yama Daniel. El a bisa: “Tempu mi tabata mas yòn, mi a disidí ku mi ke hasi mi sirbishi na Yehova e kos di mas importante den mi bida.” Debí ku Daniel a tene su bida simpel, e por a usa su tempu i abilidatnan den hopi proyekto di e organisashon. El a agregá: “Di kurason mi por bisa ku mi no ta sinti niun tiki duele di e desishon ku mi a tuma. Ta bèrdat ku mi por a gana hopi plaka si mi a pone esei komo mi meta. Pero, e ora ei lo mi no tabatin tur e bunita amistatnan ku mi tin aworakí. Tampoko lo mi no tabatin e satisfakshon di pone e Reino na promé lugá den mi bida. Niun plaka na mundu no por duna mi e bendishonnan ku Yehova a duna mi.” Daniel su eksperensia ta mustra ku nos bida lo ta hopi mas mihó si nos focus riba kosnan spiritual i no riba plaka.

8. Kon nos sa ku Sálomon tabatin un punto di bista balansá di trabou? (Eklesiástes 5:18, 19)

⁸ Sálomon a bisa ku e satisfakshon òf goso ku nos ta sinti den nos trabou ta un “regalo di Dios.” (Lesa Eklesiástes 5:18, 19.) El a skirbi: “Den tur trabou tin ganashi [òf, “benefisio,” NW].” (Pro. 14:23) Sálomon no tabata djis papia pa papia; e tabata un hòmber trahadó. El a traha kasnan, planta kunukunan di wendrùif, traha hòfi i tankinan di awa. Tambe el a traha statnan. (1 Rei. 9:19; Ekl. 2:4-6) Tur e trabounan ei a duna Sálomon un grado di satisfakshon. Pero e tabata sa ku si e ke tabata berdaderamente felis, e tabatin ku hasi algu mas. P’esei, el a hasi hopi kos pa Yehova. Por ehèmpel, el a supervisá konstrukshon di un bunita tèmpel pa Yehova—un proyekto ku a dura shete aña. (1 Rei. 6:38; 9:1) Despues di hasi diferente kos, Sálomon a realisá ku e kos di mas importante ku un hende por hasi ta di sirbi Yehova. El a skirbi: “E konklushon di tur loke ku a wòrdu tendí, ta: teme Dios i warda su mandamentunan.”—Ekl. 12:13.

9. Kon Hesus a sòru di mantené un punto di bista balansá di su trabou di karpinté?

⁹ Hesus tabata un persona trahadó. Ora e tabata yòn, e tabata karpinté. (Mar. 6:3) Sigur su mayornan tabata kontentu ku e tabata yuda kubri e nesesidatnan di nan famia grandi. Komo ku e tabata hasi su trabou perfekto, kisas hopi hende lo tabata ke e kosnan ku el a traha. Aunke ku lo e tabata gusta su trabou masha hopi mes, el a hasi sigur di apartá tempu pa kosnan spiritual. (Huan 7:15) Ora el a kuminsá prediká fultaim, el a duna e konseho akí: “No traha pa kuminda ku ta daña, ma pa kuminda ku ta dura i ku ta hiba na bida eterno.” (Huan 6:27) Anto den Sermon Riba Seru el a bisa: “Montoná tesoro den shelu.”—Mat. 6:20.

10. Ki difikultat nos por haña si nos ta bon trahadó?

¹⁰ Komo kristian, nos ta haña e animashon pa “traha duru.” (Efe. 4:28) Mayoria di biaha, doñonan di trabou ta mira ku nos ta onesto i trahadó, i kisas nan ta bisa nos ku nan ta gusta nos manera di traha. Esei por pone ku nos ta kuminsá aseptá pa traha oranan èkstra pa asina  nos doño di trabou tin un bon impreshon di Testigunan di Yehova. Pero si nos hasi esei, nos lo no tin tempu pa nos famia ni pa Yehova. P’esei ta masha importante pa nos tin un punto di bista balansá di trabou anto ta Yehova su sabiduria por yuda nos haña esei.

11. Kiko William a siña for di e ehèmpel di un ansiano?

¹¹ Un hóben ku yama William a siña e importansia di mantené trabou na su lugá for di e ehèmpel di un ansiano ku e tabata traha p’e. El a bisa: “[E ansiano akí] tabata un hende hopi balansá. E tabata traha duru i pa motibu di e kalidat di su trabou su klientenan tabata papia bon di dje. Pero na fin di dia, e tabata sa kon pa laga su trabou pa e bai kas i dediká tempu na su famia i su religion. I bo sa kiko? E ta un di e hendenan di mas felis ku mi konosé!” b

