1. Nos por siña algu for di rumannan di edat? Splika.

 NOS tur mester di yudansa pa tuma desishonnan importante den bida. Nos por haña hopi yudansa for di e ansianonan i nos rumannan di edat. Djis pasó nan tin nan edat no ke men ku nan konseho ta antikuá. Eigenlijk Yehova ke pa nos skucha nan. Nan tin mas tantu aña di eksperensia, konosementu i sabiduria ku nos.​—Yòb 12:12.

2. Kiko nos lo analisá den e artíkulo akí?

² Den Beibel, nos ta lesa ku Yehova a usa su sirbidónan di edat pa animá i guia su pueblo; manera Moises, David i Apòstel Huan. Nan no a biba den e mesun temporada ni tabatin e mesun sirkunstansianan. Pero kada un, promé ku nan a fayesé, a duna bon konseho na hende mas yòn ku nan. Nan tur a resaltá e importansia di obedesé Dios. Yehova a laga skirbi e palabranan ei den Beibel pa nos. P’esei ta bon pa nos tur, sea yòn òf di edat, analisá nan konseho. (Rom. 15:4; 2 Tim. 3:16) Den e artíkulo akí nos ta bai analisá e último palabranan di Moises, David i Apòstel Huan i loke nos por siña di e palabranan ei.

‘BOSO LO KEDA BIBA PA HOPI TEMPU’

3. Menshoná algun di e kosnan ku Moises a hasi den su bida.

³ Moises a traha duru pa Yehova henter su bida. E tabata un profeta, un hues, un komandante i un historiadó. Pues e tabatin hopi eksperensia den bida. El a libra e  israelitanan for di sklabitut na Egipto i a mira hopi di Yehova su milagernan. Yehova a us’é pa skirbi e promé sinku bukinan di Beibel, Salmo 90 i kisas tambe Salmo 91. Anto muy probablemente el a skirbi e buki di Yòb tambe.

4. Ken Moises a animá, i dikon?

⁴ Moises tabatin 120 aña i tabata sa ku no a ked’é muchu tempu mas. P’esei, el a laga yama e israelitanan huntu pa kòrda nan riba e kosnan ku nan a mira i eksperensiá. Algun di nan, tempu nan tabata yòn, a mira e milagernan ku Yehova a hasi i kon el a kastigá Egipto. (Éks. 7:3, 4) Nan a mira kon Yehova a habri Laman Kòrá, nan a kana riba fondo seku dje laman i a mira kon Yehova a destruí henter Fárao su ehérsito. (Éks. 14:29-31) Den desierto, nan a mira kon Yehova a protehá i pèrkurá pa nan. (Deu. 8:3, 4) Awor e israelitanan tabata a punto di drenta e pais ku Yehova a primintí nan. Moises a usa e chèns ei pa animá nan. a

5. E último palabranan di Moises na Deuteronomio 30:19 i 20 a duna e israelitanan ki siguransa?

⁵ Kiko Moises a bisa? (Lesa Deuteronomio 30:19, 20.) E israelitanan tabatin un bunita futuro nan dilanti. Ku Yehova su yudansa, nan por a biba hopi largu den e pais ku Yehova a primintí nan. Anto e pais tabata hopi bunita i e tera tabata fértil. Moises a pint’é asin’akí pa nan: ‘E ta un pais ku tin stat grandi i bunita ku bo no a konstruí. E pais tin kas yen di tur sorto di kos bon ku bo no a traha p’e, rembak ku bo no a koba i kunuku di wendrùif i palu di oleifi ku bo no a planta.’​—Deu. 6:10, 11.

