1. Kiko ke men mantené nos sano huisio? (2 Timoteo 4:5)

 ORA nos haña nos ku situashonnan difísil, nos lealtat na Yehova i su organisashon por ser poní na prueba. Kiko nos tin ku hasi ora nos haña nos ku situashonnan asina? Nos tin ku mantené nos sano huisio, keda lantá i para firme den fe. (Lesa 2 Timoteo 4:5.) Pero, kiko ke men mantené sano huisio? Esei ke men keda kalmu, pone bo pensamentunan na lugá i purba di mira kosnan manera Yehova ta mira nan. Ora nos hasi esei, nos emoshonnan lo no nubla nos pensamentunan.

2. Kiko nos ta bai trata den e artíkulo akí?

² Den e artíkulo anterior, nos a trata tres difikultat ku por surgi pafó di e kongregashon. Den e artíkulo akí, nos ta bai trata tres situashon ku por surgi den e kongregashon ku por pone nos lealtat na Yehova na prueba. Nan ta (1) ora nos sinti ku un ruman a trata nos malu, (2) ora nos haña korekshon i (3) ora ta difísil pa adaptá na kambio den e organisashon. Ora nos haña nos ku e tipo di difikultatnan ei, kiko nos tin ku hasi pa mantené nos sano huisio i no bandoná Yehova ni su organisashon?

3. Kiko por sosodé si nos sinti ku un ruman a trata nos malu?

³ Bo a yega di sinti ku un ruman, kisas asta un ansiano, a trata bo malu? Probablemente su intenshon no tabata pa hùrt bo. (Rom. 3:23; Sant. 3:2) Pero, esei no ta kita ku bo a sinti hopi doló. Probablemente bo no por a drumi, i  e kos a keda pasa den bo mente. Kisas b’a pensa: ‘Kon un ruman por a hasi un kos asina? Ta Yehova su organisashon esaki ta?’ Esei ta nèt loke Satanas ke pa nos pensa. (2 Kor. 2:11) Pensamentunan negativo asina por pone nos stòp di sirbi Yehova i bandoná su organisashon. Kiko nos tin ku hasi pa mantené nos sano huisio i evitá pensamentunan negativo si nos sinti ku un ruman a trata nos malu?  

4. Kon Yosef a mantené su sano huisio ora ku otro hende a trat’é malu, i kiko nos ta siña for di dje? (Génesis 50:19-21)

⁴ No bira amargá. Tempu ku Yosef tabata hóben, su rumannan mas grandi a trat’é masha malu mes. Nan tabata odi’é, i algun di nan asta kier a mat’é. (Gén. 37:4, 18-22) Al final, nan a bend’é komo katibu i, debí na esei, el a hañ’é ku hopi difikultat pa 13 aña largu. Kisas lo el a puntra su mes: ‘Di bèrdat Yehova stima mi? Dikon el a bandoná mi nèt awor ku mi tin mas mester di dje?’ Pero, asta si el a pensa asina, e no a bira amargá. Al kontrario, el a keda kalmu i asina ei mantené su sano huisio. I mas despues, ora el a haña chèns pa tuma represaya kontra su rumannan, e no a hasié. Mas bien, el a mustra nan ku e ta stima nan i ku el a pordoná nan. (Gén. 45:4, 5) E por a hasi esei pasobra e no a focus riba su problemanan, ma a keda pensa riba loke Yehova tabata ke. (Lesa Génesis 50:19-21.) Kiko nos ta siña for di esei? Si un ruman trata bo malu, no rabia ku Yehova ni pensa ku el a bandoná bo. Mas bien, meditá riba tur loke Yehova ta hasi pa yuda bo wanta e prueba. Ademas, pordoná e ruman i kòrda ku amor ta tapa un multitut di piká.—1 Ped. 4:8.

