1-2. Ki “trabou ekselente” un ansiano ta hasi?

 SI BO ta un sirbidó ministerial, probablemente bo ta den direkshon pa bira ansiano. Lo bo ke bira ansiano pa yuda bo rumannan mas ainda?​—1 Tim. 3:1.

² Kiko un ansiano ta hasi? E ta prediká ku entusiasmo huntu ku e kongregashon, traha duru pa kuida i siña e rumannan i yuda fortalesé nan fe den Yehova ku su palabra i akshon. P’esei Beibel ta yama ansianonan ku ta traha duru “regalo den forma di hende.”​—Efe. 4:8.

3. Kiko un ruman tin ku hasi pa bira ansiano? (1 Timoteo 3:1-7; Tito 1:5-9)

³ Abo ke sa kiko bo tin ku hasi pa bo bira ansiano? No ta bo abilidat i kapasidat so ta yuda bo bira ansiano. Hopi biaha ora di buska un trabou, un doño di kompania ta buska un persona ku tin sierto abilidat. I si bo tin e abilidat ei, bo ta haña e trabou. Pero den kaso di bira ansiano ta otro. Aparte di ta un ruman ku ta bon den prediká i siña hende, bo mester kumpli ku loke 1 Timoteo 3:1-7 i Tito 1:5-9 ta menshoná. (Lesa.) Den e artíkulo akí nos lo wak (1) kon un ruman por haña un bon reputashon, (2) kon e por ta un bon kabes di famia i (3) kiko por yud’é pa ta dispuesto pa sirbi e kongregashon.

HAÑA UN BON REPUTASHON

4. Kiko ke men “ta ireprochabel”?

⁴ Pa bira un ansiano, bo mester “ta ireprochabel.” Esei ke men ku bo mester tin un bon reputashon den kongregashon i ku niun hende no mester por akusá bo di kondukta  robes. Ademas, bo mester tin “un bon reputashon serka hende di pafó.” Klaru ku lo tin hende ku ta kritiká bo pasó bo ta un Testigu di Yehova. Pero, no mester ta asina ku nan ta duda ku bo ta onesto i un bon hende. (Dán. 6:4, 5) Puntra bo mes: ‘Mi tin un bon reputashon tantu paden komo pafó di e kongregashon?’

5. Kon bo por mustra ku bo ta “stimadó di loke ta bon”?

⁵ Bo mester ta un “stimadó di loke ta bon.” Esei ke men ku bo ta wak e bon kualidatnan den otro hende i ta elogiá nan pa esei. Tambe bo ta kontentu pa hasi bon pa otro hende i tin biaha asta mas di loke ta ferwagt di bo. (1 Tes. 2:8) Dikon ta asina importante pa ansianonan ta “stimadó di loke ta bon”? Pasó nan ta usa hopi di nan tempu balioso pa kuida nan rumannan den kongregashon i kumpli ku nan asignashonnan. (1 Ped. 5:1-3) Aunke tur esei ta nifiká hopi trabou i sakrifisio pa nan, nan tin masha goso den sirbi nan rumannan.​—Echo. 20:35.

6. Den ki manera bo por ta “hospitalario”? (Hebreonan 13:2, 16; wak e plachi.)

⁶ Bo ta mustra ku bo ta “hospitalario” ora bo ta hasi bon kos pa otronan, inkluso pa esnan ku bo no ta será kuné. (1 Ped. 4:9) Un buki di referensia a bisa ku un hende ku ta hospitalario ta bondadoso asta ku hende ku e no konosé i ta kontentu pa invitá nan na su kas. Puntra bo mes: ‘Mi ta konosí pa ta un hende ku ta mustra bondat na bishitantenan ku bini mi kongregashon?’ (Lesa Hebreonan 13:2, 16.) Un hende hospitalario ta mustra bondat i ta kompartí loke e tin ku tur sorto di bishitante. Por ehèmpel, e ta hasi esei ku publikadónan ku no tin hopi rekurso, oradó bishitante i ku esnan ku ta traha duru pa animá e rumannan, mané e superintendente di sirkuito.​—Gén. 18:2-8; Pro. 3:27; Luk. 14:13, 14; Echo. 16:15; Rom. 12:13.

7. Kon un ansiano ta mustra ku e no ta “un hòmber ku stima plaka”?

⁷ “No un hòmber ku stima plaka.” Esei ke men ku bo no ta focus riba kosnan material. Sea ku bo ta riku òf pober, e  kos di mas importante den bo bida ta di sirbi Yehova. (Mat. 6:33) Bo ta usa bo tempu, energia i kosnan material ku bo tin pa adorá Yehova, kuida bo famia i sirbi e kongregashon. (Mat. 6:24; 1 Huan 2:15-17) Puntra bo mes: ‘Kon importante plaka ta pa ami? Mi ta kontentu ku e kosnan básiko? Òf mi ta focus riba maneranan pa traha mas plaka i haña mas kos material?’​—1 Tim. 6:6, 17-19.

