1. Kiko Yehova ke pa nos hasi?

 PA YEHOVA amor leal ta hopi importante. (Osé. 6:6) I e ke pa su sirbidónan mira e importansia di amor leal tambe. Mediante Profeta Mikéas, nos Dios ta animá nos pa “stima miserikòrdia,” sí, stima amor leal. (Mik. 6:8) Pero promé ku nos por hasi esei, nos mester sa kiko amor leal ta.

2. Ki ora nos por bisa ku un persona ta mustra amor leal?

² E Tradukshon di Mundu Nobo di e Santu Skritura na ingles, tin e ekspreshon “amor leal” mas o ménos 230 biaha. Den algun tradukshon di Beibel e palabra hebreo pa “amor leal” a ser tradusí komo “miserikòrdia” òf “kariño.” P’esei, kaminda e tekstonan den e artíkulo akí i esun siguiente ta menshoná “miserikòrdia” òf “kariño,” eigenlijk e ta referí na amor leal. Pero, awor kiko amor leal ta? Un persona ku ta stima un hende ku amor leal, lo stima e hende ei pa semper i lo keda fielmente na su lado. E mihó persona ku ta mustra amor leal ta Yehova. Den e artíkulo akí, nos lo wak kon Yehova ta mustra amor leal na hende. I den e siguiente nos lo wak kon nos, komo Dios su sirbidónan, por imit’é mustrando amor leal na nos rumannan.

3. Kiko Yehova a bisa Moises tokante Su nòmber i Su kualidatnan?

³ Poko despues ku e israelitanan a sali for di Egipto, Yehova a bisa Moises algu tokante Su nòmber i Su kualidatnan. El a splik’é ku Yehova ta un “Dios, yen di kompashon i grasia, kende no ta rabia lihé i kende ta abundá den miserikòrdia i bèrdat; kende ta mantené miserikòrdia pa milnan, kende ta pordoná inikidat, transgreshon i piká.”  (Éks. 34:6, 7) Ku e palabranan bunita ei, Yehova a laga Moises mira algu masha importante tokante Su amor leal. Kiko esei ta?

4-5. (a) Kon Yehova a deskribí su mes? (b) Ki preguntanan nos lo bai kontestá?

⁴ Yehova no a djis bisa ku e tin amor leal, pero ku e ta abundá, òf, ta yen di amor leal. Tin seis teksto mas ku ta mustra ku Yehova ta yen di amor leal. (Num. 14:18; Neh. 9:17; Sal. 86:15; 103:8; Yoël 2:13; Yon. 4:2) Tur e tekstonan ei ta referí semper na Yehova i nunka na hende. Bo no ta haña ta interesante ku Yehova ke laga nos komprondé ku e ta yen di amor leal? Pues, ta bisto anto ku amor leal ta masha importante pa Yehova. * Ku rason Rei David a bisa esaki tokante Yehova su amor leal: “Bo miserikòrdia, o SEÑOR, ta yega te den shelunan . . . Ki presioso bo miserikòrdia ta, o Dios! I e yunan di hende ta tuma refugio den e sombra di bo alanan.” (Sal. 36:5, 7) Kiko di nos? Meskos ku David, nos ta masha gradisidu pa Dios su amor leal?

⁵ Pa nos por komprondé mihó kiko amor leal ta, nos lo bai kontestá dos pregunta: Na ken Yehova ta mustra amor leal? I kon su amor leal ta benefisiá nos?

6. Na ken Yehova ta mustra amor leal?

⁶ Pero, ta na ken Yehova ta mustra amor leal? Beibel ta bisa ku nos por gusta i stima hopi kos, manera “e tera,” “biña i zeta,” “disiplina,” “konosementu” i “sabiduria.” (2 Kró. 26:10; Pro. 12:1; 21:17; 29:3) Di otro banda, amor leal nunka por ser mustrá na kos, semper ta mustr’é na hende. Sinembargo, Yehova no ta mustra amor leal na ken ku ta. E ta mustr’é na esnan ku tin un amistat será kuné. Nos Dios ta leal na su amigunan. E tin un propósito maravioso pa nan i nunka lo e stòp di stima nan.

