1, 2. (a) Kiko Hesus tabata pensa di e Lei di Dios? (b) Dikon nos por bisa ku e eskriba- i fariseonan tabata apliká e Lei na un manera robes?

HESUS tabata stima e Lei di Moises. Esei no ta nada straño pasobra ta su Tata, Yehova, e Persona di mas importante den su bida, a duna e Lei ei. Na Salmo 40:8, Beibel a profetisá tokante e amor profundo ku Hesus lo tabatin pa e lei di Dios, bisando: “Pa hasi bo boluntat, o mi Dios, ta un delisia pa mi; bo lei ta den mi kurason.” Hesus a demostrá ku echo i palabra ku e Lei di Dios tabata perfekto i benefisioso i ku tur loke tin skirbí den dje lo kumpli sigur.—Mat. 5:17-19.

² Ki tristu Hesus mester a sintié ora el a mira kon e eskriba- i fariseonan tabata apliká e Lei di su Tata na un manera robes. Nan tabata obedesé e mandamentunan di mas chikitu di e Lei en detaye, pasobra Hesus a bisa: “Boso ta duna e désimo parti di menta, eneldo i komino.” Kiko tabata e problema anto? El a agregá: “Ma boso a neglishá e asuntunan di mas peso di Lei, esta, hustisia, miserikòrdia i fieldat.” (Mat. 23:23) Hesus tabata diferente for di e eskriba- i fariseonan ei, kendenan tabata pensa ku nan ta mihó ku otro hende. Hesus sí a komprondé e nifikashon tras di e Lei, esta, kiko kada mandamentu a revelá tokante e kualidatnan di Yehova.

3. Kiko nos lo analisá den e artíkulo akí?

 ³ Komo kristian, nos no ta bou di e pakto di Lei. (Rom. 7:6) Pero tòg Yehova a preservá e Lei akí pa nos den su Palabra, Beibel. Yehova no ke pa nos ta opseshoná ku kada detaye di e Lei; mas bien, e ke pa nos komprondé i apliká e “asuntunan di mas peso,” esta, e prinsipionan tras di e Lei. Por ehèmpel, ki prinsipio nos por saka for di e echo ku Yehova a perkurá statnan di refugio? Den e artíkulo anterior, nos por a saka lèsnan for di loke un israelita ku a mata un hende aksidentalmente mester a hasi. Pero tambe nos ta siña tokante Yehova i kon nos por imitá su kualidatnan. P’esei, den e artíkulo akí nos lo kontestá tres pregunta: Kiko nos por siña tokante e miserikòrdia di Yehova for di e statnan di refugio? Kiko e statnan ei ta siña nos tokante kon Yehova ta mira bida? Kiko nan ta siña nos di Yehova su hustisia perfekto? Segun ku nos ta kontestá kada un di e preguntanan akí, buska maneranan ku bo por imitá bo Tata den shelu.—Lesa Efesionan 5:1.

4, 5. (a) Kon bini tabata fásil pa hui bai na e statnan di refugio, i dikon e mester tabata asina? (b) Kiko esei ta siña nos di Yehova?

⁴ E seis statnan di refugio mester tabata fásil pa yega na nan. Yehova a manda Israel skohe tres stat na kada banda di Riu Hordan. Asina kualke israelita ku a mata un hende sin ku e por a yuda por a yega lihé na un di nan. (Num. 35:11-14) E kayanan ku tabata bai na e statnan ei tabata bon mantené. (Deu. 19:3) Segun tradishon hudiu, tabatin bòrchi ku ta indiká kon pa yega e statnan ei. Komo ku tabatin stat di refugio, un israelita ku a mata un hende aksidentalmente no tabata obligá pa hui bai un otro pais, kaminda e por a hañ’é ku e tentashon di adorá diosnan falsu.

⁵ Pensa riba esaki: Yehova, Esun ku a duna òrdu pa mata un hende ku a asesiná un otro hende intenshonalmente, a duna hende ku a mata un otro hende sin ku e por a yuda e oportunidat amplio pa haña kompashon i protekshon. Un komentarista a bisa: “Tur kos a ser hasí mas simpel i fásil posibel. Asina miserikòrdioso Dios tabata.” Yehova no ta un hues kruel ku ta kla pa kastigá su sirbidónan. Mas bien, e ta “riku den miserikòrdia.”—Efe. 2:4.

