1. Ki lès Yehova a siña Ábraham?

 HOPI aña pasá, Yehova a usa un angel pa bisa Ábraham ku lo E bai destruí e statnan Sódoma i Gomora. Aunke Ábraham tabatin un fe fuerte den Yehova, e no por a kaba di komprondé dikon Yehova lo hasi esei. P’esei el a puntr’é: “Di bèrdat Bo ta bai destruí e hustu huntu ku e malbado? . . . E Hues di henter mundu lo no hasi hustisia?” (Gén. 18:​23-33) Ku pasenshi Yehova a yuda su bon amigu Ábraham komprondé un lès importante: Hamas Dios lo destruí hende ku ta hustu. Anto e lès ei ta yuda i konsolá nos tur awe.

2. Kon nos por tin sigur ku Yehova su manera di husga hende semper ta hustu i miserikòrdioso?

² Yehova semper ta husga hende na un manera hustu i miserikòrdioso. Kon nos por tin sigur di esei? Pasó “Yehova ta wak kurason” di hende. (1 Sám. 16:7) De echo, e “sa kiko tin den kurason di tur hende.” (1 Rei. 8:39; 1 Kró. 28:9) Esei ta algu masha fasinante. Yehova ta asina sabí ku no ta tur biaha nos por komprondé dikon e ta tuma sierto desishon. Ta di komprondé anto dikon Apòstel Pablo a bisa tokante Yehova: “Ki insondabel su huisionan ta!”—Rom. 11:33.

3-4. Kiko tin biaha nos ta puntra nos mes, i kiko nos lo trata den e artíkulo akí? (Huan 5:​28, 29)

³ Aunke, meskos ku Ábraham, nos sa ku Yehova semper ta hasi loke ta hustu, kisas tòg nos ta puntra nos mes sierto kos manera: ‘Ta bèrdat ku no tin niun speransa pa e hendenan ku Yehova a destruí, manera esnan di Sódoma i Gomora? Tin chèns ku algun di nan lo ta den “resurekshon di . . . hende inhustu”?’—Echo. 24:15.

 ⁴ Wèl, laga nos wak promé kiko nos sa tokante resurekshon. Poko tempu ei, nos a haña un mihó komprondementu tokante “resurekshon di bida” i “resurekshon di huisio.” a (Lesa Huan 5:​28, 29.) E komprondementu akí a hiba ku mester hasi mas ahuste. Nos lo papia tokante esakinan den e artíkulo akí i esun siguiente. Den e artíkulo akí, nos lo trata loke nos no sa i loke sí nos sa tokante Yehova su manera di husga.

LOKE NOS NO SA

5. Kiko nos publikashonnan a bisa ántes tokante esnan ku a ser destruí na Sódoma i Gomora?

⁵ Ántes nos publikashonnan a yega di splika ku hende ku Yehova a destruí, mané esnan di Sódoma i Gomora, lo no haña resurekshon. Pero despues ku esklabo fiel a studia e punto ei mas profundo i a hasi hopi orashon, a bira bisto ku no por bisa esei ku tur siguridat.

6. Kua relato mas tin di hende ku Yehova a destruí, i kiko Beibel no ta bisa nos?

⁶ Beibel tin hopi relato di hende ku Yehova a destruí. Por ehèmpel, esnan ku el a destruí den Diluvio. E shete nashonnan ku el a laga e israelitanan destruí den e pais ku el a primintí e israelitanan. I e 185.000 sòldánan asirio ku un angel di Yehova a mata den un solo anochi. (Gén. 7:23; Deu. 7:​1-3; Isa. 37:​36, 37) Pero Beibel no ta bisa nos ku Yehova a disidí ku ta pa semper nan tur a ser destruí i ku nan no ta digno pa haña resurekshon.

7. Kiko nos no sa tokante e hendenan ku a muri den Diluvio òf esnan ku e israelitanan a destruí na Kánan? (Wak e plachi.)

⁷ Nos no sa ki huisio Yehova a duna kada un di e hendenan ei ni nos no sa tampoko si nan a haña chèns di siña tokante Yehova i arepentí. Ora Beibel ta papia tokante e periodo di Diluvio, e ta yama Noe “un predikadó di hustisia.” (2 Ped. 2:5) Pero niun kaminda Beibel no ta bisa ku segun ku Noe tabata traha e arka gigantesko, e tabata purba di papia tambe ku delaster un hende riba tera. Meskos tambe, nos no sa si tur e hendenan malbado ku tabata biba na Kánan a haña chèns di siña tokante Yehova i arepentí.

