1-2. Kiko kisas algun di nos a yega di puntra nos mes?

 BO A yega di puntra bo mes si Yehova ta kontestá bo orashonnan? Si esei ta e kaso, bo no ta e úniko. E pregunta ei a yega di pasa den hopi ruman su mente, foral ora nan ta pasa den difikultat. Ora nos ta sufriendo, ta difísil pa mira kon Yehova ta kontestá nos orashonnan.

² Den artíkulo akí, nos lo wak dikon nos por tin sigur ku Yehova ta kontestá orashon di su sirbidónan. (1 Huan 5:15) Tambe nos lo wak dikon tin biaha por parse ku Yehova no ta kontestá nos orashonnan i di ki manera e ta kontestá nan.

3. Dikon Yehova ke pa nos resa na dje?

³ Beibel ta sigurá nos ku Yehova stima nos mashá i ku nos ta presioso p’e. (Ageo 2:7; 1 Huan 4:10) P’esei, e ke pa nos pidié yudansa den orashon. (1 Ped. 5:6, 7) E ke yuda nos keda su amigu i logra trata ku nos difikultatnan.

4. Kon nos sa ku Yehova ta kontestá orashon di su sirbidónan? (Wak e plachi.)

⁴ Den Beibel, tin hopi relato ku ta mustra ku Yehova  ta kontestá orashon di su sirbidónan. Kua relato ta bini na bo mente? Kisas di Rei David? Durante su bida, e tabatin hopi enemigu i vários biaha el a pidi Yehova yudansa den orashon. Un biaha, el a súplika: “O Yehova, skucha mi orashon. Por fabor, tende mi ora mi ta roga pa yudansa. Kontestá mi, pasobra bo ta fiel i hustu.” (Sal. 143:1) Yehova a kontestá su orashonnan i a reskat’é. (1 Sám. 19:10, 18-20; 2 Sám. 5:17-25) P’esei, David a bisa ku konfiansa: “Yehova ta serka di tur hende ku ta hasi orashon na dje.” Nos tambe por tin sigur di esei.—Sal. 145:18.

5. Ta semper Yehova ta kontestá orashon di su sirbidónan manera nan a ferwagt? Duna un ehèmpel. (Wak e plachi.)

⁵ No ta semper Yehova ta kontestá nos orashonnan manera nos a ferwagt. Esei ta loke a pasa ku Apòstel Pablo. E tabatin “un sumpiña den karni” i tres biaha el a roga Yehova pa kita e difikultat ei. Yehova a kontestá su orashonnan? Sí, pero no manera Pablo a ferwagt. Na lugá di kita e problema, Yehova a duna Pablo e forsa ku e tabatin mester pa sigui sirbiÉ fielmente.—2 Kor. 12:7-10.

6. Dikon tin biaha nos por tin e impreshon ku Yehova no ta kontestá nos orashonnan?

⁶ Tin biaha, e kontesta ku nos ta haña pa nos orashonnan tampoko no ta loke nos a ferwagt. Pero nos por tin sigur ku Yehova sa presis kon ta e mihó manera pa yuda nos. E por “hasi infinitamente mas di tur loke nos ta pidi òf por imaginá.” (Efe. 3:20) P’esei, e por kontestá nos orashon na un momento òf di un manera ku nos no por ni imaginá.

7. Dikon kisas nos tin ku kambia loke nos ta pidi den orashon? Duna un ehèmpel.

⁷ Kisas nos tin ku kambia loke nos ta pidi den orashon segun ku nos ta realisá kiko ta Yehova su boluntat. Esei ta loke a pasa ku Martin Poetzinger. Un par di tempu despues ku el a kasa, nan a mand’é kampo di konsentrashon nazi. Na kuminsamentu, e tabata pidi Yehova pa lag’é haña su libertat pa asina e por a kuida su kasá i bolbe prediká. Dos siman a pasa pero ketu bai e tabata será, pues a parse ku Yehova no a kontestá su orashon. P’esei el a kuminsá  resa: “Yehova, mustra mi kiko bo ke pa mi hasi.” E ora ei su mente a kai riba loke e otro rumannan den e kampo tabata soportá. Hopi di nan tabata masha preokupá pa nan esposa i yunan. E ora ei, Ruman Poetzinger a bisa Yehova: “Danki pa mi asignashon nobo. Yuda mi fortalesé i animá mi rumannan.” I esei ta nèt loke el a hasi durante e sobra nuebe añanan ku e tabata será!

