Mas nan tabata prediká, mas nan tabatin mester di literatura. Bètel na Brooklyn tabata imprimí e revistanan, pero pa e bukinan te ainda nan tabata usa kompania komersial. Ora ku pa lunanan largu no tabatin sufisiente buki pa usa den e trabou di prediká, Ruman Rutherford a puntra Robert Martin, e ruman ku tabata enkargá ku imprenta, si e ta kere ku nan mes por imprimí e bukinan.

Ruman Martin a konta: “E idea ei tabata tremendo pasobra esei lo a nifiká ku mester a habri un otro imprenta pa produsí buki.” E rumannan a hür un lugá na Concord Street 18, Brooklyn, i a buska tur e ekiponan ku tabatin mester.

Pero, no ta tur hende a gusta e idea ei. Presidente di un di e kompanianan ku tabata imprimí buki pa nos a bin bishitá e imprenta nobo. El a bisa: “Wak tur e ekiponan bunita akí i boso no tin niun hende ku sa kon pa usa nan. Aki seis luna niun di e kosnan akí no ta sirbi mas.”

Ruman Martin a bisa: “Esei a zona basta lógiko, pero nos tabatin sigur ku Yehova lo yuda nos, loke semper el a hasi.” Anto Ruman Martin tabatin rason. Un poko tempu despues, e imprenta nobo tabata produsí 2.000 buki pa dia.

Aparte di imprimí algun di nan mes bukinan, e sirbidónan di Yehova a kuminsá usa un método nobo pa prediká e bon notisia: radio. Djadumingu atardi, 26 di febrüari 1922, Ruman Rutherford a papia na radio pa promé biaha. Na e emisora KOG na Los Angeles, California, el a duna e diskurso “Miónes di Hende na Bida Awor Lo No Muri Nunka.”

 Mas o ménos 25.000 hende a skucha e diskurso. Algun di nan asta a manda karta pa yama Ruman Rutherford danki. Un di e kartanan tabata di Willard Ashford ku tabata biba na Santa Ana, California. El a gradisí Ruman Rutherford pasobra e diskurso tabata “agradabel i interesante.” El a agregá: “Tabatin tres hende malu na kas. Pues, nos lo no por a sali bin skucha bo diskurso ni maske si bo a dun’é serka banda di nos kas.”

Den e siguiente simannan, a sigui transmití mas diskurso via radio. Pa fin di aña 1922, E Toren di Vigilansia a bisa ku “por lo ménos 300.000 hende a skucha e mensahe via radio.”

Debí na e bon reakshon, Studiantenan di Beibel a disidí di traha un emisora di radio riba un pida tereno na Staten Island, ku no tabata muchu leu for di Bètel na Brooklyn. Den e añanan ku a sigui, nan a usa e emisora ei, WBBR, pa plama e mensahe di e Reino na hopi hende na diferente área.

E Toren di Vigilansia di 15 di yüni 1922, a anunsiá ku lo bai tene un asamblea na Cedar Point, Ohio, di 5 pa 13 di sèptèmber 1922. Studiantenan di Beibel tabata masha entusiasmá segun ku nan tabata yega Cedar Point.

Durante Ruman Rutherford su promé diskurso, el a bisa e presentenan: “Mi tin sigur ku Señor lo . . . bendishoná e asamblea akí i sòru pa duna un testimonio manera nunka promé.” Bes tras bes e diskursantenan tabata animá e rumannan pa prediká.

Riba djabièrnè 8 di sèptèmber tabatin mas o ménos 8.000 hende ku a yena e sala i tabata ansioso pa skucha e diskurso di Ruman Rutherford. Nan a spera ku lo el a splika kiko e lèternan “ADV” riba nan invitashon tabata nifiká. Segun ku nan tabata buska lugá di sinta, sin duda algun di nan lo a ripará ku tabatin un spandoek grandi lorá kologá riba e plataforma. Arthur Claus, ku a biaha for di Tulsa, Oklahoma, a buska un  lugá di sinta kaminda e por a skucha bon. I esei no tabata nada fásil pasobra na e asamblea ei nan no usa sistema di zonido.

