1. Ki desishon importante tur hende tin ku tuma?

 TUR hende na mundu tin un desishon importante di tuma: Apoyá Yehova Dios komo e Gobernante legítimo di universo òf skohe na banda di Satanas e Diabel, kende ta Dios su enemigu kruel. Aki no tin kuenta di keda neutral. Loke nan disidí lo determiná si nan lo biba pa semper òf nò. (Mat. 25:31-33, 46) Durante “e tribulashon grandi,” tur hende lo haña un marka, sea pa sobrebibí òf pa ser destruí.—Rev. 7:14; 14:9-11; Eze. 9:4, 6.

2. (a) Kiko Hebreonan 10:35-39 ta animá nos pa hasi? (b) Kon e buki di Revelashon por yuda nos?

² Lesa Hebreonan 10:35-39. Si bo a skohe pa Yehova su gobernashon, b’a skohe bon. Sigur bo ke yuda otro hende tuma e mesun bon desishon. E buki di Revelashon por yuda bo den esei. Revelashon ta mustra nos kiko lo pasa ku esnan ku skohe pa banda di Satanas. Pero, e ta mustra nos tambe e bendishonnan ku ta spera esnan ku fielmente ta keda na banda di Yehova. Ta masha importante pa nos ta na altura di e echonan ei, pasó esei lo yuda nos ta mas determiná pa sigui sirbi Yehova. Ademas, nos por usa loke nos a siña pa yuda otro hende tuma e desishon korekto i pa no hala atras.

3. Kiko nos lo trata den e artíkulo akí?

³ Den e artíkulo akí, nos lo bai kontestá e siguiente preguntanan: Ki bendishonnan ta spera esnan ku apoyá Dios su gobernashon? Kiko lo pasa ku esnan ku ta skohe pa apoyá e bestia salbahe koló kòrá bibu?

4. Kua grupo Huan ta mira huntu ku Hesus den shelu?

⁴ Den un vishon, Apòstel Huan ta mira dos grupo di sirbidó di Yehova ku ta apoyá Yehova su gobièrnu i ta haña bida eterno. E kantidat di e promé grupo ta 144.000. (Rev. 7:4) Nan ta bini for di tera pa forma parti di un gobièrnu huntu ku Hesus den shelu. I huntu kuné nan lo goberná tera. (Rev. 5:9, 10; 14:3, 4) Den e vishon, Huan ta mira nan pará huntu ku Hesus riba Seru di Sion den shelu.—Rev. 14:1.

5. Kiko lo pasa un djis akí ku e restu di e 144.000?

⁵ Fo’i tempu di e apòstelnan te aworakí, míles di hende a ser skohí pa forma parti di e 144.000. (Luk. 12:32; Rom. 8:17) Pero, Huan a tende ku ta solamente un restu, esta, un kantidat chikitu, di e grupo ei lo ta bibu aki riba tera durante e último dianan. Nèt promé ku tribulashon grandi kuminsá, nan lo haña nan “seyo” final, esta, Yehova su aprobashon. (Rev. 7:2, 3; 12:17) Anto, na un sierto momento durante e tribulashon grandi, nan lo bai shelu kaminda nan lo ta huntu ku e sobrá di e 144.000 ku ya a muri fiel. Nan lo goberná huntu ku Hesus den e Reino di Dios.—Mat. 24:31; Rev. 5:9, 10.

6-7. (a) Kua ta e otro grupo ku Huan a mira, i kiko nos a haña sa di nan? (b) Dikon e restu di e 144.000 i e “multitut grandi” mester ta interesá den Revelashon kapítulo 7?

⁶ Despues ku Huan a mira e grupo ku ta bai shelu, el a mira “un multitut grandi.” E grupo akí ta diferente for di e 144.000; nan no ta mará na un kantidat. (Rev. 7:9, 10) Kiko mas Revelashon ta bisa tokante nan? Esaki ta loke Huan a bin haña sa: “Nan ta esnan ku a sobrebibí e tribulashon grandi, i nan a laba nan pañanan largu i a hasi nan blanku den sanger di e Lamchi.” (Rev. 7:14) E “multitut grandi” akí ku a sobrebibí e tribulashon grandi, lo sigui biba riba tera i lo disfrutá di hopi bendishon.—Sal. 37:9-11, 27-29; Pro. 2:21, 22; Rev. 7:16, 17.

⁷ Sea bo a ser skohí pa bai shelu òf pa keda riba tera, bo ta mira bo mes riba e potrèt ku Revelashon 7 ta deskribí? Esei lo ta un tempu masha emoshonante pa tur dos grupo di Yehova su sirbidónan! Nos lo ta super kontentu ku nos a skohe pa apoyá e gobièrnu di Yehova. Pero, kiko mas e buki di Revelashon ta bisa tokante e tribulashon grandi?—Mat. 24:21.