8. Kiko nos tin ku kòrda ora nos ta hasi orashon?

⁸ No lubidá ku Yehova lo kumpli ku su propósito na e tempu ku el a stipulá. E propósito ei ta inkluí eliminá unabes i pa semper tur loke ta laga nos sufri, manera desaster natural, malesa i morto. Anto lo e hasi esei pa medio di su Reino. (Dan. 2:44; Rev. 21:3, 4) Pero mientrastantu, e ta permití Satanas goberná mundu. b (Huan 12:31; Rev. 12:9) Si Yehova drecha tur problema di mundu aworakí, por parse ku Satanas su gobernashon no ta dje malu ei. Pero, aunke nos tin ku warda pa Yehova kumpli ku algun di su promesanan, esei no ke men ku lo e keda sin yuda nos. Laga nos wak algun manera ku e ta yuda nos.

9. Kon Yehova ta yuda nos ora nos tin ku tuma desishon? Duna un ehèmpel.

⁹ Yehova ta duna nos sabiduria. E ta primintí di duna nos e sabiduria ku nos mester pa tuma bon desishon. Nos mester di su sabiduria foral ora nos tin ku tuma desishon importante den bida, manera kasa òf keda sin kasa. (Sant. 1:5) Wak e eksperensia di Maria, un ruman soltero. c E tabata traha pionero felis di dje ora el a konosé un ruman hòmber. Maria a bisa: “Nos a bira bon amigu di otro i a kuminsá gusta otro. Mi sa ku mi mester a tuma un desishon. Pues, m’a hasi hopi orashon. Mi tabatin mester di Yehova su guia, pero mi tabata sa tambe ku ta mi mes mester a tuma e desishon.” Maria a sinti ku Yehova a kontestá su orashon i a dun’é sabiduria. Kon? Maria a buska den nos publikashonnan i a haña algun artíkulo spesífiko ku a dun’é kontesta pa su preguntanan. Ademas, su mama, ku ta Testigu, a dun’é bon konseho ku a yud’é analisá su sintimentunan. Tur eseinan a yuda Maria tuma un desishon sabí.

10. Segun Filipensenan 4:13, kon Yehova ta yuda su sirbidónan? Duna un ehèmpel. (Wak e plachi.)

 ¹⁰ Yehova ta duna nos forsa pa soportá. El a duna Apòstel Pablo forsa pa soportá su pruebanan i lo e hasi meskos pa nos tambe. (Lesa Filipensenan 4:13.) Wak kon el a yuda un ruman ku yama Benjamin. Fo’i hóben, el a pasa hopi aña ta biba huntu ku su famia den kampo di refugiado na Afrika. El a bisa: “Semper mi tabata hasi orashon na Yehova i pidié duna mi forsa pa hasi loke ta korekto. Yehova a kontestá mi dor di duna mi pas mental, kurashi pa sigui prediká i publikashonnan ku a yuda mi keda su amigu.” El a sigui konta: “Ora mi lesa relato di otro rumannan i mira kon Yehova a yuda nan soportá, mi ta haña ánimo pa sigui keda leal na Yehova.”

11-12. Kon Yehova por usa nos rumannan pa kontestá nos orashonnan? (Wak e plachi.)

¹¹ Yehova ta usa nos rumannan. E anochi promé ku Hesus a muri, el a hasi orashon intensamente. El a supliká su Tata pa libr’é di e akusashon di ser konsiderá un blasfemadó. Pero na lugá di hasi loke Hesus a pidi, Yehova a manda un angel, un di Hesus su rumannan, pa fortales’é. (Luk. 22:42, 43) Asina tambe Yehova por yuda nos dor di motivá un di nos rumannan pa yama òf bishitá nos i duna nos animashon. Nos tur mester buska oportunidat pa hasi nos rumannan kontentu mediante “palabra animante.”—Pro. 12:25.

¹² Wak kon Yehova a yuda Miriam. Un par di siman despues ku su kasá a muri, e tabata su so na kas i tabata sintié kibrá i deprimí. E no por a stòp di yora i tabatin nesesidat di papia ku un hende. El a bisa: “Mi no tabatin forsa pa bèl niun hende, pues m’a resa na Yehova. Ainda mi tabata yora i resa ora telefòn a rin. Tabata un ansiano, un bon amigu.” E ansiano i su kasá a konsolá Miriam. Miriam ta konvensí ku ta Yehova a laga e ruman ei yam’é.

