1. Ki lucha hopi di nos tin?

 BO A yega di pone un par di meta spiritual ku tabata difísil pa bo logra? b Si ta asina, bo no ta e úniko. Por ehèmpel, Philip kier a hasi orashon mas frekuente i di kurason. Pero, e no tabata haña tempu pa hasi orashon. Erika a pone meta pa yega reunionnan di sirbishi na tempu. Pero tòg e tabata yega lat na kasi tur. Vários biaha Tomáš a purba di lesa henter e Beibel. El a bisa: “Mi no tabatin niun smak di lesa Beibel. M’a purba tres biaha, pero tur biaha mi tabata yega te na Levítiko.”

2. Dikon nos no mester desanimá si nos tin un meta spiritual ku te ainda nos no a logra?

² Si bo tin un meta ku te ainda bo no a logra, no sinti ku bo a frakasá. Tempu i esfuerso ta nesesario pa logra asta e metanan di mas simpel. E echo ku te ainda bo ke logra e meta ei ta mustra ku bo ta balorá bo amistat ku Yehova i ku bo ke dun’é lo mihó. Sea sigur ku Yehova ta apresiá esei mashá. Klaru ku lo e no spera mas di bo ku loke bo por hasi. (Sal. 103:14; Mik. 6:8) P’esei, hasi sigur  ku bo meta ta realístiko, esta, ku e ta algu ku realmente bo por logra. Awor, unabes ku bo a pone un meta, ban wak loke bo por hasi pa logr’é.

3. Dikon motivashon ta importante?

³ Pa logra nos metanan spiritual, motivashon ta masha importante. Un persona ku ta motivá tin deseo fuerte pa logra su meta i lo traha duru pa hasié. Motivashon ta manera e bientu ku ta pusha un boto di bela manda dilanti. Miéntras e bientu sigui supla, bo por yega bo destinashon ku bo boto di bela. Anto si e bientu ta fuerte, bo por yega mas trempan ku bo a plania. Asina tambe, mas fuerte nos motivashon ta, mas chèns nos tin di logra nos metanan. David, un ruman na El Salvador, a bisa: “Ora bo ta motivá, bo ta hasi mas esfuerso. Lo bo no laga nada stroba bo di logra bo meta.” Kiko por yuda bo haña mas motivashon?

4. Kiko nos por pidi Yehova? (Filipensenan 2:13) (Wak e plachi.)

⁴ Pidi Yehova pa mas motivashon. Yehova por usa su spiritu santu pa motivá bo pa logra bo meta. (Lesa Filipensenan 2:13.) Tin biaha nos a pone algu komo meta pasó nos sa ku esei ta nos deber, i no tin nada malu den esei. Pero, kisas e motivashon, òf gana, no t’ei. Esei ta loke a pasa ku Norina, un ruman na Uganda. El a pone e meta pa dirigí un estudio di Beibel, pero e no tabata masha motivá pasó el a sinti ku e no tabata un bon maestro. Kiko a yud’é? El a bisa: “M’a kuminsá pidi Yehova tur dia pa yuda mi haña mas gana di dirigí estudio di Beibel. Na mes momento m’a hasi esfuerso pa mehorá mi abilidat di siña hende. Despues di un par di luna, m’a nota ku mi tabata mas motivá. E aña ei, m’a dirigí dos estudio di Beibel.”

5. Riba kiko nos por meditá pa nos haña mas motivashon?

⁵ Meditá riba loke Yehova a hasi pa bo. (Sal. 143:5) Apòstel Pablo a meditá riba e bondat inmeresí ku Yehova a mustra na dje. Esei a motiv’é pa traha duru pa Yehova. (1 Kor. 15:9, 10; 1 Tim. 1:12-14) Mas bo meditá riba loke Yehova a hasi pa bo, mas deseo, òf gana, lo bo haña pa logra bo meta. (Sal. 116:12) Un ruman muhé na Honduras kier a bira pionero regular. El a splika loke a yud’é logra su meta: “M’a pensa riba kuantu Yehova stima mi. El a trese mi den su pueblo. E ta kuida mi i protehá mi. Ora m’a meditá riba e kosnan ei, m’a stim’é mas i mi gana pa bira pionero a bira mas fuerte.”

