1. Kiko nos sa, i di kiko nos por tin sigur?

 NOS sa ku algun hende ta kontra nos trabou di prediká. I chèns ta grandi ku, den futuro, e oposishon ei lo oumentá. (Dan. 11:44; 2 Tim. 3:12; Rev. 16:21) Pero, nos por tin sigur ku Yehova lo duna nos e yudansa ku nos tin mester. Semper el a yuda su sirbidónan kumpli ku nan asignashon, asta ora esei tabata hopi difísil. Pa komprobá ku esei ta e kaso, laga nos wak algun kos ku a pasa den bida di Profeta Ezekiel, kende a prediká na e hudiunan den eksilio na Babilonia.

2. Kon Yehova a deskribí e hendenan den Ezekiel su teritorio, i kiko nos ta bai trata den e artíkulo akí? (Ezekiel 2:3-6)

² Ki sorto di hende Ezekiel mester a prediká na dje? Yehova a deskribí nan komo “kabesura,” “sobèrbè” i “rebelde.” El a kompará nan ku bringamosa i skòrpion pasobra nan tabata peligroso i a hasi daño. No ta pòrnada anto ku bes tras bes Yehova a bisa Ezekiel pa “no tene miedu.” (Lesa Ezekiel 2:3-6.) Ezekiel por a kumpli ku su trabou di prediká pasobra (1) ta Yehova a mand’é, (2) el a haña forsa di spiritu santu i (3) Dios su palabranan a fortalesé su fe. Kon e tres kosnan akí a yuda Ezekiel, i kon nan por yuda nos awe?

3. Kua palabranan lo a animá Ezekiel, i kon Yehova a lag’é komprondé ku lo e yud’é?

³ Yehova a bisa Ezekiel: ‘Ta mi ta manda bo.’ (Eze. 2:3, 4) E palabranan ei sigur lo a animá Ezekiel. Dikon? Pasobra  sin duda el a kòrda ku Yehova a usa palabranan paresido ora El a skohe Moises i Isaías komo profeta. (Éks. 3:10; Isa. 6:8) Ezekiel tabata sa tambe kon Yehova a yuda e dos profetanan ei kumpli ku asignashonnan difísil. P’esei, ora ku Yehova a bisa Ezekiel dos biaha: “Mi ta manda bo,” e tabatin sigur ku Yehova lo a yud’é. Anto vários biaha el a skirbi: “E palabra di SEÑOR a yega na mi.” (Eze. 3:16) Ezekiel tabata konvensí ku ta Yehova a mand’é. Ademas, komo yu di saserdote, probablemente su tata lo a siñ’é kon Yehova a yuda Su profetanan den pasado. Por ehèmpel, Yehova a bisa tantu Isak, Yakòb komo Yeremías: “Mi ta ku bo.”—Gén. 26:24; 28:15; Yer. 1:8.

4. Kua palabranan sigur lo a konsolá i duna Ezekiel e forsa ku e tabatin mester?

⁴ Kon mayoria di e israelitanan lo a reakshoná ora Ezekiel a prediká na nan? Yehova a bisa: “E kas di Israel lo no ta dispuesto pa skucha na bo, pasobra nan no ta dispuesto pa skucha na mi.” (Eze. 3:7) Dor di rechasá Ezekiel, e pueblo a rechasá Yehova. E palabranan ei a laga Ezekiel komprondé ku e reakshon di e hendenan no a nifiká ku e no a hasi su trabou di profeta bon. Yehova tambe a sigurá Ezekiel ku ora e huisionan ku el a proklamá kumpli, e hendenan “lo sa ku tabatin un profeta meimei di nan.” (Eze. 2:5; 33:33) E palabranan ei sigur a konsolá i duna Ezekiel e forsa ku e tabatin mester pa prediká.

5. Segun Isaías 44:8, kiko ta duna nos kurashi?

⁵ Nos tambe ta haña e kurashi ku nos mester pa prediká pasó nos sa ku ta Yehova ta manda nos. E ta duna nos e gran onor pa ta su “testigunan.” (Isa.  43:10) Meskos ku Yehova a bisa Ezekiel pa “no tene miedu,” E ta bisa nos pa “no tembla.” Dikon nos no mester tin miedu di e hendenan ku ta oponé nos? Pasobra meskos ku Ezekiel, ta Yehova ta manda nos i nos por konta ku Su yudansa.—Lesa Isaías 44:8.