13. Duna un ehèmpel ku ta mustra kon Yehova por usa hende ku no ta ador’é pa kontestá nos orashonnan.

 ¹³ Yehova por usa hende ku no ta ador’é. (Pro. 21:1) Tin biaha, Yehova ta kontestá nos orashonnan ora e laga hende ku no ta sirbié yuda nos. Por ehèmpel, el a laga Rei Artahérhes duna Nehemías pèrmit pa regresá Herúsalèm i yuda ku rekonstrukshon di e stat. (Neh. 2:3-6) Anto awe, Yehova por laga hende ku no ta Testigu yuda nos.

14. Kon e eksperensia di Soo Hing ta animá bo? (Wak e plachi.)

¹⁴ Un ruman muhé ku yama Soo Hing ta konvensí ku Yehova a usa dòkter di su yu pa kontestá su orashonnan. Su yu tin vários problema mental i a hañ’é den un aksidente hopi grave. Soo Hing i su esposo mester a kita for di trabou pa kuida e yu. Esei a hinka nan den problema finansiero. Soo Hing a bisa ku e tabata yegando na e punto ku e no tabata por mas. Pues, el a habri su kurason na Yehova i pidié yudansa. E dòkter ku tabata atendé ku kaso di e yu a disidí di buska un manera pa yuda Soo Hing i su famia. Danki na esei, nan a haña yudansa di gobièrnu i un bibienda mas barata. Despues, Soo Hing a bisa: “Nos a mira kon Yehova a yuda nos. Di bèrdat e ‘ta skucha orashon.’”—Sal. 65:2.

15. Kon Yoko a bin mira ku Yehova tabata kontestá su orashonnan?

¹⁵ Generalmente, Yehova no ta kontestá nos orashonnan na maneranan espektakular. Pero e ta kontestá nos i su kontestanan ta presis loke nos mester pa keda fiel na dje. P’esei, nos mester ta atento pa diserní kon Yehova ta kontestá nos. Un ruman muhé ku yama Yoko tabatin e impreshon ku Yehova no tabata kontestá su orashonnan. P’esei, el a kuminsá skirbi tur loke e tabata pidi Yehova. Despues di un par di tempu, el bai wak den su skref i a realisá ku Yehova a kontestá mayoria di su orashonnan, asta algun ku e mes a lubidá riba dje. P’esei, de bes en kuando, ta bon pa nos para i pensa riba kon Yehova  ta kontestá nos orashonnan.—Sal. 66:19, 20.

16. Pakiko nos mester di fe ora ta trata nos orashonnan? (Hebreonan 11:6)

¹⁶ Nos ta mustra ku nos tin fe ora nos ta resa na Yehova i tambe ora nos aseptá su kontesta, sea kual sea e kontesta ta. (Lesa Hebreonan 11:6.) Wak loke a pasa ku Mike i su kasá, Chrissy. Nan meta tabata pa traha na Bètel. Mike a bisa: “Tur aña di nobo nos tabata yena aplikashon i tabata resa bes tras bes na Yehova tokante nos meta, pero Bètel no a yama nos.” Mike i Chrissy no a stòp di konfia ku Yehova, mas mihó ku kualke otro persona, tabata sa unda nan lo tabata mas útil. Nan a sigui hasi tur loke nan tabata por; nan a traha pionero kaminda tabatin nesesidat i traha riba proyekto di konstrukshon. Awor nan ta den trabou di sirkuito. Mike a bisa: “No ta semper Yehova a kontestá nos orashonnan manera nos a ferwagt pero el a kontestá nan sí, i e manera ku el a kontestá nan tabata mas mihó ku loke nos a ferwagt.”

17-18. Segun Salmo 86:6 i 7, di kiko nos por tin sigur?

¹⁷ Lesa Salmo 86:6, 7. David, kende a skirbi e salmo akí, tabatin sigur ku Yehova lo skucha i kontestá su orashonnan. Bo tambe por tin e mesun konfiansa ei. Loke nos a trata den e artíkulo akí ta sigurá nos ku Yehova lo duna nos e sabiduria i forsa ku nos tin mester pa soportá. E por usa nos rumannan i asta hende ku no ta Testigu pa yuda nos di un manera òf otro.

¹⁸ Ta bèrdat ku no ta semper Yehova ta kontestá nos orashon manera nos a ferwagt, pero nos sa ku lo e kontestá nan sí. Lo e duna nos presis loke nos mester i na e momento ku nos mester di dje. P’esei, sigui hasi orashon i konfia ku Yehova lo kuida bo awor i lo “satisfasé deseo di tur ser bibu” den e mundu nobo.—Sal. 145:16.