1. Dikon nos tin sigur ku Yehova ke pa nos hala serka dje?

 YEHOVA ta pidi nos pa nos hala serka dje. (Sant. 4:8) E ke ta nos Dios, nos Tata i nos Amigu. Ora nos hasi orashon e ta kontestá nos, i ora nos ta den problema e t’ei pa nos. Ademas, e ta usa su organisashon pa siña nos i protehá nos. Pero, kiko nos tin ku hasi pa hala serka Yehova?

2. Kon nos por hala serka Yehova?

² Pa nos hala serka Yehova, nos tin ku hasi orashon na dje, lesa su Palabra i meditá riba esei. Tur esei lo yuda ku nos lo stima i atmirá Yehova asta mas. Nos lo sinti nos motivá pa dun’é loke e meresé: obedensia i alabansa. (Rev. 4:11) Mas nos siña konosé Yehova, mas konfiansa nos lo haña den dje i den e organisashon ku e ta usa pa yuda nos.

3. (a) Kon Diabel ta purba di separá nos for di Yehova? (b) Kiko lo yuda nos pa nunka bandoná nos Dios i su organisashon? (Salmo 31:13, 14)

³ Diabel ta purba di separá nos for di Yehova, foral ora nos ta pasando den situashon difísil. Kon e ta hasi esei? Tiki-tiki e ta purba di kibra nos konfiansa den Yehova i den su organisashon. Pero, nos no mester tin miedu, pasobra tanten ku nos fe ta fuerte i nos konfiansa den Yehova ta firme, nunka nos lo no bandoná nos Dios ni su organisashon.—Lesa Salmo 31:13, 14.

4. Kiko nos lo trata den e artíkulo akí?

⁴ Den e artíkulo akí nos lo trata tres situashon difísil ku ta surgi pafó di e kongregashon. Kada un di nan por kibra nos konfiansa den Yehova i den su organisashon.  Kon e kosnan ei por separá nos for di Yehova, i kiko nos tin ku hasi pa protehá nos mes?

5. Kon difikultat por kibra nos konfiansa den Yehova i den su organisashon?

⁵ Tin biaha nos por haña nos ku situashonnan difísil. Por ehèmpel, nos famia por oponé nos òf nos por pèrdè trabou. Kon e tipo di situashonnan ei por kibra nos konfiansa den Yehova su organisashon i separá nos for di Yehova? Ora un situashon difísil dura largu, nos por bira desesperá i deprimí. Satanas ta probechá di e situashonnan ei pa laga nos kere ku Yehova no stima nos. Diabel ke pa nos pensa ku ta pa falta di Yehova i Su organisashon nos ta pasa den e problemanan ei. Algun israelita na Egipto tambe a pensa asina. Na promé instante, nan tabata konvensí ku Yehova a skohe Moises i Aron pa libra nan for di sklabitut. (Éks. 4:29-31) Pero ora Fárao a hasi nan bida mas difísil, nan a kulpa Moises i Aron pa nan problemanan. Nan a bisa: “Boso a hasi nos un abominashon den bista di Fárao i den bista di su sirbidónan dor di pone un spada den nan man pa mata nos.” (Éks. 5:19-21) Ta tristu ku nan a tira falta riba Dios su fiel sirbidónan. Si bo tin hopi tempu ta pasa den un difikultat, kiko bo por hasi pa evitá di pèrdè konfiansa den Yehova i den su organisashon?

