1. Dikon tin asina tantu hende konfundí?

TIN míles di religion ku ta bisa ku nan ta kristian i ku nan manera di adorá Dios ta esun korekto. Ta di komprondé anto ku tin asina tantu hende konfundí ku ta puntra nan mes: “Ta ún religion berdadero so tin, òf tur ta bon pa Dios?” Pero awor, kiko di abo? Bo ta kompletamente konvensí ku loke bo ta siña ta e bèrdat i ku e manera ku Testigunan di Yehova ta adorá Dios ta esun korekto? Ta posibel ku bo por ta dje sigur ei? Ban wak e pruebanan.

2. Dikon Apòstel Pablo tabata konvensí ku loke e tabata kere aden tabata e bèrdat? (1 Tesalonisensenan 1:5)

² Apòstel Pablo tabata kompletamente konvensí ku loke el a kere aden tabata e bèrdat. (Lesa 1 Tesalonisensenan 1:5.) No ta su sintimentunan a konvensé di esei. Nò, Pablo tabata un bon studiante di Dios su Palabra. E tabata konvensí ku “henter e Skritura ta inspirá di Dios.” (2 Tim. 3:16) Kiko el a siña for di su estudio? Den e Skrituranan, Pablo a haña prueba konvinsente ku Hesus tabata e Mesías primintí. Lidernan religioso hudiu a skohe pa ignorá e pruebanan ei. Nan tabata bisa ku nan tabata siña hende e bèrdat tokante Dios, pero na nan echonan tabata bisto ku nan tabata hipókrita. (Tito 1:16) Kontrali na nan, Pablo no a skohe kua parti di e Skrituranan e tabata bai kere aden i kua nò. E tabata kla pa siña i apliká tur kos tokante e propósito di Dios, esta, Su boluntat.—Echo. 20:27.

3. Bo mester haña kontesta pa delaster un pregunta pa bo por ta konvensí ku bo tin e bèrdat? (Wak tambe e kuadro “ Yehova Su Maravianan Ta ‘Muchu Hopi pa Konta.’”)

³ Tin hende ta sinti ku e religion berdadero mester tin  kontesta pa delaster un pregunta, asta si Beibel no tin kontesta spesífiko pa nan. Pero, bo ta kere ta realístiko pa ferwagt esei? Wèl, ta bèrdat ku Pablo a bisa su rumannan pa “hasi sigur di tur kos.” Pero, na mes momento el a atmití ku tabatin basta kos ku e mes no a komprondé. (1 Tes. 5:21) El a bisa: “Nos tin konosementu parsial.” Anto despues el a agregá: “Nos ta mira un forma vago komo si fuera ta den un spil di metal nos ta wak.” (1 Kor. 13:9, 12) Pablo no a komprondé tur kos i nos tampoko. Pero, loke sí el a komprondé bon tabata e kosnan básiko tokante Yehova. E tabata sa sufisiente pa por a konvensé su mes ku e tabatin e bèrdat.

4. Kon nos por ta mas konvensí ku nos tin e bèrdat, anto kiko nos ta bai siña tokante berdadero kristiannan?

⁴ Un manera ku nos por ta mas konvensí ku nos tin e bèrdat ta di kompará e manera ku Hesus a mustra ku mester adorá Dios ku e manera ku Testigunan di Yehova ta adorá Dios awe. Den e artíkulo akí, nos lo mira ku berdadero kristiannan lo (1) rechasá idolatria, (2) respetá Yehova su nòmber, (3) stima e bèrdat i (4) stima otro di kurason.

