1. Kon hopi fiel sirbidó di Dios ta sinti nan debí na piká?

NA UN okashon, apòstel Pablo a bisa: “Pober di mi!” (Rom. 7:24) Meskos ku apòstel Pablo, hopi fiel sirbidó di Dios tambe a yega di bisa e palabranan ei. Nos tur ta sufri debí ku nos a heredá piká, i nos por sinti nos tristu ora nos no agradá Yehova. Anto algun ruman ku a kometé piká serio a asta pensa ku Dios no por pordoná nan.

2. (a) Kon Salmo 34:22 ta yuda nos komprondé ku sirbidónan di Dios no mester sinti nan demasiado tristu debí na sintimentu di kulpa? (b) Kiko nos lo analisá den e artíkulo akí? (Wak e kuadro “ Un Lès òf un Nifikashon Simbóliko?”)

² Sinembargo, e Skritura ta sigurá nos ku esnan ku ta buska refugio serka Yehova no mester sinti nan demasiado tristu debí na sintimentu di kulpa. (Lesa Salmo 34:22.) Kiko buska refugio serka Yehova ta enserá? Kiko nos tin ku hasi pa Yehova tene miserikòrdia di nos i pordoná nos? Nos ta haña kontesta pa e preguntanan ei ora nos siña tokante e statnan di refugio ku tabatin den tempu di Israel di pasado. Ta bèrdat ku e provishon di e statnan di refugio tabata parti di e pakto di Lei, ku a ser remplasá na Pentekòste di aña 33. Pero kòrda, e Lei a bini for di Yehova. Pues  e provishon di e statnan di refugio ta siña nos tokante Yehova su punto di bista di piká, di hende ku peka i di esnan ku arepentí. Promé, laga nos analisá e propósito di e statnan di refugio i kon nan tabata funshoná.

3. Kiko lo a pasa ku un israelita ku a mata un hende deliberadamente?

³ Yehova tabata mira tur matamentu den Israel di pasado komo algu masha serio. Si un israelita a mata un hende deliberadamente, e famia maskulino di mas serka di e víktima, esta, “e vengadó di sanger,” mester a mata e asesino. (Num. 35:19) Di e manera ei, e asesino lo a paga ku su propio bida pa e bida inosente ku el a kita. Ora un asesinato a sosodé, mester a tuma akshon mesora pa por a tene e Tera Primintí limpi, pasobra Yehova a bisa: “No kontaminá e tera ku boso ta den; pasobra [dramamentu di hende su] sanger ta kontaminá e tera.”—Num. 35:33, 34.

4. Kiko lo a pasa ora un israelita a mata un hende aksidentalmente?

⁴ Pero, kiko lo a pasa ora un israelita a mata un hende aksidentalmente? Aunke e no a hasié intenshonalmente, tòg lo e tabata kulpabel di a drama sanger inosente. (Gén. 9:5) Den Yehova su miserikòrdia, el a permití e israelita ei hui for di e vengadó di sanger i bai na un di e seis statnan di refugio. Ei e por a haña protekshon. E mester a keda den e stat di refugio te dia e sumo saserdote a muri.—Num. 35:15, 28.

5. Kon e provishon di e statnan di refugio por yuda nos komprondé Yehova mihó?

⁵ No ta hende a bini ku e idea di stat di refugio. Yehova mes a bisa Hosue: “Papia ku e yunan di Israel, bisando: ‘Apuntá [òf, “skohe,” NW] e statnan di refugio.’” E statnan akí tabatin un propósito spesial, pues nan tabata sagrado. (Hos. 20:1, 2, 7, 8) Komo ku ta Yehova mes ta esun ku a manda pa apartá e statnan akí, kisas nos por puntra nos mes: ‘Kon e statnan di refugio ta yuda nos komprondé mihó e manera ku Yehova ta mustra miserikòrdia? I kon e provishon akí ta siña nos buska refugio serka Yehova?’