8. Kiko nos no sa tokante e hendenan di Sódoma i Gomora?

⁸ Awor kiko di e hendenan di Sódoma i Gomora? Ta bèrdat ku nan tabata hende malbado i Lòt tabata biba einan i e sí tabata un hende hustu. Pero nos no sa si el a prediká na nan tur. Nos no sa tampoko si nan tabata sa e diferensia entre loke ta bon i loke ta malu. Dikon nos ta bisa esei? Pasó, kòrda ku Beibel ta bisa ku entre e multitut grandi di hende ku a buska manera pa violá Lòt su bishitantenan tabatin asta mucha chikitu. (Gén. 19:4; 2 Ped. 2:7) Pues, nos por para ariba ku nos Dios miserikòrdioso a disidí ku niun di e hendenan ei lo no haña resurekshon? Yehova a bisa Ábraham ku no tin ni dies hende hustu den e stat ei. (Gén. 18:32) Pues mirando ku e hendenan ei tabata inhustu, Yehova tabatin tur derecho di destruí nan. Akaso esei ta duna nos derecho di bisa ku tur siguridat ku niun di nan lo no lanta den “resurekshon di . . . hende inhustu”? Nò!

9. Kiko nos no sa tokante Sálomon?

⁹ Pero Beibel tin relatonan tambe di hende hustu ku despues a bira inhustu.  Rei Sálomon tabata un di nan. E tabata sa ken Yehova ta i kon e mester ador’É. P’esei Yehova a bendishon’é masha hopi. Pero despues di tempu, Sálomon a kuminsá adorá dios falsu. Su akshonnan a hasi Yehova furioso i a trese konsekuensianan pa e nashon ku a dura siglonan. Pa hopi aña nos a pensa ku Sálomon sigur lo haña resurekshon. E motibu di esei tabata pasó ora el a muri, Beibel ta bisa ku el “a bai sosegá serka su antepasadonan.” Beibel a usa e mesun palabranan ei pa hende fiel manera Rei David. (1 Rei. 11:​5-9, 43; 2 Rei. 23:13) Pero djis pasó Beibel ta usa e palabranan ei ke men ku Sálomon lo haña resurekshon? Beibel no ta bisa. Algun hende por pensa: ‘Ma no ta Beibel mes ta bisa ku “esun ku muri ta keda apsolvé di su piká”?’ (Rom. 6:7) I nan tin tur rason. Pero, no ta pasó un hende a muri esei ke men ku e tin derecho di haña un resurekshon. Resurekshon ta un regalo di nos Dios. Yehova ta duna e regalo ei na hende ku e ke duna oportunidat di sirbié pa semper. (Yòb 14:​13, 14; Huan 6:44) Sálomon lo haña e regalo ei? Ta di wak kiko Yehova lo hasi. Pero loke sí nos sa ta ku Yehova semper lo hasi loke ta hustu.

LOKE SÍ NOS SA

10. Splika dikon nos sa ku Yehova no ta lihé pa destruí hende. (Ezekiel 33:11) (Wak e plachi.)

¹⁰ Lesa Ezekiel 33:11. Mediante e teksto ei, Yehova ta laga nos sa kon e ta sinti ora e tin ku husga hende. Meskos ku Profeta Ezekiel, Apòstel Pedro a bisa: “Yehova . . . no ta deseá pa ningun hende ser destruí.” (2 Ped. 3:9) E palabranan ei ta konfirmá un bèrdat ku hamas lo no kambia. Nos sa ku Yehova no ta lihé pa destruí hende unabes i pa semper, a ménos ku e tin bon motibu pa esei. Yehova ta yen di miserikòrdia i ta demostrá esei tur momento ku ta posibel.

11. Ken lo no haña resurekshon, i kon nos sa esei?

¹¹ Nos sa di algun hende den Beibel ku lo no haña resurekshon. Pero e lista no ta largu. b Por ehèmpel, Hesus a bisa bon kla ku Hudas Iskariòt lo no haña resurekshon. (Mar. 14:21; Huan 17:12) c Maske Hudas tabata sa bon bon ku loke el a hasi tabata kontra Yehova i Su Yu, el a hasié tòg. (Mar. 3:29) d Hesus a bisa tambe ku algun guia religioso ku a opon’é lo muri sin speransa di resurekshon. (Mat. 23:33; Huan 19:11) e Anto Pablo a atvertí ku si un apóstata no arepentí, lo e no haña resurekshon.—Heb. 6:​4-8; 10:29.