6. (a) Kon Yehova ta sigurá nos ku lo e yuda nos? (b) Kiko ta duna nos forsa i kurashi?

⁶ Yehova ta primintí ku lo e yuda nos. Por ehèmpel, nèt promé ku el a bisa ku “boso ta mi testigunan,” el a primintí: “Ora bo ta pasa dor di e awanan lo mi ta ku bo, i dor di e riunan, nan lo no lastra bo bai ku bo. Ora bo ta kana dor di kandela, esaki lo no flama bo, ni e vlam lo no kima bo.” (Isa. 43:2) Den sirbishi tin biaha, nos por haña nos ku opstákulonan ku ta manera riu i pruebanan ku ta manera kandela. Pero ku Yehova su yudansa nos ta sigui prediká. (Isa. 41:13) Meskos ku den tempu di Ezekiel, mayoria di hende awe ta rechasá nos mensahe. Pero, nos sa ku nan reakshon no ta nifiká ku nos no a hasi nos trabou di prediká bon. E echo ku nos sa ku Yehova ta kontentu ora nos sigui prediká su mensahe fielmente, ta duna nos e forsa i kurashi nesesario pa sigui. Apòstel Pablo a bisa: “Kada un lo risibí su rekompensa di akuerdo ku su trabou.” (1 Kor. 3:8; 4:1, 2) Un pionero di hopi tempu a bisa: “Ta un goso pa sa ku Yehova ta rekompensá nos esfuersonan.”

7. Kon Ezekiel lo a sinti kada biaha ku el a pensa riba e vishon ku el a haña? (Wak plachi riba portada.)

⁷ Den un vishon, Ezekiel a mira kuantu poder Dios su spiritu santu tin. El a mira kon Dios su spiritu santu tabata yuda e angelnan poderoso i tambe move e wilnan grandi di un garoshi den shelu. (Eze. 1:20, 21) Na Ezekiel 1:28, e mes ta konta nos kon el a reakshoná. El a bisa: “Ora mi a mira esaki, mi a tira mi kurpa abou ku mi kara te na suela.” Kada biaha ku el a pensa riba e vishon impreshonante ei, lo el a bira mas konvensí ku Yehova su spiritu santu lo yud’é kumpli ku su trabou di prediká.

8-9. (a) Ki òrdu Yehova a duna Ezekiel? (b) Kon Yehova a sigui yuda Ezekiel?

⁸ Yehova a ordená Ezekiel: “Yu di hende, lanta para riba bo pia pa mi papia ku bo!” E òrdu ei i Dios su spiritu santu a duna Ezekiel e forsa ku e tabatin mester pa lanta fo’i suela. Ezekiel a bisa: “E spiritu a drenta den mi i a pone mi para riba mi pia.” (Eze. 2:1, 2) Mas despues i durante henter su asignashon, Dios su “man,” esta, Dios su spiritu santu, a guia Ezekiel. (Eze. 3:22; 8:1; 33:22; 37:1; 40:1) Dios su spiritu santu a duna Ezekiel forsa pa prediká na e hendenan “kabesura i sobèrbè” den su teritorio. (Eze. 3:7) Yehova a bis’é: “Mi a hasi bo kara mes duru ku nan kara, i bo frenta mes duru ku nan frenta. Manera djamanta, mas duru ku piedra, mi a hasi bo frenta. No tene miedu di nan, ni desmayá den nan presensia.” (Eze. 3:8, 9) Ta manera Yehova a bis’é: ‘No laga nan terkedat desanimá bo. Lo mi hasi bo fuerte.’

⁹ Despues di esei, den un vishon Dios su spiritu santu a hisa Ezekiel i hib’é kaminda e mester a prediká. Ezekiel a bisa: “E man di SEÑOR tabata fuerte riba mi.” A tum’é un siman p’e mes komprondé bon kiko ta e mensahe ku e mester a prediká di manera ku e por a papi’é ku konvikshon.  (Eze. 3:14, 15) Djei Yehova a mand’é na un sabana, i ei “e spiritu a drenta” den dje. (Eze. 3:23, 24) Awor Ezekiel tabata kla pa kuminsá ku su trabou di prediká.