8. Kon un ansiano ta mustra ku e ta “moderá den su kustumbernan” i ku e tin “dominio propio”?

⁸ Si bo ta “moderá den [bo] kustumbernan” i bo tin “dominio propio,” esei ke men ku bo ta rasonabel den tur área di bo bida. Por ehèmpel, bo no ta bebe ni kome di mas. Bo ta skohe bo rekreo bon. Ademas, bo ta hasi sigur ku kuido di bo aparensia for di kabes te pia ta na òrdu i representabel. Bo no ta kopia stail di hende ku no ta sirbi Yehova. (Luk. 21:34; Sant. 4:4) Anto asta ora otro hende trata bo malu, bo ta keda kalmu. Bo no ta “un buraché”; ni bo no ta konosí komo un bebedó pisá. Puntra bo mes: ‘Hende por mira ku mi ta moderá den mi kustumbernan i tin dominio propio?’

9. Kon bo por mustra ku bo tin “sano huisio” i ta “ordená”?

⁹ Si bo tin “sano huisio,” bo ta usa prinsipio di Beibel pa evaluá kada asuntu. Bo ta tuma tempu pa pensa kon e prinsipionan ei ta apliká den kada situashon i asina ei haña un mihó komprondementu i tuma un bon desishon. Bo no ta bula saka konklushon sin ku bo tin tur informashon promé. (Pro. 18:13) Debí na esei, bo ta un hende balansá ku ta tuma desishon di akuerdo ku Yehova su pensamentu. Pa bo ta “ordená,” bo mester ta organisá, puntual i konosí pa ta un hende konfiabel ku ta sigui instrukshon. E kualidatnan akí lo yuda bo haña un bon reputashon. Laga nos wak awor e kualidatnan ku Beibel ta bisa un ansiano mester tin pa por ta un bon ehèmpel komo kabes di famia.

UN BON KABES DI FAMIA

10. Kon un ruman hòmber ta “dirigí su kas na un manera ekselente”?

¹⁰ Si bo ta kasá i ke bira un ansiano, bo famia tambe mester tin bon reputashon. Pues, bo mester “dirigí [bo] kas na un manera ekselente.” Esaki ke men ku bo mester tin e reputashon di ta un kabes di kas amoroso i responsabel. Pa logra esei, bo tin ku dirigí adorashon komo famia, hasi esfuerso pa bo famia bai reunion i yuda nan hasi loke nan por den sirbishi. Dikon tur esei ta importante? Apòstel Pablo a bisa: “Si un hòmber no sa kon pa dirigí su mes kas, kon lo e por kuida e kongregashon di Dios?”​—1 Tim. 3:5.

11-12. Dikon komportashon di un ruman hòmber su yunan ta masha importante? (Wak e plachi.)

¹¹ Si bo ta tata, bo yunan menor di edat ku ta biba bou di bo kuido mester “ta sumiso i respetuoso.” Bo mester siña nan i entrená nan ku amor. Klaru ku bo ke pa nan ta felis, hari i hunga mané tur otro mucha. Pero tambe bo tin ku siña nan pa obedesé bo, respetá otro hende i komportá nan mes bon. Ademas, bo mester hasi tur bo esfuerso pa yuda nan forma un amistat será ku Yehova, apliká loke Beibel ta bisa i traha pa yega na boutismo.

¹² “Yu kreyente ku no ta ser akusá di bagamunderia ni ta rebelde.” Pero kiko ta pasa si un ruman hòmber su yu, sea ku e ta batisá òf ta traha pa yega na boutismo,  kometé un piká grave? Si e tata a neglishá di entrená i disipliná su yu, e ora ei e tata no ta kualifiká pa ta un ansiano.​—Wak E Toren di Vigilansia di 15 di òktober 1996, pág. 21, par. 6-7.

SIRBI E KONGREGASHON

13. Kon bo por mustra ku bo ta un hende “rasonabel” i no “tèrko”?

¹³ Un ruman ku ta imitá Hesus su bunita kualidatnan ta un bendishon pa su kongregashon. Komo ku e ta “rasonabel” e ta promové pas. Si bo ke pa hende mira bo komo un persona rasonabel, bo mester ta un hende ku ta kla pa skucha i habrí pa otro hende su opinion. Por ehèmpel, si den futuro bo ta den un reunion di ansiano, lo bo ta dispuesto pa apoyá e opinion di e mayoria si esei no ta bai kontra prinsipio di Beibel? Ademas Beibel ta bisa ku bo “no mester ta tèrko.” Pues bo mester ta un hende ku gusta buska konseho serka otronan i no ta insistí pa kos bai na bo amèn. (Gén. 13:8, 9; Pro. 15:22) Ni tampoko bo no mester ta “un buskadó di pleitu” ni “kla pa rabia.” Na lugá di ta un persona brutu ku no ta bai di akuerdo ku nada, bo ta un hende pasífiko, trankil i ku tin takto. Pues, asta ora e situashon ta tenso, abo ta tuma inisiativa pa promové pas. (Sant. 3:17, 18) Ademas, bo palabranan ta asina suave ku bo por kalma asta hende ku ta kompletamente kontra di bo kreensianan.​—Hues. 8:1-3; Pro. 20:3; 25:15; Mat. 5:23, 24.

