1-2. Ken asina por trata nos na un manera inhustu? Splika.

 HESUS a konta un ilustrashon di un biuda ku tabata blo pidi un hues yud’é haña hustisia. Hesus su disipelnan a komprondé bon bon kon e biuda ei tabata sinti pasobra den e tempu ei inhustisia tabata algu masha komun. (Luk. 18:1-5) Nos tambe ta komprondé loke e biuda ei a sinti pasó nos tur a yega di haña nos ku inhustisia.

² Den e mundu djawe, prehuisio, diskriminashon i opreshon ta masha normal, pues no ta straña nos ora hende trata nos malu. (Ekl. 5:8) Aunke e no sa pasa hopi, un ruman por trata nos malu i esei por hasi nos hopi doló. Pero nos tin ku kòrda ku ta debí na imperfekshon esei sa pasa i no pasó e ruman ei ta oponé òf persiguí nos. Si nos tin pasenshi ku e hendenan ku ta kontra e bèrdat, kuantu mas ainda nos tin ku tene pasenshi ku nos rumannan. Nos por siña hopi for di loke Hesus a hasi ora hende a oponé nan. Kon Yehova ta sinti si sea hende paden òf pafó di e kongregashon trata nos na un manera inhustu? E no ta wòri ku loke ta pasa ku nos?

3. Kon nos sa ku Yehova ta atento na e manera ku otro hende ta trata nos?

³ For di Salmo 37:28 nos ta komprondé ku “Yehova stima hustisia.” P’esei e ta atento na e manera ku otro hende ta trata nos. Hesus a sigurá nos ku, asina ku e tempu apropiá yega, Yehova lo “sòru pa [nos] haña hustisia rápidamente.” (Luk. 18:7, 8) Anto pronto lo e kita tur nos  sufrimentu i hamas lo e permití nos pasa den inhustisia atrobe.​—Sal. 72:1, 2.

4. Kon Yehova ta yuda nos awe?

⁴ Turesten ku nos ta warda e tempu pa Yehova resolvé tur nos problemanan, e ta yuda nos sa kiko pa hasi ora otro hende trata nos malu. (2 Ped. 3:13) Por ehèmpel, e ta siña nos kiko nos tin ku hasi ora nos haña nos ku inhustisia pa evitá di hinka nos mes den mas problema. Ademas di esei, e ta duna nos un ehèmpel perfekto, su Yu Hesus, i bon konseho den Beibel pa yuda nos trata ku inhustisia.

PAGA TINU KON BO TA REAKSHONÁ

5. Dikon nos mester paga tinu kon nos ta reakshoná?

⁵ Inhustisia por laga nos sinti hopi malu i frustrá. Esei ta normal. (Ekl. 7:7) Asta sirbidónan fiel, manera Yòb i Habakuk, a sinti asina. (Yòb 6:2, 3; Hab. 1:1-3) Pero loke sí nos tin ku paga tinu kuné ta kon nos ta reakshoná pa no hasi nada deskabeyá.

6. Kiko nos ta siña for di Ábsalòn? (Wak e plachi.)

⁶ Ora un persona trata abo òf un hende ku bo stima malu, kisas bo ke buska un manera pa pone e persona ei paga pa loke el a hasi. Pero esei por hasi kosnan mas pió. Esei ta loke nos por siña for di Ábsalòn, yu di Rei David. Ábsalòn tabatin un ruman ku yama Támar. Pero Ámnòn, nan ruman parti tata, a violá Támar. Ora Ábsalòn a haña sa esei, el a rabia masha pisá. Segun e Lei di Moises, Ámnòn a meresé morto. (Lev. 20:17) Ábsalòn tabatin rason pa rabia pero esei no a dun’é e derecho di resolvé kos na su manera i mata Ámnòn.​—2 Sám. 13:20-23, 28, 29.

7. Kon e salmista a reakshoná riba e inhustisianan ku el a mira?

⁷ Tin biaha por parse ku hende ku ta hasi kos inhustu nunka ta haña kastigu. Debí na esei nos por kuminsá duda si realmente ta bale la pena hasi loke ta korekto. Wak loke a pasa ku un salmista ku a kuminsá ripará ku semper kos tabata bai bon ku hende ku tabata trata otronan malu. E salmista a bisa: “Asina hende malbado ta; nan bida semper ta fásil i sin preokupashon.” (Sal. 73:12) E tabata masha preokupá pa tur e  inhustisia ku e tabata mira i el a pensa ku no tabata bale la pena pa sigui sirbi Yehova. El a bisa: “Mi a purba di komprondé tur e kosnan ei, ma e asuntu a sigui preokupá mi.” (Sal. 73:14, 16) De echo, el a atmití: “Pero, den mi kaso, mi a kasi desviá for di e bon kaminda; mi pianan a hera di slep.” (Sal. 73:2) Algu paresido a pasa ku un ruman ku nos lo yama Alberto.