6, 7. (a) Kiko e ansianonan mester a hasi den kaso di un israelita ku a mata un hende sin ku e por a yuda? (Wak e promé plachi.) (b) Dikon tabata sabí pa e israelita bai serka e ansianonan?

⁶ Despues ku un israelita a mata un hende aksidentalmente, e promé kos ku e mester a hasi tabata “splika su kaso” na e ansianonan na e porta di e stat di refugio kaminda el a hui bai. E ansianonan mester a mustra hospitalidat na dje. (Hos. 20:4) Un poko tempu despues, nan mester a mand’é bèk na e stat kaminda el a mata e hende pa e ansianonan di e stat ei husga su kaso. (Lesa Numbernan 35:24, 25.) E israelita por a bai e stat di refugio bèk solamente despues ku e ansianonan a deklará ku e asesinato no tabata intenshonal.

⁷ Dikon e ansianonan mester a trata e kaso? Pasobra nan mester a tene e kongregashon di Israel limpi i yuda esun ku a mata un hende aksidentalmente benefisiá di Yehova su miserikòrdia. Un eksperto riba tereno di Beibel a splika ku si e persona ei a keda sin bai serka e ansianonan, “lo el a kore peliger di ser matá.” E eksperto a sigui bisa: “Su sanger lo tabata riba su mes kabes, pasobra e no a hasi uso di e provishon di Dios pa proteh’é.” Sí, e por a haña yudansa, pero e mester a buska i aseptá e yudansa ei. Si e no a hui bai na un di e statnan di refugio, e famia di mas serka di e víktima tabata liber pa mat’é.

8, 9. Dikon un kristian ku a kometé un piká serio mester buska yudansa serka e ansianonan?

 ⁸ Awe, pa un kristian ku a kometé un piká serio rekuperá, e mester buska yudansa serka e ansianonan di kongregashon. Dikon esei ta importante? Na promé lugá, Yehova ta bisa den su Palabra ku ta ansianonan mester trata kaso di piká serio. (Sant. 5:14-16) Na di dos lugá, e ansianonan por yuda un pekadó ku a arepentí pa bolbe haña Dios su aprobashon i pa evitá di bolbe kometé un piká serio. (Gal. 6:1; Heb. 12:11) Na di tres lugá, ansianonan a haña e tarea i e entrenamentu nesesario pa por konsolá pekadónan arepentí i yuda suavisá nan doló i sintimentu di kulpa. Yehova ta yama e ansianonan “un protekshon kontra tempestat.” (Isa. 32:1, 2) Tur esaki ta un muestra di Dios su miserikòrdia, no ta bèrdat?

⁹ Hopi sirbidó di Dios a haña alivio ora nan a buska i haña yudansa serka e ansianonan. Por ehèmpel, un ruman ku yama Daniel a kometé un piká serio, pero pa vários luna e tabata vasilá pa bai serka e ansianonan. E ta atmití: “Despues ku asina tantu tempu a pasa, mi a pensa ku e ansianonan no por a hasi nada mas pa mi. Semper mi tabatin miedu ku un hende lo a haña sa loke mi a hasi i ku lo mi tabatin ku enfrentá e konsekuensianan di mi akshonnan. I ora mi tabata hasi orashon na Yehova, mi tabata sinti ku promé ku mi pidi algu, mi tabatin ku pidi despensa pa loke mi a hasi.” Por fin Daniel a bai buska yudansa serka e ansianonan. Mirando bèk, el a bisa: “Di mes mi tabatin miedu di aserká nan. Pero despues, mi a sinti manera un karga pisá a kita for di mi lomba. Awor mi ta sinti ku mi por hasi orashon na Yehova sin ku nada ta stroba mi.” Awe Daniel tin un konsenshi limpi, i resientemente el a ser nombrá komo sirbidó ministerial.