14. Kiko Beibel ke men ora e bisa “no . . . resien kombertí” i “leal”?

¹⁴ Si bo ke bira ansiano, bo no por ta “un hòmber resien kombertí.” Pero esei no ke men tampoko ku bo mester tin siglonan batisá. Mas bien, bo mester di tempu sí pa bira un kristian madurá. Promé ku bo bira ansiano bo tin ku demostrá ku bo ta imitá Hesus, ku bo ta humilde i dispuesto pa warda riba Yehova  pa kualke asignashon. (Mat. 20:23; Flp. 2:5-8) I bo tin ku proba ku bo ta “leal” dor di pega na Yehova i su normanan hustu i dor di sigui kualke instrukshon ku bo haña mediante Su organisashon.​—1 Tim. 4:15.

15. Akaso un ansiano mester ta un tremendo diskursante? Splika.

¹⁵ Ta bèrdat ku Beibel ta bisa ku un ansiano mester ta “kapasitá pa siña otro hende.” Pero akaso esei ke men ku bo mester ta un tremendo diskursante? Nò. Tin hopi ansiano ku ta masha bon den prediká i ta duna bon pastoreo. Pero kisas nan no ta e mihó diskursante. (Kompará ku 1 Korintionan 12:28, 29 i Efesionan 4:11.) Sea kual sea ta e kaso, bo tin ku sigui traha riba bo kapasidat pa siña otro hende. Kon bo por hasi esei?

16. Kon bo por bira un bon maestro? (Wak e plachi.)

¹⁶ Bo tin ku “tene firmemente na e palabra fiel.” Pa mehorá bo kapasidat pa siña i bira un mihó maestro, bo tin ku hasi sigur ku loke bo bisa semper ta basá riba Beibel. Esei mester ta e kaso sea ku bo ta siña for di plataforma òf ta duna un ruman konseho. P’esei, bo mester ta un bon studiante di Beibel i di nos publikashonnan. (Pro. 15:28; 16:23) Presta bon atenshon na e manera ku nos publikashonnan ta splika i apliká e tekstonan pa asina abo por usa nan korektamente. Ademas, hasi tur bo esfuerso pa motivá bo oyentenan pa stima Yehova mas i apliká loke nan ta skucha. Algu tambe ku bo por hasi ta di pidi un otro ansiano ku ta bon maestro pa duna bo konseho i apliká su sugerensianan. (1 Tim. 5:17) Ansianonan mester “por duna spièrtamentu” tambe na nan rumannan i tin biaha asta “reprendé” nan. Klaru ansianonan semper lo hasi tur esei ku amor. Si bo ta trankil, amoroso i ta basa loke bo ta siña riba Dios su Palabra lo bo ta un bon maestro, meskos ku nos Gran Maestro, Hesus.​—Mat. 11:28-30; 2 Tim. 2:24.

 SIGUI HASI BO ESFUERSO PA KUALIFIKÁ KOMO ANSIANO

17. (a) Ki yudansa bo tin si bo ke bira ansiano? (b) Kiko ansianonan mester tene kuenta kuné ora di evaluá un ruman pa nombramentu? (Wak e kuadro “ Sea Rasonabel Ora di Evaluá un Ruman.”)

¹⁷ Despues ku bo pasa den e kualidatnan ku un ansiano mester tin, kisas bo ta bisa: “Ami no sa kon mi ta bai logra esei.” Pero kòrda ku Yehova ni su organisashon no ta ferwagt pa bo demostrá tur e kualidatnan ei perfektamente. (1 Ped. 2:21) Yehova su spiritu santu lo yuda bo kultivá e kualidatnan ei. (Flp. 2:13) Pues, si tin un kualidat ku bo ke mehorá, pidi Yehova yuda bo. Ademas, hasi investigashon den nos publikashonnan i pidi un ansiano pa konseho i sugerensia.

18. Kiko tur sirbidó ministerial ta wòrdu animá pa hasi?

¹⁸ Laga kada un di nos, asta esnan ku ta ansiano kaba, sigui traha riba e kualidatnan menshoná den e artíkulo akí. (Flp. 3:16) Anto si bo ta sirbidó ministerial, sigui hasi bo esfuerso pa progresá i pa haña gana di yuda bo rumannan. Pidi Yehova pa entrená bo pa bo por ta asta mas útil p’e i pa e kongregashon. (Isa. 64:8) Nos ta pidi Yehova su bendishon pa bo segun bo ta traha duru pa kualifiká komo ansiano.