8. Kon inhustisia a afektá Alberto?

⁸ Algun ruman a gaña riba Alberto i bisa ku el a kue sèn di e kongregashon. Debí na esei, e no por tabata ansiano mas i hopi ruman ku a haña sa di e asuntu a pèrdè rèspèt p’e. Alberto a konta: “Mi tabata masha rabiá i desepshoná.” E tabata asina rabiá ku el a stòp di bai reunion i asta a bira inaktivo pa sinku aña. E eksperensia akí ta mustra kiko por pasa ku nos si nos no kontrolá nos rabia ora nos haña nos ku inhustisia.

PURBA DI HASI MESKOS KU HESUS

9. Ki inhustisia Hesus a pasa aden? (Wak e plachi.)

⁹ Hesus ta e mihó hende ku por siña nos kon pa trata ku inhustisia. Pensa riba kuantu inhustisia el a pasa aden tantu na man di su famia komo di otro hende. Algun di su famianan a bisa ku el  a bira di kabes, e lidernan religioso a bisa ku e ta mete ku demoño i e sòldánan romano a chèrch’é, batié i finalmente mat’é. (Mar. 3:21, 22; 14:55; 15:16-20, 35-37) Pero tòg Hesus a logra soportá tur e inhustisianan ei i asta mas sin tuma vengansa. Ki nos por siña for di Hesus?

10. Kon Hesus a trata ku inhustisia? (1 Pedro 2:21-23)

¹⁰ Lesa 1 Pedro 2:21-23. a Hesus a mustra nos e mihó manera pa dil ku inhustisia. E tabata sa ki ora pa papia i ki ora pa keda ketu. (Mat. 26:62-64) E no a defendé su mes kada biaha ku hende a gaña riba dje. (Mat. 11:19) Anto ora el a defendé su mes, e no a ofendé ni menasá niun hende. Hesus por a kontrolá su mes pasó el “a laga su mes na enkargo di esun ku ta husga ku hustisia.” E tabata sa ku Yehova ta mira e inhustisianan ku e tabata pasa aden. I el a konfia ku Yehova lo drecha tur esei na Su debido tempu.

11. Kua ta algun manera ku nos por kontrolá loke nos ta bisa? (Wak e plachi.)

¹¹ Ora ku un hende trata nos na un manera inhustu, nos por imitá Hesus i kontrolá loke nos ta bisa. Esei ta enserá ku si ta kosnan chikitu nos ta laga nan bai òf morde nos lenga pa evitá di hasi e situashon pió. (Ekl. 3:7; Sant. 1:19, 20) Pero, den algun situashon, nos mester defendé un persona ku ta ser maltratá òf nos mester papia e bèrdat i defendé  nos kreensianan. (Echo. 6:1, 2) Ma si nos disidí di papia, nos mester hasié na un manera kalmu i ku rèspèt.​—1 Ped. 3:15. b

12. Kon nos ta laga nos mes na enkargo di “esun ku ta husga ku hustisia”?

¹² Nos por imitá Hesus ora nos tambe laga nos mes na enkargo di “esun ku ta husga ku hustisia.” Ora hende husga nos robes òf trata nos malu, nos ta konfia ku Yehova sí sa e bèrdat. E konfiansa ei por yuda nos soportá trato inhustu pasó nos sa ku Yehova lo korigí tur asuntu. Ora nos laga kosnan den man di Yehova, nos ta evitá di laga rabia i odio saka rais den nos kurason. E sintimentunan negativo ei por pone nos hasi algu malu, pèrdè nos goso i daña nos amistat ku Yehova.​—Sal. 37:8.

13. Kiko por yuda nos sigui soportá inhustisia?

¹³ Ta klaru ku nunka nos lo logra imitá Hesus perfektamente. Tin biaha, nos por hasi òf bisa algu ku despues ta duel nos. (Sant. 3:2) Anto tin biaha e manera inhustu ku hende a trata nos por laga nos ku sikatris emoshonal i físiko pa restu di nos bida den e mundu malbado akí. Si bo ta víktima di inhustisia, bo por tin sigur ku Yehova sa loke bo ta pasando aden. Anto Hesus sa kon bo ta sinti pasó e mes a pasa den inhustisia. (Heb. 4:15, 16) Pero fuera di e bon ehèmpel di Hesus, Yehova a duna nos bon konseho den Beibel pa yuda nos trata ku inhustisia. Laga nos wak dos versíkulo di e buki Romanonan ku por yuda nos ku esei.