6. Kiko nos ta siña for di e ehèmpel di Profeta Habakuk? (Habakuk 3:17-19)

⁶ Bisa Yehova tur loke tin den bo kurason i konfia ku lo e yuda bo. Profeta Habakuk a hañ’é ta wanta hopi difikultat. Ta parse ku dado momento, el a kere ku Yehova no tabata stim’é. P’esei, el a bisa Yehova tur loke e tabatin den su kurason. El a bis’é: “Te ki tempu, o SEÑOR, lo mi sklama pa yudansa, i abo no ta tende? . . . Pakiko bo ta hasi mi mira inikidat, i ta hasi mi mira maldat?” (Hab. 1:2, 3) Yehova a kontestá e orashon di su sirbidó fiel. (Hab. 2:2, 3) Ora Habakuk a meditá riba e manera ku Yehova a salba su pueblo den pasado, el a haña su goso bèk. El a bira konvensí ku Yehova tabata stim’é i ku lo e yud’é wanta kualke prueba. (Lesa Habakuk 3:17-19.) Kiko ta e lès? Ora bo ta pasa den difikultat, hasi orashon na Yehova i kont’é presis kon bo ta sinti bo. Pidié yuda bo. Bo por konfia ku lo e duna bo e forsa ku bo tin mester pa wanta e difikultatnan. I ora bo mira kon e ta yuda bo, bo fe den dje lo bira asta mas fuerte.

7. Kiko Shirley su ruman hòmber kier a logra, pero kiko Shirley a hasi?

⁷ No baha man na aktividatnan spiritual. Esei a yuda Shirley, un ruman di Papoea-Nieuw-Guinea, ora el a hañ’é ku difikultat. b Su famia tabata pober i tin biaha nan mester a traha duru pa nan tin sufisiente kuminda. Un ruman hòmber di dje a purba di kibra su konfiansa den Yehova. El a bisa Shirley: “Tur biaha bo ta bisa ku Dios su spiritu santu ta yuda bo, pero unda bo yudansa a keda? Te ainda boso ta pober. Anto bo ta blo gasta bo tempu ta prediká.” Shirley a atmití: “M’a puntra mi mes si di bèrdat Dios ta interesá den nos òf nò. P’esei, mesora m’a hasi orashon na Yehova i  a kont’é delaster un kos ku mi tabatin den mi kurason. M’a sigui lesa Beibel i nos publikashonnan, i mi no a stòp di prediká ni di bai reunion.” No a tarda mashá ku Shirley a realisá ku Yehova tabata kuida su famia. Nan no tabata pasa hamber i nan tabata felis. El a bisa: “M’a mira kon Yehova a kontestá mi orashonnan.” (1 Tim. 6:6-8) Si bo sigui ku bo aktividatnan spiritual, lo bo no permití difikultat ni duda separá bo for di Yehova.

8. Kiko por pasa ku rumannan ku tin responsabilidat den Yehova su organisashon?

⁸ Nos enemigunan ta usa medionan di komunikashon i retnan sosial pa plama mentira i informashon falsu tokante rumannan ku tin responsabilidat den Yehova su organisashon. (Sal. 31:13) Algun ruman a ser arestá i a ser akusá di ta kriminal. Den promé siglo, e kristiannan a pasa den un situashon similar ora Apòstel Pablo a ser akusá falsamente i a ser arestá. Kon e kristiannan a reakshoná?

9. Kiko algun kristian a hasi ora Pablo tabata prezu?

⁹ Ora Pablo tabata prezu na Roma, algun kristian no kier a yud’é mas. (2 Tim. 1:8, 15) Dikon? Kisas ta pasó nan a sinti bèrgwensa ku hende tabata mira Pablo komo un kriminal? (2 Tim. 2:8, 9) Òf ta pasó nan mes tabatin miedu ku nan tambe lo a ser persiguí? Sea kual sea e motibu, imaginá kon Pablo lo a sintié. El a pasa den hopi difikultat i asta a riska su bida pa nan. (Echo. 20:18-21; 2 Kor. 1:8) Nunka bira manera e kristiannan ku a bandoná Pablo ora ku mas e tabatin mester di yudansa. Pero, kiko nos tin ku keda kòrda ora rumannan ku tin responsabilidat ser persiguí?

