1. Kiko Apòstel Pablo tabata pensa tokante sirbidónan ministerial?

 LOKE e sirbidónan ministerial ta hasi den kongregashon ta hopi importante. I ta bisto ku Apòstel Pablo a apresiá loke a hòmbernan leal akí tabata hasi. Por ehèmpel, ora el a skirbi su karta pa e rumannan na Filipo, el a kumindá tantu e ansianonan komo e sirbidónan ministerial.​—Flp. 1:1.

2. Kon Luis ta sinti tokante su asignashon komo sirbidó ministerial?

² Tantu nos sirbidónan ministerial yòn komo esnan di edat gusta nan trabou. Por ehèmpel, Devan a bira sirbidó ministerial ora e tabatin 18 aña. Di otro un banda, Luis a wòrdu nombrá despues di su 50 aña. Wak kon Luis ta sinti tokante su asignashon komo sirbidó ministerial. El a bisa: “Mi ta masha kontentu pa sirbi mi rumannan den kongregashon di e manera akí. Nan a mustra mi ku nan ta stima mi. I awor ami por mustra nan kuantu ami ta stima nan!” Hopi sirbidó ministerial ta sinti meskos.

3. Kiko nos lo trata den e artíkulo akí?

³ Den e artíkulo akí nos lo trata e siguiente preguntanan: Si bo ta batisá i bo no ta un sirbidó ministerial, kiko bo tin ku hasi pa haña e gana di bira un sirbidó ministerial? Kiko ta e kualidatnan ku bo mester tin pa bira un sirbidó ministerial? Pero promé, laga nos wak kiko sirbidónan ministerial ta hasi den kongregashon.

 KIKO SIRBIDÓNAN MINISTERIAL TA HASI?

4. Kiko un sirbidó ministerial ta hasi? (Wak e plachi.)

⁴ Un sirbidó ministerial ta un ruman hòmber batisá ku a wòrdu nombrá pa spiritu santu. Sirbidónan ministerial ta yuda e ansianonan ku kosnan práktiko den kongregashon. Por ehèmpel, tin sirbidó ministerial ta yuda ku teritorio i literatura. Tin otro ta yuda ku limpiesa i mantenshon dje Salòn di Reino. Nan ta traha tambe komo úsher òf ku oudio i vidio. Ta bèrdat ku mayoria kos ku nan ta hasi ta kosnan práktiko. Pero, e kos di mas importante ta ku nan ta hòmbernan spiritual. Ku otro palabra, nan tin un amor pa Yehova, ta biba segun su normanan hustu i ta stima nan rumannan. (Mat. 22:37-39) Pero kiko un ruman hòmber tin ku hasi pa e bira sirbidó ministerial?

5. Kiko un ruman hòmber tin ku hasi pa bira sirbidó ministerial?

⁵ Den Beibel bo ta haña tur e kualidatnan ku un ruman hòmber mester tin pa bira un sirbidó ministerial. (1 Tim. 3:8-10, 12, 13) Loke abo tin ku hasi ta, pasa den e kualidatnan, studia nan i pone nan na práktika. Pero promé ku bo hasi esei, ta hopi importante pa bo kontestá esaki: ‘Pakiko eigenlijk mi ke bira un sirbidó ministerial?’

LOKE MESTER MOTIVÁ BO PA BIRA SIRBIDÓ MINISTERIAL

6. Kiko mester motivá bo pa sirbi bo rumannan? (Mateo 20:28; wak e plachi.)

⁶ E mihó ehèmpel ku nos tin ta Hesukristu. Loke a motiv’é pa traha duru i hasi kos pa hende, asta ora esaki a rekerí hopi humildat, ta amor​—amor pa su Tata i amor pa hende. (Lesa Mateo 20:28; Huan 13:5, 14, 15) Si amor ta e motibu pakiko bo ke bira un sirbidó ministerial, e ora ei Yehova lo bendishoná bo i yuda bo logra bo meta di bira sirbidó ministerial.​—1 Kor. 16:14; 1 Ped. 5:5.