8. Kon tribulashon grandi lo kuminsá, i kiko mayoria di hende lo hasi?

⁸ Manera nos a mira den e artíkulo anterior, e organisashonnan polítiko pronto lo ataká Babilonia e Grandi, esta, tur religion falsu ku ta eksistí. (Rev. 17:16, 17) E atake ei lo indiká ku tribulashon grandi a kuminsá. Pero, esei lo pone ku hopi hende lo kuminsá adorá Yehova? No, al kontrario, kapítulo 6 ta mustra ku durante e periodo desisivo ei hende ku no ta sirbi Yehova lo buska protekshon tantu serka organisashonnan polítiko komo komersial. Kapítulo 6 ta kompará e organisashonnan ei ku seru. Komo ku e hendenan ei lo no skohe pa e Reino di Dios, Yehova lo konsiderá nan komo su enemigu.—Luk. 11:23; Rev. 6:15-17.

9. Durante tribulashon grandi, dikon lo ta hopi bisto ku Yehova su sirbidónan ta diferente, i na kiko esei lo hiba?

 ⁹ Sin duda, durante e periodo sumamente difísil ei lo ta hopi bisto ku Yehova su sirbidónan ta diferente. Dikon? Pasobra nan lo sigui ta e únikonan ku lo adorá Yehova i ku lo nenga di apoyá “e bestia salbahe.” (Rev. 13:14-17) Sanger di esnan ku ta oponé Yehova lo herebé. Esei lo hiba ku un grupo di nashon lo ataká Dios su sirbidónan rònt mundu. Beibel ta yama e atake ei e atake di Gòg di Magòg.—Eze. 38:14-16.

10. Segun Revelashon 19:19-21, kiko Yehova lo hasi ora ku ataká su sirbidónan?

¹⁰ Kon Yehova lo sinti ora e atake kruel ei tuma lugá? E mes ta bisa: “Mi furia lo subi.” (Eze. 38:18, 21-23) Revelashon kapítulo 19 ta bisa nos kiko lo pasa despues. Yehova lo manda su Yu defendé Su sirbidónan i derotá nan enemigunan. Anto, “e ehérsitonan den shelu,” esta, e angelnan fiel huntu ku e 144.000, lo kompañá Hesus den e bataya kontra Gòg di Magòg. (Rev. 17:14; 19:11-15) Kon e guera akí lo kaba? Tur hende i tur organisashon ku ta oponé Yehova lo ser destruí!—Lesa Revelashon 19:19-21.

11. Kua ta e suseso mas emoshonante den e buki di Revelashon?

¹¹ Djis imaginá kon alegre i felis Dios su sirbidónan lo sinti nan ora nan mira ku nan a sobrebibí e destrukshon di Dios su enemigunan. Den shelu lo tin gritu di alegria ora Babilonia e Grandi ser destruí. Pero, un otro suseso lo pone ku lo tin mas alegria ainda. (Rev. 19:1-3) Kua suseso esei ta? E “kasamentu di e Lamchi,” e suseso mas emoshonante den e buki di Revelashon.—Rev. 19:6-9.

12. Ki ora e kasamentu di e Lamchi lo tuma lugá? (Revelashon 21:1, 2)

¹² Ki ora e kasamentu lo tuma lugá? Aunke ku tur e 144.000 lo ta den shelu nèt promé ku Armagedon kuminsá, no ta na e momento ei e kasamentu lo tuma lugá. (Lesa Revelashon 21:1, 2.) Lo e tuma lugá despues di Armagedon, ora ku tur Dios su enemigunan a ser destruí.—Sal. 45:3, 4, 13-17.

13. Kiko lo pasa na e kasamentu di e Lamchi?

¹³ Kiko lo pasa na e kasamentu di e Lamchi? Kasamentu ta uni un hòmber i un muhé. Di mes manera, e kasamentu di e Lamchi, den un sentido, lo uni e Rei, Hesukristu, ku su “brùit,” e 144.000. Kuminsando ku e suseso importante ei, e 144.000 huntu ku Hesus lo kuminsá goberná tera pa 1.000 aña.—Rev. 20:6.

14-15. Ku kiko Revelashon kapítulo 21 ta kompará e 144.000? (Wak e plachi riba portada.)

¹⁴ Mas despues, Revelashon kapítulo 21 ta kompará e 144.000 ku un stat hopi bunita ku yama “Herúsalèm Nobo.” (Rev. 21:2, 9) E stat akí ta trahá riba 12 piedra di fundeshi i riba nan tin skirbí “e 12 nòmbernan di e 12 apòstelnan di e Lamchi.” Dikon e detaye ei lo tabata interesante pa Huan? Pasó, el a mira su mes nòmber skirbí riba un di e piedranan. Esta un privilegio!—Rev. 21:10-14; Efe. 2:20.

