1, 2. Dikon animashon ta importante? Duna ehèmpel.

“KASI nunka mi mayornan no ta animá mi, ma nan ta kritiká mi hopi sí. I nan palabranan por hasi hopi doló. Nan ta bisa mi ku mi ta manera mucha chikí, ku nunka lo mi siña i ku mi ta gordo. P’esei hopi biaha mi ta yora, i mi ta preferá di no papia ku nan. Mi ta sinti ku mi no ta bal nada.” Asina Cristina, ^[1] di 18 aña di edat, a bisa. Ki tristu bida ta ora hende no ta haña animashon.

² Di otro banda, animashon ta masha benefisioso. Rubén a bisa: “Pa añanan largu mi a lucha ku e sintimentu di no ta bal nada. Un dia, mi tabata prediká ku un ansiano ku a ripará ku e dia ei mi tabata down. El a skucha mi ku tur su atenshon segun ku mi tabata ekspresá loke mi tabata sinti. Despues el a kòrda mi riba tur e kosnan bon ku mi a logra. Tambe el a kòrda mi riba e palabranan di Hesus, esta, ku kada un di nos ta bal mas ku hopi mòfi. Hopi bes mi ta pensa riba e teksto ei, i te ainda e ta konmové mi. E palabranan di e ansiano ei a yuda mi hopi.”—Mat. 10:31.

3. (a) Kiko apòstel Pablo a bisa tokante animashon? (b) Kiko nos lo konsiderá den e artíkulo akí?

³ No ta nada straño ku Beibel ta enfatisá e importansia di animá otro regularmente. Apòstel Pablo a skirbi e kristiannan  hebreo: “Tene kuidou, rumannan, pa ningun di boso no haña un mal kurason, un kurason sin fe, pa motibu ku boso a alehá for di e Dios bibu. Pero . . . sigui animá otro tur dia, pa ningun di boso no laga e poder engañoso di piká hasi boso kurason duru.” (Heb. 3:12, 13) Sin duda, lo bo ta di akuerdo kon importante e konseho pa animá otro ta ora bo kòrda kon palabranan di estímulo a lanta bo ánimo. Pues, laga nos konsiderá e siguiente preguntanan: Dikon animashon ta importante? Kiko nos por siña for di e manera ku Yehova, Hesus i apòstel Pablo a animá otro hende? Kon nos por duna bon animashon?

4. Ken tin mester di animashon, i dikon ta masha poko biaha hende ta duna otro animashon?

⁴ Nos tur tin mester di animashon, spesialmente ora nos ta kresiendo. Timothy Evans, un edukadó, a bisa: “Mucha . . . tin mester di animashon meskos ku mata tin mester di awa. Animashon ta pone un mucha sinti ku e tin balor i ku hende ta apresi’é.” Pero nos ta biba den tempunan krítiko. Hende ta egoista, sin kariño i masha poko biaha ta duna animashon. (2 Tim. 3:1-5) Algun mayor no ta elogiá nan yunan pasobra nan mes mayornan nunka no a hasi esei ku nan. Hopi trahadó no ta haña elogio, i nan ta bisa ku nan ta sinti masha falta di esei na trabou.

5. Kiko dunamentu di animashon ta enserá?

⁵ Por lo general, dunamentu di animashon ta enserá elogiá un hende pa loke el a hasi bon. Ademas, nos por animá hende ora nos ta rekordá nan ku nan tin bon kualidatnan òf ora nos papia “palabranan di konsuelo ku esnan ku ta deprimí [òf, desanimá].” (1 Tes. 5:14) E palabra griego ku hopi biaha ta ser tradusí komo “animá” ta nifiká literalmente “yama un hende p’e bini banda di bo.” Segun ku nos ta traha skouder ku skouder ku nos rumannan, nos lo haña oportunidat pa bisa algu ku lo animá nan. (Lesa Eklesiástes 4:9, 10.) Bo ta probechá di e oportunidatnan akí pa laga bo rumannan sa ku bo ta stima nan i apresiá nan? Promé ku bo kontestá, pensa bon riba e proverbio akí: “Ki bon ta un palabra duná na ora!”—Pro. 15:23.

