1. Kon nos mester mira fe kristian?

FE KRISTIAN ta un kualidat masha presioso. No ta tur hende tin fe. (2 Tes. 3:2) Sinembargo, Yehova a duna kada un di su sirbidónan un “midí di fe.” (Rom. 12:3; Gal. 5:22) Nos tur ku tin fe mester ta masha gradisidu pa esei!

2, 3. (a) Ki bendishon nos ta haña si nos tin fe? (b) Ki preguntanan nos lo konsiderá den e artíkulo akí?

² Hesukristu a bisa ku su Tata selestial ta hala hende serka dje mediante Su Yu. (Huan 6:44, 65) I ora nos pone fe den Hesus, nos lo por haña pordon pa nos pikánan. Anto esei ta habri kaminda pa nos por disfrutá di un relashon eterno ku Yehova. (Rom. 6:23) Kiko nos a hasi pa meresé un bendishon asina maravioso? Komo pekadó, e úniko kos ku nos meresé ta morto. (Sal. 103:10) Pero, Yehova a mira ku nos tin potensial pa hasi bon. Debí na su bondat inmeresí, el a habri nos kurason pa aseptá e bon notisia. Asina nos a kuminsá  pone fe den Hesus ku e speransa di haña bida eterno.—Lesa 1 Huan 4:9, 10.

³ Pero kiko fe ta enserá? E ta enserá solamente sa kiko ta e bendishonnan ku Dios tin den tapara pa nos? I mas importante ainda, den ki maneranan nos mester demostrá ku nos tin fe?

4. Kiko mas fe ta enserá?

⁴ Fe ta enserá muchu mas ku djis un komprondementu di Dios su propósito. E ta un forsa poderoso ku ta motivá un hende pa biba na armonia ku Dios su boluntat. Fe den e medio ku Dios a perkurá pa salba hende ta motivá nos pa kompartí e bon notisia ku otro hende. Apòstel Pablo a splika: “Si bo ta deklará públikamente e ‘palabra den bo mes boka,’ esta, ku Hesus ta Señor, i den bo kurason bo tin fe ku Dios a lant’é for di morto, lo bo ser salbá. Pasobra den bo kurason bo mester tin fe pa haña un posishon hustu dilanti di Dios, ma ku bo boka bo ta hasi deklarashon públiko di bo fe pa haña salbashon.”—Rom. 10:9, 10; 2 Kor. 4:13.

5. Dikon fe ta asina importante, i kon nos por manten’é fuerte? Ilustrá esaki.

⁵ Pues, pa nos por haña bida eterno den Dios su mundu nobo, nos mester tin fe i mantené e fe akí fuerte. Nos fe ta manera un mata ku tin mester di awa. Na kontraste ku un mata artifisial, un mata bibu ta keda kambia. Ora e haña sufisiente awa, lo e keda salú i sigui krese, ma si nos no duna e mata sufisiente awa, lo e marchitá i asta e por muri. Algu similar por pasa ku nos fe. Si nos no manten’é, lo e debilitá i kaba na nada. (Luk. 22:32; Heb. 3:12) Pero si nos dun’é e kuido nesesario, lo e keda na bida i sigui ‘krese masha hopi,’ i nos lo ta “firme den fe.”—2 Tes. 1:3; Tito 2:2.

6. Den ki dos manera Hebreonan 11:1 ta deskribí fe?

⁶ Na Hebreonan 11:1 (les’é), nos ta haña Beibel su deskripshon di fe. Fe ta enserá dos kos invisibel: (1) “Loke [nos] ta spera ariba.” Esaki por inkluí susesonan den futuro ku Dios a primintí ku lo sosodé pero ku ainda no a tuma lugá, manera e fin di tur maldat i e binidero mundu nobo. (2) “Realidatnan ku [nos] no ta mira.” Den e konteksto akí, e palabra griego tradusí komo “demostrashon kla” ta referí na “evidensia konvinsente” di algu ku ta eksistí pero ku nos no ta mira. Por ehèmpel, nos sa ku Yehova Dios, Hesukristu, e angelnan i e Reino selestial ta eksistí, maske nos no por mira nan. (Heb. 11:3) Kon nos por demostrá ku nos tin un speransa bibu i ku nos ta kere den e kosnan invisibel ku e Palabra di Dios ta papia di dje? Nos por demostrá esei mediante nos palabra- i akshonnan. Sin esakinan, nos fe lo no ta kompleto.