10. Kiko nos tin ku kòrda ora ku rumannan ku tin responsabilidat ser persiguí, i dikon?

¹⁰ Kòrda dikon nos ta ser persiguí i  ken ta tras di esei. Dos Timoteo 3:12 ta bisa: “Tur hende ku ta deseá di biba ku deboshon na Dios komo disipel di Kristu Hesus tambe lo ser persiguí.” Pues, no mester sorprendé nos ku Satanas ta mek riba rumannan ku tin responsabilidat. E no ke pa nan keda fiel na Yehova i ke pa nos haña miedu.—1 Ped. 5:8.

11. Kiko nos ta siña for di loke Onesíforo a hasi? (2 Timoteo 1:16-18)

¹¹ Sigui yuda bo rumannan fielmente. (Lesa 2 Timoteo 1:16-18.) Onesíforo tabata un kristian den promé siglo ku sí a reakshoná diferente ora el a tende ku Pablo tabata prezu. “E no tabatin bèrgwensa di [Pablo su] kadenanan di prizòn.” El a buska pa sa unda Pablo tabata i ora el a hañ’é, el a hasi esfuerso pa yud’é. Onesíforo a hasi tur e kosnan ei riskando su mes bida. Kiko nos ta siña for di esei? Nunka nos no mester laga hende spanta nos ni stroba nos di yuda nos rumannan ku ta ser persiguí. Mas bien, laga nos hasi tur loke nos por pa yuda nan. (Pro. 17:17) Nan mester di nos amor i apoyo.

12. Kiko nos ta siña di nos rumannan na Rusia?

¹² Pensa riba loke e rumannan na Rusia ta hasi ora nan rumannan stimá kai será. Ora ku kaso di algun di nan bai dilanti, hopi ruman ta bai korte pa demostrá nan apoyo. Kiko esei ta siña nos? No haña miedu ora rumannan ku responsabilidat ser kalumniá, arestá òf persiguí. Hasi orashon pa nan, kuida nan famia i buska otro manera práktiko pa demostrá ku bo ta apoyá nan.—Echo. 12:5; 2 Kor. 1:10, 11.

13. Kon chèrchi por pone nos kuminsá duda den Yehova i den su organisashon?

¹³ Tin biaha famia ku no ta Testigu, kolega di trabou òf kompañero di skol por hasi chèrchi di nos pasobra nos ta prediká òf pasobra nos ta biba segun Yehova su normanan haltu. (1 Ped. 4:4) Kisas nan ta bisa: “Bo ta un bon hende, pero e religion di bo ei ta muchu strèn i hopi ouderwets.” Algun di nan por asta kritiká e manera ku nos ta trata hende ekspulsá, bisando: “Boso ta kana prediká tokante amor, pero wak kon boso ta trata boso mes hendenan.” Tipo di komentarionan asina por laga bo kuminsá duda i pensa: ‘Akaso Yehova ta eksigí demasiado di mi? Su organisashon tin muchu restrikshon?’ Si bo ta den un situashon asina, kon bo por keda serka Yehova i su organisashon?

14. Kiko nos tin ku hasi ora hende hasi chèrchi di nos pasobra nos ta biba segun Yehova su normanan? (Salmo 119:50-52)

¹⁴ Sea determiná pa sigui hasi loke Yehova ta bisa ku ta korekto. Yòb tabata un hende ku semper a biba segun Yehova su normanan, aunke ku otro hende a hasi chèrchi di dje. Un di Yòb su supuesto amigunan a asta purba di konvens’é ku Dios no ta wòri si Yòb sigui Su normanan òf nò. (Yòb 4:17, 18; 22:3) Pero, Yòb no a bai tras di e mentiranan ei. E tabata sa ku Yehova su normanan semper ta korekto i tabata determiná pa biba segun e normanan ei. E no a permití nada ni niun hende strob’é di keda fiel na Yehova. (Yòb 27:5, 6) Kiko esei ta siña nos? No laga chèrchi pone bo kuminsá duda den Yehova su normanan.  Pensa riba tur loke a pasa den bo bida. Di propio eksperensia, bo sa ku Yehova su normanan ta korekto i ta pa bo mes bon. Pues, sea determiná pa semper apoyá e organisashon ku ta para pa e normanan ei. E ora ei, ni maske ken hasi chèrchi di bo, hamas nan lo logra separá bo for di Yehova.​—Lesa Salmo 119:50-52.