7. Kon Yehova a mustra ku e stima tur hende?

⁷ Yehova a mustra ku e stima tur hende. Hesus a bisa Nikodemo: “Dios a stima mundu [esta, humanidat] asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.”—Huan 3:1, 16; Mat. 5:44, 45.

8-9. (a) Dikon Yehova ta mustra amor leal na su sirbidónan? (b) Kiko nos lo bai wak?

⁸ Manera nos a mira na paragraf 6,  Yehova ta mustra amor leal solamente na su sirbidónan, esnan ku tin un bon amistat kuné. Esei ta bisto for di loke Rei David i Profeta Daniel a bisa. Por ehèmpel, David a bisa: “Laga bo miserikòrdia kontinuá pa esnan ku konosé bo.” “Ma e miserikòrdia di SEÑOR ta di eternidat pa eternidat riba esnan ku ta tem’é.” Anto Daniel a bisa: “Ai Señor, e Dios grandi i temibel, kende ta warda su aliansa i miserikòrdia pa ku esnan ku ta stim’é i ta warda su mandamentunan.” (Sal. 36:10; 103:17; Dan. 9:4) Di loke nos por komprondé for di e palabranan akí, Yehova ta mustra amor leal na su sirbidónan debí ku nan konos’é, ta tem’é, ta stim’é i ta warda su mandamentunan. Yehova ta mustra amor leal solamente na esnan ku ta stim’é i ta sirbié na e manera korekto.

⁹ Promé ku kualke un di nos a kuminsá sirbi Yehova, ya kaba e tabata stima nos meskos ku tur hende. (Sal. 104:14) Pero ora ku nos a bira su sirbidó, nos a kuminsá benefisiá di su amor leal. De echo, Yehova ta primintí su sirbidónan: “Mi miserikòrdia lo no wòrdu kitá for di bo.” (Isa. 54:10) David for di su propio eksperensia por a mira ku Yehova ta “trata e persona ku ta leal na dje na un manera spesial.” (Sal. 4:3, NW) Mirando ku Yehova Dios ta trata nos na un manera asina spesial, kiko esei mester motivá nos pa hasi? Un salmista a bisa: “Ken ta sabí? Lag’é paga bon tinu na e kosnan akí, i konsiderá e miserikòrdia di SEÑOR.” (Sal. 107:43) Teniendo e konseho inspirá ei na mente, laga nos wak tres manera ku Yehova su amor leal ta benefisiá nos.

10. Kon nos ta benefisiá di e echo ku Yehova su amor leal ta dura pa semper? (Salmo 31:7)

¹⁰ Dios su amor leal ta dura pa semper. Bintiseis biaha Salmo 136 ta menshoná e aspekto importante ei di amor leal. Versíkulo 1 ta bisa: “Duna gradisimentu na SEÑOR, pasobra e ta bon, pasobra su miserikòrdia ta pa semper.” (Sal. 136:1) For  di versíkulo 1 pa 26, e salmo ei ta keda ripití e frase “pasobra su miserikòrdia ta pa semper.” Segun ku bo ta lesa e salmo ei, bo ta keda gewon babuká ora bo mira e diferente maneranan ku Yehova a mustra su amor leal sin stòp. E frase “pasobra su miserikòrdia ta pa semper,” ta sigurá nos ku Yehova su amor leal pa nos ta konstant. Bo no ta kontentu pa sa ku Yehova no ta lihé pa bira lomba pa su sirbidónan? Mas bien, ora e kuminsá stima un hende ku ta sirbié, e no ta bandon’é ma ta keda na su lado foral ora e ta pasa den tempunan difísil. Kon esei ta benefisiá nos? Sabiendo ku Yehova ta keda na bo lado ta duna bo e goso i forsa ku bo mester pa dil ku bo difikultatnan i sigui kana riba e kaminda pa bida.—Lesa Salmo 31:7.