6. Kiko mas por motivá nos?

 ⁶ Focus riba e bentahanan. Erika, menshoná na paragraf 1, a splika kon el a logra su meta pa yega na ora pa e reunion di sirbishi: “M’a bin realisá kuantu kos mi tabata pèrdè ora mi yega lat. Si mi yega trempan, mi por kumindá e rumannan i papia ku nan. Tambe lo mi haña sugerensianan práktiko ku lo yuda mi mehorá i haña éksito den sirbishi.” Erika a focus riba e bentahanan di yega na ora. Anto, esei a yud’é logra su meta. Ki ta e bentahanan ku abo por focus riba dje? Si bo meta ta tokante lesamentu di Beibel òf orashon, pensa riba kon esei lo fortalesé bo amistat ku Yehova. (Sal. 145:18, 19) Òf si bo meta ta pa traha riba un sierto kualidat, focus riba kon lo e yuda bo bai bon ku otro hende. (Kol. 3:14) Purba esaki tambe: Skirbi tur e motibunan pakiko bo tin gana di logra bo meta i ratu-ratu repasá nan. Tomáš, menshoná tambe na paragraf 1, a bisa: “Mas motibu mi tin pa logra un meta, mas duru lo mi traha pa logr’é.”

7. Kiko a yuda Julio i su kasá logra nan meta?

⁷ Pasa tempu ku esnan ku lo motivá bo. (Pro. 13:20) Julio i su kasá kier a hasi mas den sirbishi. Julio a bisa: “Nos a skohe amigunan ku lo a apoyá nos. Nos tabata kòmbersá ku nan tokante nos metanan. Hopi di nan ya a logra metanan similar i por a duna nos bon konseho. Nan tabata puntra nos kon kosnan ta bayendo i tabata animá nos ora nos tabatin mester di esei.”

8. Kiko por pasa si ta ora nos ta motivá so nos ta traha riba nos meta? (Wak e plachi.)

⁸ Realidat ta ku no ta tur dia nos ta sinti nos motivá. Esei ke men ku nos no por traha pa logra nos meta? Nò. Pensa riba e boto di bela atrobe. Bientu ta importante pa bo por yega bo destinashon. Pero no ta tur dia bientu ta supla mes fuerte. Forsa di bientu ta varia i tin biaha no tin bientu mes. Akaso esei ke men ku e boto no por sigui nabegá? Nò, tin otro kos ku bo por hasi. Algun boto di bela tin motor òf rema ku bo por usa pa sigui bai dilanti. Nos motivashon ta manera e bientu. Tin dia nos ta mas motivá ku otro. Anto tin biaha nos no tin gana di hasi nèt-nèt nada. Pero, si ta ora nos ta motivá so nos ta traha riba nos meta, nos lo no logr’é nunka. Meskos ku nos por hasi otro kos pa yuda e boto di bela bai dilanti ora no tin bientu, asina tambe nos  por sigui hasi nos esfuerso tòg pa logra nos meta asta ora nos falta motivashon. Anto e esfuerso ei lo ta bale la pena. Pero promé ku nos wak loke nos por hasi, laga nos kontestá un pregunta ku por surgi.

9. Nos tin ku sigui hasi esfuerso pa logra un meta asta si nos no tin gana? Splika.

⁹ Yehova ke pa nos sirbié ku goso i di kurason. (Sal. 100:2; 2 Kor. 9:7) Pero dikon nos tin ku sigui hasi esfuerso pa logra un meta spiritual asta si nos no tin gana di hasié? Tende loke Apòstel Pablo a bisa: “Mi ta gòlpia mi kurpa i ta domin’é manera un esklabo.” (1 Kor. 9:25-27) Pablo a fòrsa su mes pa hasi loke Yehova tabata ke p’e hasi, asta ora e no tabatin gana. Yehova tabata kontentu ku Pablo su sirbishi? Sigur ku sí! I Yehova a rekompens’é pa tur loke el a hasi.—2 Tim. 4:7, 8.