5. Kon Hesus a mustra e manera korekto pa adorá Dios, i kon nos tambe por hasi esei?

⁵ Hesus ta stima Yehova masha hopi mes. I tantu ora e tabata den shelu komo ora e tabata riba tera, Yehova tabata e úniko ku e tabata adorá. (Luk. 4:8) El a siña su disipelnan pa hasi meskos. Ni Hesus, ni su disipelnan no a usa imágen pa adorá Yehova. Debí ku Dios ta un Spiritu, niun hende hamas por traha algu ku por pars’é. (Isa. 46:5) Kiko awor di hasi  orashon na e imágennan di e asina yamá “santunan”? Wèl, e di dos di e Dies Mandamentunan ta bisa: “No traha ningun imágen grabá pa bo mes, ni nada semehante na loke tin ariba den shelu, ni abou riba tera . . . No adorá nan.” (Éks. 20:4, 5) Pa un hende ku ke ègt adorá Dios, e palabranan ei no ta laga niun duda kiko nan tin ku hasi.

6. Ken su ehèmpel Testigunan di Yehova ta sigui?

⁶ Diferente historiadó a rekonosé ku den e tempu di e apòstelnan, e kristiannan tabata adorá Dios so. Por ehèmpel, un buki di historia a bisa ku e kristiannan ei “lo no a soportá e idea di tin imágen den nan lugánan di adorá.” Awe, Testigunan di Yehova ta hasi meskos ku e kristiannan di promé siglo ei. Nos no ta hasi orashon na imágen di e “santunan” ni e angelnan, ni nos no ta hasi orashon na Hesus. Anto nos lo no kanta himno ni hasi nada ku lo ta un forma di adorashon pa nos pais. Ni maske kiko pasa, nos ta determiná pa obedesé loke Hesus a bisa: “Ta Yehova bo Dios bo tin ku adorá.”—Mat. 4:10.

7. Kiko ta hasi Testigunan di Yehova hopi diferente for di e otro religionnan?

⁷ Awe hopi hende ta enkantá ku lidernan popular di iglesia. Nan ta atmirá e lidernan akí asina tantu ku kasi nan ta bira nan dios. Hendenan ta basha bai nan iglesianan, ta kumpra nan bukinan, ta kla pa duna plaka pa kiko ku e lidernan promové. Algun ta bai tras di delaster un kos ku e lidernan ei bisa. Nan ta atmirá nan lidernan asina hopi ku kasi bo por bisa ku si Hesus mes a aparesé nan dilanti, Hesus lo no a impreshoná nan. Kontrali na esei, berdadero adoradónan di Yehova no ta sigui hende. Bèrdat, nos ta respetá e rumannan ku ta dirigí, pero nos ta kòrda tambe loke Hesus a bisa: “Boso tur ta ruman.” (Mat. 23:8-10) Nos no ta adorá hende, sea ku nan ta lidernan religioso òf lidernan polítiko. Ni tampoko nos no ta duna nan nos sosten pa nan metanan religioso ni polítiko. En bes di esei, nos ta keda neutral i separá for di e mundu. Di e maneranan ei, nos ta mustra ku nos ta diferente for di e otro religionnan ku ta bisa ku nan ta kristian.—Huan 18:36.

8. Kon nos sa ku Yehova ke pa su nòmber ser glorifiká i pa tur hende sa su nòmber?

⁸ Tabatin un biaha ku Hesus a hasi orashon i a bisa: “Tata, glorifiká bo nòmber.” I ku un stèm duru for di shelu, Yehova mes a kontestá e orashon ei, anto el a primintí ku lo e glorifiká su nòmber. (Huan 12:28) Ora Hesus tabata prediká, tur ora bai el a glorifiká su Tata su nòmber. (Huan 17:26) Pues, nos por ferwagt ku un berdadero kristian lo haña ku ta un privilegio pa usa Dios su nòmber i pa yuda otro hende konosé e nòmber ei.

