1-2. (a) Pa kua preguntanan nos lo haña kontesta? (b) Kiko ta mustra ku Yehova tin masha gana di yuda nos?

 YEHOVA por yuda nos trata ku nos problemanan i sirbié ku goso. Kon presis e ta hasi esei? I kiko nos tin ku hasi pa probechá plenamente di su yudansa? Pa kuminsá laga nos haña kontesta pa e pregunta: Di bèrdat Yehova ke yuda nos?

² Pa haña kontesta pa e pregunta ei, wak loke Apòstel Pablo a skirbi na Hebreonan 13:6: “Yehova ta mi ayudante; lo mi no tin miedu. Kiko hende por hasi mi?” Algun dikshonario di Beibel a bisa ku e palabra “ayudante,” ta referí na un persona ku ta sali na kareda pa yuda un hende ku ta grita pa yudansa. Imaginá bo kon Yehova ta sali na kareda pa yuda un hende ku ta den angustia. E deskripshon ei ta mustra ku Yehova ke ta nos Ayudante i tin masha gana di esei. Ku Yehova na nos lado, nos por wanta prueba ku goso.

3. Den ki tres manera Yehova ta yuda nos wanta prueba ku goso?

³ Kon Yehova ta yuda nos wanta prueba ku goso? Pa kontestá esei, laga nos ban den e buki di Isaías. Dikon Isaías? Wèl, hopi di e profesianan ku Yehova a laga Isaías skirbi ta konta pa nos tambe. Ademas, hopi biaha Isaías a usa palabranan fásil pa deskribí Yehova. Por ehèmpel, na kapítulo 30 el usa bunita ilustrashonnan pa deskribí kon Yehova ta yuda su pueblo. El bisa ku Yehova ta (1) skucha nos orashonnan ku atenshon i ta kontestá  nan, (2) guia nos i (3) bendishoná nos aworakí i den futuro. Laga nos analisá kada un di nan.

4. (a) Kon Yehova a deskribí e hudiunan den tempu di Isaías, i kiko el a permití nan pasa aden? (b) Ki speransa Yehova a duna e hudiunan fiel? (Isaías 30:18, 19)

⁴ Na Isaías kapítulo 30, nos ta kuminsá lesa ku Yehova a yama e hudiunan “yunan rebelde” ku ta “montoná piká riba piká.” Anto el a bisa tambe ku nan ta “un pueblo rebelde, . . . ku ta nenga di skucha e instrukshon di SEÑOR.” (Isa. 30:1, 9) Debí na nan desobedensia, Isaías a profetisá ku Yehova lo laga nan pasa den kalamidat. (Isa. 30:5, 17; Yer. 25:8-11) Anto esei ta loke a pasa ora nan a ser hibá preso na Babilonia. Pero, tabatin un par di hudiu ku sí tabata fiel, i Isaías tabatin un mensahe di speransa pa nan: Un dia Yehova lo laga nan bai Herúsalèm bèk. (Lesa Isaías 30:18, 19.) E palabranan ei a kumpli a pie de la letra. Yehova a libra nan for di Babilonia. Pero, esei no a sosodé mesora. E frase “Señor ta anhelá [“warda ku pasenshi,” NW]” ta indiká ku algun tempu lo a pasa promé ku Yehova a librá e hudiunan fiel. E israelitanan a keda 70 aña na Babilonia promé ku algun di nan por a bai kas bèk. (Isa. 10:21; Yer. 29:10) Unabes ku nan a yega Herúsalèm bèk, nan lágrimanan di tristesa a kambia pa lágrima di alegria.

5. Ki siguransa Isaías 30:19 ta duna nos?

⁵ Nos ta haña konsuelo den e palabranan na Isaías 30:19, ku ta bisa: “Siguramente lo e ta miserikòrdioso ku bo ora ku e tende e zonido di bo yoramentu; ora ku e tende esaki, lo e kontestá bo.” Ei Isaías ta sigurá nos ku Yehova ta skucha nos ku atenshon i ta kontestá nos orashon mesora. E echo ku nos sa ku nos Tata tin masha gana di yuda esnan ku tin mester di yudansa, ta yuda nos wanta prueba ku goso.

6. Kon e palabranan di Isaías ta mustra ku Yehova ta skucha orashon di kada un di nos?

⁶ Ki otro siguransa Isaías 30:19 ta duna nos tokante orashon? Ku Yehova tin atenshon pa orashon di kada un di nos. Kon nos por sa esei? Den e promé 18 versíkulonan, Yehova ta papia ku su pueblo komo grupo, p’esei el usa e pronòmber “boso.” Pero na versíkulo 19 el usa “bo,” pasó e tabata papia ku su sirbidónan individualmente. Isaías a skirbi: “Lo bo no yora mas”; “lo e ta miserikòrdioso ku bo” i “lo e kontesta bo.” Komo Yehova ta un Tata ku ta stima su yunan, hamas lo e bisa un di nan ku ta kibrá i desanimá: “Dikon bo ta mimu asina? Dikon bo no ta manera bo ruman?” Al kontrario, e ta tene kuenta ku nos individualmente, i e mes ta atendé ku nos orashonnan.—Sal. 116:1; Isa. 57:15.

