1. Segun Revelashon, kiko Satanas ta hasi ku Yehova su sirbidónan?

 E BUKI di Revelashon ta splika ku Dios su Reino ya kaba ta goberná den shelu i ku a saka Satanas afó. (Rev. 12:1-9) Esei a nifiká alivio pa shelu pero problema pa nos aki riba tera. Dikon? Pasobra Satanas ta baha tur su rabia riba tur esnan ku ta sirbi Yehova aki riba tera.—Rev. 12:12, 15, 17.

2. Kiko lo yuda nos keda fiel na Yehova?

² Kon nos por keda fiel na Yehova apesar di Satanas su atakenan? (Rev. 13:10) Algu ku por yuda nos ta di sa kiko lo pasa den futuro. Den Revelashon, Apòstel Huan a papia tokante algun di e bendishonnan ku pronto nos lo haña. Anto un di e bendishonnan ei ta destrukshon di Dios su enemigunan. Laga nos wak kon Revelashon ta deskribí nan i kiko lo pasa ku nan.

3. Menshoná e bestianan salbahe ku Revelashon ta papia di dje.

³ For di e promé versíkulo di Revelashon, nos ta haña sa ku e vishonnan den dje ta “den forma di símbolo,” esta, nan no ta literal. (Rev. 1:1) Despues, nos ta lesa tokante algun bestia salbahe ku ta representá Dios su enemigunan. Por ehèmpel, tin “un bestia salbahe” ku ta “sali for di laman” i ku tin “dies kachu i shete kabes.” (Rev. 13:1) Despues, tin “un otro bestia salbahe” ku ta “sali for di tera” i ku ta “papia manera un dragon.” E di dos bestia ei “ta laga kandela baha for di shelu.” (Rev. 13:11-13) Kaba Huan a mira un di tres bestia, “un bestia salbahe koló kòrá bibu” ku tin un prostituta sintá riba dje. E tres  bestianan salbahe ei ta representá Yehova su enemigunan ku pa hopi tempu kaba ta bringando kontra dje i su Reino. P’esei ta masha importante pa nos sa ta ken e enemigunan ei ta.—Rev. 17:1, 3.

4-5. Kon Daniel 7:15-17 ta yuda nos komprondé kiko e bestianan salbahe ta representá?

⁴ Pa nos por sa ken e enemigunan akí ta, ta importante pa nos sa kiko e bestianan salbahe i e prostituta ta representá. E mihó manera pa nos komprondé esei ta di laga Beibel mes splika nos. Hopi di e kosnan ku Revelashon ta deskribí den forma di símbolo ya ta spliká den otro bukinan di Beibel kaba. Por ehèmpel, den un soño Profeta Daniel a mira “kuater bestia grandi tabata subi sali for di laman.” (Dan. 7:1-3) Daniel a bisa ku e kuater bestianan grandi ei ta representá kuater “rei,” esta, kuater gobièrnu. (Lesa Daniel 7:15-17.) E splikashon ei ta yuda nos komprondé ku e bestianan salbahe di Revelashon tambe mester ta representá gobièrnu.

⁵ Laga nos wak kon Beibel ta yuda nos komprondé kiko algun di e símbolonan deskribí den Revelashon ta representá. Nos lo kuminsá ku e bestianan salbahe. Promé, nos lo wak kiko nan ta representá. Djei, nos ta bai wak kiko lo pasa ku nan. I por último nos lo analisá kiko tur esei ta nifiká pa nos.