9. Kon e kristiannan di promé siglo a proba ku nan tabata respetá Dios su nòmber?

⁹ Un poko despues ku e kongregashon kristian a ser formá, Yehova a “dirigí su atenshon na e nashonnan pa saka for di nan un pueblo pa karga su nòmber.” (Echo. 15:14) E kristiannan di e promé siglo ei tabata orguyoso di por a usa Dios su nòmber i pa yuda otro hende konos’é. Nan a usa Dios su nòmber ora ku nan tabata prediká i ora nan tabata skirbi e bukinan di Beibel. * Di e maneranan ei, nan a proba di ta un pueblo ku ta karga Dios su nòmber.—Echo. 2:14, 21.

10. Ki evidensianan tin ku Testigunan di Yehova ta e únikonan ku ta hasi Yehova su nòmber konosí?

 ¹⁰ Kua pueblo awe ta karga e nòmber di Yehova? Ban wak e evidensianan. Awe hopi lider religioso a hasi tur loke nan tabata por pa skonde e echo ku Dios tin un nòmber. Nan a kita e nòmber ei for di nan tradukshonnan di Beibel i asta den algun kaso nan a prohibí uso di e nòmber ei den misa. * Ta bisto anto, ku Testigunan di Yehova ta e únikonan ku ta duna Dios su nòmber e debido rèspèt i onor ku e meresé. Mas ku tur otro religion, nos ta hasi tur nos esfuerso pa yuda hende konosé Dios su nòmber. Nos ta hasiendo nos bèst pa biba konforme nos nòmber: Testigunan di Yehova. (Isa. 43:10-12) Nos a imprimí mas ku 240 mion Beibel di e Tradukshon di Mundu Nobo di e Santu Skrituranan. E tradukshon ei ta pone Yehova su nòmber bèk na e lugánan ku otro traduktornan di Beibel a sak’é afó. Anto nos ta produsí publikashonnan basá riba Beibel ku ta promové Yehova su nòmber den mas ku mil idioma!

11. Kon e kristiannan di promé siglo a mustra ku nan tabata stima e bèrdat?

¹¹ Hesus a stima e bèrdat, esta, e bèrdat tokante Dios i Su propósito. Hesus a hiba su bida di akuerdo ku e bèrdat, i el a yuda  otro hende konosé e bèrdat ei. (Huan 18:37) Hesus su berdadero siguidónan tambe a stima e bèrdat. (Huan 4:23, 24) De echo, apòstel Pedro a yama kristianismo “e kaminda di e bèrdat.” (2 Ped. 2:2) E kristiannan di promé siglo tabata stima e bèrdat asina tantu ku nan tabata rechasá ideanan religioso, tradishon ku ta bini di kultura i opinion di hende ku no tabata kuadra ku e bèrdat. (Kol. 2:8) Awe tambe, kristiannan berdadero ta hasi tur nan esfuerso pa “sigui kana den e bèrdat.” E manera ku nan ta hasi esei ta di hasi sigur ku tur loke nan ta kere aden i nan manera di biba ta kuadra ku Beibel.—3 Huan 3, 4.

12. Kiko Kuerpo Gobernante ta hasi ora ku nan ripará ku mester ahustá nos komprondementu, i dikon nan ta hasi esei?

¹² Testigunan di Yehova nunka a pretendé ku semper nan a komprondé tur kos ku tin den Beibel. Tabatin biaha ku nan a hasi fout den e manera ku nan tabata splika algun kos den Beibel i e manera ku nan a organisá e kongregashon. Esei no mester sorprendé nos pasobra asta Beibel a bisa ku konosementu eksakto lo oumentá ku tempu. (Kol. 1:9, 10) Yehova ta revelá e bèrdat pokopoko. I p’esei nos mester warda ku pasenshi pa e lus di e bèrdat bria mas i mas. (Pro. 4:18) Ora Kuerpo Gobernante mira ku mester kambia un komprondementu, nan no ta tarda pa hasi esei. Segun ku hopi religion den kristiandat ta hasi kambio pa sea komplasé nan miembronan òf pa gana fabor di mundu, Testigunan di Yehova ta hasi kambio pa hala nos mas serka di Dios i pa ador’é na e manera ku Hesus a hasi. (Sant. 4:4) Pues, ora nos hasi kambionan, nan no ta basá riba loke ta na moda òf loke ta popular, pero riba e echo ku a haña un mihó komprondementu di loke Beibel ta bisa. Nos stima e bèrdat!—1 Tes. 2:3, 4.