5. Kon Miqueas a logra mantené su sano huisio ora el a sinti ku nan a trat’é malu?

⁵ Miqueas, un ansiano na Suramérika, a yega di sinti ku algun ansiano a trat’é brutu. b El a bisa: “Nunka di mi bida m’a sinti mi asina malu. E kos ei a duna mi masha tantu strès mes. M’a keda agitá, mi no por a drumi i mi tabata yora sin miserikòrdia pasobra mi no tabata sa mas kiko pa hasi.” Apesar di esei, Miqueas a mantené su sano huisio i a lucha pa dominá su emoshonnan. Hopi biaha el a pidi Yehova pa dun’é spiritu santu i forsa pa wanta e situashon. El a buska informashon den nos publikashonnan ku por a yud’é. Kiko nos ta siña? Si bo ta sinti ku un ruman a trata bo malu, keda kalmu i purba di dominá kualke sintimentu negativo ku bo por tin. Bo no sa den ki situashon e ruman ta ku a pon’é papia òf aktua asina. P’esei, papia ku Yehova i pidié yuda bo komprondé dikon e ruman a trata bo asina. Ora bo hasi esei, lo ta mas fásil pa bo pordoná e ruman i mira ku no tabata su intenshon pa trata bo asina. (Pro. 19:11) Kòrda ku Yehova sa kiko bo ta pasando aden i lo e duna bo e forsa pa wanta.—2 Kró. 16:9; Ekl. 5:8.

6. Dikon ta importante pa nos mira Yehova su korekshon komo muestra di su amor? (Hebreonan 12:5, 6, 11)

⁶ Ora Yehova korigí nos, nos por sinti nos hopi kibrá. Pero si nos keda focus solamente riba e doló ku nos ta sinti, nos por kuminsá pensa ku e korekshon tabata muchu strèn. Anto esei ta pone ku nos ta pèrdè for di bista algu masha bunita: Yehova ta korigí nos pasobra  e ta stima nos. (Lesa Hebreonan 12:5, 6, 11.) Ademas, si nos laga sintimentunan negativo dominá nos, nos mes ta habri kaminda pa Satanas ataká nos. E ke pa nos rechasá e korekshon i, pió ainda, pa nos alehá for di Yehova i di e kongregashon. Kon bo por mantené bo sano huisio si Yehova a korigí bo?

7. (a) Manera nos ta mira riba e plachi, ki trabou Yehova a duna Pedro despues ku el a aseptá korekshon? (b) Kiko nos ta siña for di Pedro?

⁷ Aseptá korekshon i hasi kambio nesesario. Mas ku un biaha Hesus a korigí Pedro dilanti di e otro apòstelnan. (Mar. 8:33; Luk. 22:31-34) Pedro lo mester a sinti hopi bèrgwensa! Pero apesar di tur esei, el a keda leal na Hesus. El a aseptá su korekshon i a siña for di su foutnan. Debí na esei, Yehova a rekompensá Pedro pa su lealtat i a dun’é asignashon importante den kongregashon. (Huan 21:15-17; Echo. 10:24-33; 1 Ped. 1:1) Kiko nos ta siña for di Pedro? Ora nos no focus riba e bèrgwensa ku nos ta sinti ma aseptá korekshon i hasi e kambionan nesesario, tantu nos komo e otro rumannan ta benefisiá. Di e manera ei, nos lo ta mas útil pa Yehova i pa nos rumannan.

8-9. Kon Bernardo a sinti ora el a haña korekshon, pero kiko a yud’é kambia su manera di pensa?

⁸ Bernardo, un ruman na Mozambique, a pèrdè su privilegio di ansiano. Kon el a sintié? El a bisa: “Mi tabata hopi rabiá pasó mi no tabata eens ku e korekshon.” E tabata wòri kiko e rumannan lo a pensa di dje. El a atmití: “Un par di luna a pasa promé ku mi por a mira e situashon manera Yehova ta mir’é i konfia Yehova i su organisashon atrobe.”

⁹ Kiko a yuda Bernardo kambia su manera di pensa? El a splika: “Tempu mi tabata ansiano, mi tabata usa Hebreonan 12:7 pa yuda e rumannan mira e korekshon ku ta bini di Yehova na un manera positivo. Pero, awor m’a puntra mi mes: ‘Warda un ratu, pa ken eigenlijk e teksto akí ta?’ Pa tur Yehova su sirbidónan, inkluso ami.” Ma e no a keda te ei. El a hasi mas pa fortalesé su konfiansa den Yehova i Su organisashon. El a tuma mas tempu pa lesa su Beibel i pa pensa riba loke el a lesa. Aunke ku ainda e tabata wòri  tokante kiko su rumannan ta pensa di dje, tòg e tabata sali den sirbishi ku nan i duna komentario na reunion. Ku tempu, Bernardo a bira ansiano atrobe. Si bo a pasa den un situashon similar, purba di no focus riba e bèrgwensa ku bo ta sinti. Aseptá korekshon i hasi e kambionan nesesario. c (Pro. 8:33; 22:4) Bo por tin sigur ku Yehova lo rekompensá bo pa bo lealtat na dje i na su organisashon.