6. Kiko e bestia salbahe ku shete kabes deskribí na Revelashon 13:1-4 ta representá?

⁶ Kiko e bestia salbahe ku shete kabes ta representá? (Lesa Revelashon 13:1-4.) E bestia akí parse un leopardo. Pero, e tin pia di ber, boka di leon i dies kachu. E kuater bestianan menshoná na Daniel kapítulo 7 tambe tin e karakterístikanan ei, pero separá. Pero, Revelashon kapítulo 13 ta menshoná un bestia ku tin tur e kuater karakterístikanan ei. E bestia salbahe akí no ta representá djis un gobièrnu ni djis un potensia mundial. Huan a bisa tambe ku e bestia ei tin “outoridat riba tur tribu, pueblo, idioma i nashon.” Pues, ta opvio ku e ta mas poderoso ku kualke gobièrnu di kualke nashon. (Rev. 13:7) Tur e faktornan ei ta indiká ku e bestia salbahe akí ta representá tur e gobièrnunan ku a yega di goberná riba humanidat te den nos tempu. b—Ekl. 8:9.

7. Kiko e shete kabesnan di e bestia salbahe ta representá?

⁷ Kiko kada un di e shete kabesnan ta representá? Revelashon 17 ta yuda nos ku kontesta pa e pregunta ei pasobra e ta deskribí un imágen di e bestia salbahe menshoná den kapítulo 13. Revelashon 17:10 ta bisa: “Esakinan ta representá shete rei: sinku a kai, un t’ei, i e otro no a yega ainda; ma ora e yega, e tin ku keda pa un tempu kòrtiku.” Di tur e gobièrnunan ku Satanas a usa, ta shete di nan so por kompará komo “kabes.” Dikon? Pasobra nan tabatin hopi poder. Hopi sirbidó di Dios a biba den teritorio kaminda e gobièrnunan akí tabata manda riba nan òf tabata persiguí nan. Pa ora Apòstel Huan a haña e vishon, ya sinku di nan a goberná kaba: Egipto, Asiria, Babilonia, Medo-Persia i Gresia. Anto e di seis, Roma, tabata goberná. Pero kua gobièrnu lo ta e di shete kabes?

8. Kiko e di shete kabes di e bestia salbahe ta representá?

 ⁸ Kua potensia mundial ta goberná durante e tempu di fin akí, esta, “e dia di Señor”? (Rev. 1:10) E ta un kombinashon di dos gobièrnu poderoso: Reino Uní i Merka, esta, Potensia Mundial Angloamerikano. Pues, nos por konkluí ku esei ta e di shete kabes di e bestia salbahe menshoná den Revelashon 13:1-4.

9. Kiko e bestia salbahe ku tin “dos kachu manera un lamchi” ta representá?

⁹ Revelashon kapítulo 13 ta presentá e di shete kabes, esta, Potensia Mundial Angloamerikano, den forma di un bestia salbahe ku tin “dos kachu manera un lamchi,” ma ku ta “kuminsá papia manera un dragon.” Revelashon kapítulo 16 i 19 ta yam’é “e profeta falsu.” (Rev. 16:13; 19:20) Den e vishon ku Huan a mira, e bestia akí “ta hasi señalnan grandi i asta ta laga kandela baha for di shelu riba tera den bista di hende.” (Rev. 13:11-15) Daniel a menshoná algu paresido, esta, ku Potensia Mundial Angloamerikano “lo destruí,” esta, kousa destrukshon horendo. (Dan. 8:19, 23, 24) Esei ta nèt loke a pasa durante Segundo Guera Mundial. E dos bòmnan atómiko ku a pone ku eventualmente e guera a yega na su fin a ser diseñá pa sientífikonan britániko i merikano. Pues, den un sentido, Potensia Mundial Angloamerikano a “laga kandela baha for di shelu riba tera.”

10. Kiko “e imágen di e bestia salbahe” ta representá? (Revelashon 13:14, 15; 17:3, 8, 11)

¹⁰ Huan a mira un otro bestia salbahe. Esun akí ta kasi meskos ku e bestia salbahe ku shete kabes, pero su koló ta kòrá bibu. Revelashon ta yam’e “e imágen di e bestia salbahe” i ta bisa ku e ta “un di ocho rei.” c (Lesa Revelashon 13:14, 15; 17:3, 8, 11.) Huan a bin haña sa ku e “rei” akí a kuminsá eksistí, djei e no tabat’ei mas, anto despues el a aparesé di nobo. E deskripshon ei ta pas pa Nashonnan Uní. E tabata eksistí promé komo Liga di Nashonnan. Durante Segundo Guera Mundial, el a stòp di eksistí. Mas despues, el a aparesé atrobe pero komo Nashonnan Uní i ta defendé interes di e sistema polítiko mundial.