7. Kon e ehèmpel di Noe ta yuda nos komprondé kiko ke men demostrá nos fe? (Wak e promé plachi.)

⁷ Hebreonan 11:7 ta resaltá e fe di Noe, kende “despues ku el a haña spièrtamentu divino tokante kosnan ku hende no a mira ainda, a demostrá temor di Dios i a traha un arka pa salba su hendenan di kas.” Noe a demostrá su fe ora el a traha un arka inmenso. Sin duda, su bisiñanan lo mester a puntr’é dikon e tabata traha algu asina grandi. Akaso Noe a keda ketu òf bisa nan ku ta for di  nan asuntu? Di ningun manera! Su fe a motiv’é pa duna testimonio ku kurashi i spièrta e hendenan tokante e huisio di Dios ku tabata na kaminda. Muy probablemente Noe a bisa e hendenan ei nèt e palabranan ku Yehova a bis’é: “E fin di tur karni a bini mi dilanti, pasobra tera ta yen di violensia pa nan motibu; . . . Ami ta bai trese un diluvio di awa riba tera, pa destruí tur karni, ku tin e rosea di bida, for di bou di shelu; tur loke tin riba tera lo peresé.” Ademas, sin duda Noe lo a splika e hendenan tokante e úniko medio pa haña salbashon ora el a ripití loke Dios a mand’é hasi: “Bai den e arka.” Pues, Noe a sigui demostrá su fe pasobra e tabata “un predikadó di hustisia.”—Gén. 6:13, 17, 18; 2 Ped. 2:5.

8. Kiko Dios a inspirá disipel Santiago pa splika tokante e nifikashon di berdadero fe kristian?

⁸ Probablemente Santiago a skirbi su karta un poko tempu despues ku Dios a inspirá apòstel Pablo pa duna un deskripshon di fe. Meskos ku Pablo, Santiago a splika ku berdadero fe kristian ta enserá mas ku djis kere den algu; nos mester demostrá nos fe ku akshon. Santiago a bisa: “Mustra mi bo fe sin e  obranan, i ami lo mustra bo mi fe pa medio di mi obranan.” (Sant. 2:18) El a sigui mustra e diferensia kla entre djis kere den algu i pone fe den algu. E demoñonan ta kere ku Dios ta eksistí, pero nan no tin berdadero fe. Mas bien, nan ta oponé Dios fuertemente. (Sant. 2:19, 20) Na kontraste, papiando di un otro hòmber di fe di antigwedat, Santiago a puntra: “Akaso Dios no a deklará nos tata Abraham hustu pa medio di obra despues ku el a ofresé su yu Isak riba altar? Bo ta mira ku su fe a traha huntu ku su obranan, i su fe a ser perfekshoná pa medio di su obranan.” Anto pa enfatisá e punto ku nos mester demostrá nos fe pa medio di obra, el a agregá: “Meskos ku kurpa sin spiritu ta morto, asina tambe fe sin obra ta morto.”—Sant. 2:21-23, 26.

9, 10. Kon apòstel Huan a yuda nos komprondé e importansia di pone fe den Hesus?

⁹ Mas ku tres dékada despues ku Santiago a skirbi su karta, apòstel Huan a skirbi su Evangelio i tambe tres karta. El a komprondé e nifikashon profundo ku Dios a inspirá otro eskritornan di Beibel pa splika tokante berdadero fe kristian? Wèl, Huan a usa e verbo griego ku tin biaha ta ser tradusí komo “pone fe” mas ku kualke otro eskritor di Beibel.

¹⁰ Por ehèmpel, Huan a splika: “Esun ku pone fe den e Yu lo haña bida eterno; esun ku desobedesé e Yu lo no haña bida, ma e rabia di Dios ta keda riba dje.” (Huan 3:36) Fe kristian ta enserá tambe ku bo tin ku obedesé Hesus. Hopi biaha Huan a sita Hesus su palabranan ku ta mustra ku pone fe mester ta un proseso kontinuo.—Huan 3:16; 6:29, 40; 11:25, 26; 14:1, 12.

11. Kon nos por mustra ku nos ta gradisidu ku nos a haña e bèrdat?

¹¹ Nos mester ta masha gradisidu ku Yehova a usa su spiritu santu pa revelá e bèrdat na nos i pa yuda nos pone fe den e bon notisia. (Lesa Lukas 10:21.) Nunka nos mester stòp di gradisí Yehova ku el a hala nos serka dje mediante su Yu, “e Representante Prinsipal di nos fe i Esun ku ta hiba esaki na perfekshon.” (Heb. 12:2) Pa nos mustra apresio pa e muestra di bondat inmeresí ei, nos mester sigui fortalesé nos fe mediante orashon i estudio di e Palabra di Dios.—Efe. 6:18; 1 Ped. 2:2.

12. Den ki maneranan nos mester demostrá nos fe?

¹² Nos mester sigui pone fe den Yehova su promesanan. Otro hende mester mira esei klaramente. Por ehèmpel, nos ta sigui prediká tokante e Reino di Dios i partisipá den e trabou di hasi disipel. Ademas, nos ta sigui “hasi loke ta bon pa ku tur hende, pero spesialmente pa ku nos rumannan den fe.” (Gal. 6:⁠10) I nos ta traha duru pa “kita e personalidat bieu ku su práktikanan” i ta tene kuidou ku kualke kos ku por debilitá nos den sentido spiritual.—Kol. 3:5, 8-⁠10.