13. Kua ta e kualidat di mas importante ku un berdadero kristian mester mustra i kon Testigunan di Yehova awe ta demostr’é?

¹³ Di tur e bon kualidatnan ku e kristiannan di promé siglo tabatin, esun di mas importante tabata amor. Hesus a bisa: “Na esaki tur hende lo sa ku boso ta mi disipelnan, esta, si boso ta stima otro.” (Huan 13:34, 35) Awe Testigunan di Yehova ta disfrutá di berdadero amor i union. Testigunan di Yehova ta diferente for di tur otro religion. Aunke ku nos ta bini di diferente pais i kultura, nos ta un famia. I nos ta mira e amor ei bon kla na nos reunion-, asamblea i kongresonan. Ora nos mira tur e kosnan ei, e ta fortalesé nos konvikshon ku e manera ku nos ta adorá Yehova ta esun ku e ta aprobá.

14. Segun Kolosensenan 3:12-14, kon nos por stima otro di kurason?

¹⁴ Beibel ta bisa ku nos tin ku “stima otro intensamente,” sí, di henter nos kurason. (1 Ped. 4:8) Un manera ku nos ta demostrá e amor ei, ta di pordoná otro i keda soportá e imperfekshonnan di otro. Tambe nos ta buska oportunidat pa ta generoso i pa demostrá hospitalidat na tur hende den kongregashon, asta esnan ku a hùrt nos. (Lesa Kolosensenan 3:12-14.) Ora nos ta stima di e manera ei, nos ta demostrando ku nos ta berdadero kristiannan.

15. Den ki otro manera mas nos ta imitá e kristiannan di promé siglo?

¹⁵ Tin otro kosnan tambe ku e kristiannan di promé siglo tabata hasi ku nos ta  imitá. Por ehèmpel, e manera kon nos organisashon ta hinká den otro—ku ta inkluí superintendente di sirkuito, ansiano i sirbidó ministerial—ta sigui e mesun areglo ku e apòstelnan di promé siglo a pone. (Flp. 1:1; Tito 1:5) I meskos ku nan, nos tin e mesun punto di bista tokante di sèks, matrimonio, uso di sanger i e deseo pa protehá e kongregashon for di esnan ku ta peka i no ke arepentí.—Echo. 15:28, 29; 1 Kor. 5:11-13; 6:9, 10; Heb. 13:4.

16. Kiko bo ta siña for di Efesionan 4:4-6?

¹⁶ Hesus a bisa ku hopi hende lo bisa ku nan ta su disipel, pero ku no ta nan tur lo ta su berdadero disipelnan. (Mat. 7:21-23) Anto Beibel ta bisa tambe ku den e último dianan hopi hende lo tin djis “aparensia di ta deboto na Dios.” (2 Tim. 3:1, 5) Pero, Beibel ta bisa bon kla ku tin solamente “ún fe,” esta, solamente un religion, ku tin Dios su aprobashon.—Lesa Efesionan 4:4-6.

17. Ken ta adorando Dios na e manera ku Hesus a mustra i ta e úniko religion berdadero?

¹⁷ Nos a wak e pruebanan. Nos a analisá e manera ku Hesus a mustra ku mester adorá Dios, i kon e kristiannan di promé siglo a hasi meskos. Pues, ken awe ta e religion berdadero? Tin solamente ún kontesta: Testigunan di Yehova. Ta un gran privilegio di ta un di Yehova su sirbidónan i di sa e bèrdat tokante di Yehova i di su propósito. Bo tin e bèrdat, pues sigui hasi tur bo esfuerso pa tene duru na bo konvikshon.