7. Kiko un ruman hòmber mester tene kuidou kuné, i dikon?

⁷ Awendia ora un persona pusha su mes pa bai dilanti den bida, e ta haña hopi atmirashon. Pero den Yehova su organisashon no ta asina. Un ruman ku  stima hende meskos ku Hesus no ke manda riba su rumannan ni ke ser mirá komo un hende masha importante. Si un ruman ambisioso wòrdu nombrá den kongregashon, chèns ta grandi ku lo e no hasi trabounan ku ta humilde. Kisas lo e pensa ku e no por baha su mes pa hasi e tipo di trabounan ei. (Huan 10:12) Yehova lo no bendishoná hende asina.​—1 Kor. 10:24, 33; 13:4, 5.

8. Ki konseho Hesus a duna su apòstelnan?

⁸ Tabatin biaha ku asta algun di Hesus su bon amigunan a pidi sierto kos ku e motivashon robes. Por ehèmpel, wak loke a pasa ku dos di Hesus su apòstelnan, Santiago i Huan. Nan a pidi Hesus un lugá spesial den su Reino. Hesus no a bisa nan ku tabata bon pa pidi esei. Na lugá di esei, el a bisa su 12 apòstelnan: “Ken ku ke bira grandi meimei di boso mester ta boso sirbidó, i ken ku ke ta promé meimei di boso mester ta esklabo di tur.” (Mar. 10:35-37, 43, 44) Ora un ruman hòmber ke hasi mas den kongregashon ku e motivashon korekto, esta, pa sirbi su rumannan, lo e ta un gran bendishon pa e kongregashon.​—1 Tes. 2:8.

KIKO POR DUNA BO DESEO PA HASI MAS DEN KONGREGASHON?

9. Kon bo por haña gana di hasi mas den kongregashon?

⁹ No tin duda ku bo stima Yehova i ke yuda bo rumannan. Pero kisas ora e idea di bira un sirbidó ministerial pasa den bo mente, bo ta wanta un poko paso bo ta pensa riba e trabou èkstra ku bo tin ku hasi. Kon bo por surpasá esei i haña gana di hasi mas pa bo rumannan? Pensa riba e goso ku lo bo haña. Hesus a bisa: “Tin mas felisidat den duna ku den risibí.” (Echo. 20:35) Hesus no a djis bisa e palabranan ei, el a bib’é. El a sinti e goso di sirbi otro i abo tambe por sinti e goso ei.

10. Kon nos sa ku Hesus gusta yuda i sirbi hende? (Marko 6:31-34)

¹⁰ Hesus semper a gusta yuda i sirbi hende. (Lesa Marko 6:31-34.) Tabatin un biaha ku Hesus i su apòstelnan tabata kansá i nan tabata na kaminda pa un lugá solitario pa nan sosegá. Pero tabatin un multitut ku a yega einan promé ku nan. E multitut tabata ke pa Hesus siña nan algu. Hesus por a bisa nò pasobra e ku su disipelnan no a haña “ni sikiera chèns di kome.” Òf e por a djis siña nan un òf dos bèrdat i djei manda nan kas. Na lugá di esei, amor a motiv’é pa “siña nan hopi kos.” Anto el a sigui hasi esei te ora “a bira lat.” (Mar. 6:35) E no tabata obligá di hasi esei. Pero el a hasié pasobra “el a haña duele di nan.” E tabata ke siña nan pasó e tabata stima nan. Ta bisto ku sirbi i yuda hende a duna Hesus hopi goso.