10. Ki kambio por a pone lealtat di algun israelita na prueba?

¹⁰ Kambio den e organisashon por pone nos lealtat na prueba. Si nos no paga tinu, nos por asta laga e kosnan ei separá nos for di Yehova. Por ehèmpel, Lei di Moises a trese kambio pa algun israelita. Promé, kabesnan di famia tabata hasi e kosnan ku e saserdotenan lo a hasi. Nan tabata traha altar i hasi sakrifisio na Yehova pa nan famia. (Gén. 8:20, 21; 12:7; 26:25; 35:1, 6, 7; Yòb 1:5) Pero ora Yehova a duna e Lei, nan a pèrdè e asignashon ei. Yehova a nombra famia di Aron komo saserdote pa hasi sakrifisio. For di e momento ku e Lei a drenta na vigor, si un kabes di famia ku no tabata desendiente di Aron kuminsá hasi e kosnan ku un saserdote mester hasi, esei por a kost’é su bida. d (Lev. 17:3-6, 8, 9) Akaso ta e kambio ei a pone ku Koré, Datan, Abiram i e 250 kabesantenan di e pueblo a rebeldiá kontra Moises i Aron? (Num. 16:1-3) Nos no sa sigur, pero loke sí nos sa ta ku Koré i e hòmbernan ku tabata huntu kuné no a keda leal na Yehova. Kiko bo por hasi si kambionan den e organisashon ta pone bo lealtat na prueba?

11. Kiko nos ta siña for di algun di e koatitanan?

¹¹ Kooperá ku kualke kambio den e organisashon. Durante e 40 añanan ku e israelitanan tabata den desierto, e koatitanan tabatin un privilegio masha spesial. Kada bes ku e kampamentu mester a kambia di lugá, algun koatita mester a karga e arka di pakto dilanti di e pueblo. (Num. 3:29, 31; 10:33; Hos. 3:2-4) Esei tabata un bunita privilegio! Pero ora e israelitanan a drenta e Tera Primintí, kos a kambia. Kasi nan no mester a move e arka bai niun kaminda mas. Anto pa tempu ku Sálomon a bira rei, algun di e koatitanan a bira kantante, pòrtir i otronan tabata enkargá ku e depósitonan. (1 Kró. 6:31-33; 26:1, 24) Niun kaminda den Beibel nos no ta lesa ku e koatitanan a reklamá òf eksigí un puesto ku tabata ekivalente na loke nan tabata hasi ántes. Kiko nos ta siña for di nan? Kooperá ku henter nos kurason ora kambionan tuma lugá den Yehova su organisashon, asta si esakinan ta afektá nos asignashon. Disfrutá di kualke kos ku Yehova duna bo pa hasi. Kòrda ku no ta bo asignashon ta hasi bo presioso den bista di Yehova. Pa Yehova, obedensia ta mas importante ku kualke asignashon.—1 Sám. 15:22.

12. Kon Zaina a sinti ora el a haña kambio di asignashon?

¹² Zaina, un ruman na Medio Oriente, a haña kambio di un asignashon ku e tabata  stima mashá. Despues di mas ku 23 aña na Bètel, el a ser asigná komo pionero spesial. El a bisa: “E kambio ei a kai manera un baño di awa friu. M’a sinti mi hopi malu; m’a keda puntra mi mes: ‘Ta kiko m’a hasi robes?’” I ta tristu pa bisa ku algun ruman a basha salu riba su herida ora nan a bis’é: “Si bo tabata hasi bo trabou manera mester ta, nan lo a laga bo keda.” Pa un tempu, Zaina tabata asina tristu ku tur anochi e tabata yora. Pero el a bisa: “Niun ora so mi no a permití mi mes pensa ku Yehova no ta stima mi ni mi no a duda den su organisashon.” Kon Zaina por a mantené su sano huisio?