12. Kon Sálomon a mustra ku e tabatin un punto di bista balansá di su mes, i kon el a pèrd’é?

¹² Miéntras Sálomon tabata sirbi Yehova fielmente, e tabatin un punto di bista balansá di su mes. Ora e tabata yòn i relativamente nobo komo rei, el a rekonosé ku e no tabatin eksperensia i a pidi Yehova Dios gui’é. (1 Rei. 3:7-9) Sálomon tabata konsiente tambe di e peliger di bira un hende orguyoso. E mes a skirbi: “Orguyo ta bin promé ku destrukshon, i un spiritu arogante promé ku kaida.” (Pro. 16:18) Ta tristu pa bisa ku Sálomon mes no a sigui e konseho ei. Pasobra un par di aña despues, el a bira orguyoso i no a hasi kaso di Yehova su instrukshonnan. Por ehèmpel, un di e leinan a bisa ku un rei hebreo “no mester a tuma hopi esposa pa su mes, pa su kurason no desviá.” (Deu. 17:17) Sálomon no a hasi kaso di e lei ei i tabatin  700 esposa i 300 konkubina, mayoria di nan no tabata sirbi Yehova. (1 Rei. 11:1-3) Kisas Sálomon a pensa: “Mi sa ki mi ta hasi.” Sea ku el a pensa asina òf nò, ku tempu el a sufri konsekuensia di su desobedensia na Yehova.—1 Rei. 11:9-13.

13. Kiko nos por siña for di e humildat di Hesus?

¹³ Hesus semper tabatin un punto di bista balansá i humilde di su mes. Promé ku el a bini na tera, el a hasi hopi kos maravioso miéntras e tabata sirbi Yehova. Pa medio di Hesus “tur otro kos a ser kreá, tantu den shelu komo riba tera.” (Kol. 1:16) Ta parse ku ora el a batisá, el a kòrda tur e kosnan ku el a hasi ora e tabata den shelu ku su Tata. (Mat. 3:16; Huan 17:5) Pero, e no a bira orguyoso ora el a kòrda tur e kosnan ei. Al kontrario, nunka el a hasi komo si fuera e tabata mihó ku otronan. El a bisa su disipelnan ku e no a bini na tera “pa ser sirbí, sino pa sirbi i pa duna su alma komo reskate a kambio di hopi hende.” (Mat. 20:28) Tambe el a rekonosé ku e no por hasi nada for di su propio inisiativa. (Huan 5:19) Esta humilde Hesus tabata! El a pone un ekselente ehèmpel pa nos sigui.

14. Kiko Hesus a bisa ku ta yuda nos tin un punto di bista balansá di nos mes?

¹⁴ Hesus a siña su disipelnan e importansia di mantené un punto di bista balansá di nan mes. Un dia, el a bisa nan: “[Dios] a konta asta e drachinan di kabei riba boso kabes.” (Mat. 10:30) E palabranan ei ta di gran konsuelo, foral si nos tin e tendensia di papia òf di pensa malu di nos mes. E palabranan ei ta laga nos mira kuantu nos Tata Yehova stima nos i ku nos ta masha balioso p’e. Si Yehova konsiderá ku nos ta digno pa ador’é i pa biba pa semper den su mundu nobo, ken nos ta pa pensa ku e ta robes?

15. (a) Ki punto di bista balansá di nos mes E Toren di Vigilansia a bisa ku nos mester tin? (b) Manera e plachinan di página 24 ta mustra, ki bendishonnan nos ta pèrdè si nos ta focus demasiado riba nos mes?

¹⁵ Un 15 aña pasá E Toren di Vigilansia  a bisa lo siguiente tokante e importansia di tin un punto di bista balansá di nos mes: “Klaru ku nos lo no kier pensa asina haltu di nos mes te ku nos ta kere ku nos ta masha kos; ni nos no ke bai n’e otro ekstremo i pensa ku nos no ta bal nada. Mas bien, nos meta mester ta pa kultivá un punto di bista rasonabel di nos mes, unu ku ta tene kuenta ku tantu nos puntonan fuerte komo nos limitashonnan. Un señora kristian a ekspres’é den e forma akí: ‘Mi no ta dje mal hende ei, pero mi no ta un pan di Dios tampoko. Mi tin mi kosnan bon i mi kosnan ménos bon, meskos ku tur otro hende.’” c

16. Dikon Yehova ta duna nos konseho i guia?

¹⁶ Mediante su Palabra, Yehova ta duna nos konseho i guia. Dikon? Pasobra e stima nos i ke pa nos ta felis. (Isa. 48:17, 18) E mihó kos ku nos por hasi ta di sigui pone Yehova na promé lugá den nos bida. Esei lo duna nos berdadero felisidat. Nos lo evitá hopi di e problemanan ku esnan ku ta enfoká demasiado riba plaka, trabou i nan mes ta haña nan kuné. P’esei, laga nos ta determiná pa ta sabí i hasi Yehova su kurason kontentu.—Pro. 23:15.