11. Kon Hesus a duna hende yudansa práktiko? (Wak e plachi.)

¹¹ Ora Hesus a yuda hende, el a hasi mas ku djis siña nan tokante Dios. El a hasi kosnan práktiko tambe pa nan. El a perkurá kuminda i a laga su disipelnan parti esaki na e hendenan. (Mar. 6:41) Asina ei, el a siña su disipelnan kon pa sirbi i yuda hende. El a mustra nan ku hasiendo kosnan práktiko, manera e tareanan ku sirbidónan ministerial ta hasi, ta importante. Bo por imaginá bo kon kontentu e apòstelnan a sinti ku nan por a yuda parti e kuminda ku Hesus a pèrkurá i mira kon “tur hende a kome i keda satisfecho”? (Mar. 6:42) Pero klaru esaki no ta e promé ni e último biaha ku Hesus  a pone bienestar di otro hende promé ku esun di dje. Henter su bida akí riba tera, el a sirbi i yuda hende. (Mat. 4:23; 8:16) Hesus tabatin hopi goso den siña i yuda hende. Meskos ku Hesus, abo tambe lo sinti e goso ei si bo ta dispuesto pa yuda bo rumannan.

12. Dikon niun ruman no tin motibu pa bisa ku e no ta útil pa e kongregashon?

¹² Tin ruman ta haña ku nan no tin niun abilidat ekstraordinario pa usa den e kongregashon. Si bo ta sinti asina, no desanimá. Sigur bo tin kualidatnan ku ta hopi útil pa yuda e kongregashon. Lo ta bon pa bo lesa loke Pablo a skirbi na 1 Korintionan 12:12-30 i hasi orashon tokante esei. Den e versíkulonan ei Pablo a splika ku tur sirbidó di Yehova, inkluso abo, ta importante i presioso pa e kongregashon. Pero si aworakí bo no por ta un sirbidó ministerial pasó bo tin kos pa traha riba dje, no entregá. En bes di esei, hasi loke bo por pa sirbi Yehova i yuda bo rumannan. Bo por tin sigur ku e ansianonan lo tene kuenta ku bo i duna bo asignashon ku abo por kumpli kuné.​—Rom. 12:4-8.

13. Kiko nos por bisa di mayoria di e rekisitonan bíbliko pa bira un sirbidó ministerial?

¹³ Wak un otro motibu mas pakiko lo ta bon pa bo hasi bo esfuerso pa bira un sirbidó ministerial. Gran mayoria di e rekisitonan bíbliko ta kosnan ku eigenlijk tur kristian mester traha riba dje. Bon mirá, ta tur kristian tin ku hala mas serka Yehova, sinti e goso di duna i sea un bon ehèmpel pa otro kristian imitá. Pero kiko presis bo tin ku hasi pa bira un sirbidó ministerial?

KON PA BIRA UN SIRBIDÓ MINISTERIAL

14. Kiko ta nifiká ku bo “mester ta hende serio”? (1 Timoteo 3:8-10, 12)

¹⁴ Laga nos trata 1 Timoteo 3:8-10, 12. (Les’é.) Ei tin algun di e kualidatnan ku ta nesesario pa bira sirbidó ministerial. Un sirbidó ministerial “mester ta hende serio.” E ekspreshon ei tambe por a ser tradusí komo “digno di rèspèt,” “responsabel” òf “onorabel.” Pero, esei no ke men ku bo no tin mag di hari òf hasi wega. (Ekl. 3:1, 4) Loke e ke men ta ku bo mester traha duru pa kumpli ku e tareanan ku bo haña. E ora ei e rumannan den  kongregashon lo sa ku nan por dependé riba bo i nan lo respetá bo.

15. Kiko ke men “no tin dos lenga” i “no ta golos pa ganashi desonesto”?

¹⁵ “No tin dos lenga” ta nifiká ku bo ta un hende sinsero, onesto i konfiabel. Semper bo ta kumpli ku bo palabra i bo no ta pretendé di ta un hende ku bo no ta. (Pro. 3:32) “No ta golos pa ganashi desonesto” ta nifiká ku bo ta onesto ora ta trata di negoshi òf anda ku plaka. Lo bo no probechá di bo rumannan pa gana sèn.

16. (a) Kiko “no ta bebe muchu biña” ta nifiká? (b) Kiko ke men tin “un konsenshi limpi”?