13. Kon Zaina a logra dominá su sintimentunan negativo?

¹³ Zaina a logra dominá su sintimentunan negativo. Kon el a hasi esei? El a buska den nos publikashonnan i a lesa artíkulonan ku a trata e situashon difísil ku e tabata aden. Por ehèmpel, un artíkulo ku a yud’é hopi tabata esun titulá: “Bo Por Enfrentá Desanimashon ku Éksito” den E Toren di Vigilansia di 1 di febrüari 2001. E artíkulo ei a splika ku probablemente e eskritor bíbliko Marko a lucha ku sintimentunan paresido ora el a haña un kambio di asignashon. Zaina a bisa: “Marko su ehèmpel a yuda kalma mi doló.” Un otro kos ku a yuda Zaina ta ku el a keda pasa tempu ku su amigunan. E no a isolá su mes ni a sinti duele di su mes. El a komprondé ku ta Yehova su spiritu santu ta guia e rumannan ku ta tuma desishon den e organisashon i ku e rumannan ei ta stim’é masha hopi mes. Pero, el a komprondé tambe ku e kos di mas importante pa Yehova su organisashon ta pa kumpli ku Yehova su trabou.

14. Ki kambionan tabata difísil pa Vlado aseptá, i kiko a yud’é?

¹⁴ Vlado, un ansiano di 73 aña na Slovenia, tabatin difikultat pa aseptá ku su kongregashon mester a djòin un otro kongregashon anto ku a sera e Salòn di Reino kaminda e tabata bai. El a bisa: “Mi no por a kaba di komprondé pakiko nan a sera un Salòn asina bunita. E kos ei a duel mi masha tantu mes pasobra ta poko tempu ei nos a kaba di drecha e Salòn.  Mi ta karpinté, i mi a yuda traha algun di e muebelnan den Salòn. Anto tur e kambionan ku mester a hasi pa uni e kongregashonnan no tabata fásil pa nos ku ta di edat.” Kiko a yuda Vlado kooperá ku e kambionan ei? El a splika: “Si bo adaptá na e kambionan ku Yehova su organisashon ta bini kuné, semper lo bai bo bon. Tur e kambionan chikitu ei ta prepará nos pa e kambionan mas grandi ku lo bini den futuro.” Bo a haña un kambio di asignashon? Bo kongregashon a djòin un otro kongregashon? Kisas no ta fásil pa trata ku e kambionan ei. Pero, bo por tin sigur ku Yehova ta komprondé kon bo ta sinti. Ora bo kooperá ku kambio i keda leal na Yehova i su organisashon, lo bo ser bendishoná sigur.—Sal. 18:25.

15. Kon nos por mantené nos sano huisio ora nos ta trata ku situashonnan difísil den e kongregashon?

¹⁵ Segun ku nos ta yega mas serka di e fin di e mundu malbado akí, nos por ferwagt mas situashonnan difísil den e kongregashon ku por pone nos lealtat na prueba. P’esei, nos mester hasi esfuerso pa mantené nos sano huisio. Si bo sinti ku un ruman a trata bo malu, no bira amargá. Si bo a haña korekshon di Yehova, wak mas aleu ku e bèrgwensa ku bo ta sinti. Aseptá e korekshon i hasi e kambionan ku bo mester hasi. Anto ora Yehova su organisashon bin ku kambio ku ta afektá bo personalmente, aseptá nan di kurason i obedesé e instrukshonnan.

16. Kiko bo tin ku hasi pa bo por mantené bo konfiansa den Yehova i su organisashon?

¹⁶ Bo por mantené bo konfiansa den Yehova i su organisashon ora bo lealtat ser poní na prueba. Pero, pa bo por hasi esei bo tin ku mantené bo sano huisio. Esei ta nifiká ku bo tin ku keda kalmu, pone bo pensamentunan na lugá i purba di mira kosnan manera Yehova ta mira nan. Pone meta pa studia e personahenan bíbliko ku a logra trata ku problemanan manera esnan di bo i meditá riba loke nan a hasi. Pidi Yehova yuda bo. I nunka isolá bo mes for di e kongregashon. Anto e ora ei ni maske kiko pasa, Satanas lo no por separá bo for di Yehova ni di Su organisashon.—Sant. 4:7.