10. Kiko un israelita ku a mata un hende aksidentalmente mester a hasi pa haña pordon?

¹⁰ Un israelita ku a mata un hende aksidentalmente mester a tuma akshon mesora  si e kier a haña e miserikòrdia di Dios. E mester a hui bai na e stat di refugio di mas serka. (Lesa Hosue 20:4.) Nos no por imaginá nos mes ku e israelita ei lo no a tuma e mandamentu pa hui na serio; e mester a yega mas lihé posibel na e stat di refugio i keda einan pasobra su bida tabata na peliger. Esaki a nifiká ku lo e tabatin ku hasi sierto sakrifisio. E mester a bandoná su trabou, e komodidat di su kas i su libertat di biaha te dia e sumo saserdote a muri. * (Num. 35:25) Pero tur e sakrifisionan ei tabata bale la pena. Si lo el a sali for di e stat di refugio, lo el a demostrá ku e no tabatin kunes ku el a mata un hende, i su mes bida lo tabata na peliger.

11. Kiko un kristian ku a arepentí mester hasi pa e demostrá ku e ta gradisidu pa e miserikòrdia di Dios?

¹¹ Di mes manera awe, un pekadó ku a arepentí mester tuma akshon desisivo si e ke pa Dios mustra miserikòrdia na dje. Nos mester evitá tur loke por hiba na piká, pues no solamente nos mester hui for di piká serio, sino tambe for di pikánan ménos serio ku por hiba na piká grave. Bou di inspirashon, apòstel Pablo a deskribí loke kristiannan na Korinto ku a arepentí a hasi. El a skirbi: “Ki fruta e tristesa ku ta agradá Dios a produsí den boso: ki un gran esfuerso, ki un deseo pa libra boso mes di kulpa, ki un indignashon pa e mal echo, ki un temor di Dios, ki un deseo sinsero i zelo i korekshon di e malu!” (2 Kor. 7:10, 11) Nos mester hasi esfuerso pa stòp ku un piká grave pa nos por demostrá na Yehova ku nos no ta negligente, ku nos no ta pensa ku di mes nos lo haña e miserikòrdia di Yehova.

12. Kiko kisas un kristian mester stòp kuné pa e por sigui haña e miserikòrdia di Yehova?

¹² Kiko kisas un kristian mester stòp kuné pa e por sigui haña e miserikòrdia di Yehova? E mester ta dispuesto pa asta stòp ku loke e ta gusta si akaso esaki por pon’é kometé piká. (Mat. 18:8, 9) Si bo amigunan ta influensiá bo pa hasi loke ku Yehova no ke, lo bo stòp di anda ku nan? Si ta difísil pa bo kontrolá kuantu bibida alkohóliko bo ta bebe, bo ta dispuesto pa evitá situashonnan ku por pone bo bebe di mas? Si bo ta lucha ku deseonan seksual inmoral, bo ta evitá pelíkula, website òf otro kosnan ku por lanta pensamentunan inmoral? Kòrda ku kualke sakrifisio ku bo hasi pa mantené bo integridat na Yehova ta bale la pena. Nada ta hasi mas doló ku sinti ku Yehova a bandoná bo. Di otro banda, no tin nada mas satisfaktorio di tin Yehova su “miserikòrdia [òf, “amor leal,” NW] eterno.”—Isa. 54:7, 8.

13. Dikon un israelita ku a mata un hende aksidentalmente por a sintié safe i kontentu den e stat di refugio?

¹³ Unabes un israelita tabata den un stat di refugio, e tabata safe. Relashoná ku e statnan akí, Yehova a bisa: “Nan lo bira boso refugio.” (Hos. 20:2, 3) Yehova no a rekerí pa e israelita ei bolbe ser husgá pa e mesun kaso, i e vengadó di sanger no tabatin mag di drenta den e stat i mat’é. Asina nunka e no mester tabatin miedu di represaya kontra dje. Miéntras e tabata den e stat, e tabata safe bou di e protekshon di Yehova. E no tabata den un prizòn, e por a traha, yuda otro hende i sirbi Yehova na pas. Sí, e por a hiba un bida felis i satisfaktorio.