10. Kiko ta e bentahanan ora nos sigui hasi esfuerso pa logra un meta asta ora nos no tin gana?

¹⁰ Yehova ta keda kontentu ora e mira ku nos ta sigui hasi esfuerso pa logra nos meta asta ora nos no tin deseo, òf gana. E sa ku aunke no ta semper nos gusta loke nos ta hasi, nos ta hasié tòg pasobra nos stim’é. Meskos ku el a bendishoná Pablo, lo e bendishoná nos esfuersonan tambe. (Sal. 126:5) Anto ora nos mira ku Yehova ta bendishoná nos esfuerso, esei mes ta laga nos sinti nos mas motivá. Lucy, un ruman di Polonia, a bisa: “Tin biaha mi no tin niun tiki gana di bai sirbishi, foral ora mi ta kansá. Pero e goso ku mi ta sinti ora mi bai tòg ta un maravioso regalo.” Awor laga nos wak loke nos por hasi ora nos no tin motivashon.

11. Kon Yehova por yuda nos haña mas dominio propio?

¹¹ Pidi Yehova dominio propio. Un persona ku tin dominio propio por kontrolá su sintimentu- i akshonnan. Hopi biaha ta usa e ekspreshon ei pa duna e idea di stroba bo mes di hasi algu malu. Pero nos mester di dominio propio tambe pa hasi loke ta bon, foral si ta algu ku ta difísil òf ku nos no tin muchu gana di hasi. Dominio propio ta parti di e fruta di spiritu. Pues, pidi Yehova pa usa su spiritu santu pa yuda bo haña mas dominio propio. (Luk. 11:13; Gal. 5:22, 23) David, menshoná na paragraf 3, ke tabata mas regular ku su estudio personal. El a splika kon orashon a yud’é: “M’a pidi Yehova yuda mi haña mas dominio propio. Ku su yudansa m’a logra traha un bon programa di estudio i pega na dje.”

12. Kon Eklesiástes 11:4 ta yuda nos logra nos metanan spiritual?

¹² No warda riba e momento perfekto. Den e mundu akí, chèns ta chikitu ku nos lo haña un momento perfekto. Pues, si nos sinta warda p’e momento ei yega, kisas nunka nos lo logra nos meta. (Lesa Eklesiástes 11:4.) Un ruman hòmber ku yama Dayniel a bisa: “E momento perfekto no ta eksistí. Pues no warda, dal bai kuminsá.” Paul, un ruman na Uganda, a menshoná un motibu mas pakiko nos no mester keda posponé kos. El a bisa: “Ora nos kuminsá apesar ku e sirkunstansianan ta difísil, nos ta duna Yehova motibu pa bendishoná nos.”—Mal. 3:10.

13. Ki ta e bentahanan di parti nos meta na pida-pida?

 ¹³ Partié na pida-pida. Tin biaha, nos no tin motivashon pasó nos meta por parse muchu difísil pa logra. Si esei ta bo kaso, purba di parti bo meta na pida-pida. Por ehèmpel, si bo ta traha riba un sierto kualidat, kuminsá na demostr’é den kosnan chikitu. Òf, si bo meta ta pa lesa henter Beibel, kuminsá lesa djis un par di minüt tur dia. Tomáš, menshoná na paragraf 1, tabatin difikultat pa logra su meta di lesa Beibel den un aña. El a bisa: “M’a realisá ku e kantidat di versíkulo ku m’a plania pa lesa tur dia tabata muchu pa mi. Pues, m’a disidí di purba atrobe. Pero, e biaha akí m’a skohe pa lesa djis parti di un kapítulo tur dia i meditá riba esei. Asina ei, m’a kuminsá gusta lesamentu di Beibel.” Mas Tomáš su goso a oumentá, mas tempu e kier a pasa ta lesa su Beibel. Finalmente, el a logra lesa henter e Beibel. c