¹⁶ “No ta bebe muchu biña” ta nifiká ku bo no ta bebe hopi alkohòl ni bo no tin e reputashon di ta un hende ku ta bebe hopi. Tin “un konsenshi limpi” ta nifiká ku bo ta biba segun Yehova su normanan. Aunke bo no ta perfekto, bo tin un bon amistat ku Dios i esei ta laga bo sinti na pas.

17. Kon un ruman por demostrá ku e ta konfiabel i ku por dependé riba dje? (1 Timoteo 3:10; wak e plachi.)

¹⁷ Beibel ta bisa pa “laga tèst e hòmbernan akí promé pa wak si nan ta apto.” Esei ke men ku e ansianonan lo duna bo sierto responsabilidatnan pa wak si nan por konfia i dependé riba bo. P’esei, ora ku e ansianonan duna bo un asignashon, presta bon atenshon na nan instrukshonnan i e guia ku ta bini di e organisashon. Hasi sigur ku bo ta komprondé bon kiko bo tin ku hasi i pa ki dia bo mester hasié. Segun bo ta hasi bo bèst ku kada asignashon, otro hende den kongregashon lo tuma nota di bo bon progreso. Anto ansianonan, hasi sigur di entrená ruman hòmbernan batisá. (Lesa 1 Timoteo 3:10.) Den bo kongregashon tin algun ruman hòmber batisá entre 10 i 14 aña òf asta mas yòn? Nan tin un bon programa di hasi estudio personal i ta prepará bon pa e reunionnan? Nan ta duna komentario regularmente na reunion? Bo ta mira nan regularmente den sirbishi? Si ta asina, duna nan asignashon ku ta pas ku nan edat i abilidat. Asina ei bo por “laga tèst” nan for di awor i pa ora nan hasi 17 aña, kisas nan lo por kualifiká komo sirbidó ministerial.

18. Kiko “liber di akusashon” ta nifiká?

 ¹⁸ “Liber di akusashon” ta nifiká ku niun hende no tin un akusashon kontra bo di a kometé un pika serio. Klaru, komo un kristian, hende por akusá bo falsamente. Esei a pasa ku Hesus, i el a bisa ku su siguidónan por ferwagt meskos. (Huan 15:20) Pero si bo tene bo kondukta limpi, meskos ku Hesus, lo bo tin un bon reputashon den kongregashon.​—Mat. 11:19.

19. Kiko “esposo di ún esposa” ta nifiká?

¹⁹ “Esposo di ún esposa.” Si bo ta kasá, bo mester tene bo mes na Yehova su norma original di matrimonio​—un hòmber i un muhé. (Mat. 19:3-9) Klaru, un kristian nunka lo ke kometé inmoralidat seksual. (Heb. 13:4) Pero bo mester hasi mas ku djis esei. Bo mester ta leal na bo esposa. Nunka lo bo ke duna demasiado atenshon na un otro hende muhé ku no ta bo kasá.​—Yòb 31:1.

20. Kon un ruman por dirigí su famia na “un manera ekselente”?

²⁰ Nan mester “dirigí nan yunan i nan kas na un manera ekselente.” Si bo ta kabes di famia, bo tin ku tuma bo responsabilidat hopi na serio. Hasi adorashon komo famia tur siman. Tur chèns ku bo haña, traha den sirbishi ku kada miembro di bo famia. Yuda bo yunan pa sigui hala mas serka Yehova. (Efe. 6:4) Un ruman ku ta kuida i stima su famia ta mustra ku e por kuida e kongregashon.​—Kompará 1 Timoteo 3:5.

21. Si ainda bo no ta un sirbidónan ministerial, kiko bo por hasi?

²¹ Ruman, si ainda bo no ta un sirbidónan ministerial, hasi orashon i studia e artíkulo akí bon. Hasi esfuerso pa kumpli ku e rekisitonan. Meditá riba kuantu bo stima Yehova i bo rumannan. Oumentá bo deseo pa sirbi nan. (1 Ped. 4:8, 10) Sinti e goso di sirbi bo famia spiritual. Nos ta pidi Yehova pa bendishoná bo rikamente segun bo ta hasi esfuerso pa bira un sirbidó ministerial!​—Flp. 2:13.