10. Ki yudansa nos tin mester pa por prediká, i dikon?

¹⁰ Ki yudansa nos tin mester pa por prediká? Kòrda loke a pasa ku Ezekiel. Promé ku e por a kuminsá prediká, Dios su spiritu santu a dun’é e forsa ku e tabatin mester. Meskos ku Ezekiel, e úniko manera ku nos por kumpli ku nos trabou di prediká ta ku yudansa di Dios su spiritu santu. Dikon nos ta bisa esei? Pasobra Satanas ta bringa un guera kontra nos i ke stòp nos di prediká. (Rev. 12:17) For di e punto di bista di hende, por parse ku nunka nos lo por gana e bataya ei. Pero, pa medio di nos obra di prediká, nos ta vense Satanas. (Rev. 12:9-11) Den ki sentido? Ora nos prediká, nos ta mustra Satanas ku nos no tin miedu di su menasanan i esei ta un bòftá den su kara. Pues, e echo ku nos ta sigui prediká apesar di oposishon, ta demostrá bon kla ku Dios su spiritu santu ta duna nos forsa i ku nos tin Yehova su aprobashon.—Mat. 5:10-12; 1 Ped. 4:14.

11. Kiko Dios su spiritu santu lo duna nos, i kiko nos tin ku hasi pa sigui haña Dios su spiritu santu?

¹¹ Yehova, den un sentido, a hasi kara di Ezekiel mas duru ku piedra. Kiko esei ta sigurá nos? Ku Dios su spiritu santu por duna nos e forsa ku nos tin mester pa surpasá kualke opstákulo ku nos por haña nos kuné den e trabou di prediká. (2 Kor. 4:7-9) Pero, kiko nos tin ku hasi pa sigui haña Dios su spiritu santu? Nos tin ku sigui pidi Yehova pa su spiritu santu i konfia ku Yehova lo skucha nos. Hesus a siña su disipelnan: “Sigui pidi, . . . sigui buska, . . . sigui bati.”  Yehova sigur lo “duna spiritu santu na esnan ku pidié.”—Luk. 11:9, 13; Echo. 1:14; 2:4.

12. Segun Ezekiel 2:9–3:3, di unda e ròl a bini, i kiko tabatin skirbí riba dje?

¹² Dios su spiritu santu a duna Ezekiel e forsa i kurashi ku e tabatin mester pa prediká. Pero, esei no ta tur kos. Dios su palabranan tambe a fortalesé Ezekiel su fe fuerte. Den un vishon, Ezekiel a mira un man ku tabatin un ròl. (Lesa Ezekiel 2:9–3:3.) Di unda e ròl ei a bini? For di e trono di Dios. Probablemente Yehova a laga un di e kuater angelnan ku Ezekiel a mira dun’é e ròl. (Eze. 1:8; 10:7, 20) Kiko tabatin skirbí riba e ròl? Riba dje tabatin Dios su palabranan skirbí—un mensahe largu di huisio ku Ezekiel mester a deklará na e eksiliadonan hudiu rebelde. (Eze. 2:7) E mensahe tabata riba tur dos banda. Pero, kon e palabranan riba e ròl a hasi Ezekiel su fe fuerte?

13. Kiko Ezekiel mester a hasi ku e ròl, i dikon el a haña e ròl dushi?

¹³ Yehova a bisa su profeta: “Kome e ròl akí . . . i yena bo barika kuné.” Ezekiel tabata obediente i a kome henter e ròl. Kiko esei a nifiká? Ku Ezekiel mes mester a komprondé bon kiko ta e mensahe ku e mester a prediká. E mensahe mester a bira parti di dje, pa asina motiv’é pa prediká. Pa straño ku por parse ora Ezekiel a kome e ròl el a realisá ku e “tabata dushi manera miel.” (Eze. 3:3) Dikon el a hañ’é dushi? Pa Ezekiel, representá Yehova tabata un eksperensia dushi i agradabel. (Sal. 19:8-11) E tabata masha kontentu ku Yehova a skoh’é komo su profeta.