13. (a) Kon importante “fe den Dios” ta? (b) Ku kiko Beibel ta kompará fe, i dikon esei ta un bon komparashon?

¹³ Beibel ta bisa: “Sin fe ta imposibel pa agradá Dios, pasobra ken ku ta aserk’é mester kere ku e ta eksistí i ku e ta bira Esun ku ta rekompensá esnan ku ta hasi esfuerso pa busk’é.” (Heb. 11:6) E Palabra di Dios ta deskribí “fe den Dios” komo parti di e “fundeshi” ku un hende mester tin pa e por bira i keda un  kristian berdadero. (Heb. 6:1) Ta riba e fundeshi ei, kristiannan mester “agregá na [nan] fe” otro kualidatnan importante “pa asina [nan] por keda den e amor di Dios.”—Lesa 2 Pedro 1:5-7; Hudas 20, 21.

14, 15. Dikon amor ta mas importante ku fe so?

¹⁴ E eskritornan di e Skritura Griego Kristian a enfatisá e importansia di fe refiriendo sientos di biaha na dje. Beibel no ta menshoná ningun otro kualidat kristian asina tantu biaha. Akaso esaki ta nifiká ku fe ta e kualidat kristian di mas importante?

¹⁵ Pablo a kompará fe ku amor ora el a skirbi: “Si mi tin asina tantu fe ku mi por kita seru for di nan lugá, pero mi no tin amor, mi no ta nada.” (1 Kor. 13:2) Hesus a mustra bon kla kon importante amor pa Dios ta ora el a kontestá e pregunta: “Kua ta e mandamentu di mas grandi di Lei?” (Mat. 22:35-40) Amor ta enserá hopi kualidat kristian importante, inkluso fe. Beibel ta bisa ku ‘amor ta kere tur kos.’ Pues amor ta yuda nos pone fe den tur loke Dios a bisa den su Palabra.—1 Kor. 13:4, 7.

16, 17. (a) Kon Beibel ta enfatisá fe i amor huntu? (b) Kua di e kualidatnan ei ta esun di mas importante, i dikon?

¹⁶ Komo ku fe i amor ta hopi importante, e eskritornan di e Skritura Griego Kristian vários biaha a enfatisá e kualidatnan akí huntu, hopi biaha den e mesun frase. Pablo a urgi su rumannan pa nan “bisti fe i amor manera un harnas di pechu.” (1 Tes. 5:8) Pedro a skirbi: “Aunke boso no a mira [Hesus] nunka, boso ta stim’é. Aunke boso no ta mir’é aworakí, tòg boso tin fe den dje.” (1 Ped. 1:8) Santiago a puntra su rumannan ungí: “Akaso Dios no a skohe esnan ku ta pober for di e punto di bista di mundu pa nan ta riku den fe i heredero di e Reino ku el a primintí esnan ku ta stim’é?” (Sant. 2:5) Huan a skirbi: “Esaki ta [Dios] su mandamentu: tene fe den e nòmber di su Yu Hesukristu i stima otro.”—1 Huan 3:23.

¹⁷ Maske fe ta esensial, den futuro nos lo no tin nodi di pone fe mas den Dios su promesanan tokante su mundu nobo pasobra nan lo kumpli i nos lo eksperensiá e realidat di e mundu nobo. Pero semper nos lo tin ku sigui stima Dios i nos próhimo. Pues Pablo por a bisa: “Awor lo keda fe, speransa, amor, e tresnan akí; ma esun di mas grandi ta amor.”—1 Kor. 13:13.

18, 19. Ki demostrashon kla di fe nos ta mira awe, i ken mester haña e mérito pa esaki?

¹⁸ Awe, e pueblo di Yehova ta pone fe den e Reino di Dios. Esaki a resultá den un paradeis spiritual mundial ku tin mas ku ocho mion ruman. Nan ta laga e fruta di e spiritu di Dios reina den nan bida. (Gal. 5:22, 23) Esaki ta un demostrashon kla di berdadero fe i amor kristian.

¹⁹ Niun hende no por haña mérito pa esaki, sino Dios so. E trabou maravioso akí ta “trese gloria pa Yehova, i lo e ta un señal eterno, ku nunka lo stòp di eksistí.” (Isa. 55:13, NW) Sin duda, ta “un regalo di Dios” ku nos ta “ser salbá mediante fe.” (Efe. 2:8) Nos paradeis spiritual lo sigui krese i ‘bona’ te ora henter e tera ta yená ku hende perfekto, hustu i felis pa e alabansa eterno di Yehova su nòmber. Laga nos ta determiná pa sigui pone fe den e promesanan di Yehova.