Bo Tabata Sa?
Den pasado, tabata posibel pa un hende sembra mal yerba den kunuku di otro hende?
E kopia akí di Digest di aña 1468 di emperador Justiniano ta un di e hopi registronan ku ta duna detaye relashoná ku asuntunan legal di antigwedat
MATEO 13:24-26 ta sita e siguiente palabranan di Hesus: “E Reino di shelu ta manera un hòmber ku a sembra bon simia den su kunuku. Ma miéntras ku e hendenan tabata drumí, su enemigu a bini, sembra mal yerba meimei di e trigu i bai. Ora e trigu a sprùit i forma tapushi, e mal yerba tambe a aparesé.” Vários eskritor ta puntra nan mes si un kos asina por a sosodé di bèrdat. Sinembargo, tin dokumentonan legal di e romanonan di pasado ku ta mustra ku esei lo por tabata posibel.
Un dikshonario di Beibel ta bisa: “Segun lei romano, sembramentu di mal yerba den un kunuku pa tuma vengansa . . . tabata un krímen. E echo ku tabatin un lei relashoná ku e punto akí ta indiká ku esei tabata sosodé ku frekuensia.” Alastair Kerr, un eksperto riba tereno di asuntunan legal, a splika ku na aña 533 despues di Kristu, e emperador romano Justiniano a publiká su Digest, un resúmen di e lei romano i fragmentonan di hurista di e periodo klásiko di e lei (rònt di aña 100-250 despues di Kristu). Segun e obra akí (Digest, 9.2.27.14), e hurista Ulpiano a referí na un kaso ku Selso, e estadista romano di siglo dos promé ku Kristu, a trata. Un hende a sembra mal yerba den kunuku di un otro hende, i komo resultado di esei, a ruiná su kosecha. Digest ta splika e kaminda legal ku e doño di e kunuku, òf hürdó di e tereno, por a kana pa haña kompensashon pa e daño ku el a sufri.
Tal maldat ku tabata sosodé den e imperio romano di antigwedat ta indiká ku e ilustrashon ku Hesus a duna tabata trata di algu ku por a pasa den bida real.
Den promé siglo, kuantu libertat Roma a duna outoridatnan hudiu na Hudea?
DURANTE e tempu ei, un gobernador romano ku su trupa militar, tabata goberná Hudea. Su responsabilidat prinsipal tabata pa kolektá belasting pa Roma i pa mantené òrdu i pas. Ademas, e romanonan tabata tene tur aktividat ilegal bou di kontrol i tabata kastigá kualke hende ku a kousa disturbio. Aparte di esakinan, por lo general nan tabata laga e outoridatnan lokal atendé ku asuntunan di tur dia.
Un seshon di e Sanedrin hudiu
E Sanedrin tabata e korte supremo hudiu i e konseho munisipal ku tabata supervisá asuntunan di e lei hudiu. Na Hudea tabatin otro kortenan mas abou ku probablemente tabata trata mayoria di kaso sivil i kriminal sin intervenshon di gobernantenan romano. Pero algu ku e kortenan hudiu no por a tuma desishon riba dje tabata ehekushon di kriminal. Esei tabata un derecho ku generalmente e romanonan a reservá pa nan mes. Un eksepshon bon konosí ta ora e miembronan di Sanedrin a husga Esteban i a laga piedr’é mata.—Echo. 6:8-15; 7:54-60.
Pues, e Sanedrin hudiu tabatin hopi outoridat. Sinembargo, segun e historiadó Emil Schürer, “e restrikshon di mas grandi tabata ku outoridatnan romano por a atendé un kaso riba nan mes i independiente na kualke momento, manera nan a hasi ora nan a sospechá ku tabatin un krímen polítiko.” Un ehèmpel di esaki ta ora e komandante militar Klaudio Lisias a arestá apòstel Pablo, un siudadano romano.—Echo. 23:26-30.
Otro Artíkulo Interesante
E TOREN DI VIGILANSIA (EDISHON DI ESTUDIO)
Bo Tabata Sa?—Febrüari 2022
Dikon e israelitanan tabata paga plaka-di-brùit, òf bruidschat?
E TOREN DI VIGILANSIA (EDISHON DI ESTUDIO)
Bo Tabata Sa?—February 2022
Dikon tabata bon ku e israelitanan por a ofresé tantu tòrteldùif komo palomba?
E TOREN DI VIGILANSIA (EDISHON DI ESTUDIO)
Bo Tabata Sa?—Mart 2020
Fuera di Beibel, ki otro prueba tin ku e israelitanan tabata esklabo na Egipto?
E TOREN DI VIGILANSIA (EDISHON DI ESTUDIO)
Bo Tabata Sa?—Novèmber 2019
Kiko tabata trabou di un mayordomo den tempu bíbliko?
E TOREN DI VIGILANSIA (EDISHON DI ESTUDIO)
Bo Tabata Sa?—Aprel 2019
Den pasado, kiko un hende mester a hasi pa biaha riba barku?