12. Kiko nos por bisa di Yehova su miserikòrdia? Duna algun ehèmpel.

¹² Pero, kiko nos por bisa di Yehova su miserikòrdia? Kon Yehova a mustra ku e “no ta deseá pa ningun hende ser destruí”? Wak kon el a mustra miserikòrdia na algun hende ku a kometé piká serio. Por ehèmpel, Rei David a kometé adulterio i asesinato. Pero, el a arepentí. P’esei Yehova a mustr’é miserikòrdia i a pordon’é. (2 Sám. 12:​1-13) Rei Mánases, pa gran parti di su bida a hasi kosnan horibel. Pero asta den su kaso, ora el a arepentí, Yehova a mustr’é miserikòrdia i a pordon’é. (2 Kró. 33:​9-16) E ehèmpelnan ei ta mustra nos ku Yehova ta mustra  miserikòrdia ora e mira un motibu pa hasi esei. Lo e resusitá hende ku a rekonosé ku nan a hasi un piká serio i a arepentí.

13. (a) Dikon Yehova a mustra miserikòrdia na e ninivitanan? (b) Kiko Hesus a bisa di e ninivitanan?

¹³ Un otro ehèmpel di Yehova su miserikòrdia ta kon el a trata ku e ninivitanan. El a bisa Yónas: “Nan maldat a hala mi atenshon.” Pero ora nan a arepentí, Yehova a pordoná nan. Yehova tabata mas miserikòrdioso ku Yónas kende tabata hopi rabiá. Yehova mester a kòrd’é ku e ninivitanan “ni sikiera sa e diferensia entre bon i malu.” (Yón. 1:​1, 2; 3:10; 4:​9-11) Mas despues, Hesus a usa e ehèmpel ei pa mustra algu tokante Yehova su hustisia i miserikòrdia. Hesus a bisa ku e ninivitanan ku a arepentí “lo lanta for di morto riba Dia di Huisio.”—Mat. 12:41.

14. Ki chèns e ninivitanan lo haña den e “resurekshon di huisio”? Duna un ehèmpel.

¹⁴ Pero kiko Hesus tabata ke men ora el a bisa ku e ninivitanan “lo lanta for di morto riba Dia di Huisio”? Hesus a bisa ku lo bai tin un “resurekshon di huisio.” (Huan 5:29) E tabata papiando di su Reinado di Mil Aña, i durante e periodo ei lo bai tin “resurekshon di tantu hende hustu komo hende inhustu.” (Echo. 24:15) Hende inhustu lo haña “resurekshon di huisio.” Esei ke men ku despues ku nan resusitá, Yehova i Hesus lo mira i evaluá si nan ta obedesé i ta apliká loke nan ta siñando. Por ehèmpel, si un ninivita ku resusitá no ke adorá Yehova, Yehova lo no permitié keda na bida. (Isa. 65:20) Pero tur ku skohe pa adorá Yehova tin e oportunidat di biba pa semper.—Dán. 12:2.

15. (a) Dikon nos no por bisa ku niun hende di Sódoma i Gomora lo no haña resurekshon? (b) Kon nos tin ku komprondé e palabranan na Hudas 7? (Wak e kuadro “ Kiko Hudas Tabata Ke Men?”)

¹⁵ Ora Hesus a papia tokante hendenan di Sódoma i Gomora, el a bisa ku “riba Dia di Huisio” nan lo ta mihó pará ku e hendenan ku a rechasá tantu e komo su siñansanan. (Mat. 10:​14, 15; 11:​23, 24; Luk. 10:12) Ta un forma di eksagerashon Hesus a usa pa laga mira ku e hendenan  den su tempu tabata pió ku esnan di Sódoma i Gomora? Parse ku esei no tabata su intenshon. Kòrda ku ora Hesus a bisa ku e ninivitanan “lo lanta for di morto riba Dia di Huisio” e no tabata papia den sentido simbóliko. f Pues, parse ku e no a papia tokante e hendenan di Sódoma i Gomora den sentido simbóliko. E “Dia di Huisio” ku el a papia di dje den tur dos kaso mester ta e mesun “Dia di Huisio.” No lubidá ku Hesus a bisa ku entre e hendenan ku lo haña “resurekshon di huisio” tin esnan ku a “praktiká maldat.” (Huan 5:29) Meskos ku e ninivitanan, e hendenan di Sódoma i Gomora a hasi kosnan malu. Pero e ninivitanan a haña chèns di arepentí. Pues parse ku tin speransa pa e hendenan di Sódoma i Gomora. E chèns t’ei ku algun di nan lo haña resurekshon i kisas nos lo tin e oportunidat di siña nan tokante Yehova i Hesukristu.

