1. Kon Beibel ta deskribí amor berdadero?

 E MANERA ku Beibel ta deskribí amor berdadero ta masha bunita mes. Kantika di Sálomon 8:6 i 7 ta bisa: “Amor ta manera kandela feros, vlam di Yah. Avalancha di awa no por paga amor; niun riu no por lastra amor bai kuné.” b E palabranan ei ta garantisá parehanan kasá ku nan por tin amor berdadero pa otro.

2. Kiko un pareha mester hasi pa nan amor no fria?

² Tantu esposo komo esposa mester duna di nan parti si nan ke stima otro pa semper. Por ehèmpel, pensa riba un kampvür. E por keda kima sin paga basta ku un hende sigui tira palu den dje. Pero, si keda sin hasi esei, ku tempu lo e paga. Asina tambe, e amor ku tin entre esposo i esposa por keda fuerte basta nan sigui fortalesé nan matrimonio. Pero, tin biaha problema finansiero, salú òf lantamentu di yu por pone ku kos entre nan ta kuminsá fria. Si bo ta kasá, kiko abo por hasi pa sigui tene e “vlam di Yah” sendí? Den e artíkulo akí, nos lo wak tres kos ku lo yuda bo tin un matrimonio felis i fuerte. c

3. Kon un bon amistat ku Yehova lo yuda un pareha sigui stima otro? (Eklesiástes 4:12) (Wak e plachi.)

³ Pa sigui tene e “vlam di Yah” sendí, tantu e esposo komo e esposa tin ku hasi esfuerso pa ta bon amigu di Yehova. Kon esei lo yuda nan? Ora nan dos ta balorá nan amistat ku Yehova, nan lo ta dispuesto pa apliká su konsehonan. Asina ei, nan lo evitá òf vense problema ku por laga nan amor pa otro fria. (Lesa Eklesiástes 4:12.) Ademas, bon amigu di Yehova lo hasi esfuerso pa nan tin e mesun kualidatnan kuné. Por ehèmpel, nan ta bondadoso, tin pasenshi i ta pordoná. (Efe. 4:32–5:1) Ora un pareha ta demostrá e kualidatnan ei, lo ta fásil pa nan amor krese. Un ruman ku yama Lena tin mas ku 25 aña kasá. El a bisa: “Ta fásil pa stima i respetá un hende ku ta bon amigu di Yehova.”

4. Dikon Yehova a skohe Hose i Maria pa bira mayornan di e Mesías?

⁴ Ban wak kon Beibel ta proba esei. Di tur e desendientenan di David, Yehova a skohe Hose i Maria pa bira mayornan di e Mesías. Dikon el a skohe nan? Pasobra nan tur dos tabata bon amigu di dje i e tabata sa ku semper nan lo pon’é na promé lugá den nan matrimonio. Si bo ta kasá, kiko bo por siña for di Hose i Maria?

5. Kiko esposonan por siña di Hose?

⁵ Hose tabata sigui tur guia ku tabata bini di Yehova, anto esei a hasié un bon esposo. Por lo ménos tres biaha Yehova a dun’é instrukshon relashoná ku su famia. Kada biaha el a obedesé mesora, asta ora esei tabata difísil. (Mat. 1:20, 24; 2:13-15, 19-21) Debí ku Hose tabata obedesé Yehova, e por a protehá i kuida Maria. Sin duda esei a yuda Maria stim’é i respet’é mashá. Meskos ku Hose, lo bo ta un bon esposo si bo ta buska konseho den Beibel ku ta yuda bo kuida bo famia. d Ora bo sigui e konsehonan di Beibel, asta si esei ta enserá kambio, bo ta mustra ku bo ta stima bo esposa i esei lo fortalesé bo matrimonio. Un ruman muhé na Vanuatu ku tin mas ku 20 aña kasá, a bisa: “Ora mi mira ku mi kasá ta buska guia di Yehova, esei ta pone ku mi ta respet’é asta mas. Mi ta sinti mi safe i ta konfia su desishonnan.”