6. Dikon Diabel ke desanimá nos? Duna un ehèmpel.

⁶ Satanas e Diabel ke desanimá nos pasobra e sa ku esei por suak nos den sentido spiritual i den otro maneranan. Proverbionan 24:10 ta bisa: “Si bo desmayá [òf, “desanimá,” NW] den e dia di angustia, bo forsa ta keda limitá.” Satanas a usa un seri di kalamidat i akusashon falsu pa purba di desanimá Yòb, un hòmber hustu, pero e kòmplòt ei a frakasá. (Yòb 2:3; 22:3; 27:5) Nos por lucha kontra e trampanan di Diabel ora nos animá nos famia i rumannan kristian. Esaki lo yuda hasi nos hogar i Salòn di Reino lugánan kaminda nos ta sinti nos felis i sigur.

7, 8. (a) Ki ehèmpelnan bíbliko ta mustra ku Yehova ta haña ku ta importante pa duna animashon? (b) Kon mayornan por imitá e ehèmpel di Yehova? (Wak e promé plachi.)

⁷ Yehova. Un salmista a kanta: “SEÑOR ta serka di e hende di kurason kibrá, i ta salba esnan di spiritu abatí.” (Sal. 34:18) Ora e fiel profeta Yeremías tabatin miedu i tabata desanimá, Yehova a lanta su ánimo i yud’é haña konfiansa. (Yer. 1:6-10) I imaginá bo kon  animá e biehitu profeta Daniel a sintié ora Dios a manda un angel pa fortales’é i a yam’é un “hòmber masha stimá.” (Dan. 10:8, 11, 18, 19) Abo tambe por animá publikadó-, pionero- i rumannan di edat ku no por hasi hopi mas manera ántes?

⁸ Dios no a pensa ku e no tabatin nodi di elogiá i animá su Yu stimá, Hesus, tempu e tabata riba tera djis pasobra nan a traha huntu pa un tempu largu promé ku el a bini na tera. En bes di esei, na dos okashon Hesus a tende su Tata bisa: “Esaki ta mi Yu stimá, esun ku tin mi aprobashon.” (Mat. 3:17; 17:5) Asina Dios a elogiá Hesus i a sigur’é ku e tabata hasi bon. Hesus lo mester a sintié masha animá ora el a tende e palabranan akí dos biaha, esta, na komienso di su sirbishi i den e último aña di su bida riba tera. Tambe Yehova a manda un angel pa fortalesé Hesus ora e tabata den angustia e anochi promé ku su morto. (Luk. 22:43) Si nos ta mayor, laga nos sigui e ehèmpel di Yehova, animá nos yunan regularmente i duna nan elogio ora nan hasi bon. Tambe nos mester duna nan èkstra sosten si dia tras dia nan integridat ta ser poné na prueba na skol.

9. Kiko nos por siña for di e manera ku Hesus a trata su apòstelnan?

⁹ Hesus. Riba e anochi ku Hesus a instituí e Konmemorashon di su morto, el a ripará ku ainda su apòstelnan tabatin problema ku orguyo. Aunke Hesus tabata humilde i a laba nan pianan, tòg nan a sigui diskutí tokante kua di nan tabata esun di mas grandi. Anto Pedro tabatin demasiado konfiansa den su mes. (Luk. 22:24, 33, 34) Apesar di esei, Hesus a elogiá su fiel apòstelnan pasobra nan a keda huntu kuné durante su pruebanan. El a profetisá ku nan lo a hasi obranan mas grandi kuné i a sigurá nan ku Dios tabatin kariño pa nan. (Luk. 22:28; Huan 14:12; 16:27) Nos por puntra nos mes: ‘Ami ta imitá Hesus i ta elogiá mi yunan i otro hende pa e bon kosnan ku nan ta hasi en bes di enfoká riba nan imperfekshonnan?’

10, 11. Kon apòstel Pablo a demostrá ku el a mira e nesesidat pa animá otro hende?