6. Dikon Yehova a laga otro nashon vense Israel?

⁶ Pero Moises a duna e israelitanan un spièrtamentu tambe. Pa nan por a sigui biba den e pais bendishoná ei, nan mester a obedesé Yehova su mandamentunan. Moises a roga nan pa skucha Yehova i keda leal na dje i asina “skohe bida.” Ma nan no a hasi esei, nan a rechasá Yehova. Pues, ku tempu Yehova a laga e asirionan i despues e babilonionan vense nan i hiba nan prezu.​—2 Rei. 17:6-8, 13, 14; 2 Kró. 36:15-17, 20.

7. Ki nos por siña for di loke Moises a bisa? (Wak e plachi.)

⁷ Ki nos ta siña? Obedensia lo hiba na bida eterno. Meskos ku e israelitanan tabata serka serka di drenta e pais ku Yehova a primintí nan, asina nos tambe ta serka serka di drenta e mundu nobo ku Dios a primintí nos. Pronto, mundu lo bira un paradeis atrobe. (Isa. 35:1; Luk. 23:43) Diabel i su demoñonan lo no t’ei mas. (Rev. 20:2, 3) Lo no tin religion falsu pa kita hende for di Dios. (Rev. 17:16) Lo no bai tin gobièrnu humano ku lo bai oprimí su hendenan. (Rev. 19:19, 20) Lo no tin hende rebelde den Paradeis. (Sal. 37:10, 11) Komo ku tur hende lo ta obedesidu na Yehova su leinan, lo tin pas. Tur hende lo stima i konfia otro. (Isa. 11:9) Nos ke pa e dia ei yega pa kaba! Anto si nos sigui obedesé Yehova nos lo no biba pa shen aña so, ma pa eternidat.​—Sal. 37:29; Huan 3:16.

8. Kon e promesa di bida eterno a yuda un misionero? (Hudas 20, 21)

 ⁸ Si nos sigui tene duru na Yehova su promesa di bida eterno esei lo duna nos e forsa pa pega na Yehova sin importá ki prueba nos haña nos kuné. (Lesa Hudas 20, 21.) Ademas, e promesa ei por duna nos forsa pa lucha kontra nos debilidatnan. Por ehèmpel, un ruman ku tabatin hopi aña komo misionero na Afrika a bisa ku vários biaha e tabata lucha kontra e gana di hasi algu ku Yehova no tabata gusta. El a bisa: “M’a bin realisá ku si mi no sigui lucha lo mi pèrdè mi chèns di haña bida eterno. Pues mi tabata mas determiná ku nunka pa sigui lucha i pidi Yehova yuda mi. Ku su yudansa m’a logra vense mi debilidat.”

“LO BO TIN ÉKSITO”

9. Kon David su bida tabata?

⁹ David tabata un bon rei. E tabata un músiko, un poeta, un guerero i un profeta tambe. Pero, su bida no tabata fásil. Pa hopi aña e mester a skonde pa Rei Saul kende tabata purba di mat’é. Anto despues ku el a bira Rei atrobe e mester a skonde. Pero e biaha akí ta su yu Ábsalòn kier a mat’é pasó Ábsalòn mes tabata ke bira rei. Apesar di tur e kosnan difísil ku David a pasa aden i e foutnan ku el a hasi, el a keda leal na Yehova te ora el a muri. Yehova a deskribié komo “un hòmber na mi agrado.” Pues ta bale la pena pa skucha David su konseho!​—Echo. 13:22; 1 Rei. 15:5.

10. Dikon David a duna Sálomon konseho?

¹⁰ Un hende ku David a duna konseho tabata su yu, Sálomon, e siguiente rei di Israel. Yehova a skohe Sálomon pa traha e tèmpel kaminda hende por a bai adorá Yehova. (1 Kró. 22:5) Tabatin hopi trabou enbolbí den esei. Sálomon tabata yòn i tabatin mester di Yehova su yudansa pa guia e nashon. Kiko David lo a konseh’é? Ban wak.

11. Segun 1 Reinan 2:2 i 3, ki konseho David a duna Sálomon, i ki a pasa ora Sálomon a hasi kaso di e konseho? (Wak e plachi.)