14. Kiko a yuda Ezekiel ta kla pa su asignashon?

¹⁴ Despues, Yehova a bisa Ezekiel: “Risibí den bo kurason tur mi palabranan ku lo mi papia ku bo, i skucha bon.” (Eze. 3:10) Pues, Yehova a instruyé pa purba di kòrda e palabranan skirbí riba e ròl i pa meditá riba nan. Ora Ezekiel a hasi esei, su fe a bira mas fuerte i den su mente e tabatin un mensahe poderoso pa bisa e pueblo. (Eze. 3:11) Unabes ku Ezekiel tabatin Dios su mensahe den su boka i den su kurason, e tabata kla pa kuminsá prediká i kumpli ku su asignashon.—Kompará ku Salmo 19:14.

15. Pa nos por perseverá, kiko nos tin ku risibí den nos kurason?

¹⁵ Pa perseverá den e trabou di prediká, nos tambe tin ku permití Dios su palabranan sigui fortalesé nos fe. Nos tin ku “risibí den [nos] kurason” tur loke Yehova bisa nos. Awe, Yehova ta papia ku nos mediante su Palabra skirbí, esta, Beibel. Pero, kiko nos por hasi pa Dios su Palabra sigui guia nos pensamentu-, sintimentu- i motivashonnan?

16. Kiko nos tin ku hasi ku Dios su Palabra, i kon nos por logra esei?

¹⁶ Ora nos kome i digerí nos kuminda, nos kurpa ta bira mas fuerte. Asina tambe, ora nos studia Dios su Palabra i pensa tokante loke nos a lesa, nos fe ta bira mas fuerte. Esei ta e lès ku Yehova ke siña nos ku e vishon dje ròl. E ke pa nos “yena [nos] barika” ku su Palabra, esta, pa komprondé su Palabra bon. Nos por logra esei ora nos hasi orashon, lesa i meditá. Promé, nos ta hasi orashon pa prepará nos kurason pa aseptá Yehova su  pensamentunan. Djei nos ta lesa un porshon di Beibel. Despues, nos ta meditá riba loke nos a kaba di lesa. Kiko lo ta e resultado? Mas nos meditá, mas nos lo komprondé Dios su Palabra i esei lo fortalesé nos fe.

17. Dikon ta importante pa nos meditá ora nos lesa Beibel?

¹⁷ Ta masha importante pa nos lesa Beibel i meditá riba dje. Asina ei nos lo haña e forsa i kurashi ku nos tin mester pa prediká tantu e mensahe di Reino aworakí komo e mensahe di huisio ku nos kisas lo tin ku prediká den futuro. Ademas, ora nos meditá riba e bunita kualidatnan di Yehova, nos amistat kuné ta bira mas fuerte. Anto e ora ei, nos lo disfrutá di algu masha dushi i agradabel: pas i satisfakshon.—Sal. 119:103.

18. Kiko hende den nos teritorio lo tin ku rekonosé, i dikon?

¹⁸ Aunke nos no ta profeta inspirá pa Dios manera Ezekiel, loke sí nos tin ta e mensahe inspirá ku Dios a laga den su Palabra. Nos ta determiná pa sigui prediká e mensahe ei te ora ku Yehova bisa ta kla. Ora ku e dia di huisio kuminsá, niun hende den nos teritorio no por kulpa Dios ku e no a atvertí nan. (Eze. 3:19; 18:23) Mas bien, nan lo tin ku rekonosé ku e mensahe ku nos tabata prediká a bini di Dios.

19. Kiko lo duna nos e forsa i kurashi ku nos tin mester pa kumpli ku nos trabou di prediká?

¹⁹ Kiko lo duna nos e forsa i kurashi ku nos tin mester pa kumpli ku nos trabou di prediká? E mesun tres kosnan ku a yuda Ezekiel. Nos ta sigui prediká pasobra nos tin sigur ku ta Yehova ta manda nos, ku su spiritu santu ta duna nos forsa i ku su Palabra ta fortalesé nos fe. Komo ku nos sa ku Yehova ta yuda nos, laga nos ta determiná pa kumpli ku nos trabou di prediká i perseverá “te na fin.”—Mat. 24:13.