6. Ki diferensia tabatin entre e aktitut di Dios i esun di e fariseonan?

⁶ Di otro banda, e fariseonan no tabata tene miserikòrdia di otro hende. Segun tradishon hudiu, nan tabata nenga di pordoná un hende ku a hasi e mesun fayo mas ku tres biaha. Pa mustra ku nan aktitut tabata robes, Hesus a konta un ilustrashon tokante  un fariseo ku a hasi orashon i a bisa: “O Dios, mi ta gradisí bo ku mi no ta manera otro hende—ladron, inhustu, ku ta kometé adulterio—ni tampoko manera e kobradó di belasting akí,” esta, un kobradó di belasting ku humildemente tabata pidi pa e miserikòrdia di Dios. Pero dikon e fariseonan no kier a mustra miserikòrdia? Beibel ta bisa ku nan “tabata menospresiá otro hende.”—Luk. 18:9-14.

7, 8. (a) Kon bo por imitá Yehova ora un hende peka kontra bo? (b) Dikon bo mester ta humilde pa pordoná otro hende?

⁷ Nos mester imitá Yehova, i no e fariseonan. Nos mester mustra kompashon na otro hende. (Lesa Kolosensenan 3:13.) Un manera ku nos por logra esei ta ora nos ta un persona aserkabel i asina lo ta mas fásil pa otro hende pidi nos pordon. (Luk. 17:3, 4) Puntra bo mes: ‘Mi ta lihé pa pordoná otro hende asta ora nan a peka mas ku un biaha kontra mi? Mi ta kla pa hasi pas ku un hende ku a hùrt mi?’

⁸ Pa nos por pordoná otro hende, nos mester ta humilde. E fariseonan tabata orguyoso, p’esei nan no tabata pordoná otro hende. Pero komo kristian, ku humildat nos mester “konsiderá ku otro hende ta superior” na nos i ku nan meresé nos pordon. (Flp. 2:3) Lo bo imitá Yehova i mustra humildat? Si bo ta humilde, lo ta fásil pa otro hende pidi bo pordon i pa bo pordoná nan. Bo mester ta lihé pa mustra miserikòrdia i slo pa rabia.—Ekl. 7:8, 9.

9. Kon Yehova a yuda e israelitanan komprondé ku bida ta sagrado?

⁹ Un meta importante di e statnan di refugio tabata pa protehá e israelitanan di kulpa di sanger. (Deu. 19:10) Yehova ta stima bida i e ta odia “man ku ta drama sanger inosente.” (Pro. 6:16, 17) Komo ku Dios ta hustu i santu, e no por ignorá matamentu aksidental. Ta bèrdat ku un israelita ku a mata un hende aksidentalmente a haña miserikòrdia. Pero e mester a presentá su kaso na e ansianonan, i si nan a determiná ku di bèrdat e matamentu tabata un aksidente, e por a keda den e stat di refugio te dia e sumo saserdote a muri. Esei por a nifiká ku e mester a pasa e restu di su bida einan. E konsekuensianan serio ei a yuda tur israelita komprondé ku bida ta sagrado. Pa mustra onor na nan Dunador di Bida, nan mester a evitá di pone bida di otro hende na peliger.

10. Segun Hesus, kon e eskriba- i fariseonan a demostrá ku nan no a balorá bida di otro hende?

¹⁰ Kontrali na Yehova, e eskriba- i fariseonan no tabatin kunes ku bida. Kon asina? Hesus a bisa nan: “Boso a kita e yabi di e porta ku ta hiba na konosementu; boso mes no a drenta, i boso a stroba esnan ku kier a drenta!” (Luk. 11:52) Nan mester a siña hende loke e Palabra di Dios ta bisa i yuda nan kana riba e kaminda pa haña bida eterno. Na lugá di esei, nan tabata stroba hende  di sigui Hesus, “e Representante Prinsipal di bida,” i asina nan tabata pone hende kue un rumbo ku por a hiba na destrukshon eterno. (Echo. 3:15) E lidernan orguyoso i egoista ei tabatin poko interes den bida i bienestar di nan próhimo. Esta kruel i sin miserikòrdia nan tabata!