¹¹ Kiko David a bisa? (Lesa 1 Reinan 2:2, 3.) David a bisa su yu bon kla ku si e obedesé Yehova lo e tin éksito. Pa hopi aña, Sálomon a hasi kaso i kos a bai bon kuné. (1 Kró. 29:23-25) El a traha un tèmpel bunita, skirbi vários buki di Beibel i bo por haña algun di e kosnan ku el a bisa den otro partinan di Beibel. Ademas, el a bira famoso pa su sabiduria i rikesa. (1 Rei. 4:34) Pero mané David a splika, e éksito ei lo dura tanten ku Sálomon a obedesé Yehova. Lamentablemente,  ora Sálomon a bira di mas edat el a bai sirbi otro diosnan. Yehova no a gusta esei niun tiki, anto el a stòp di duna Sálomon sabiduria pa guia e nashon na un manera amabel i hustu.​—1 Rei. 11:9, 10; 12:4.

12. Ki nos por siña for di loke David a bisa?

¹² Ki nos ta siña? Obedensia lo hiba na éksito. (Sal. 1:1-3) Klaru ku Yehova no a primintí di duna nos ni e rikesa ni e fama ku Sálomon tabatin. Pero si nos obedes’é, lo e duna nos sabiduria pa tuma bon desishon. (Pro. 2:6, 7; Sant. 1:5) Yehova su prinsipionan, esta, su konsehonan, lo yuda nos ora di skohe trabou, edukashon, entretenimentu i uso di sèn. Si nos sigui su konseho, nos lo protehá nos amistat kuné i lo haña bida eterno. (Pro. 2:10, 11) Ademas nos lo tin bon amigu i nos famia lo ta felis.

13. Kon Carmen a haña éksito den bida?

¹³ Carmen, ku ta biba na Mozambique, a pensa ku mas skol bo tin, mas éksito lo bo tin den bida. P’esei, el a bai universidat pa studia arkitektura. El a skirbi: “Mi tabata gusta loke mi tabata siña. Pero mi tabata keda morto kansá i no tabatin tempu pa nada otro. Mi tabata na skol for di 7:30 di mainta te 6:00 di atardi. Tabata duru pa bai reunion i mi amistat ku Yehova a bai atras. M’a bin realisá ku mi no a hasi kaso di Yehova su konseho.” (Mat. 6:24) Carmen a hasi orashon tokante su situashon i a buska informashon den nos publikashonnan. El a bisa: “Despues di haña algun bon konseho for di e ansianonan i mi mama, m’a disidí di legumai universidat i sirbi Yehova fultaim. Mi ta sinti ku m’a tuma e mihó desishon i mi no tin niun tiki duele di esei.”

14. Kiko eigenlijk Moises i David kier a bisa?

¹⁴ Tantu Moises komo David a stima Yehova i a mira e importansia di obedes’é. P’esei nan a animá otro hende pa imitá nan i keda fiel na Yehova. Pero nan tur dos a atvertí ku esnan ku no keda leal na Yehova lo no por keda su amigu ni lo no haña e bendishonnan ku el a primintí. Te awe nan konseho ta bálido pa nos. Siglonan despues, un otro sirbidó  di Yehova a splika kon importante ta pa nos keda fiel na Dios.

“NO TIN NADA KU TA HASI MI MAS KONTENTU”

15. Kiko Apòstel Huan a eksperensiá den su bida?

¹⁵ Huan tabata un bon amigu i apòstel di Hesukristu. (Mat. 10:2; Huan 19:26) El a pasa hopi tempu ta prediká huntu ku Hesus i a mira Hesus su milagernan. El a keda leal na Hesus durante tempunan difísil. El a mira Hesus klabá na staka i a mira Hesus despues di Su resurekshon. El a biba largu sufisiente pa mira tambe kon e kongregashon kristian a krese te ku a “prediká na henter e kreashon bou di shelu.”​—Kol. 1:23.