¹⁵ No ta eksistí niun stat manera esaki. Dikon? Pasobra e stat akí su kaya prinsipal ta di oro puru, su 12 portanan ta 12 pèrla, su muraya i fundeshi ta trahá di piedra presioso i su largura, hanchura i  haltura tin mesun midí. (Rev. 21:15-21) Pero, Huan a ripará ku tabata falta un kos! Kiko? El a bisa: “Mi no a mira un tèmpel den e stat, pasobra ta Yehova Dios, e Todopoderoso, i e Lamchi ta su tèmpel. I e stat no tabatin mester di solo ni luna pa bria riba dje, pasobra e gloria di Dios tabata ilumin’é, i su lampi tabata e Lamchi.” (Rev. 21:22, 23) Esnan ku ta forma parti di Herúsalèm Nobo lo ta huntu ku Yehova. (Heb. 7:27; Rev. 22:3, 4) Ta p’esei ta bisa ku Yehova i Hesus ta e tèmpel den e stat.

16. Kiko lo pasa ku hende durante e Reinado di Mil Aña di Dios Su Reino?

¹⁶ Ora kristiannan ungí pensa riba e stat akí, nan ta sinti nan mashá felis. Pero, e kristiannan ku lo biba pa semper akí riba tera tambe mester sinti nan asina. Dikon? Pasobra durante e Reinado di Mil Aña, Herúsalèm Nobo lo trese hopi bendishon riba tera. Huan ta mira ku e bendishonnan akí ta kore manera “un riu di awa di bida.” Na tur dos banda di e riu tin ‘palunan di bida,’ i nan blachinan ta “pa kura e nashonnan.” (Rev. 22:1, 2) Durante e tempu ei, tur hende lo benefisiá di e bendishonnan ei. Pokopoko tur hende ku ta obedesidu lo bira perfekto. Lo no tin malesa mas, ni doló ni lágrima di tristesa.—Rev. 21:3-5.

17. Segun Revelashon 20:11-13, ken lo benefisiá di e Reinado di Mil Aña?

¹⁷ Ken lo benefisiá di e maravioso bendishonnan ei? E proménan ta bai ta e multitut grandi di hende ku lo sobrebibí Armagedon i e yunan ku kisas lo nase den mundu nobo. Pero, Revelashon kapítulo 20 ta papia di un resurekshon tambe. (Lesa Revelashon 20:11-13.) Tantu “hende hustu,” esta, esnan ku a sirbi Yehova fielmente komo hende “inhustu,” esta, esnan ku no a haña un chèns pa siña tokante Yehova lo haña un resurekshon. (Echo. 24:15; Huan 5:28, 29) Esei ke men ku tur hende morto lo haña un resurekshon durante e Reinado di Mil Aña? Nò. Esnan ku a haña e oportunidat di sirbi Yehova i deliberadamente a nenga esei lo no haña un resurekshon. Nan a haña nan chèns kaba i a demostrá ku nan no meresé bida den  Paradeis.—Mat. 25:46; 2 Tes. 1:9; Rev. 17:8; 20:15.

18. Kon hende su situashon lo ta na fin di e 1.000 aña?

¹⁸ Na fin di e 1.000 aña, tur hende lo ta perfekto. Niun hende lo no sinti efekto di e piká ku nos a heredá for di Adam. (Rom. 5:12) Nos lo no tin e maldishon di e piká di Adam riba nos mas. Esei lo nifiká ku na fin di e 1.000 aña, hende lo “haña bida” den sentido ku nan lo bira perfekto.—Rev. 20:5.

19. Pakiko mester di un último prueba?

¹⁹ Nos sa ku Hesus a keda fiel na Yehova asta ora Satanas a pon’é na prueba. Pero, ta tur hende perfekto lo ta dispuesto pa keda fiel na Yehova ora Satanas haña e oportunidat di pone nan na prueba? Kada un di nan lo tin chèns pa demostrá esei ora e fin di e 1.000 aña yega i laga Satanas sali for di abismo. (Rev. 20:7) Esnan ku keda fiel durante e último prueba ei lo haña bida eterno i berdadero libertat. (Rom. 8:21) Pero, esnan ku rebeldiá kontra Yehova lo ser destruí huntu ku Satanas i su demoñonan.—Rev. 20:8-10.

20. Kon bo ta sinti bo awor despues di e repaso di e profesianan emoshonante di e buki di Revelashon?

²⁰ Kon bo ta sinti bo awor ku nos a kaba di hasi e repaso breve akí di e buki di Revelashon? Bo ta mira bo mes den e profesianan ei? Esaki ta duna bo gana di invitá otronan pa djòin nos den adorashon puru di nos Dios? (Rev. 22:17) Awor ku nos a papia di e kosnan ku lo pasa den futuro, nos ta kontentu i nos ke ripití loke Apòstel Huan a bisa: “Amèn! Bini, Señor Hesus!”—Rev. 22:20.