1-2. Kiko por pone ku algun teksto ta haña un nifikashon mas importante pa nos?

 ORA dos sirbidó di Yehova ku ta namorá otro kasa, nan ta haña un diskurso. E diskurso ei tin tekstonan di Beibel ku ya nan a yega di skucha vários biaha. Pero, for di e dia akí padilanti, e tekstonan ei ta haña un nifikashon mas importante pa nan. Dikon? Pasobra nan lo tin ku apliká e tekstonan ei awor komo pareha kasá.

² Mesun kos ta pasa ora un pareha haña yu. Durante e añanan, nan a skucha vários diskurso tokante kon pa lanta yu. Pero awor ku nan mes ta bai haña yu, e prinsipionan ei ta bira importante pasobra nan a haña un responsabilidat masha spesial. No tin duda, kambio den bida por pone ku nos ta mira tekstonan di Beibel ku nos konosé fo’i kabes, ku un otro bista. Ta p’esei sirbidónan di Yehova ta lesa Beibel i ta meditá riba dje “tur e dianan di [nan] bida,” meskos ku e reinan di Israel mester a hasi.—Deu. 17:19.

3. Kiko nos lo trata den e artíkulo akí?

³ Mayornan, boso tin un di e privilegionan di mas grandi ku un kristian por tin, esta, di siña boso yunan tokante Yehova. Boso lo no ke djis duna nan informashon tokante Yehova. Boso ke siña nan stim’é di kurason. Pero, kon boso por logra esei? Den e artíkulo akí nos lo papia di kuater prinsipio ku lo yuda boso. (2 Tim. 3:16) Tambe nos lo wak kon a bai ku algun mayor ku a apliká e prinsipionan di Beibel ei.

4. Kua ta un prinsipio ku por yuda mayornan siña nan yunan stima Yehova? (Santiago 1:5)

⁴ Prinsipio 1: Buska Yehova su guia. Pidié duna boso e sabiduria ku boso mester pa yuda boso yunan stim’é. (Lesa Santiago 1:5.) E ta e mihó persona ku boso por pidi konseho. Dikon? Tin vários motibu, laga nos wak dos di nan. Promé, e ta e mayor ku tin mas tantu eksperensia. (Sal. 36:9) Anto di dos, su konsehonan semper ta duna bon resultado.—Isa. 48:17.

5. (a) Ki yudansa Yehova su organisashon ta duna mayornan? (b) Manera e vidio ta mustra, kiko boso a siña for di e manera ku e rumannan Amorim a lanta nan yunan?

⁵ Yehova ta usa su Palabra i su organisashon pa duna mayornan hopi informashon ku por yuda nan lanta nan yunan i siña nan stim’é. (Mat. 24:45) Riba nos website tin e seri di artíkulo “Yudansa pa Famia,” i nan ta hopi útil pa mayornan. Ántes, e artíkulonan ei tabata sali den Spièrta! Riba jw.org tambe tin hopi vidio ku ta yuda mayornan apliká konsehonan ku Yehova ta duna enkuanto kon pa lanta yu. b—Pro. 2:4-6.

6. Kiko Joe a bisa tokante e guia ku e i su kasá ta haña for di Yehova su organisashon?

⁶ Hopi mayor a bisa ku nan ta masha kontentu ku e yudansa ku Yehova su organisashon ta duna. Joe, un tata, a bisa: “Lanta tres yu den bèrdat no ta nada fásil. Ami ku mi kasá semper ta hasi orashon na Yehova i pidié pa e yuda nos. Hopi biaha nos tabata den un sierto situashon, i un vidio òf artíkulo a sali nèt na ora pa yuda nos ku esei. Semper nos a konfia riba Yehova su konseho.” Joe i su kasá a mira ku e artíkulo- i vidionan ei ta yuda nan yunan hala mas serka Yehova.

7. Dikon ta importante pa mayornan paga tinu riba e ehèmpel ku nan ta pone pa nan yunan? (Romanonan 2:21)

⁷ Prinsipio 2: Sea un bon ehèmpel. Mucha ta wak tur kos ku nan mayornan ta hasi i mayoria di biaha ta imitá  nan. Klaru, niun mayor no ta perfekto. (Rom. 3:23) Pero, mayornan mester hasi nan esfuerso pa ta bon ehèmpel pa nan yunan. (Lesa Romanonan 2:21.) Papiando di yu, un tata a bisa: “Nan ta manera spòns ku ta apsorbá tur kos.” Anto el a agregá: “Ora nan mira ku nos no ta hasi loke nos ta siña nan, nan lo tira esei na nos kara.” Pues, si boso ke pa boso yunan stima Yehova, boso tin ku laga nan mira kuantu boso ta stima Yehova.