“LAGA LUGÁ PA E RABIA DI DIOS”

14. Kon nos ta “laga lugá pa e rabia di Dios”? (Romanonan 12:19)

¹⁴ Lesa Romanonan 12:19. Apòstel Pablo a konsehá kristiannan pa “laga lugá pa e rabia di Dios.” Nos ta hasi esei ora nos laga Yehova disidí kon i ki ora lo e trese hustisia. Un ruman a trata John na un manera inhustu. John a bisa: “Mi mester a kontrolá mi rabia pa asina evitá di purba di resolvé kosnan na mi manera, pero esei no tabata fásil. Romanonan 12:19 a yuda mi pa warda riba Yehova.”

15. Dikon ta mihó pa nos warda riba Yehova?

¹⁵ Ora nos haña nos ku inhustisia, ta kumbiní nos mashá pa warda riba Yehova. Nos lo spar nos mes strès i frustrashon ku hopi biaha nos ta haña ora nos purba di solushoná kosnan riba nos mes. Yehova ke yuda nos. P’esei e ta bisa nos pa warda riba dje pasobra e mes lo drecha e asuntu. El a primintí ku é lo paga bèk esnan ku a maltratá nos òf trata nos malu. Si nos ta konvensí di esei, nos lo no keda rabiá pasó nos sa ku Yehova lo hasi loke ta hustu. Esei ta loke a yuda John, menshoná na paragraf 14. El a bisa: “Si mi warda riba Yehova, e resultado lo ta hopi mas mihó ku si mi mes purba di resolv’é.”

“SIGUI VENSE MALU KU BON”

16-17. Kon orashon por yuda nos “sigui vense malu ku bon”? (Romanonan 12:21)

¹⁶ Lesa Romanonan 12:21. Pablo a bisa kristiannan tambe pa “sigui vense malu ku bon.” Hesus a bisa den e spich ku el a duna riba seru: “Sigui stima boso enemigunan i hasi orashon pa esnan ku  ta persiguí boso.” (Mat. 5:44) Anto esei ta presis loke e mes a hasi. Kisas nos a para pensa kuantu el a sufri ora e sòldánan romano a klab’é na staka. Nan a trat’é kruel i el a soportá hopi doló. Nos no por ni imaginá kuantu el a sufri.

¹⁷ Hesus no a laga e inhustisia ku el a pasa aden domin’é. Na lugá di pidi Yehova pa kastigá òf kaba ku e sòldánan ei, el a resa: “Tata, pordoná nan, pasobra nan no sa kiko nan ta hasi.” (Luk. 23:34) Ora nos resa pa esnan ku a trata nos malu, esei lo yuda nos pa ta kalmu i sinti ménos rabia i odio.

18. Kon orashon a yuda Alberto i John trata ku inhustisia?

¹⁸ Orashon a yuda Alberto i John trata ku inhustisia. Alberto a bisa: “M’a resa pa e rumannan ku a trata mi inhustu. M’a pidi Yehova vários biaha pa yuda mi stòp di ta rabiá pa loke a pasa.” Nos ta kontentu pa sa ku Alberto ta sirbiendo Yehova fielmente aworakí. John a bisa: “Hopi biaha, m’a pidi Yehova yuda e ruman ku a hùrt mi i yuda mi pordon’é. Yehova a yuda mi pa no keda rabiá ku e ruman i pa stòp di husg’é. I e orashonnan ei tambe a duna mi pas.”

19. Ki nos tin ku hasi tanten nos ta den e mundu akí? (1 Pedro 3:8, 9)

¹⁹ Nos no sa ki inhustisia nos lo haña nos kuné miéntras nos ta biba den e mundu malbado akí. Pero ni maske kiko ku pasa, laga nos nunka stòp di pidi Yehova yudansa. Ademas, nos mester imitá kon Hesus a reakshoná ora nan a trat’é na un manera inhustu i tambe sigui apliká prinsipionan di Beibel. Si nos hasi esei, nos por tin sigur ku Yehova lo bendishoná nos semper.​—Lesa 1 Pedro 3:8, 9.