11. Kiko e bestianan salbahe lo hasi, i dikon nos no mester tin miedu?

¹¹ Pa medio di informashon falsu, e bestianan salbahe, esta, e gobièrnunan, lo animá hende pa bringa kontra Yehova i su sirbidónan. Lo ta komo si fuera e bestianan salbahe lo reuní “e reinan di henter e tera habitá” huntu pa e guera di Armagedon ku ta “e gran dia di Dios, e Todopoderoso.” (Rev. 16:13, 14, 16) Pero, nos no mester tin miedu! Nos Dios, Yehova, mesora lo aktua i salba tur esnan ku ta apoyá su gobièrnu.—Eze. 38:21-23.

12. Kiko lo pasa ku tur e bestianan salbahe?

¹² Kiko lo pasa ku tur e bestianan salbahe? Revelashon 19:20 ta bisa ku lo “gara e bestia salbahe i huntu kuné e profeta falsu ku su dilanti a hasi e señalnan milagroso, ku kua e profeta a engañá esnan ku a risibí e marka di e bestia salbahe i esnan ku a adorá su imágen. Sí, miéntras  ku nan dos tabata bibu ainda, a tira nan den e lago di kandela ku ta kima ku suafel.” Pues miéntras ku e gobièrnunan akí ta gobernando ainda, nan lo ser destruí pa semper.

13. Den ki situashon difísil tur kristian lo haña nan aden?

¹³ Kiko ta e lès pa nos? Komo kristian, nos mester ta leal na Yehova i su Reino. (Huan 18:36) P’esei, nos no ta mete ni tuma parti den niun asuntu polítiko. Pero, esei por ta hopi difísil pasobra gobièrnunan ta eksigí apoyo total di nan siudadanonan, sea ku echo òf ku palabra. Esnan ku sukumbí na e preshon ei lo haña e marka di e bestia salbahe. (Rev. 13:16, 17) I si un kristian haña e marka ei, lo e pèrdè Yehova su aprobashon i lo e no haña bida eterno. (Rev. 14:9, 10; 20:4) P’esei, ta masha importante pa nos keda leu for di tur loke tin haber ku polítika, sin importá kuantu preshon gobièrnu pone riba nos.

14. Segun Revelashon 17:3-5, kiko a asombrá Apòstel Huan?

¹⁴ Apòstel Huan a bisa ku el “a keda masha asombrá mes” pa un kos ku el a mira. Kiko el a mira? Un muhé sintá riba e bestia salbahe koló kòrá bibu. (Rev. 17:1, 2, 6) E ta un “gran prostituta” ku yama “Babilonia e Grandi.” E ta “kometé fornikashon” ku “e reinan di tera.”—Lesa Revelashon 17:3-5.

15-16. Kiko Babilonia e Grandi ta, i kon nos sa esei?

¹⁵ Kiko “Babilonia e Grandi” ta? E muhé akí no por ta representá un gobièrnu ni un organisashon polítiko. Dikon nò? Pasobra Revelashon ta bisa ku e ta kometé fornikashon ku e reinan di tera. (Rev. 18:9) E echo ku e ta sintá riba e bestia salbahe koló kòrá bibu ta mustra ku e ta purba di manda riba e gobernantenan ei. Di otro banda, e no por ta representá organisashon komersial golos pa plaka di Satanas su mundu. Dikon nò? Pasobra Revelashon ta papia di nan mas despues i ta yama nan “e komersiantenan di tera.”—Rev. 18:11, 15, 16.