14. Ki kontratempu nos por haña nos kuné?

¹⁴ Tin biaha aunke nos ta motivá i ta hasi esfuerso, tòg nos por haña nos ku kontratempu. Por ehèmpel, “suseso inesperá” por kita e tempu ku nos tin mester pa logra nos meta. (Ekl. 9:11) Nos por haña nos ku un problema ku por laga nos desanimá i sin forsa. (Pro. 24:10) Nos imperfekshon por pone ku nos ta hasi kosnan ku kisas ta hala nos mas leu fo’i nos meta. (Rom. 7:23) Òf tin biaha, gewon nos ta kansá. (Mat. 26:43) Kiko nos por hasi ora nos haña nos ku kontratempu?

15. Dikon nos no mester laga kontratempu stroba nos? Splika. (Salmo 145:14)

¹⁵ No laga kontratempu stroba bo.  Beibel ta bisa ku nos lo haña nos ku un problema tras di otro. Pero e ta splika tambe ku Yehova lo yuda nos lanta kada biaha atrobe. (Lesa Salmo 145:14.) Philip, menshoná na paragraf 1, a splika kon e ta midi progreso: “Mi no ta focus riba kuantu biaha mi no a logra mi meta. Mas bien, mi ta focus riba kuantu biaha m’a bolbe kuminsá traha pa logr’é.” David, menshoná anteriormente, a bisa: “Mi ta purba di mira kontratempu no komo un opstákulo pero komo un oportunidat pa mustra Yehova kuantu mi stim’é.” Pues, ora bo sigui padilanti apesar di kontratempu, bo ta demostrá Yehova ku bo ke agrad’é. Imaginá kon kontentu Yehova ta bira ora e mira bo ta sigui lucha pa logra bo meta.

16. Kiko kontratempu por siña nos?

¹⁶ Siña for di e kontratempu. Analisá e situashon i puntra bo mes: ‘Kiko mi por hasi pa e kos ei no bolbe pasa?’ (Pro. 27:12) Tin biaha kontratempu ta laga nos mira ku nos meta no ta dje realístiko ei manera nos a pensa. Si esei ta bo kaso, kisas ta momento pa rekonsiderá bo meta. d Yehova lo no pensa ku bo a frakasá pasó bo no a logra un meta ku tabata fuera di bo alkanse.—2 Kor. 8:12.

17. Dikon nos mester keda kòrda riba loke ya nos a logra?

¹⁷ Keda kòrda riba tur loke ya bo a logra. Beibel ta bisa ku “Dios no ta inhustu pa lubidá boso trabou.” (Heb. 6:10) Pues, bo tampoko no mester lubidá. Pensa riba e metanan ku ya bo a logra, manera bira amigu di Yehova, prediká òf batisá. Meskos ku bo a logra bo metanan spiritual den pasado, asina tambe bo por bai padilanti i logra e metanan ku bo tin aworakí.—Flp. 3:16.

18. Kiko bo no mester lubidá segun ku bo ta hasi esfuerso pa logra bo meta? (Wak e plachi.)

¹⁸ Meskos ku un hende den un boto di bela ta yega su destinashon i ta felis ku esei, asina tambe ku yudansa di Yehova, bo por logra bo meta. Pero no lubidá di disfrutá di e biahe tambe. Pues, segun ku bo ta hasi esfuerso pa logra bo meta, keda kontentu pa mira kon Yehova ta bendishoná bo esfuersonan. (2 Kor. 4:7) Anto si bo no entregá, lo tin bendishonnan asta mas grandi ta warda bo.—Gal. 6:9.