16. Kiko Yehova ta saminá pa disidí ken lo e resusitá? (Yeremías 17:10)

¹⁶ Lesa Yeremías 17:10. E teksto ei ta bisa algu ku sí nos sa di Yehova: E semper ta “investigá kurason.” Pues, e ta “saminá e pensamentunan di mas íntimo.” Ora di disidí ken ta bai haña resurekshon, lo e “duna kada ken loke e meresé a base di su komportashon.” Yehova lo pega firme na su normanan di hustisia, pero lo e ta miserikòrdioso semper ku ta posibel. P’esei hamas nos por bisa ku un hende lo no haña resurekshon a ménos ku nos sa ku Beibel ta bisa esei bon kla!

“E HUES DI HENTER TERA LO . . . HASI LOKE TA HUSTU”

17. Kiko lo pasa ku hendenan ku a muri?

¹⁷ Desde ku Ádam i Eva a uni ku Satanas i rebeldiá kontra Yehova Dios, míles di miónes di hende a muri. Morto ta un “enemigu” teribel! (1 Kor. 15:26) Pero kiko lo pasa ku tur e hendenan ei? Algun di nan ta forma parti di e 144.000 fiel sirbidó  di Kristu ku lo haña bida inmortal den shelu. (Rev. 14:1) Anto tambe, lo tin un kantidat grandi di hende fiel ku tabata stima Yehova ku lo haña bida atrobe den “resurekshon di . . . hende hustu.” Anto si nan keda hustu durante Kristu su Reinado di Mil Aña i durante e prueba final, nan lo biba pa semper riba tera. (Dán. 12:13; Heb. 12:1) Ademas durante e Mil Aña, lo tin “resurekshon di . . . hende inhustu,” nan lo ta hende ku nunka a sirbi Yehova i hende ku asta tabata “praktiká maldat.” Nan lo haña chèns di kambia nan kondukta i bira sirbidó fiel di Yehova. (Luk. 23:​42, 43) Pero, tabatin algun hende ku tabata asina malbado, asina determiná pa bai kontra Yehova i su propósito, ku el a disidí ku nan lo no haña niun resurekshon.—Luk. 12:​4, 5.

 18-19. (a) Kiko nos por tin sigur tokante Yehova su manera di husga hende ku a muri? (Isaías 55:​8, 9) (b) Kiko nos lo trata den e siguiente artíkulo?

¹⁸ Pues, nos por ta shen porshento sigur ku Yehova su manera di husga hende ku a muri semper ta hustu! Dikon? Pasó Yehova, “e Hues di henter tera,” ta perfekto, sabí i miserikòrdioso. Anto ta esei Ábraham tambe a bin komprondé. Yehova a trein su Yu i a dun’é responsabilidat di husga tur hende. (Huan 5:22) Tantu Yehova komo Hesus por lesa ki tin den kurason di kada hende. (Mat. 9:4) Pues, ora nan ta husga kada hende, semper nan lo hasi “loke ta hustu”!

¹⁹ P’esei, keda kòrda ku semper Yehova lo tuma e mihó desishon. Nos tin ku aseptá ku nos no ta apto pa husga—pero Yehova sí! (Lesa Isaías 55:​8, 9.) Ta p’esei anto, ku tur konfiansa nos ta laga tur husgamentu pa Yehova i su Yu. Nos sa tambe ku nos Rei Hesus lo mustra hustisia i miserikòrdia eksaktamente meskos ku su Tata. (Isa. 11:​3, 4) Yehova i Hesus lo husga hende durante e tribulashon grandi. Den e siguiente artíkulo nos lo wak loke nos no sa i loke sí nos sa tokante esei.