16. Ken a benefisiá di Huan su kartanan?

¹⁶ Kasi na final di Huan su bida, e tabatin e privilegio di skirbi e buki di Revelashon. (Rev. 1:1) Ademas, el a skirbi tres karta i tambe e Evangelio ku ta karga su nòmber. E di tres karta, kual ta 3 Huan, el a skirbi pa Gayo, kende Huan a stima mané un yu. (3 Huan 1) Pa e tempu ei, lo tabatin hopi ruman ku Huan a mira mané su yu. Loke e ruman fiel di edat ei a skirbi a animá tur Hesus su siguidónan te den nos tempu.

17. Segun 3 Huan 4, kiko ta hasi un hende kontentu?

¹⁷ Kiko Huan a skirbi? (Lesa 3 Huan 4.) Den Huan su di tres karta, el a bisa ku loke a hasié mas kontentu ta di wak su rumannan obedesé Dios. Pa ora ku Huan a skirbi e karta ei, tabatin algun hende ku tabata plama siñansa falsu i krea problema grandi den kongregashon. Pero otro rumannan a sigui “kana den e bèrdat.” Nan a obedesé Yehova i tabata “kana di akuerdo ku su mandamentunan.” (2 Huan 4, 6) E rumannan fiel akí a hasi tantu Huan komo Yehova masha kontentu.​—Pro. 27:11.

18. Ki nos por siña for di loke Huan a bisa?

¹⁸ Ki nos ta siña? Fieldat ta hiba na goso. (1 Huan 5:3) Por ehèmpel, nos ta kontentu pasó nos ta hasi Yehova kontentu. Ora nos no kai pa e tentashonnan ku mundu ta bin kuné i nos obedesé Su mandamentunan, esei ta hasi Yehova kontentu i e angelnan tambe. (Pro. 23:15; Luk. 15:10) Nos tambe ta bira kontentu ora nos mira nos rumannan  keda fiel, foral ora nan haña nan ku prueba i tentashon. (2 Tes. 1:4) Anto ora e mundu malbado akí ser destruí, nos lo ta kontentu ku nos a keda fiel na Yehova.

19. Kiko Ruman Rachel a bisa? (Wak e plachi.)

¹⁹ Nos ta kontentu foral ora nos siña hende tokante Yehova. Pa Rachel, ku ta biba na Repúblika Dominikana, esei ta e onor di mas grandi ku tin. El a yuda vários hende kuminsá sirbi Yehova. Rachel a bisa: “Mi no por splika kon kontentu mi ta sinti ora mi mira un studiante kuminsá stima Yehova i siña konfi’é. Esei ta laga mi sinti ku tur esfuerso òf sakrifisio ku m’a hasi pa siñ’é e bèrdat tabata bale la pena.”

BENEFISIÁ DI NAN ÚLTIMO PALABRANAN

20. Ki nos tin en komun ku Moises, David i Huan?

²⁰ Moises, David i Huan a biba hopi tempu pasá. I nan manera di biba ta masha diferente for di esun di nos. Pero nos tin vários kos en komun. Meskos ku nan, nos ta sirbi e Dios berdadero, resa na dje, konfia den dje i pidié yudansa i guia. Anto meskos ku nan, nos tin fe ku Yehova lo bendishoná esnan ku obedes’é.

21. Kon Yehova lo bendishoná nos si nos sigui e konsehonan di Moises, David i Huan?

²¹ Laga nos hasi kaso di e konsehonan di Moises, David i Huan i obedesé Yehova su mandamentunan. E ora ei nos lo tin berdadero éksito den tur loke nos hasi. Nos lo ‘keda biba pa hopi tempu,’ sí pa semper! (Deu. 30:20) I nos lo ta kontentu di hasi nos Tata Yehova kontentu. E semper lo kumpli ku su promesanan na maneranan ku nunka nos por imaginá.​—Efe. 3:20.