7. Kon Isaías i Hesus ta mustra e importansia di persistí den orashon?

⁷ Ora nos resa na Yehova tokante algu ku ta preokupá nos, kisas e promé kos ku e ta hasi ta di duna nos forsa pa wanta e situashon. Anto si nos prueba dura mas largu ku nos a ferwagt, kisas nos lo tin ku sigui pidi Yehova bes tras bes pa duna nos e forsa pa wanta. E mes ke pa nos hasi esei. Wak loke Isaías a bisa: “No duna [Yehova] sosiegu.” Sí, no dun’é ora i porta. (Isa. 62:7) Kiko esei ke men? Nos mester persistí asina tantu den orashon, ku ta komo si fuera nos no  ta duna Yehova niun chèns pa hala rosea. Loke Isaías a skirbi ei ta laga nos kòrda riba Hesus su ilustrashon tokante orashon na Lukas 11:8-10 i 13. Ei Hesus ta animá nos pa “tin e tribilidat di insistí” den orashon i pa “sigui pidi” pa spiritu santu. Tambe nos por roga Yehova pa guia nos pa tuma bon desishon.

8. Kon e palabranan di Isaías 30:20 i 21 a kumpli den pasado?

⁸ Lesa Isaías 30:20, 21. E ehérsito di Babilonia a rondoná Herúsalèm pa un aña i mei. Durante e tempu ei, e hudiunan a pasa den asina tantu angustia ku nan a kustumbrá ku esei. Pero na versíkulo 20 i 21, Yehova a primintí di salba nan si nan arepentí i kambia nan komportashon. Isaías a referí na Yehova komo nan “Siñadó,” òf Gran Instruktor. Lo el a siña nan kon e ke pa nan ador’é. E palabranan ei a kumpli ora Yehova a libra e hudiunan for di Babilonia. Yehova a proba di ta nan Gran Instruktor, i ku su guia, su pueblo a logra restorá adorashon puru. Nos ta masha kontentu ku nos tambe tin Yehova komo nos Gran Instruktor.

9. Den ki manera Yehova ta guia nos awe?

⁹ Na Isaías 30:20 i 21, Isaías ta kompará nos ku alumnonan ku Yehova ta instruí na dos manera. Promé, Isaías ta bisa: “Bo wowonan lo mira bo Siñadó.” Aki Isaías ke pa nos imaginá un instruktor pará dilanti su alumnonan. Awe, nos tin e privilegio di haña instrukshon for di Yehova. Kon e ta hasi esei? Pa medio di su organisashon. Nos ta masha kontentu ku nos ta haña bon guia na nos reunionnan, kongresonan, via nos publikashonnan, programanan di JW Broadcasting^® i diferente otro manera. Tur esakinan ta yuda nos wanta prueba ku goso.

10. Den ki sentido nos ta “tende un palabra tras di [nos]”?

¹⁰ Ora Isaías a bisa: “Bo orea lo tende un palabra tras di bo,” e tabata menshoná e di dos manera ku Yehova ta instruí nos. Aki Isaías ke pa nos imaginá Yehova komo un instruktor atento ku ta kana tras di su alumnonan i ta guia nan pa nan sa unda nan tin ku bai. Yehova ta hasi esei awe? Sí, mediante Beibel. Yehova a inspirá e palabranan ei for di hopi tempu pasá. Anto ora nos lesa Beibel, ta komo  si fuera nos ta tende Yehova su stèm tras di nos.—Isa. 51:4.

11. Kiko ta dos kos ku nos mester hasi pa nos keda ku nos goso, i dikon?

¹¹ Kiko nos tin ku hasi pa probechá plenamente di e guia ku Yehova ta duna nos mediante su organisashon i su Palabra? Ripará ku Isaías a bisa dos kos. Promé, “esaki ta e kaminda.” Di dos, “kana den dje.” (Isa. 30:21) No ta sufisiente pa djis konosé e kaminda, nos tin ku kana den dje tambe. Mediante Yehova su Palabra i e splikashonnan ku nos ta haña for di su organisashon, nos ta siña kiko Yehova ta ferwagt di nos i kon pa apliká loke nos ta siña. Ora nos hasi e dos kosnan ei, nos lo por sirbi Yehova ku goso. Ta asina ei so nos tin sigur ku Yehova lo bendishoná nos.

12. Segun Isaías 30:23-26, kon Yehova lo bendishoná su pueblo?

¹² Lesa Isaías 30:23-26. Kon e profesia akí a kumpli den pasado? E hudiunan ku a regresá Israel despues ku Yehova a librá nan for di Babilonia a haña masha hopi bendishon, tantu den sentido físiko komo spiritual. Yehova a bendishoná su pueblo ku hopi kuminda. Pero, mas importante ainda, el duna nan tur loke nan tabatin mester pa tin un amistat será kuné i pa kuminsá ador’é na e manera ku e ke. Nunka promé e hudiunan a eksperensiá asina tantu bendishon spiritual. Manera nos ta mira na versíkulo 26, Yehova a duna nan mas lus, esta, el a yuda nan komprondé su Palabra. (Isa. 60:2) Tur e bendishonnan ku Yehova a duna su pueblo a duna nan goso i forsa pa sigui sirbié. Sin duda, nan kurason tabata kontentu.​—Isa. 65:14.