¹⁰ Apòstel Pablo. Den su kartanan, Pablo a papia masha bon di su rumannan kristian. El a biaha ku algun di nan pa añanan largu. Sin duda, e tabata sa di nan fayonan, pero el a skirbi kosnan bon tokante nan. Por ehèmpel, Pablo a bisa ku Timoteo tabata su “yu stimá i fiel den Señor,” kende tabata masha interesá den e otro kristiannan. (1 Kor. 4:17; Flp. 2:19, 20) I tokante Tito, Pablo a bisa e kongregashon di Korinto ku e tabata su ‘kompañero i kolaboradó, kende a sirbi na nan interes.’ (2 Kor. 8:23) Timoteo i Tito lo mester a sinti nan mashá animá ora nan a haña sa kiko Pablo tabata pensa di nan.

¹¹ Pablo i Bárnabas a riska nan bida ora nan a bai bèk nèt kaminda nan a ser ataká violentamente. Por ehèmpel, apesar ku nan a haña nan ku oposishon severo na Listra, nan a regresá einan pa nan por a animá e disipelnan nobo pa keda firme den fe. (Echo. 14:19-22) Na Efeso, un multitut di hende furioso a ataká Pablo. Echonan 20:1 i 2 ta bisa: “Despues ku e bochincha a plakia, Pablo a manda yama e disipelnan, i ora el a kaba di animá nan i yama nan ayó, el a kue kaminda pa Masedonia. Despues ku el a pasa den e regionnan ei i a papia hopi palabra di animashon ku e disipelnan, el a yega Gresia.” Pues, pa Pablo, dunamentu di animashon tabata masha importante.

12. Kon nos reunionnan ta habri kaminda pa nos duna i risibí animashon?

¹² Un motibu pakiko nos bondadoso Tata selestial a hasi posibel pa nos reuní huntu riba un base regular ta pa nos duna i risibí animashon. (Lesa Hebreonan 10:24, 25.) Meskos ku e promé siguidónan di Hesus, nos ta reuní huntu pa nos siña di Beibel i haña animashon. (1 Kor. 14:31) Cristina, kende nos a menshoná na komienso di e artíkulo akí, a bisa: “Loke mi ta gusta mas di e reunionnan ta e amor i animashon ku mi ta risibí einan. Tin bes, mi ta sinti mi deprimí ora mi yega Salòn di Reino, pero e ruman muhénan ta aserká mi, brasa mi i bisa mi ku mi a keda bunita. Tambe nan ta bisa mi ku nan stima mi i ta kontentu di mira mi progreso spiritual. Nan animashon ta laga mi sinti muchu mas mihó.” Ta masha refreskante ora kada un di nos ta animá otro, i di e manera ei sòru pa por tin “un interkambio di estímulo” entre nos.—Rom. 1:11, 12.

13. Dikon sirbidónan di Dios ku tin hopi tempu ta sirbié tin mester di animashon?

¹³ Asta sirbidónan di Dios ku tin hopi tempu ta sirbié tin mester di animashon. Tuma por ehèmpel Hosue. El a sirbi Dios fielmente pa hopi aña. Sinembargo, Yehova a bisa Moises pa anim’é, bisando: “Enkargá Hosue, enkurash’é i fortales’é, pasobra ta é lo krusa na kabes di e pueblo akí i ta é lo duna nan komo herensia e tera ku abo lo mira.” (Deu. 3:27, 28) Hosue tabata bai haña e responsabilidat grandi di guia e israelitanan pa nan konkistá e Tera Primintí. Lo el a enfrentá kontratempu i lo a sufri por lo ménos un derota militar. (Hos. 7:1-9) No kabe duda, Hosue mester a haña animashon i fortalesa. Meskos tambe, laga nos kada un animá e ansianonan, inkluso superintendentenan di sirkuito, kendenan ta traha duru pa kuida e tou di Dios. (Lesa 1 Tesalonisensenan 5:12, 13.) Un superintendente di sirkuito a bisa: “Tin biaha rumannan ta duna nos karchi di gradisimentu pa bisa nos kuantu nan a disfrutá di nos bishita. Nos ta warda nan i ta lesa nan ora nos ta un poko desanimá. Nan ta animá nos mashá!”