¹⁶ Den Beibel, e palabra “prostituí” por referí na e komportashon di hende ku ta bisa ku nan ta sirbi Dios pero ku ta praktiká idolatria òf ku di un manera òf otro ta amigu di mundu. (1 Kró. 5:25; Sant. 4:4) Di otro banda, Beibel ta usa e palabranan “puru” i “bírgen” pa tur esnan ku ta sirbi Yehova fielmente. (2 Kor. 11:2; Rev. 14:4) Den tempu di Beibel, Babilonia tabata un sentro di adorashon falsu. Pues anto, Babilonia e Grandi mester ta representá tur forma di adorashon falsu, esta, tur religion falsu ku ta eksistí.—Rev. 17:5, 18; wak e artíkulo riba jw.org na spañó “¿Qué es Babilonia la Grande?”

17. Kiko lo pasa ku Babilonia e Grandi?

¹⁷ Kiko lo pasa ku Babilonia e Grandi? Revelashon 17:16 i 17 ta bisa: “E bestia salbahe ku e dies kachunan ku bo a mira lo odia e prostituta. Nan lo kita tur kos for di dje, kit’é sunú, kome su karni i kim’é kompletamente ku kandela. Pasobra Dios a hinka den nan kurason pa kumpli ku Su pensamentu.” Sí, Yehova lo sòru pa e nashonnan usa e bestia salbahe koló kòrá bibu, esta, Nashonnan Uní, pa ataká tur religion falsu i destruí nan kompletamente.—Rev. 18:21-24.

18. For di kiko nos mester keda leu si nos no ke tin nada di haber ku Babilonia e Grandi?

 ¹⁸ Kiko ta e lès pa nos? Ta importante pa nos “forma di adorashon . . . ta limpi i sin mancha for di e punto di bista di nos Dios.” (Sant. 1:27) P’esei, nos mester keda leu for di Babilonia e Grandi su siñansanan falsu, su selebrashonnan, su norma- i moralnan baho i for di spiritismo. Ademas, nos mester sigui spièrta hende pa “sali for di [Babilonia e Grandi],” ya asina Yehova no ta konsiderá nan kómplise di Babilonia e Grandi su pikánan.—Rev. 18:4.

19. Ken e ‘dragon grandi, koló di kandela’ ta?

¹⁹ Revelashon tambe ta papia tokante ‘un dragon grandi koló di kandela.’ (Rev. 12:3) E dragon akí ta bringa kontra Hesus i su angelnan. (Rev. 12:7-9) E ta ataká Dios su pueblo i ta for di dje e bestianan salbahe, esta, e gobièrnunan, ta haña nan poder. (Rev. 12:17; 13:4) Ken e dragon akí ta? E ta “e kolebra original, esun ku yama Diabel i Satanas.” (Rev. 12:9; 20:2) E ta esun ku tin kontrol riba tur Dios su enemigunan.

20. Kiko lo pasa ku e dragon?

²⁰ Kiko lo pasa ku e dragon? Revelashon 20:1-3 ta splika ku un angel lo benta Satanas den abismo. E abismo ei lo ta manera un prizòn p’e. Satanas lo ta será “pa 1.000 aña,” i durante e periodo ei lo ‘e no por gaña e nashonnan mas.’ Por último, Satanas i su demoñonan lo ser “bentá den e lago di kandela i suafel.” Esei ta nifiká ku nan lo ser destruí pa semper. (Rev. 20:10) Bo por imaginá bo kon dushi bida lo ta ora Satanas i su demoñonan no t’ei mas?

21. Dikon nos por ta felis?

²¹ E artíkulo akí a yuda nos komprondé vários di e símbolonan den Revelashon. Nos a haña sa ken Yehova su enemigunan ta, i kiko lo pasa ku nan. Ki animante esei ta! Manera Revelashon 1:3 ta bisa: “Felis ta esun ku ta lesa e palabranan di e profesia akí na bos haltu pa otro hende, i felis ta esnan ku ta tende nan.” Pero, unabes ku Yehova su enemigunan no t’ei mas, ki bendishon hende ku keda fiel na Yehova lo haña? Nos lo papia tokante esei den e siguiente artíkulo.