11. Segun Salmo 86:5, kiko ta motivá Yehova pa pordoná?

¹¹ Dios su amor leal ta motiv’é pa pordoná. Ora ku Yehova mira ku un pekadó ta arepentí i ta bringa pa no kai den piká atrobe, amor leal ta motiv’é pa pordon’é. E salmista David a bisa tokante Yehova: “E no a trata ku nos segun nos pikánan, ni a paga nos segun nos inikidatnan.” (Sal. 103:8-11) Di su propio eksperensia David tabata sa kon malu i kibrá un hende por sintié si e tin un konsenshi ku ta molesti’é. Pero, el a bin komprondé tambe ku Yehova ta “kla pa pordoná.” Kiko ta motivá Yehova pa pordoná? Nos ta haña e kontesta na Salmo 86:5. (Les’é.) Sí, manera David mes a bisa den su orashon, Yehova ta pordoná pasobra e tin amor leal pa tur esnan ku ta pidié pordon.

12-13. Si ketu bai nos ta sinti nos mes malu i kibrá pa fayonan ku nos a hasi den pasado, kiko por yuda nos?

¹² Ora nos peka, ta bon pa nos tin duele di loke nos a hasi. Esei lo yuda nos bira di nos mal kaminda i dal paso pa korigí nos erornan. Pero, tin algun sirbidó di Dios ku ketu bai ta keda sinti nan malu pa e fayonan ku nan a kometé den pasado. Nan kurason ta keda kondená nan i ta konvensé nan ku ni maske kuantu  pordon nan a pidi i kuantu kambio nan a hasi, Yehova hamas lo pordoná nan. Si bo ta sinti asina, loke por yuda bo ta di tuma tempu pa komprondé kuantu gana Yehova tin pa mustra bo su amor leal.

¹³ Kon esei ta benefisiá nos? Apesar di nos imperfekshon, tòg nos por sirbi Yehova ku goso i ku un konsenshi limpi. Esei ta posibel, pasobra “e sanger di Hesus, su Yu, ta limpia nos di tur piká.” (1 Huan 1:7) Si bo ta desanimá debí na kualke fayo ku bo a hasi, kòrda ku Yehova di bèrdat ke pordoná bo si bo ta arepentí di kurason. Wak kon David a konektá amor leal ku pordon. El a skirbi: “Mes haltu ku e shelunan ta for di tera, mes grandi su miserikòrdia ta pa esnan ku ta tem’é. Mes leu ku pariba ta for di pabou, mes leu el a alehá nos transgreshonnan for di nos.” (Sal. 103:11, 12) Sí, Yehova ta dispuesto pa “pordoná abundantemente.”—Isa. 55:7.

14. Kon David a deskribí e manera ku Dios su amor leal ta protehá nos?

¹⁴ Dios su amor leal ta protehá nos den sentido spiritual. Den orashon David a bisa Yehova: “Bo ta mi lugá di skonde; bo ta warda mi di angustia; bo ta rondoná mi ku kantika di liberashon . . . esun ku ta konfia den SEÑOR, miserikòrdia lo rondon’é.” (Sal. 32:7, 10) Den pasado, e murayanan ku tabata rondoná un stat a protehá e siudadanonan. Asina tambe, Yehova su amor leal ta rondoná nos pa protehá nos for di peligernan ku por daña nos amistat kuné. Ademas, debí na Yehova su amor leal e ta hala nos serka dje.—Yer. 31:3.