6. Kiko esposanan por siña di Maria?

 ⁶ Maria tambe tabatin su mes amistat ku Yehova; su fe no tabata dependé di Hose. E tabatin bon konosementu di e Skritura. e Tambe, e tabata apartá tempu pa meditá. (Luk. 2:19, 51) Maria su amistat ku Yehova a yud’é bira un ekselente esposa. Awe, hopi esposa ta hasi esfuerso pa ta manera Maria. Por ehèmpel, un ruman muhé ku yama Emiko a bisa: “Promé ku m’a kasa, mi tabatin mi mes rutina spiritual. Pero despues, ta mi esposo tabata hasi orashon i dirigí tur kos spiritual den famia. Pero m’a ripará ku m’a kuminsá dependé riba dje pa e kosnan ei. M’a bin mira ku ta ami ta esun ku tin e responsabilidat di kuida mi amistat ku Yehova. Pues, mi ta apartá tempu pa ta mi so ku Yehova i asina hasi orashon na dje, lesa Beibel i meditá.” (Gal. 6:5) Si abo komo esposa sigui fortalesé bo amistat ku Yehova, bo esposo lo tin mas motibu pa elogiá bo i stima bo.—Pro. 31:30.

7. Kiko parehanan kasá por siña for di Hose i Maria tokante adorá Yehova huntu?

⁷ Hose i Maria a traha komo tim pa mantené nan amistat ku Yehova fuerte. Nan tabata sa ku ta masha importante pa nan famia adorá Yehova huntu. (Luk. 2:22-24, 41; 4:16) I segun ku nan famia tabata krese, esei no tabata algu fásil, pero nan a logra sí. Parehanan kasá por siña hopi for di Hose i Maria. Si boso tin yu, ta henter un reto pa bai reunion i pa apartá tempu pa adorashon komo famia. Anto tin biaha ta asta mas kompliká ainda pa abo i bo kasá saka tempu pa studia i hasi orashon huntu. Pero kòrda ku ora boso adorá Yehova huntu komo pareha, boso ta hala mas serka di dje i tambe mas serka di otro. P’esei, pone adorashon di Yehova na promé lugá den boso matrimonio.

8. Kiko un pareha por hasi pa mehorá nan adorashon di famia si kos no ta bai muchu bon den nan matrimonio?

⁸ Pero kiko awor si kos no ta bai muchu bon den bo matrimonio? Kisas e ora ei boso lo no tin masha gana di hasi adorashon komo famia. Si esei ta e kaso, purba di hasi algu simpel den boso adorashon komo famia ku boso tur dos gusta. Ora boso hasi esei, boso lo fortalesé boso matrimonio i lo haña mas gana di hasi kosnan spiritual huntu.

9. Dikon un esposo i su esposa mester pasa tempu huntu?

⁹ Algu tambe ku lo evitá ku boso amor ta fria ta di pasa tempu huntu. Esei lo yuda boso keda pendiente di loke e otro ta pensa i sinti. (Gén. 2:24) Wak loke Lilia i Ruslan a ripará djis despues ku nan a kasa mas ku 15 aña pasá. Lilia a bisa: “Nos a realisá ku nos no por a pasa hopi tempu huntu manera nos a pensa. Kasi tur nos tempu tabata bai na trabou, kosnan di kas i ku tempu na nos yunan. Nos a ripará ku si nos no saka tempu pa hasi kos komo pareha, tiki-tiki nos lo habri for di otro.”

10. Kon un pareha por apliká e prinsipio na Efesionan 5:15 i 16?

¹⁰ Kon boso por hasi sigur pa pasa  tempu huntu? Kisas boso tin ku plania, esta, hinka den boso skèdjel, tempu ku boso lo ke pasa huntu. (Lesa Efesionan 5:15, 16.) Un ruman na Nigeria ku yama Uzondu a bisa: “Ora mi ta bezig ta hinka mi kosnan den agènda, mi ta hasi sigur di pone tempu pa mi pasa ku mi kasá. Esei ta algu masha importante pa mi.” (Flp. 1:10) Anastasia, kasá di un superintendente di sirkuito na Moldavia, ta hasi bon uso di su tempu. E ta bisa: “Ora mi kasá ta bezig ku su kosnan di sirkuito, mi ta purba di hasi tur mi kosnan. Asin’ei ora e kaba, nos por pasa mas tempu huntu.” Pero kiko awor si boso no por koordiná boso skèdjel pa boso por pasa tempu huntu?