Pa evitá ku hende por a stroba Ruman Rutherford su diskurso, e presidente di e asamblea a anunsiá ku lo no permití niun hende ku yega lat drenta e sala durante e diskurso. Pa 9:30 di mainta Ruman Rutherford a kuminsá su diskurso sitando loke Hesus a bisa na Mateo 4:17: “E Reino di shelu a yega serka.” Ora e tabata splika kon hende lo tende tokante e Reino akí, el a bisa: “Hesus mes a bisa ku durante su presensia lo tuma lugá un kosecha, den kua lo e reuní su sirbidónan berdadero i leal.”

Ruman Claus, kende tabata sintá den e sala prinsipal, a konta: “Nos no kier a pèrdè ni un pida di e diskurso.” Pero, diripiente Ruman Claus a kuminsá sintié malu i a hañ’é ta sali for di e sala. El a sali tòg aunke e no kier a hasi esei, pasó e tabata sa ku nan lo no a lag’é drenta bèk.

Un par di minüt despues, el a kuminsá sinti su kurpa mihó. El a konta ku nèt ora el a kuminsá kana bai direkshon di e sala, el a tende un aplouso masha duru mes. E no por a dominá su mes; el a disidí ku lo e skucha sobrá di e diskurso asta si ta dak e tin ku subi pa hasi esei. Ruman Claus, kende tabatin 23 aña e tempu ei, a logra haña un manera pa subi dak. E bentananan ku tabata te ariba bou di e dak tabata habrí. El a bisa ku segun ku e tabata yega mas serka, el a ripará ku e por a skucha e diskurso mas mihó.

Pero, no ta Arthur so tabata ei riba. Algun di su amigunan tambe tabata riba dak. Un di nan, Frank Johnson, a kore bin serka dje i puntr’é: “Bo tin un sambèchi skèrpi?”

Arthur a bisa: “Sí, mi tin!”

Frank a bis’é: “Bo ta e kontesta di nos orashonnan. Bo ta mira e spandoek lorá  aki? E ta mará na e klabunan ei. Ora bo tende e Hues a bisa: ‘Anto boso tin ku anunsiá, anunsiá,’ kòrta e kuater kabuyanan akí.”

Arthur, ku sambèchi den man, a warda riba e señal. No a tarda muchu ku Ruman Rutherford a yega na e parti di mas importante di su diskurso. Yen di ánimo i ku un stèm fuerte el a bisa: “Wak pa boso ta testigu fiel i berdadero pa Señor. Sigui den e lucha te ora ku tur rastro di Babilonia ser eliminá. Proklamá e mensahe tur kaminda. Mundu tin ku sa ku Yehova ta Dios i ku Hesukristu ta Rei di reinan i Señor di señornan. Esaki ta e dia di mas importante. Tende! E Rei ta reina! Boso ta su agentenan di publisidat. P’esei, anunsiá, anunsiá, anunsiá e Rei i su Reino!”

Arthur a konta kon e huntu ku e otro rumannan a kòrta e kabuyanan i e spandoek a lora habri sin niun problema. Riba e spandoek tabatin: “Anunsiá e Rei i e Reino.” “ADV” ta e promé lèternan di e palabra ingles advertise, ku na papiamentu ta “anunsiá.”

E asamblea ei na Cedar Point a yuda e rumannan enfoká riba e trabou di mas importante, esta, esun di prediká e Reino. Tur esnan ku tabata dispuesto tabata felis di por partisipá. Un kòlportùr (awe konosí komo pionero) di Oklahoma, a bisa: “Den nos teritorio tabatin mina di karbon i tabatin hopi hende pober einan.” El a bisa ku hopi biaha ora e hendenan tabata lesa e mensahe ku tabatin den E Époka di Oro, “nan tabata kuminsá yora.” El a bisa: “Nos ta masha kontentu ku nos por konsolá nan.”

E Studiantenan di Beibel akí tabata sa kon importante Hesus su palabranan na Lukas 10:2 ta: “E kosecha en bèrdat ta grandi, ma trahadó ta poko.” Pa fin di e aña ei, nan tabata mas determiná ainda pa anunsiá e mensahe di e Reino rònt mundu.