14. Kiko ta mustra ku konseho duná huntu ku elogio i animashon ta mas efikas?

¹⁴ Ansiano- i mayornan kristian a ripará ku nan konseho basá riba Beibel lo ta mas efikas ora nan dun’é huntu ku elogio i animashon. Por ehèmpel, ora Pablo a elogiá e korintionan pa apliká su konseho, nan lo mester a sinti nan animá pa sigui hasi loke ta korekto. (2 Kor. 7:8-11) Andreas, kende tin dos yu, a bisa: “Animashon ta yuda yunan krese den  sentido spiritual i emoshonal. E ta yuda nan keda kòrda konseho bíbliko mihó. Maske nos yunan sa kiko ta korekto, si nos ta duna nan animashon tur ora bai, semper nan lo hasi tambe loke ta korekto.”

15. Menshoná un manera ku nos por animá nos rumannan.

¹⁵ Mustra nos rumannan ku nos ta apresiá nan esfuersonan i nan bon kualidatnan. (2 Kró. 16:9; Yòb 1:8) Tantu Yehova komo Hesus ta balorá mashá tur loke nos ta hasi pa apoyá e interesnan di Reino, asta ora nos esfuersonan i kontribushonnan ta limitá debí na nos sirkunstansianan. (Lesa Lukas 21:1-4; 2 Korintionan 8:12.) Por ehèmpel, algun di nos kerido rumannan di edat ta hasi hopi esfuerso pa asistí na e reunionnan i partisipá den nan, i tambe pa sali regularmente den sirbishi. Nan meresé nos elogio i animashon, no ta bèrdat?

16. Dikon nos tin ku probechá di kada oportunidat pa duna animashon?

¹⁶ Probechá di kada oportunidat pa animá otro hende. Si un hende hasi algu bon, no keda sin elogi’é. Wak kiko a pasa ora Pablo i Bárnabas tabata na Antiokia, Pisidia. E presidentenan di e snoa einan a bisa nan: “Rumannan, si boso tin un palabra di animashon pa e pueblo, papia numa.” Despues di esei, Pablo a duna un bunita diskurso. (Echo. 13:13-16, 42-44) Dikon no duna un palabra di animashon ora esei ta posibel? Si nos tin e kustumber di duna animashon, siguramente otro hende tambe lo animá nos.—Luk. 6:38.

17. Kon ta e mihó manera pa duna elogio?

¹⁷ Duna animashon di kurason i sea spesífiko. Palabranan general di animashon i elogio ta yuda sigur, pero e mensahe ku Hesus a duna e kristiannan na Tiatira ta mustra ku ta mihó pa nos ta spesífiko. (Lesa Revelashon 2:18, 19.) Por ehèmpel, komo mayor, nos por bisa nos yunan kiko nos ta apresiá mas di e progreso spiritual ku nan ta hasiendo. Nos por bisa un mama soltero kiko ta impreshoná nos di e manera ku e ta lantando su yunan apesar ku esei por ta difísil p’e. Tal animashon i elogio por ta un gran yudansa.

18, 19. Kon nos por yuda otro hende ku tin mester di animashon?

¹⁸ Yehova no ta duna nos personalmente un enkargo pa animá un hende manera el a hasi ku Moises ora e mester a animá i fortalesé Hosue. Ma Dios ta keda masha kontentu ora nos animá nos rumannan i otro hende. (Pro. 19:17; Heb. 12:12) Por ehèmpel, nos por bisa un oradó kon su diskurso a duna nos e konseho ku nos tabatin mester òf kon el a yuda nos komprondé un sierto teksto di Beibel. Un ruman muhé a skirbi un oradó bishitante: “Maske ta un ratu so nos a kòmbersá, bo a mira e doló ku mi tin den mi kurason, i bo a konsolá mi i animá mi. Mi ke pa bo sa ku e manera kariñoso ku bo ta papia riba plataforma i en persona tabata manera un regalo for di Yehova.”

¹⁹ Nos lo haña hopi manera pa animá otro hende spiritualmente ora nos ta determiná pa apliká e konseho di Pablo. El a bisa: “Sigui animá otro i fortalesé otro, manera de echo boso ta hasiendo kaba.” (1 Tes. 5:11) Sin duda, nos tur lo agradá Yehova si nos “sigui animá otro tur dia.”