14. Kiko un kristian ku arepentí por ta sigur di dje?

¹⁴ Algun sirbidó di Dios ku a kometé piká serio ainda ta sinti nan kulpabel asta  despues ku nan a arepentí. Algun di nan asta ta pensa ku nunka Yehova lo lubidá nan piká grave. Si bo ta sinti asina, sea sigur ku Yehova ta mustra miserikòrdia na bo i ta pordoná bo kompletamente. Daniel, kende a ser menshoná anteriormente, a mira ku esei ta bèrdat. Despues ku e ansianonan a trata su kaso i a yud’é bolbe haña un konsenshi limpi, el a sinti un gran alivio. El a bisa: “Despues ku nan a trata mi kaso, mi no a sinti mi kulpabel mas. Unabes bo haña pordon, e piká a ser kitá, e no t’ei mas. Ta manera Yehova a bisa, lo e kita e peso di e piká i e ta pon’é leu di bo. Bo no tin nodi di mir’é nunka mas.” Unabes ku un asesino tabata den e stat di refugio, e no mester tabatin miedu mas di e vengadó di sanger. Di mes manera, ora Yehova pordoná nos, nos no tin nodi di tin miedu ku lo e bolbe tira esei na nos kara òf ku lo e bolbe husga nos pa esei.—Lesa Salmo 103:8-12.

15, 16. Kon Hesus su ròl komo Reskatador i Sumo Saserdote por yuda bo haña mas konfiansa den e miserikòrdia di Dios?

¹⁵ De echo, kompará ku e israelitanan, nos tin mas motibu pa konfia den e miserikòrdia di Yehova. Despues ku Pablo a bisa kon malu el a sintié pasobra e no por a obedesé Yehova perfektamente, el a sklama: “Mi ta gradisí Dios . . . pa medio di Hesukristu, nos Señor!” (Rom. 7:25) Sí, komo ku Pablo a arepentí kaba pa piká i eror di pasado, e tabatin konfiansa ku Dios lo a pordon’é a base di e sakrifisio di reskate di Hesus. Komo nos Reskatador, Hesus ta hasi nos konsenshi limpi i ta duna nos pas mental. (Heb. 9:13, 14) Ademas, komo nos Sumo Saserdote, “e por salba e hendenan ku ta aserká Dios pa medio di dje, pasobra semper e ta na bida pa boga pa nan.” (Heb. 7:24, 25) Den antigwedat, e ròl di e sumo saserdote a sigurá e israelitanan ku nan pikánan tabata pordoná. Awe, e ròl di Hesus komo nos Sumo Saserdote ta duna nos mas motibu pa ta sigur ku “nos por haña miserikòrdia i risibí bondat inmeresí pa yuda nos na e momento apropiá.”—Heb. 4:15, 16.

¹⁶ P’esei, pa bo buska refugio serka Yehova, pone fe den e sakrifisio di Hesus. No kere ku e reskate ta djis pa hende en general, sino tene fe ku e reskate ta pa abo. (Gal. 2:20, 21) Bo mester tin fe ku e reskate ta e base pa pordon di bo pikánan. Anto bo mester tin fe ku e reskate ta duna abo e speransa di bida eterno. E sakrifisio di Hesus ta un regalo ku Yehova a duna abo.

17. Dikon bo ke buska refugio serka Yehova?

¹⁷ E statnan di refugio ta un muestra di Yehova su miserikòrdia. E provishon di e statnan akí a enfatisá ku bida ta sagrado pa Dios. Tambe e ta yuda nos komprondé kon e ansianonan ta yuda nos, kiko berdadero arepentimentu ta enserá i dikon nos por tin sigur ku Yehova ta pordoná nos. Bo ta buska refugio serka Yehova? No tin un lugá mas safe! (Sal. 91:1, 2) Den e siguiente artíkulo, nos lo mira kon e statnan di refugio por yuda nos imitá Yehova su ekselente ehèmpel di hustisia i miserikòrdia.