11. Kiko ta e kosnan ku Akila i Priskila tabata hasi huntu?

¹¹ Parehanan kasá por siña tambe for di Akila ku Priskila ku tabata un pareha ku e kristiannan di promé siglo tabata stima mashá. (Rom. 16:3, 4) Aunke Beibel no ta duna masha detaye tokante nan matrimonio, loke sí e ta bisa ta ku huntu nan tabata traha, prediká i yuda otro hende. (Echo. 18:2, 3, 24-26) De echo, semper Beibel ta menshoná Akila i Priskila huntu.

12. Kiko un esposo i su esposa por hasi pa pasa mas tempu huntu? (Wak e plachi.)

¹² Kon parehanan por hasi meskos ku Akila i Priskila? Pensa riba tur e kosnan ku abo i bo kasá tin ku hasi. Tin algun kos ku boso por hasi huntu na lugá di kada ken riba nan mes? Por ehèmpel, Akila i Priskila a prediká huntu. Boso tambe tin e kustumber ei? Akila i Priskila tabatin e mesun trabou i a traha huntu. Ta bèrdat ku kisas abo i bo kasá no tin e mesun trabou, pero boso por hasi trabounan di kas huntu? (Ekl. 4:9) Ora boso yuda otro, boso lo sinti ku boso ta un tim i boso lo tin mas chèns di kòmbersá ku otro. Robert ku Linda tin mas ku 50 aña kasá. Robert a bisa: “Pa ta franko, nos no tin hopi tempu liber pa pasa huntu. Pero mi ta masha felis ora ku mi ta laba tayó i mi kasá ta seka nan òf ora mi ta traha pafó den kurá i e ta bin traha huntu ku mi. Ora nos ta hasi kos huntu, esei ta uni nos mas i nos amor ta sigui krese.”

13. Kiko un pareha tin ku hasi pa nan ta berdaderamente uní?

¹³ Sinembargo, kòrda ku djis hasi kos huntu no ta nifiká ku outomátikamente boso lo bira uní. Un esposa na Brazil a bisa: “Ku tur e distraishonnan ku  tin awendia ta fásil pa pensa ku, komo ku nos ta biba bou di e mesun dak, ya nos ta pasando tempu huntu. Pero m’a siña ku bo tin ku hasi mas ku esei. Mi tin ku duna mi kasá e atenshon tambe ku e tin mester.” Por ehèmpel, wak kiko Bruno i su kasá, Tays, ta hasi pa duna otro e atenshon ku nan tin mester. Bruno a bisa: “Pa nos por disfrutá di e tempu ku nos ta pasa huntu, nos ta pone nos telefòn un banda.”

14. Kiko un pareha por hasi si nan no gusta pasa tempu huntu?

¹⁴ Pero kiko awor si boso no gusta pasa tempu huntu? Kiko si boso no ta gusta e mesun kosnan òf ta traha riba otro su nèrvio? Kiko boso por hasi e ora ei? Boso ta kòrda e kampvür ku nos a papia di dje na paragraf 2? No ta mesora ku sende un kampvür bo ta haña un kandela grandi. Nò, bo tin ku kuminsá sende e kandela ku pida pida palu chikitu anto tiki-tiki bo ta keda pone palu mas grandi. Meskos tambe, kisas boso por kuminsá na pasa djis un ratu huntu tur dia. Buska algu ku boso tur dos gusta i no algu ku lo kousa problema. (Sant. 3:18) Kosnan chikitu asina lo yuda boso amor bolbe krese.