11. (a) Kon apòstel Pablo a demostrá ku e ta mira bida manera Dios ta mir’é? (b) Kiko lo yuda nos tin e mesun aktitut ku Pablo tabatin pa ku sirbishi?

¹¹ Kon nos por imitá Yehova i evitá di haña un aktitut manera esun di e eskriba- i fariseonan? Nos mester balorá e regalo di bida i respet’é. Apòstel Pablo a hasi esei ora el a prediká i duna testimonio kabal. Komo resultado, e por a bisa: “Mi no ta kulpabel di sanger di ningun hende.” (Lesa Echonan 20:26, 27.) Pero no ta obligashon òf un sintimentu di kulpa a motiv’é pa prediká. Mas bien, el a stima hende, i nan bida tabata presioso p’e. (1 Kor. 9:19-23) Di mes manera, nos mester hasi esfuerso pa mira bida manera Dios ta mir’é. Yehova “ta deseá pa tur [hende] haña chèns di arepentí.” (2 Ped. 3:9) Bo tambe ta deseá esei? Si bo hasi bo bèst pa ta mas miserikòrdioso, lo bo por tin mas zelo den sirbishi i lo bo tin mas goso.

12. Dikon siguridat ta importante pa sirbidónan di Dios?

¹² Un otro manera ku nos ta demostrá ku nos ta mira bida manera Yehova ta mir’é ta ora nos ta tuma medidanan di siguridat na serio. Nos mester stür i traha na un manera sigur tur ora, asta ora nos ta konstruí, mantené òf biaha bai na nos lugánan di adorashon. Salú i siguridat di hende ta mas importante ku e tempu i plaka ku nos por spar. Nos Dios hustu semper ta hasi loke ta korekto i apropiá, i nos ke ta manera e. Foral ansianonan ta hasi esfuerso pa ta konsiente tantu di nan mes siguridat komo di esun di otro hende ku ta traha ku nan. (Pro. 22:3) Pues, si un ansiano rekordá bo tokante regla- i proseduranan di siguridat, apliká su konseho. (Gal. 6:1) Si nos mira bida manera Yehova ta mir’é, nos lo no haña “kulpa di sanger.”

13, 14. Den ki manera e ansianonan israelita por a imitá e hustisia di Yehova?

¹³ Yehova a manda e ansianonan israelita pa imitá su hustisia. Di promé, e ansianonan mester a haña sa tur detaye di un kaso. Despues, pa determiná si e israelita ku a mata un hende aksidentalmente por a haña miserikòrdia, nan mester a wak kiko tabata su intenshon, su aktitut i su akshonnan di pasado. Pa reflehá e hustisia di Yehova, nan mester a saka afó si e israelita ei a mata e hende debí na odio òf ku mal intenshon. (Lesa Numbernan 35:20-24.) Si tabatin testigu, lo mester tabatin por lo ménos dos testigu pa por a akusá un hende di matamentu intenshonal.—Num. 35:30.

¹⁴ Despues ku e ansianonan a determiná kiko a pasa, nan mester a wak ki tipo di persona e israelita tabata i no djis wak loke el a hasi. Nan tabatin mester di disernimentu, esta, e kapasidat pa wak mas ayá di loke ta opvio i pa mira dikon algu a sosodé. Mas importante ainda, nan tabatin mester di e spiritu santu di Yehova, i esei lo a yuda nan reflehá su disernimentu, miserikòrdia i hustisia.—Éks. 34:6, 7.