15. Dikon por kompará Yehova su amor leal ku un refugio i un fòrti?

¹⁵ David a usa un otro komparashon pa mustra kon Dios ta protehá su sirbidónan. El a bisa: “Dios ta mi defensa, e Dios ku ta mustra miserikòrdia na mi.” Tambe el a bisa di Yehova: “Mi miserikòrdia i mi fòrti, mi toren fuerte i esun ku ta libra mi; mi eskudo i esun den ken mi ta tuma refugio.” (Sal. 59:17; 144:2) Dikon David a kompará Yehova su amor leal ku fòrti i refugio? Pasobra, sin importá unda nos ta biba, tanten ku nos ta sigui sirbi Yehova, lo e duna nos tur e protekshon ku nos tin mester di dje pa mantené nos amistat kuné. Salmo 91 ta duna nos e mesun siguransa ei. E salmista a bisa: “Lo mi bisa SEÑOR: ‘Mi refugio i mi fòrti.’” (Sal. 91:1-3, 9, 14) Moises a usa e mesun komparashon tokante un refugio. (Sal. 90:1) Pero poko promé ku el a muri, el a skirbi: “E Dios eterno ta un refugio.” Anto el a hala atenshon na un detaye bunita: “Abou e brasanan eterno ta.” Ku otro palabra, Yehova su brasanan eterno ta bou di nos. (Deu. 33:27) Pero, kiko nos ta siña tokante Yehova for di e echo ku Yehova su brasanan eterno ta bou di nos?

16. Ki dos bendishon nos tin? (Salmo 136:23)

¹⁶ Si nos tin Yehova komo nos refugio, nos lo sinti nos safe. Asina mes, sa sosodé ku tin dia nos por sinti nos down anto e sintimentu ei no ke kita. Kon Yehova lo yuda nos na e momentonan ei? (Lesa Salmo 136:23.) Lo e pone su brasanan bou di nos i pokopoko lo e yuda nos para bèk riba nos pia. (Sal. 28:9; 94:18) Kon esei ta benefisiá nos? Sabiendo ku Yehova semper t’ei pa nos, ta kòrda nos di dos bendishon importante. Di promé, sin importá unda nos ta biba, nos sa ku semper Yehova lo protehá nos. I di dos, nos Tata  ku ta den shelu ta stima nos masha tantu mes i ta interesá den nos.

17. Debí ku Dios tin amor leal pa nos, di kiko nos por tin sigur? (Salmo 33:18-22)

¹⁷ Manera nos por a mira te asina leu, ora nos haña nos den kualke prueba, nos por tin sigur ku Yehova lo yuda nos keda fiel na dje. (2 Kor. 4:7-9) Profeta Yeremías a bisa: “Di bèrdat, e miserikòrdia di SEÑOR no ta kaba nunka, pasobra su kompashon nunka no ta faya.” (Lam. 3:22) Nos por tin sigur ku Yehova nunka lo stòp di mustra nos amor leal pasobra e salmista mes a bisa: “E wowo di SEÑOR ta riba esnan ku ta tem’é, riba esnan ku ta spera riba su miserikòrdia.”—Lesa Salmo 33:18-22.

18-19. (a) Kiko nos tin ku keda kòrda? (b) Kiko nos lo studia den e siguiente artíkulo?

¹⁸ Pues, kiko nos ke keda kòrda? Promé ku nos a bira un sirbidó di Yehova, e tabata stima nos meskos ku tur hende. Pero ora ku nos a kuminsá sirbié, nos a kuminsá benefisiá di su amor leal. Yehova su amor leal ta motiv’é pa, den un sentido, brasa nos i protehá nos. Semper lo e tene nos serka di dje i lo kumpli ku su propósito pa ku nos. E ke pa semper nos ta su amigu! (Sal. 46:1, 2, 7) P’esei, sin importá ki prueba nos haña nos kuné, Yehova semper lo duna nos e forsa ku nos mester pa por keda fiel na dje.

¹⁹ Nos a mira kon Yehova ta mustra amor leal na su sirbidónan. Di otro banda, e ta ferwagt pa nos mustra amor leal na otro. Kon nos por hasi esei? E siguiente artíkulo lo kontestá esei.