15. Dikon hende tabata hasi chèrchi di Brizit?

¹⁵ Brizit, un ruman muhé na India, mester a soportá chèrchi di tantu su famia komo esnan di su esposo. Poko tempu despues ku el a batisá na 1997, su esposo, ku no ta un Testigu, a pèrdè trabou. Esei a pone ku Brizit su esposo a disidí pa nan tur bai biba serka su mayornan ku tabata biba na un otro stat. Pero Brizit su difikultatnan no a kaba einan. Debí ku su esposo no tabatin trabou, Brizit a hañ’é ta traha fultaim pa perkurá pa e famia. Fuera di esei, e kongregashon di mas serka tabata keda 350 kilometer leu. Lamentablemente, debí ku Brizit tabata un Testigu, famia di su esposo tabata kontra dje. E situashon a bira asina difísil ku Brizit i su famia a haña nan ta muda atrobe. Un poko despues, di un dia pa otro, su esposo a muri. I despues, su yu muhé di 12 aña a muri di kanser. I pa hasi e kos pió, Brizit su famianan a bis’é ku ta pa su falta tur e kosnan ei a pasa i ku si e no tabata un Testigu, niun di e kosnan ei lo no a sosodé. Apesar di tur esei, Brizit a keda konfia den Yehova i a keda serka di Su organisashon.

16. Ki bendishonnan Brizit a haña debí ku el a keda serka di Yehova i di Su organisashon?

¹⁶ Komo ku Brizit tabata biba leu for di su kongregashon, e superintendente di sirkuito a anim’é pa prediká den su mes área i pa tene reunion na su kas. Na promé instante, el a sinti ku tur esei tabata muchu p’e, pero tòg el a hasié. El a prediká,  tene reunionnan na su kas i apartá tempu pa hasi adorashon di famia ku su yu muhénan. Ku ki resultado? El a haña hopi estudio i vários di nan a batisá. Na 2005, el a kuminsá traha pionero. Debí ku Brizit a konfia den Yehova i a keda leal na Yehova su organisashon, el a haña hopi bendishon. Su yu muhénan ta sirbi Yehova fielmente i tin dos kongregashon den su área. Brizit ta konvensí ku ta Yehova a dun’é e forsa pa wanta tur e chèrchinan i trata ku tur e difikultatnan ku el a hañ’é kuné.

17. Kiko mester ta nos determinashon?

¹⁷ Satanas lo keda masha kontentu si e logra separá nos for di Yehova. Manera nos a mira kaba, e ta usa difikultatnan den bida pa pone nos pensa ku Yehova a bandoná nos i ku si nos keda leal na Yehova su organisashon nos bida lo bira hopi mas difísil. Satanas ke pa nos haña miedu ora hende kalumniá, persiguí òf sera e rumannan ku tin responsabilidat. Anto e ta usa chèrchi pa purba di kibra nos konfiansa den Yehova su normanan i den Su organisashon. Pero, nos konosé su táktikanan malbado i nos no ta lag’é gaña nos. (2 Kor. 2:11) Nos ta determiná pa rechasá Satanas su mentiranan i pa keda leal na Yehova i na Su organisashon. Kòrda, Yehova nunka lo no bandoná bo. (Sal. 28:7) Pues, no laga nada separá bo for di Yehova!—Rom. 8:35-39.

18. Kiko nos lo trata den e siguiente artíkulo?

¹⁸ Den e artíkulo akí, nos a mira algun situashon difísil pafó di e kongregashon. Pero, situashonnan difísil den e kongregashon tambe por pone nos konfiansa den Yehova i den su organisashon na prueba. Kon nos por dil ku nan? Nos lo trata esei den e siguiente artíkulo.