8-9. Ki bo ta siña for di loke Andrew i Emma a konta?

⁸ Tin hopi manera ku mayornan por siña nan yunan stima Yehova. Wak kiko Andrew, un hóben di 17 aña, a bisa: “Mi mayornan semper tabata bisa nos ku ta importante pa hasi orashon. Tur anochi, tata tabata hasi orashon ku mi asta ora mi mes a hasi mi orashon kaba. Semper mi mayornan tabata bisa nos: ‘Ki ora ku ta bo por resa na Yehova.’ P’esei, orashon ta hopi importante pa mi. I awor ta fásil pa mi hasi orashon. Anto mi ta sinti ku Yehova ta un tata ku ta stima mi.” Mayornan, si boso ta stima Yehova hopi, esei lo yuda boso yunan tambe stim’é.

⁹ Laga nos wak e ehèmpel di Emma tambe. Ora su tata a bai laga nan, el a laga e mama ku debe masha grandi. Emma a bisa: “Hopi biaha sèn no tabata yega. Pero semper Mama tabata bisa ku Yehova ta bon, i ku semper e ta perkurá pa su sirbidónan. Ora mi tabata opservá Mama, mi por a mira ku e tabata konvensí di esei. Loke Mama tabata bisa nos, e mes tambe tabata hasi.” Ki ta e lès? Ku asta ora mayornan ta den situashonnan difísil, nan por pone bon ehèmpel.—Gal. 6:9.

10. Ki oportunidat e mayornan israelita tabatin pa kòmbersá ku nan yunan? (Deuteronomio 6:6, 7)

¹⁰ Prinsipio 3: Kòmbersá regularmente ku boso yunan. Yehova a instruí e israelitanan den pasado pa papia ku nan yunan tokante dje tur ora. (Lesa Deuteronomio 6:6, 7.) Durante dia, mayornan tabatin hopi oportunidat pa papia ku nan yunan i siña nan stima Yehova di kurason. Por ehèmpel, un mucha hòmber israelita lo a pasa oranan huntu ku su tata den kunuku, sea pa planta òf pa kosechá. Su ruman muhé lo a pasa gran parti di e dia ku su mama, sea ta kose òf hasiendo otro kosnan. Segun ku e mayornan i e yunan ta traha huntu, nan lo tabata kòmbersá tokante hopi kos importante. Por ehèmpel, kisas nan lo tabata papia tokante kon bon Yehova ta i kon e ta yuda e famia.

11. Ki oportunidat mayornan awe tin pa kòmbersá ku nan yunan?

¹¹ Kos a kambia, bida no ta manera ántes mas. Awe den hopi pais, apénas mayornan tin tempu pa ta huntu ku nan yunan. Dikon? Pasobra nan tin ku bai traha i e muchanan tin ku bai skol. P’esei, mayornan mester buska oportunidat pa kòmbersá ku nan yunan. (Efe. 5:15, 16; Flp. 1:10) Adorashon Komo Famia ta un di e oportunidatnan pa mayornan hasi esei. Un hóben ku yama Alexander a bisa: “Mi tata semper ta plania pa nos Adorashon Komo Famia, i no ta laga nada stroba nos di pasa e tempu ei huntu. Anto despues ku nos kaba di studia, nos ta djis sigui kòmbersá.”

12. Kiko un kabes di famia ke logra durante Adorashon Komo Famia?

 ¹² Si bo ta un kabes di famia, kon bo por hasi bo Adorashon Komo Famia leuk pa e muchanan? Dikon bo no ta studia e publikashon nobo Bo Por Disfrutá di Bida pa Semper! ku nan? E buki ei ta habri kaminda pa kòmbersá masha dushi mes ku otro. Komo mayor, bo ke pa bo yu ta habrí ku bo tokante e kosnan ku ta preokup’é i e kosnan ku e ta pasa aden. P’esei, no usa e tempu di Adorashon Komo Famia pa korigí nan ni pa keda papia papia den nan kabes. Anto, purba di no pèrdè kabes òf zundra bo yunan si nan bisa algu ku no ta di akuerdo ku loke Beibel ta bisa. Mas bien, bisa nan ku bo ta kontentu ku nan ta onesto i ku nan ta habrí. Sigui animá nan pa bisa loke nan ta sinti, pasobra ora bo sa kiko realmente ta biba den nan kurason, e ora ei lo ta mas fásil pa bo yuda nan.

13. Ki otro oportunidat mayornan tin pa por yuda nan yunan hala mas serka di Yehova?

¹³ Mayornan, durante dia, buska oportunidat pa yuda bo yunan hala mas serka di Yehova. Bo no tin ku warda te dia ku bo tin ku studia ku nan pa bo siña nan tokante Yehova. Wak loke un mama ku yama Lisa ta bisa: “Nos ta yuda nos yunan mira e konekshon entre Yehova i su kreashon. Por ehèmpel, ora nos kachó hasi algu ku ta pone e muchanan hari, nos ta bisa nan ku esei ta mustra ku Yehova ta un Dios felis i ku e ta stima bida meskos ku nos.”