15. Ki diferensia tabatin entre e manera ku Hesus i e fariseonan tabata mira pekadó?

¹⁵ E fariseonan a enfoká solamente riba kiko un pekadó a hasi en bes di konsiderá ki tipo di persona e tabata. Ora nan a mira Hesus na un komementu na kas di Mateo, nan a puntra Hesus su disipelnan: “Dikon boso maestro ta kome ku kobradó di belasting i pekadó?” Hesus a kontestá nan: “Hende  bon di salú no tin mester di dòkter, ma hende malu sí. Bai anto, i siña loke esaki ta nifiká: ‘Mi ke miserikòrdia i no sakrifisio.’ Pasobra mi no a bini pa yama hende hustu, sino pekadó.” (Mat. 9:9-13) Akaso Hesus tabata buska èksküs pa pekadó? Klaru ku nò. E tabata ke pa nan arepentí, i esei tabata un parti importante di e mensahe ku e tabata prediká. (Mat. 4:17) Pues Hesus por a mira ku algun “kobradó di belasting i pekadó” kier a kambia. Nan no tabata na Mateo su kas simplemente pa kome. Mas bien, ‘hopi di nan a bira Hesus su siguidó.’ (Mar. 2:15) Lamentablemente, mayoria di fariseo no a mira loke Hesus a mira den e hendenan ei. Kontrali na e Dios hustu i miserikòrdioso ku e fariseonan a pretendé ku nan tabata adorá, nan a mira nan próhimo komo pekadó i komo kaso pèrdí.

16. Kiko un komité hudisial ta trata di determiná?

¹⁶ Ansianonan awe mester hasi tur nan esfuerso pa imitá Yehova, kende “stima hustisia.” (Sal. 37:28) Promé, nan mester hasi un investigashon profundo pa por determiná si un ruman a peka. Si e ruman a peka, nan lo trata su kaso segun prinsipionan di Beibel. (Deu. 13:12-14) Ansianonan ku ta sirbi den un komité hudisial mester determiná ku kuidou si un ruman ku a kometé un piká serio a arepentí. No ta semper fásil pa mira esei. Nan mester wak e ruman su aktitut, disposishon i kondishon di kurason. (Rev. 3:3) Un pekadó mester arepentí si e ke haña Yehova su miserikòrdia. *

17, 18. Kon ansianonan por sa si un ruman a arepentí di bèrdat? (Wak e promé plachi.)

¹⁷ Yehova i Hesus por lesa kurason, pero ansianonan no. Si bo ta un ansiano, kon bo por sa si un ruman a arepentí di bèrdat? Di promé, pidi Yehova duna bo sabiduria i disernimentu. (1 Rei. 3:9) Di dos, usa e Palabra di Dios i publikashonnan di e esklabo fiel pa yuda bo distinguí entre “tristesa di mundu” i “tristesa ku ta agradá Dios,” esta, si e ruman a arepentí di bèrdat. (2 Kor. 7:10, 11) Usa Beibel pa analisá ehèmpelnan di hende ku a arepentí i di esnan ku no a arepentí. Kiko Beibel ta bisa tokante nan sintimentunan, nan aktitut i nan kondukta?

¹⁸ Di tres, purba di komprondé ki tipo di persona e ruman ta. Bo mester tene kuenta ku e ruman su pasado, intenshon- i limitashonnan. Beibel a profetisá lo siguiente tokante Hesus, kabes di e kongregashon kristian, bisando: “E lo no husga segun loke su wowo ta mira, ni [tuma] desishon segun loke su orea ta tende; ma ku hustisia e lo husga e pobernan, i disidí ku onestidat pa e afligínan di e tera.” (Isa. 11:3, 4) Ansianonan, Hesus a nombra boso pa kuida e kongregashon i lo e yuda boso husga manera é ta husga. (Mat. 18:18-20) Nos ta kontentu ku nos tin ansianonan kariñoso ku ta hasi nan esfuerso pa imitá Hesus, no ta bèrdat? Nos ta apresiá kuantu esfuerso nan ta hasi sin kansa pa yuda nos mustra miserikòrdia i hustisia na nos rumannan.

19. Ki lès ku nos a siña for di e provishon di e statnan di refugio bo ke apliká?

¹⁹ E Lei di Moises a reflehá “e rasgonan básiko di e konosementu i di e bèrdat” tokante Yehova i su prinsipionan hustu. (Rom. 2:20) Por ehèmpel, for di e statnan di refugio ansianonan ta siña kon pa “husga na un manera hustu,” i nos tur ta siña kon pa “trata otro ku amor leal i tene miserikòrdia di otro.” (Zak. 7:9, NW) Nos no ta bou di e Lei mas. Pero, Yehova no ta kambia i su kualidatnan di hustisia i miserikòrdia ainda ta importante p’e. Ta un goso pa sirbi un Dios ku a traha nos den su imágen, ku nos por imitá su kualidatnan i tuma refugio den dje!