15. Dikon rèspèt ta asina importante den matrimonio?

¹⁵ Rèspèt ta algu masha importante den matrimonio. Bo por kompar’é ku e oksígeno ku ta laga un kampvür sigui kima. Sin oksígeno, e kampvür ta paga masha lihé. Asina tambe, si no tin rèspèt, masha lihé mes e amor den matrimonio ta fria. Di otro banda, ora e esposo i e esposa ta trata otro ku rèspèt, nan ta tene e vlam di nan amor bibu. Kisas abo ta haña ku bo ta mustra bo kasá rèspèt, pero esei ta loke e ta sinti? Penny ku Aret tin mas ku 25 aña kasá. Penny a bisa: “Komo ku nos ta respetá otro, bo por sinti ku tin amor den nos kas. Ora nos ta kòmbersá, nos ta sinti nos kómodo pasó tantu ami komo Aret ta balorá opinion di otro.” Pues, kiko bo por hasi pa laga bo kasá sinti ku di bèrdat bo ta respet’é? Ban wak loke Ábraham ku Sara a hasi.

16. Kiko esposonan por siña for di Ábraham? (1 Pedro 3:7) (Wak e plachi.)

¹⁶ Ábraham a trata Sara ku rèspèt. El a skucha su opinion i a tene kuenta ku su sintimentunan. Un biaha, Sara tabata masha angustiá. El a baha tur su frustrashon riba Ábraham i asta a tira falta riba dje. Ábraham a rabia kuné? Nò.  E tabata sa ku Sara tabata un kasá sumiso ku semper a apoy’é. El a skucha Sara i a purba di resolvé e problema. (Gén. 16:5, 6) Kiko esposonan por siña? Wèl, ta bèrdat ku boso tin outoridat pa tuma desishon pa boso famia. (1 Kor. 11:3) Pero, komo ku bo ta stima bo esposa, lo bo tene su opinion na kuenta, foral si ta algu ku lo afekt’é. (1 Kor. 13:4, 5) Kiko lo bo hasi ora bo esposa tin strès i ke ekspresá su sintimentu? Lo bo respetá su sintimentu i skuch’é ku atenshon? (Lesa 1 Pedro 3:7.) Angela ku Dmitry tin kasi 30 aña kasá. Angela a splika kon Dmitry ta mustra ku e ta respet’é: “Ora mi ta iritá, desanimá òf ke djis papia, Dmitry semper ta skucha mi. E tin pasenshi ku mi, asta ora mi no por dominá mi emoshonnan.”

17. Kiko esposanan por siña for di Sara? (1 Pedro 3:5, 6)

¹⁷ Sara a respetá Ábraham i p’esei e tabata apoyá su desishonnan. (Gén. 12:5) Un biaha, Ábraham a disidí di pidi algun bishitante ku a bini ònferwagt pa keda pa kome i bebe algu. El a pidi Sara pa stòp ku loke e tabata hasiendo i bai traha un kantidat di pan. (Gén. 18:6) Mesora Sara a hasi loke Ábraham a pidié. Esposanan ta hasi meskos ku Sara ora nan ta apoyá desishon di nan kasá. Ora nan hasi esei, nan ta fortalesé nan matrimonio. (Lesa 1 Pedro 3:5, 6.) Dmitry, menshoná den paragraf 16, a splika kon Angela ta mustra ku e ta respet’é: “Mi ta apresiá e esfuerso ku Angela ta hasi pa apoyá mi desishonnan, asta ora nos no ta di akuerdo. Anto si resultá ku mi desishon no tabata e mihó, e no ta tira esei na mi kara.” Ta fásil pa stima un hende ku ta respetá bo.

18. Kiko lo ta e resultado si un pareha kasá hasi esfuerso pa tene nan amor bibu?

¹⁸ Satanas ta hasi tur loke e por pa paga e amor ku tin entre un pareha kristian. E sa ku si e esposo i e esposa stòp di stima otro, kisas nan lo hala for di Yehova tambe. Pero, no tin nada ku por paga e vlam di amor berdadero! P’esei, laga e amor ku boso tin sea manera esun ku Kantika di Sálomon ta deskribí. Traha duru pa pone Yehova na promé lugá den boso matrimonio, saka tempu pa pasa huntu i respetá sintimentu i nesesidat di otro. Ora boso hasi esei, boso matrimonio lo trese onor na Yehova, kende ta Fuente di amor berdadero, anto boso lo stima otro pa semper.