14. Dikon ta importante pa mayornan yuda nan yunan skohe bon amigu? (Proverbionan 13:20)

¹⁴ Prinsipio 4: Yuda boso yunan skohe bon amigu. Beibel ta bisa bon kla ku nos amigunan tin influensia riba nos, sea pa bon òf pa malu. (Lesa Proverbionan 13:20.) Mayornan, boso konosé e amigunan di boso yunan? Boso a topa nan i a pasa tempu ku nan? Kiko boso por hasi pa yuda boso yunan buska amigu ku ta stima Yehova? (1 Kor. 15:33) Un kos ku boso por hasi ta di invitá rumannan ku tin un bon amistat ku Yehova pa  pasa tempu ku boso famia. Asina ei, boso ta yuda boso yunan skohe bon amigu.—Sal. 119:63.

15. Kiko mayornan por hasi pa yuda nan yunan tin bon amistat?

¹⁵ Un tata ku yama Tony ta splika kiko e i su kasá a hasi pa yuda nan yunan skohe bon amigu. El a bisa: “Pa hopi aña nos tabata invitá rumannan di tur edat na nos kas. Nan tabata kome ku nos i tabata partisipá den nos Adorashon Komo Famia. Esaki tabata un bon manera pa konosé rumannan ku ta stima i sirbi Yehova ku goso. Nos tabata laga superintendente di sirkuito, misionero i otronan keda na nos kas. Nos yunan a siña hopi for di e eksperensianan ku nan tabata konta, e entusiasmo ku nan tabata mustra i e trabou duru ku nan tabata hasi den Yehova su sirbishi. Tur e kosnan akí a yuda nos yunan hala mas serka Yehova.” Mayornan, hasi tur loke boso por pa yuda boso yunan haña bon amigu.

16. Kiko si un yu bisa ku e no ke sirbi Yehova?

¹⁶ Kiko si apesar di tur boso esfuersonan, un di boso yunan bisa ku e no ke sirbi Yehova? No pensa ku boso a faya komo mayor. Yehova a duna nos tur, inkluso boso yu, boluntat liber. Esei ta e kapasidat di skohe sea di sirbi Yehova òf nò. Si boso yu a disidí di bira lomba pa Yehova, no pèrdè speransa ku lo e bolbe un dia. Kòrda riba e ilustrashon di e yu pèrdí. (Luk. 15:11-19, 22-24) E hóben ei a hasi yen kos malu i mahos. Pero, al final, el a bolbe. Algun hende por bisa: “Ya, pero e ko’i ta djis un ilustrashon. E ko’i por pasa den bida real anto?” Konpolaga e por pasa! De echo, e eksperensia di un hóben ku yama Elie ta proba esei.

17. Kon e eksperensia di Elie a animá bo?

¹⁷ Elie ta konta tokante su mayornan: “Nan a hasi tur loke nan tabata por pa siña mi stima Yehova i Beibel. Tempu mi tabata tiner, mi a kuminsá rebeldiá.”  Elie a kuminsá hasi kos skondí, i no tabata ke e yudansa ku su mayornan tabata dun’é pa e por a keda serka Yehova. Despues, el a bai fo’i kas, i el a hasi yen di kos malu. Apesar di esei, tin biaha e tabata papia tokante Beibel ku un di su amigunan. El a bisa: “Mas mi tabata papia kuné tokante Yehova, mas mi tabata pensa riba Yehova. Tiki tiki e simianan di e bèrdat ku mi mayornan a hasi asina tantu esfuerso pa planta den mi kurason a kuminsá krese.” Ku tempu, Elie a bini bèk den e bèrdat. c Bo por imaginá kon kontentu su mayornan tabata ku fo’i chikitu nan a hasi esfuerso pa siñ’é stima Yehova?—2 Tim. 3:14, 15.

18. Kon bo ta sinti ora bo mira mayornan ta hasi esfuerso pa siña nan yunan stima Yehova?

¹⁸ Mayornan, Yehova a duna boso un bunita regalo, esta, di lanta e siguiente generashon di su adoradónan. (Sal. 78:4-6) Esei no ta un trabou fásil. I nos ta elogiá boso pa e esfuersonan ku boso ta hasi pa yuda boso yunan. Si boso sigui hasi tur loke boso por pa yuda boso yunan stima Yehova i obedes’é, boso por tin sigur ku boso Tata lo ta masha kontentu ku esei.—Efe. 6:4.