13. Kon nos sa ku e profesia di restorashon a kumpli den nos tempu?

¹³ E profesia tokante restorashon di adorashon puru a kumpli tambe den nos tempu? Klaru ku sí! Desde 1919, miónes di hende a ser librá for di Babilonia e Grandi, esta, tur religion falsu na mundu. E hendenan ei a ser guiá na un paradeis spiritual, kual ta un lugá hopi mas mihó ku e tera ku Yehova a primintí Israel. (Isa. 51:3; 66:8) Kiko e paradeis spiritual ei ta?

14. Kiko e paradeis spiritual ta, i ken ta den dje? (Wak Splikashon.)

¹⁴ Desde 1919, e ungínan ta den un paradeis  spiritual. b Ku tempu, e kristiannan ku tin speransa di biba aki riba tera, esta, e ‘otro karnénan,’ tambe a drenta den e paradeis spiritual i a haña hopi bendishon di Yehova.—Huan 10:16; Isa. 25:6; 65:13.

15. Na unda e paradeis spiritual ta?

¹⁵ Na unda e paradeis spiritual ta awe? Yehova tin sirbidó rònt mundu. P’esei, nos por bisa ku e paradeis spiritual ta rònt mundu. Pues, no ta importá unda nos ta biba, nos por forma parti di e paradeis spiritual tanten nos ta hasi tur loke nos por pa apoyá adorashon berdadero.

16. Kiko nos tin ku hasi pa sigui mira kon bunita e paradeis spiritual ta?

¹⁶ Un di e kosnan ku nos tin ku hasi pa keda den e paradeis spiritual, ta di sigui balorá e kongregashon kristian mundial. Kon nos por hasi esei? Esei ta di focus riba e kualidatnan bunita di nos rumannan, i no riba nan imperfekshonnan. (Huan 17:20, 21) Dikon ta asina importante pa nos hasi esei? Pensa riba e siguiente ilustrashon. Den un parke bunita, tin diferente palu, tur ku nan bunitesa i defektonan. Asina tambe, den e paradeis spiritual tin diferente ruman. (Isa. 44:4; 61:3) Meskos ku nos lo no focus riba e defektonan di e palunan den e parke, asina tambe nos lo no focus riba e imperfekshonnan di nos rumannan i keda sin mira kon bunita i uní e kongregashon kristian ta den su totalidat.

17. Kiko kada un di nos por hasi pa mantené union den e kongregashon?

¹⁷ Kiko kada un di nos por hasi pa mantené union den e kongregashon? Esei ta di hasi esfuerso pa hasi pas. (Mat. 5:9; Rom. 12:18) Kada bes ku nos tuma e inisiativa pa tin pas ku otronan den e kongregashon, nos ta hasi e paradeis spiritual mas bunita ainda. Nos tin ku keda kòrda ku kada persona ku ta den e  paradeis spiritual t’ei pasó ta Yehova a hal’é. (Huan 6:44) Imaginá kon kontentu Yehova ta ora e mira su sirbidónan, ku ta presioso p’e, ta hasi esfuerso pa fortalesé e pas i union entre nan!—Isa. 26:3; Hag. 2:7.

18. Riba kiko nos tin ku keda pensa, i dikon?

¹⁸ Kon nos por probechá plenamente di e bendishonnan ku Yehova ta duna nos? Esei ta ora nos tuma tempu pa pensa riba loke nos ta siña den Beibel i nos publikashonnan. Esei lo yuda nos tin e kualidatnan ku Kristu tabatin. E kualidatnan aki lo motivá nos pa demostrá “amor di ruman” i “tierno kariño pa otro” den e kongregashon. (Rom. 12:10) Ora nos para pensa riba e bendishonnan ku Yehova ta duna nos aworakí, nos amistat kuné ta bira mas fuerte. Anto ora nos meditá riba e bon kosnan ku Yehova ta primintí nos, e speransa di sirbié pa semper lo keda bibu den nos mente. Tur e kosnan ei ta yuda nos sirbi Yehova ku goso.

19. (a) Segun Isaías 30:18, kiko nos por tin sigur di dje? (b) Kiko lo yuda nos pa sigui sirbi Yehova ku goso i nunka entregá?

¹⁹ Yehova lo lanta pa mustra nos bondat ora e trese fin na e mundu malbado akí. (Isa. 30:18) Komo ku e ta un Dios di hustisia, nos ta konvensí ku lo e no laga Satanas su mundu eksistí ni un dia mas ku ta nesesario. (Isa. 25:9) Huntu ku Yehova nos ta warda pa e dia di nos liberashon yega. Pero mientrastantu, nos ta sigui balorá nos privilegio di hasi orashon, studia Dios su Palabra, apliká loke nos ta siña i meditá riba nos bendishonnan. Ora nos hasi esei, Yehova lo yuda nos sigui sirbié ku goso i nunka entregá.